၁၇. သတ္တရသမဝဂ္ဂေါ

(၁၆၉) ၄. ဣန္ဒြိယဗဒ္ဓကထာ

၇၈၆. ဣန္ဒြိယဗဒ္ဓညေဝ ဒုက္ခန္တိ? အာမန္တာ. ဣန္ဒြိယဗဒ္ဓညေဝ အနိစ္စံ သင်္ခတံ ပဋိစ္စသမုပ္ပန္နံ ခယဓမ္မံ ဝယဓမ္မံ ဝိရာဂဓမ္မံ နိရောဓဓမ္မံ ဝိပရိဏာမဓမ္မန္တိ? န ဟေဝံ ဝတ္တဗ္ဗေ။ပေ။ နနု အနိန္ဒြိယဗဒ္ဓံ အနိစ္စံ သင်္ခတံ ပဋိစ္စသမုပ္ပန္နံ ခယဓမ္မံ ဝယဓမ္မံ ဝိရာဂဓမ္မံ နိရောဓဓမ္မံ ဝိပရိဏာမဓမ္မန္တိ? အာမန္တာ. ဟဉ္စိ အနိန္ဒြိယဗဒ္ဓံ အနိစ္စံ သင်္ခတံ ပဋိစ္စသမုပ္ပန္နံ ခယဓမ္မံ ဝယဓမ္မံ ဝိရာဂဓမ္မံ နိရောဓဓမ္မံ ဝိပရိဏာမဓမ္မံ၊ နော စ ဝတ ရေ ဝတ္တဗ္ဗေ – ‘‘ဣန္ဒြိယဗဒ္ဓညေဝ ဒုက္ခ’’န္တိ.

အနိန္ဒြိယဗဒ္ဓံ အနိစ္စံ သင်္ခတံ ပဋိစ္စသမုပ္ပန္နံ။ပေ။ ဝိပရိဏာမဓမ္မံ၊ တဉ္စ န ဒုက္ခန္တိ? အာမန္တာ. ဣန္ဒြိယဗဒ္ဓံ အနိစ္စံ သင်္ခတံ။ပေ။ ဝိပရိဏာမဓမ္မံ၊ တဉ္စ န ဒုက္ခန္တိ? န ဟေဝံ ဝတ္တဗ္ဗေ။ပေ။.

ဣန္ဒြိယဗဒ္ဓံ အနိစ္စံ သင်္ခတံ။ပေ။ ဝိပရိဏာမဓမ္မံ၊ တဉ္စ ဒုက္ခန္တိ [ဣဒံ-ပုစ္ဆာဒွယေန ပုရိမပုစ္ဆာဒွယဿ ပုရတော ဘဝိတဗ္ဗံ]? အာမန္တာ. အနိန္ဒြိယဗဒ္ဓံ အနိစ္စံ သင်္ခတံ။ပေ။ ဝိပရိဏာမဓမ္မံ၊ တဉ္စ ဒုက္ခန္တိ [ဣဒံ-ပုစ္ဆာဒွယေန ပုရိမပုစ္ဆာဒွယဿ ပုရတော ဘဝိတဗ္ဗံ]? န ဟေဝံ ဝတ္တဗ္ဗေ။ပေ။.

၇၈၇. ဣန္ဒြိယဗဒ္ဓညေဝ ဒုက္ခန္တိ? အာမန္တာ. နနု ယဒနိစ္စံ တံ ဒုက္ခံ [သံ. နိ. ၃.၁၅] ဝုတ္တံ ဘဂဝတာ – ‘‘အနိန္ဒြိယဗဒ္ဓံ အနိစ္စ’’န္တိ? အာမန္တာ. ဟဉ္စိ ယဒနိစ္စံ တံ ဒုက္ခံ [သံ. နိ. ၃.၁၅] ဝုတ္တံ ဘဂဝတာ – အနိန္ဒြိယဗဒ္ဓံ အနိစ္စံ၊ နော စ ဝတ ရေ ဝတ္တဗ္ဗေ – ‘‘ဣန္ဒြိယဗဒ္ဓညေဝ ဒုက္ခ’’န္တိ.

၇၈၈. န ဝတ္တဗ္ဗံ – ‘‘ဣန္ဒြိယဗဒ္ဓညေဝ ဒုက္ခ’’န္တိ? အာမန္တာ. ယထာ ဣန္ဒြိယဗဒ္ဓဿ ဒုက္ခဿ ပရိညာယ ဘဂဝတိ ဗြဟ္မစရိယံ ဝုဿတိ၊ ဧဝမေဝံ အနိန္ဒြိယဗဒ္ဓဿ ဒုက္ခဿ ပရိညာယ ဘဂဝတိ ဗြဟ္မစရိယံ ဝုဿတီတိ? န ဟေဝံ ဝတ္တဗ္ဗေ။ပေ။ ယထာ ဣန္ဒြိယဗဒ္ဓံ ဒုက္ခံ ပရိညာတံ န ပုန ဥပ္ပဇ္ဇတိ၊ ဧဝမေဝံ အနိန္ဒြိယဗဒ္ဓံ ဒုက္ခံ ပရိညာတံ န ပုန ဥပ္ပဇ္ဇတီတိ? န ဟေဝံ ဝတ္တဗ္ဗေ. တေန ဟိ ဣန္ဒြိယဗဒ္ဓညေဝ ဒုက္ခန္တိ.

ဣန္ဒြိယဗဒ္ဓကထာ နိဋ္ဌိတာ.