(၁၆၃) ၈. ရူပံ ဝိပါကောတိကထာ

၇၆၅. ရူပံ ဝိပါကောတိ? အာမန္တာ. ရူပံ သုခဝေဒနိယံ ဒုက္ခဝေဒနိယံ အဒုက္ခမသုခဝေဒနိယံ၊ သုခါယ ဝေဒနာယ သမ္ပယုတ္တံ၊ ဒုက္ခာယ ဝေဒနာယ သမ္ပယုတ္တံ၊ အဒုက္ခမသုခါယ ဝေဒနာယ သမ္ပယုတ္တံ၊ ဖဿေန သမ္ပယုတ္တံ။ပေ။ စိတ္တေန သမ္ပယုတ္တံ၊ သာရမ္မဏံ၊ အတ္ထိ တဿ အာဝဋ္ဋနာ။ပေ။ ပဏိဓီတိ? န ဟေဝံ ဝတ္တဗ္ဗေ။ပေ။ နနု န သုခဝေဒနိယံ န ဒုက္ခဝေဒနိယံ။ပေ။ အနာရမ္မဏံ၊ နတ္ထိ တဿ အာဝဋ္ဋနာ။ပေ။ ပဏိဓီတိ? အာမန္တာ. ဟဉ္စိ န သုခဝေဒနိယံ န ဒုက္ခဝေဒနိယံ။ပေ။ အနာရမ္မဏံ၊ နတ္ထိ တဿ အာဝဋ္ဋနာ။ပေ။ ပဏိဓိ၊ နော စ ဝတ ရေ ဝတ္တဗ္ဗေ – ‘‘ရူပံ ဝိပါကော’’တိ.

၇၆၆. ဖဿော ဝိပါကော၊ ဖဿော သုခဝေဒနိယော ဒုက္ခဝေဒနိယော။ပေ။ သာရမ္မဏော၊ အတ္ထိ တဿ အာဝဋ္ဋနာ။ပေ။ ပဏိဓီတိ? အာမန္တာ. ရူပံ ဝိပါကော၊ ရူပံ သုခဝေဒနိယံ ဒုက္ခဝေဒနိယံ။ပေ။ သာရမ္မဏံ၊ အတ္ထိ တဿ အာဝဋ္ဋနာ။ပေ။ ပဏိဓီတိ? န ဟေဝံ ဝတ္တဗ္ဗေ။ပေ။.

ရူပံ ဝိပါကော၊ ရူပံ န သုခဝေဒနိယံ န ဒုက္ခဝေဒနိယံ။ပေ။ အနာရမ္မဏံ၊ နတ္ထိ တဿ အာဝဋ္ဋနာ။ပေ။ ပဏိဓီတိ? အာမန္တာ. ဖဿော ဝိပါကော၊ ဖဿော န သုခဝေဒနိယော န ဒုက္ခဝေဒနိယော။ပေ။ အနာရမ္မဏော၊ နတ္ထိ တဿ အာဝဋ္ဋနာ။ပေ။ ပဏိဓီတိ? န ဟေဝံ ဝတ္တဗ္ဗေ။ပေ။.

၇၆၇. န ဝတ္တဗ္ဗံ – ‘‘ရူပံ ဝိပါကော’’တိ? အာမန္တာ. နနု ကမ္မဿ ကတတ္တာ ဥပ္ပန္နာ စိတ္တစေတသိကာ ဓမ္မာ ဝိပါကောတိ? အာမန္တာ. ဟဉ္စိ ကမ္မဿ ကတတ္တာ ဥပ္ပန္နာ စိတ္တစေတသိကာ ဓမ္မာ ဝိပါကော၊ တေန ဝတ ရေ ဝတ္တဗ္ဗေ – ‘‘ကမ္မဿ ကတတ္တာ ဥပ္ပန္နံ ရူပံ ဝိပါကော’’တိ.

ရူပံ ဝိပါကောတိကထာ နိဋ္ဌိတာ.