(၁၄၅) ၁. ပစ္စယတာကထာ

၇၁၁. ပစ္စယတာ ဝဝတ္ထိတာတိ? အာမန္တာ. နနု ဝီမံသာ ဟေတု၊ သော စ အဓိပတီတိ? အာမန္တာ. ဟဉ္စိ ဝီမံသာ ဟေတု၊ သော စ အဓိပတိ၊ တေန ဝတ ရေ ဝတ္တဗ္ဗေ – ‘‘ဟေတုပစ္စယေန ပစ္စယော၊ အဓိပတိပစ္စယေန ပစ္စယော’’တိ.

နနု ဆန္ဒာဓိပတိ သဟဇာတာနံ ဓမ္မာနံ အဓိပတီတိ? အာမန္တာ. ဟဉ္စိ ဆန္ဒာဓိပတိ သဟဇာတာနံ ဓမ္မာနံ အဓိပတိ၊ တေန ဝတ ရေ ဝတ္တဗ္ဗေ – ‘‘အဓိပတိပစ္စယေန ပစ္စယော၊ သဟဇာတပစ္စယေန ပစ္စယော’’တိ.

၇၁၂. နနု ဝီရိယာဓိပတိ သဟဇာတာနံ ဓမ္မာနံ အဓိပတီတိ? အာမန္တာ. ဟဉ္စိ ဝီရိယာဓိပတိ သဟဇာတာနံ ဓမ္မာနံ အဓိပတိ၊ တေန ဝတ ရေ ဝတ္တဗ္ဗေ – ‘‘အဓိပတိပစ္စယေန ပစ္စယော၊ သဟဇာတပစ္စယေန ပစ္စယော’’တိ.

နနု ဝီရိယာဓိပတိ သဟဇာတာနံ ဓမ္မာနံ အဓိပတိ၊ တဉ္စ ဣန္ဒြိယန္တိ? အာမန္တာ. ဟဉ္စိ ဝီရိယာဓိပတိ သဟဇာတာနံ ဓမ္မာနံ အဓိပတိ၊ တဉ္စ ဣန္ဒြိယံ၊ တေန ဝတ ရေ ဝတ္တဗ္ဗေ – ‘‘အဓိပတိပစ္စယေန ပစ္စယော၊ ဣန္ဒြိယပစ္စယေန ပစ္စယော’’တိ.

နနု ဝီရိယာဓိပတိ သဟဇာတာနံ ဓမ္မာနံ အဓိပတိ၊ တဉ္စ မဂ္ဂင်္ဂန္တိ? အာမန္တာ. ဟဉ္စိ ဝီရိယာဓိပတိ သဟဇာတာနံ ဓမ္မာနံ အဓိပတိ၊ တဉ္စ မဂ္ဂင်္ဂံ၊ တေန ဝတ ရေ ဝတ္တဗ္ဗေ – ‘‘အဓိပတိပစ္စယေန ပစ္စယော၊ မဂ္ဂပစ္စယေန ပစ္စယော’’တိ.

၇၁၃. နနု စိတ္တာဓိပတိ သဟဇာတာနံ ဓမ္မာနံ အဓိပတီတိ? အာမန္တာ. ဟဉ္စိ စိတ္တာဓိပတိ သဟဇာတာနံ ဓမ္မာနံ အဓိပတိ၊ တေန ဝတ ရေ ဝတ္တဗ္ဗေ – ‘‘အဓိပတိပစ္စယေန ပစ္စယော၊ သဟဇာတပစ္စယေန ပစ္စယော’’တိ.

နနု စိတ္တာဓိပတိ သဟဇာတာနံ ဓမ္မာနံ အဓိပတိ၊ သော စ အာဟာရောတိ? အာမန္တာ. ဟဉ္စိ စိတ္တာဓိပတိ သဟဇာတာနံ ဓမ္မာနံ အဓိပတိ၊ သော စ အာဟာရော၊ တေန ဝတ ရေ ဝတ္တဗ္ဗေ – ‘‘အဓိပတိပစ္စယေန ပစ္စယော၊ အာဟာရပစ္စယေန ပစ္စယော’’တိ.

နနု စိတ္တာဓိပတိ သဟဇာတာနံ ဓမ္မာနံ အဓိပတိ၊ တဉ္စ ဣန္ဒြိယန္တိ? အာမန္တာ. ဟဉ္စိ စိတ္တာဓိပတိ သဟဇာတာနံ ဓမ္မာနံ အဓိပတိ၊ တဉ္စ ဣန္ဒြိယံ၊ တေန ဝတ ရေ ဝတ္တဗ္ဗေ – ‘‘အဓိပတိပစ္စယေန ပစ္စယော၊ ဣန္ဒြိယပစ္စယေန ပစ္စယော’’တိ.

၇၁၄. နနု ဝီမံသာဓိပတိ သဟဇာတာနံ ဓမ္မာနံ အဓိပတီတိ? အာမန္တာ. ဟဉ္စိ ဝီမံသာဓိပတိ သဟဇာတာနံ ဓမ္မာနံ အဓိပတိ၊ တေန ဝတ ရေ ဝတ္တဗ္ဗေ – ‘‘အဓိပတိပစ္စယေန ပစ္စယော၊ သဟဇာတပစ္စယေန ပစ္စယော’’တိ.

