၁၆. သောဠသမဝဂ္ဂေါ

(၁၆၅) ၁၀. ရူပါရူပဓာတုပရိယာပန္နကထာ

၇၇၁. ရူပရာဂေါ ရူပဓာတုပရိယာပန္နောတိ? အာမန္တာ. သမာပတ္တေသိယော ဥပပတ္တေသိယော ဒိဋ္ဌဓမ္မသုခဝိဟာရော၊ သမာပတ္တေသိယေန စိတ္တေန ဥပပတ္တေသိယေန စိတ္တေန ဒိဋ္ဌဓမ္မသုခဝိဟာရေန စိတ္တေန သဟဂတော သဟဇာတော သံသဋ္ဌော သမ္ပယုတ္တော ဧကုပ္ပါဒေါ ဧကနိရောဓော ဧကဝတ္ထုကော ဧကာရမ္မဏောတိ? န ဟေဝံ ဝတ္တဗ္ဗေ။ပေ။ နနု န သမာပတ္တေသိယော န ဥပပတ္တေသိယော န ဒိဋ္ဌဓမ္မသုခဝိဟာရော၊ န သမာပတ္တေသိယေန စိတ္တေန။ပေ။ ဧကဝတ္ထုကော ဧကာရမ္မဏောတိ? အာမန္တာ. ဟဉ္စိ န သမာပတ္တေသိယော န ဥပပတ္တေသိယော န ဒိဋ္ဌဓမ္မသုခဝိဟာရော၊ န သမာပတ္တေသိယေန စိတ္တေန။ပေ။ ဧကဝတ္ထုကော ဧကာရမ္မဏော၊ နော စ ဝတ ရေ ဝတ္တဗ္ဗေ – ‘‘ရူပရာဂေါ ရူပဓာတုပရိယာပန္နော’’တိ.

၇၇၂. ရူပရာဂေါ ရူပဓာတုပရိယာပန္နောတိ? အာမန္တာ. သဒ္ဒရာဂေါ သဒ္ဒဓာတုပရိယာပန္နောတိ? န ဟေဝံ ဝတ္တဗ္ဗေ ။ပေ။ ရူပရာဂေါ ရူပဓာတုပရိယာပန္နောတိ? အာမန္တာ. ဂန္ဓရာဂေါ။ပေ။ ရသရာဂေါ။ပေ။ ဖောဋ္ဌဗ္ဗရာဂေါ ဖောဋ္ဌဗ္ဗဓာတုပရိယာပန္နောတိ? န ဟေဝံ ဝတ္တဗ္ဗေ။ပေ။.

သဒ္ဒရာဂေါ န ဝတ္တဗ္ဗံ – ‘‘သဒ္ဒဓာတုပရိယာပန္နော’’တိ? အာမန္တာ. ရူပရာဂေါ န ဝတ္တဗ္ဗံ – ‘‘ရူပဓာတုပရိယာပန္နော’’တိ? န ဟေဝံ ဝတ္တဗ္ဗေ။ပေ။ ဂန္ဓရာဂေါ။ပေ။ ရသရာဂေါ။ပေ။ ဖောဋ္ဌဗ္ဗရာဂေါ န ဝတ္တဗ္ဗံ – ‘‘ဖောဋ္ဌဗ္ဗဓာတုပရိယာပန္နော’’တိ? အာမန္တာ. ရူပရာဂေါ န ဝတ္တဗ္ဗံ – ‘‘ရူပဓာတုပရိယာပန္နော’’တိ? န ဟေဝံ ဝတ္တဗ္ဗေ။ပေ။.

