၁၅. ပန္နရသမဝဂ္ဂေါ

(၁၄၇) ၃. အဒ္ဓါကထာ

၇၂၀. အဒ္ဓါ ပရိနိပ္ဖန္နောတိ? အာမန္တာ. ရူပန္တိ? န ဟေဝံ ဝတ္တဗ္ဗေ။ပေ။ ဝေဒနာ။ပေ။ သညာ။ပေ။ သင်္ခါရာ။ပေ။ ဝိညာဏန္တိ? န ဟေဝံ ဝတ္တဗ္ဗေ။ပေ။ အတီတော အဒ္ဓါ ပရိနိပ္ဖန္နောတိ? အာမန္တာ. ရူပန္တိ? န ဟေဝံ ဝတ္တဗ္ဗေ။ပေ။ ဝေဒနာ။ပေ။ သညာ။ပေ။ သင်္ခါရာ။ပေ။ ဝိညာဏန္တိ? န ဟေဝံ ဝတ္တဗ္ဗေ။ပေ။ အနာဂတော အဒ္ဓါ ပရိနိပ္ဖန္နောတိ? အာမန္တာ. ရူပန္တိ? န ဟေဝံ ဝတ္တဗ္ဗေ။ပေ။ ဝေဒနာ။ပေ။ သညာ။ပေ။ သင်္ခါရာ။ပေ။ ဝိညာဏန္တိ? န ဟေဝံ ဝတ္တဗ္ဗေ။ပေ။ ပစ္စုပ္ပန္နော အဒ္ဓါ ပရိနိပ္ဖန္နောတိ? အာမန္တာ. ရူပန္တိ? န ဟေဝံ ဝတ္တဗ္ဗေ။ပေ။ ဝေဒနာ။ပေ။ သညာ။ပေ။ သင်္ခါရာ။ပေ။ ဝိညာဏန္တိ? န ဟေဝံ ဝတ္တဗ္ဗေ။ပေ။.

အတီတံ ရူပံ ဝေဒနာ သညာ သင်္ခါရာ ဝိညာဏံ အတီတော အဒ္ဓါတိ? အာမန္တာ. အတီတာ ပဉ္စဒ္ဓါတိ? န ဟေဝံ ဝတ္တဗ္ဗေ။ပေ။ အနာဂတံ ရူပံ ဝေဒနာ သညာ သင်္ခါရာ ဝိညာဏံ အနာဂတော အဒ္ဓါတိ? အာမန္တာ. အနာဂတာ ပဉ္စဒ္ဓါတိ? န ဟေဝံ ဝတ္တဗ္ဗေ။ပေ။ ပစ္စုပ္ပန္နံ ရူပံ ဝေဒနာ သညာ သင်္ခါရာ ဝိညာဏံ ပစ္စုပ္ပန္နော အဒ္ဓါတိ? အာမန္တာ. ပစ္စုပ္ပန္နာ ပဉ္စဒ္ဓါတိ? န ဟေဝံ ဝတ္တဗ္ဗေ။ပေ။.

အတီတာ ပဉ္စက္ခန္ဓာ အတီတော အဒ္ဓါ၊ အနာဂတာ ပဉ္စက္ခန္ဓာ အနာဂတော အဒ္ဓါ၊ ပစ္စုပ္ပန္နာ ပဉ္စက္ခန္ဓာ ပစ္စုပ္ပန္နော အဒ္ဓါတိ? အာမန္တာ. ပန္နရသဒ္ဓါတိ? န ဟေဝံ ဝတ္တဗ္ဗေ။ပေ။.

အတီတာနိ ဒွါဒသာယတနာနိ အတီတော အဒ္ဓါ၊ အနာဂတာနိ ဒွါဒသာယတနာနိ အနာဂတော အဒ္ဓါ၊ ပစ္စုပ္ပန္နာနိ ဒွါဒသာယတနာနိ ပစ္စုပ္ပန္နော အဒ္ဓါတိ? အာမန္တာ. ဆတ္တိံသ အဒ္ဓါတိ? န ဟေဝံ ဝတ္တဗ္ဗေ။ပေ။.

အတီတာ အဋ္ဌာရသ ဓာတုယော အတီတော အဒ္ဓါ၊ အနာဂတာ အဋ္ဌာရသ ဓာတုယော အနာဂတော အဒ္ဓါ၊ ပစ္စုပ္ပန္နာ အဋ္ဌာရသ ဓာတုယော ပစ္စုပ္ပန္နော အဒ္ဓါတိ? အာမန္တာ. စတုပညာသ အဒ္ဓါတိ? န ဟေဝံ ဝတ္တဗ္ဗေ။ပေ။.

အတီတာနိ ဗာဝီသတိန္ဒြိယာနိ အတီတော အဒ္ဓါ၊ အနာဂတာနိ ဗာဝီသတိန္ဒြိယာနိ အနာဂတော အဒ္ဓါ၊ ပစ္စုပ္ပန္နာနိ ဗာဝီသတိန္ဒြိယာနိ ပစ္စုပ္ပန္နော အဒ္ဓါတိ? အာမန္တာ. ဆသဋ္ဌိ အဒ္ဓါတိ? န ဟေဝံ ဝတ္တဗ္ဗေ။ပေ။.

၇၂၁. န ဝတ္တဗ္ဗံ – ‘‘အဒ္ဓါ ပရိနိပ္ဖန္နောတိ? အာမန္တာ. နနု ဝုတ္တံ ဘဂဝတာ – ‘‘တီဏိမာနိ၊ ဘိက္ခဝေ၊ ကထာဝတ္ထူနိ! ကတမာနိ တီဏိ? အတီတံ ဝါ၊ ဘိက္ခဝေ၊ အဒ္ဓါနံ အာရဗ္ဘ ကထံ ကထေယျ – ‘ဧဝံ အဟောသိ အတီတမဒ္ဓါန’န္တိ၊ အနာဂတံ ဝါ၊ ဘိက္ခဝေ၊ အဒ္ဓါနံ အာရဗ္ဘ ကထံ ကထေယျ – ‘ဧဝံ ဘဝိဿတိ အနာဂတမဒ္ဓါန’န္တိ၊ ဧတရဟိ ဝါ၊ ဘိက္ခဝေ၊ ပစ္စုပ္ပန္နံ အဒ္ဓါနံ အာရဗ္ဘ ကထံ ကထေယျ – ‘ဧဝံ ဟောတိ ဧတရဟိ ပစ္စုပ္ပန္န’န္တိ. ဣမာနိ ခေါ၊ ဘိက္ခဝေ၊ တီဏိ ကထာဝတ္ထူနီ’’တိ [အ. နိ. ၃.၆၈၊ ဒီ. နိ. ၃.၃၀၅]. အတ္ထေဝ သုတ္တန္တောတိ? အာမန္တာ. တေန ဟိ အဒ္ဓါ ပရိနိပ္ဖန္နောတိ.

အဒ္ဓါကထာ နိဋ္ဌိတာ.