နနု ဝီမံသာဓိပတိ သဟဇာတာနံ ဓမ္မာနံ အဓိပတိ၊ တဉ္စ ဣန္ဒြိယန္တိ? အာမန္တာ. ဟဉ္စိ ဝီမံသာဓိပတိ သဟဇာတာနံ ဓမ္မာနံ အဓိပတိ၊ တဉ္စ ဣန္ဒြိယံ၊ တေန ဝတ ရေ ဝတ္တဗ္ဗေ – ‘‘အဓိပတိပစ္စယေန ပစ္စယော၊ ဣန္ဒြိယပစ္စယေန ပစ္စယော’’တိ.

နနု ဝီမံသာဓိပတိ သဟဇာတာနံ ဓမ္မာနံ အဓိပတိ၊ တဉ္စ မဂ္ဂင်္ဂန္တိ? အာမန္တာ. ဟဉ္စိ ဝီမံသာဓိပတိ သဟဇာတာနံ ဓမ္မာနံ အဓိပတိ၊ တဉ္စ မဂ္ဂင်္ဂံ၊ တေန ဝတ ရေ ဝတ္တဗ္ဗေ – ‘‘အဓိပတိပစ္စယေန ပစ္စယော၊ မဂ္ဂပစ္စယေန ပစ္စယော’’တိ.

၇၁၅. နနု အရိယံ ဓမ္မံ ဂရုံ ကတွာ ဥပ္ပဇ္ဇတိ ပစ္စဝေက္ခဏာ၊ တဉ္စာရမ္မဏန္တိ? အာမန္တာ. ဟဉ္စိ အရိယံ ဓမ္မံ ဂရုံ ကတွာ ဥပ္ပဇ္ဇတိ ပစ္စဝေက္ခဏာ၊ တဉ္စာရမ္မဏံ၊ တေန ဝတ ရေ ဝတ္တဗ္ဗေ – ‘‘အဓိပတိပစ္စယေန ပစ္စယော၊ အာရမ္မဏပစ္စယေန ပစ္စယော’’တိ.

၇၁၆. နနု ပုရိမာ ပုရိမာ ကုသလာ ဓမ္မာ ပစ္ဆိမာနံ ပစ္ဆိမာနံ ကုသလာနံ ဓမ္မာနံ အနန္တရပစ္စယေန ပစ္စယော၊ သာ စ အာသေဝနာတိ? အာမန္တာ. ဟဉ္စိ ပုရိမာ ပုရိမာ ကုသလာ ဓမ္မာ ပစ္ဆိမာနံ ပစ္ဆိမာနံ ကုသလာနံ ဓမ္မာနံ အနန္တရပစ္စယေန ပစ္စယော၊ သာ စ အာသေဝနာ၊ တေန ဝတ ရေ ဝတ္တဗ္ဗေ – ‘‘အနန္တရပစ္စယေန ပစ္စယော၊ အာသေဝနပစ္စယေန ပစ္စယော’’တိ.

နနု ပုရိမာ ပုရိမာ အကုသလာ ဓမ္မာ ပစ္ဆိမာနံ ပစ္ဆိမာနံ အကုသလာနံ ဓမ္မာနံ အနန္တရပစ္စယေန ပစ္စယော၊ သာ စ အာသေဝနာတိ? အာမန္တာ. ဟဉ္စိ ပုရိမာ ပုရိမာ အကုသလာ ဓမ္မာ ပစ္ဆိမာနံ ပစ္ဆိမာနံ အကုသလာနံ ဓမ္မာနံ အနန္တရပစ္စယေန ပစ္စယော၊ သာ စ အာသေဝနာ၊ တေန ဝတ ရေ ဝတ္တဗ္ဗေ – ‘‘အနန္တရပစ္စယေန ပစ္စယော၊ အာသေဝနပစ္စယေန ပစ္စယော’’တိ.

နနု ပုရိမာ ပုရိမာ ကိရိယာဗျာကတာ ဓမ္မာ ပစ္ဆိမာနံ ပစ္ဆိမာနံ ကိရိယာဗျာကတာနံ ဓမ္မာနံ အနန္တရပစ္စယေန ပစ္စယော၊ သာ စ အာသေဝနာတိ? အာမန္တာ. ဟဉ္စိ ပုရိမာ ပုရိမာ ကိရိယာဗျာကတာ ဓမ္မာ ပစ္ဆိမာနံ ပစ္ဆိမာနံ ကိရိယာဗျာကတာနံ ဓမ္မာနံ အနန္တရပစ္စယေန ပစ္စယော၊ သာ စ အာသေဝနာ၊ တေန ဝတ ရေ ဝတ္တဗ္ဗေ – ‘‘အနန္တရပစ္စယေန ပစ္စယော၊ အာသေဝနပစ္စယေန ပစ္စယော’’တိ.

၇၁၇. န ဝတ္တဗ္ဗံ – ‘‘ပစ္စယတာ ဝဝတ္ထိတာ’’တိ? အာမန္တာ. ဟေတုပစ္စယေန ပစ္စယော ဟောတိ၊ အာရမ္မဏပစ္စယေန ပစ္စယော ဟောတိ၊ အနန္တရပစ္စယေန ပစ္စယော ဟောတိ၊ သမနန္တရပစ္စယေန ပစ္စယော ဟောတီတိ? န ဟေဝံ ဝတ္တဗ္ဗေ. တေန ဟိ ပစ္စယတာ ဝဝတ္ထိတာတိ.

ပစ္စယတာကထာ နိဋ္ဌိတာ.