၇၇၃. အရူပရာဂေါ အရူပဓာတုပရိယာပန္နောတိ? အာမန္တာ. အရူပရာဂေါ န ဝတ္တဗ္ဗံ – ‘‘အရူပဓာတုပရိယာပန္နော’’တိ? န ဟေဝံ ဝတ္တဗ္ဗေ။ပေ။ အရူပရာဂေါ အရူပဓာတုပရိယာပန္နောတိ? အာမန္တာ. သမာပတ္တေသိယော ဥပပတ္တေသိယော ဒိဋ္ဌဓမ္မသုခဝိဟာရော၊ သမာပတ္တေသိယေန စိတ္တေန ဥပပတ္တေသိယေန စိတ္တေန ဒိဋ္ဌဓမ္မသုခဝိဟာရေန စိတ္တေန သဟဂတော သဟဇာတော သံသဋ္ဌော သမ္ပယုတ္တော ဧကုပ္ပါဒေါ ဧကနိရောဓော ဧကဝတ္ထုကော ဧကာရမ္မဏောတိ? န ဟေဝံ ဝတ္တဗ္ဗေ။ပေ။ နနု န သမာပတ္တေသိယော န ဥပပတ္တေသိယော န ဒိဋ္ဌဓမ္မသုခဝိဟာရော၊ န သမာပတ္တေသိယေန စိတ္တေန။ပေ။ ဧကဝတ္ထုကော ဧကာရမ္မဏောတိ? အာမန္တာ. ဟဉ္စိ န သမာပတ္တေသိယော န ဥပပတ္တေသိယော န ဒိဋ္ဌဓမ္မသုခဝိဟာရော၊ န သမာပတ္တေသိယေန စိတ္တေန န ဥပပတ္တေသိယေန စိတ္တေန န ဒိဋ္ဌဓမ္မသုခဝိဟာရေန စိတ္တေန သဟဂတော သဟဇာတော သံသဋ္ဌော သမ္ပယုတ္တော ဧကုပ္ပါဒေါ ဧကနိရောဓော ဧကဝတ္ထုကော ဧကာရမ္မဏော၊ နော စ ဝတ ရေ ဝတ္တဗ္ဗေ – ‘‘အရူပရာဂေါ အရူပဓာတုပရိယာပန္နော’’တိ.

၇၇၄. အရူပရာဂေါ အရူပဓာတုပရိယာပန္နောတိ? အာမန္တာ. သဒ္ဒရာဂေါ သဒ္ဒဓာတုပရိယာပန္နောတိ? န ဟေဝံ ဝတ္တဗ္ဗေ။ပေ။ အရူပရာဂေါ အရူပဓာတုပရိယာပန္နောတိ? အာမန္တာ. ဂန္ဓရာဂေါ။ပေ။ ရသရာဂေါ။ပေ။ ဖောဋ္ဌဗ္ဗရာဂေါ ဖောဋ္ဌဗ္ဗဓာတုပရိယာပန္နောတိ? န ဟေဝံ ဝတ္တဗ္ဗေ။ပေ။.

သဒ္ဒရာဂေါ န ဝတ္တဗ္ဗံ – ‘‘သဒ္ဒဓာတုပရိယာပန္နော’’တိ? အာမန္တာ. အရူပရာဂေါ န ဝတ္တဗ္ဗံ – ‘‘အရူပဓာတုပရိယာပန္နော’’တိ? န ဟေဝံ ဝတ္တဗ္ဗေ။ပေ။ ဂန္ဓရာဂေါ။ပေ။ ရသရာဂေါ။ပေ။ ဖောဋ္ဌဗ္ဗရာဂေါ န ဝတ္တဗ္ဗံ – ‘‘ဖောဋ္ဌဗ္ဗဓာတုပရိယာပန္နော’’တိ? အာမန္တာ. အရူပရာဂေါ န ဝတ္တဗ္ဗံ – ‘‘အရူပဓာတုပရိယာပန္နော’’တိ? န ဟေဝံ ဝတ္တဗ္ဗေ။ပေ။.

၇၇၅. န ဝတ္တဗ္ဗံ – ‘‘ရူပရာဂေါ ရူပဓာတုပရိယာပန္နော၊ အရူပရာဂေါ အရူပဓာတုပရိယာပန္နော’’တိ? အာမန္တာ. နနု ကာမရာဂေါ ကာမဓာတုပရိယာပန္နောတိ? အာမန္တာ. ဟဉ္စိ ကာမရာဂေါ ကာမဓာတုပရိယာပန္နော၊ တေန ဝတ ရေ ဝတ္တဗ္ဗေ – ‘‘ရူပရာဂေါ ရူပဓာတုပရိယာပန္နော၊ အရူပရာဂေါ အရူပဓာတုပရိယာပန္နော’’တိ.

ရူပရာဂေါ ရူပဓာတုပရိယာပန္နော အရူပရာဂေါ အရူပဓာတုပရိယာပန္နောတိကထာ နိဋ္ဌိတာ.

ရူပါရူပဓာတုပရိယာပန္နကထာ နိဋ္ဌိတာ.

သောဠသမဝဂ္ဂေါ.

တဿုဒ္ဒါနံ –

စိတ္တနိဂ္ဂဟော၊ စိတ္တပဂ္ဂဟော၊ သုခါနုပ္ပဒါနံ၊ အဓိဂယှ မနသိကာရော၊ ရူပံ ဟေတု၊ ရူပံ သဟေတုကံ၊ ရူပံ ကုသလမ္ပိ အကုသလမ္ပိ၊ ရူပံ ဝိပါကော၊ အတ္ထိ ရူပံ ရူပါဝစရံ အတ္ထိ ရူပံ အရူပါဝစရံ၊ သဗ္ဗေ ကိလေသာ ကာမဓာတုပရိယာပန္နာတိ.