(၁၄၄) ၉. အပရိယာပန္နကထာ

၇၀၉. ဒိဋ္ဌိဂတံ အပရိယာပန္နန္တိ? အာမန္တာ. မဂ္ဂေါ ဖလံ နိဗ္ဗာနံ၊ သောတာပတ္တိမဂ္ဂေါ သောတာပတ္တိဖလံ၊ သကဒါဂါမိမဂ္ဂေါ သကဒါဂါမိဖလံ၊ အနာဂါမိမဂ္ဂေါ အနာဂါမိဖလံ၊ အရဟတ္တမဂ္ဂေါ အရဟတ္တဖလံ၊ သတိပဋ္ဌာနံ သမ္မပ္ပဓာနံ ဣဒ္ဓိပါဒေါ ဣန္ဒြိယံ ဗလံ ဗောဇ္ဈင်္ဂေါတိ? န ဟေဝံ ဝတ္တဗ္ဗေ။ပေ။.

၇၁၀. န ဝတ္တဗ္ဗံ – ‘‘ဒိဋ္ဌိဂတံ အပရိယာပန္န’’န္တိ? အာမန္တာ. ပုထုဇ္ဇနော ‘‘ကာမေသု ဝီတရာဂေါ’’တိ ဝတ္တဗ္ဗောတိ? အာမန္တာ. ‘‘ဝိဂတဒိဋ္ဌိယော’’တိ ဝတ္တဗ္ဗောတိ? န ဟေဝံ ဝတ္တဗ္ဗေ. တေန ဟိ ဒိဋ္ဌိဂတံ အပရိယာပန္နန္တိ.

အပရိယာပန္နကထာ နိဋ္ဌိတာ.

စုဒ္ဒသမဝဂ္ဂေါ.

တဿုဒ္ဒါနံ –

အကုသလမူလံ ပဋိသန္ဒဟတိ ကုသလမူလံ၊ ကုသလမူလံ ပဋိသန္ဒဟတိ အကုသလမူလံ၊ သဠာယတနံ ဆဝိညာဏကာယာ၊ အရိယရူပံ မဟာဘူတာနံ ဥပါဒါယ၊ သွေဝ အနုသယော တံ ပရိယုဋ္ဌာနံ၊ ပရိယုဋ္ဌာနံ စိတ္တဝိပ္ပယုတ္တံ၊ ယထာဓာတု တညေဝ အနုသေတိ၊ ဒိဋ္ဌိဂတံ အဗျာကတံ၊ ဒိဋ္ဌိဂတံ အပရိယာပန္နန္တိ.