(၁၆၀) ၅. ရူပံ ဟေတူတိကထာ

၇၅၄. ရူပံ ဟေတူတိ? အာမန္တာ. အလောဘော ဟေတူတိ? န ဟေဝံ ဝတ္တဗ္ဗေ။ပေ။ အဒေါသော ဟေတု။ပေ။ အမောဟော ဟေတု။ လောဘော ဟေတု။ ဒေါသော ဟေတု။ မောဟော ဟေတူတိ? န ဟေဝံ ဝတ္တဗ္ဗေ။ပေ။.

ရူပံ ဟေတူတိ? အာမန္တာ. သာရမ္မဏံ၊ အတ္ထိ တဿ အာဝဋ္ဋနာ။ပေ။ ပဏိဓီတိ? န ဟေဝံ ဝတ္တဗ္ဗေ။ပေ။ နနု အနာရမ္မဏံ၊ နတ္ထိ တဿ အာဝဋ္ဋနာ။ပေ။ ပဏိဓီတိ? အာမန္တာ. ဟဉ္စိ အနာရမ္မဏံ၊ နတ္ထိ တဿ အာဝဋ္ဋနာ။ပေ။ ပဏိဓိ၊ နော စ ဝတ ရေ ဝတ္တဗ္ဗေ – ‘‘ရူပံ ဟေတူ’’တိ.

၇၅၅. အလောဘော ဟေတု သာရမ္မဏော၊ အတ္ထိ တဿ အာဝဋ္ဋနာ။ပေ။ ပဏိဓီတိ? အာမန္တာ. ရူပံ ဟေတု သာရမ္မဏံ၊ အတ္ထိ တဿ အာဝဋ္ဋနာ။ပေ။ ပဏိဓီတိ? န ဟေဝံ ဝတ္တဗ္ဗေ။ပေ။ အဒေါသော ဟေတု။ အမောဟော ဟေတု။ လောဘော ဟေတု။ ဒေါသော ဟေတု။ မောဟော ဟေတု သာရမ္မဏော၊ အတ္ထိ တဿ အာဝဋ္ဋနာ။ပေ။ ပဏိဓီတိ? အာမန္တာ. ရူပံ ဟေတု သာရမ္မဏံ၊ အတ္ထိ တဿ အာဝဋ္ဋနာ။ပေ။ ပဏိဓီတိ? န ဟေဝံ ဝတ္တဗ္ဗေ။ပေ။.

ရူပံ ဟေတု အနာရမ္မဏံ၊ နတ္ထိ တဿ အာဝဋ္ဋနာ။ပေ။ ပဏိဓီတိ? အာမန္တာ. အလောဘော ဟေတု အနာရမ္မဏော၊ နတ္ထိ တဿ အာဝဋ္ဋနာ။ပေ။ ပဏိဓီတိ? န ဟေဝံ ဝတ္တဗ္ဗေ။ပေ။ ရူပံ ဟေတု အနာရမ္မဏံ၊ နတ္ထိ တဿ အာဝဋ္ဋနာ။ပေ။ ပဏိဓီတိ? အာမန္တာ. အဒေါသော ဟေတု။ အမောဟော ဟေတု။ လောဘော ဟေတု။ ဒေါသော ဟေတု။ မောဟော ဟေတု အနာရမ္မဏော၊ နတ္ထိ တဿ အာဝဋ္ဋနာ။ပေ။ ပဏိဓီတိ? န ဟေဝံ ဝတ္တဗ္ဗေ။ပေ။.

၇၅၆. န ဝတ္တဗ္ဗံ – ‘‘ရူပံ ဟေတူ’’တိ? အာမန္တာ. နနု မဟာဘူတာ ဥပါဒါယရူပါနံ [ဥပါဒါရူပါနံ (သီ. ပီ. က.)] ဥပါဒါယဟေတူတိ? အာမန္တာ. ဟဉ္စိ မဟာဘူတာ ဥပါဒါယရူပါနံ ဥပါဒါယဟေတု၊ တေန ဝတ ရေ ဝတ္တဗ္ဗေ – ‘‘ရူပံ ဟေတူ’’တိ.

ရူပံ ဟေတူတိကထာ နိဋ္ဌိတာ.