(၁၄၃) ၈. အဗျာကတကထာ

၇၀၆. ဒိဋ္ဌိဂတံ အဗျာကတန္တိ? အာမန္တာ. ဝိပါကာဗျာကတံ ကိရိယာဗျာကတံ ရူပံ နိဗ္ဗာနံ စက္ခာယတနံ။ပေ။ ဖောဋ္ဌဗ္ဗာယတနန္တိ? န ဟေဝံ ဝတ္တဗ္ဗေ။ပေ။ ဒိဋ္ဌိဂတံ အဗျာကတန္တိ? အာမန္တာ. ဒိဋ္ဌိဂတသမ္ပယုတ္တော ဖဿော အဗျာကတောတိ? န ဟေဝံ ဝတ္တဗ္ဗေ။ပေ။ ဒိဋ္ဌိဂတံ အဗျာကတန္တိ? အာမန္တာ. ဒိဋ္ဌိဂတသမ္ပယုတ္တာ ဝေဒနာ။ပေ။ သညာ။ပေ။ စေတနာ။ပေ။ စိတ္တံ အဗျာကတန္တိ? န ဟေဝံ ဝတ္တဗ္ဗေ။ပေ။.

ဒိဋ္ဌိဂတသမ္ပယုတ္တော ဖဿော အကုသလောတိ? အာမန္တာ. ဒိဋ္ဌိဂတံ အကုသလန္တိ? န ဟေဝံ ဝတ္တဗ္ဗေ။ပေ။ ဒိဋ္ဌိဂတသမ္ပယုတ္တာ ဝေဒနာ သညာ စေတနာ စိတ္တံ အကုသလန္တိ? အာမန္တာ. ဒိဋ္ဌိဂတံ အကုသလန္တိ? န ဟေဝံ ဝတ္တဗ္ဗေ။ပေ။.

၇၀၇. ဒိဋ္ဌိဂတံ အဗျာကတန္တိ? အာမန္တာ. အဖလံ အဝိပါကန္တိ? န ဟေဝံ ဝတ္တဗ္ဗေ။ပေ။ နနု သဖလံ သဝိပါကန္တိ? အာမန္တာ. ဟဉ္စိ သဖလံ သဝိပါကံ၊ နော စ ဝတ ရေ ဝတ္တဗ္ဗေ – ‘‘ဒိဋ္ဌိဂတံ အဗျာကတ’’န္တိ.

ဒိဋ္ဌိဂတံ အဗျာကတန္တိ? အာမန္တာ. နနု မိစ္ဆာဒိဋ္ဌိပရမာနိ ဝဇ္ဇာနိ [အင်္ဂုတ္တရနိကာယေ] ဝုတ္တာနိ ဘဂဝတာတိ? အာမန္တာ. ဟဉ္စိ မိစ္ဆာဒိဋ္ဌိပရမာနိ ဝဇ္ဇာနိ ဝုတ္တာနိ ဘဂဝတာ၊ နော စ ဝတ ရေ ဝတ္တဗ္ဗေ – ‘‘ဒိဋ္ဌိဂတံ အဗျာကတ’’န္တိ.

ဒိဋ္ဌိဂတံ အဗျာကတန္တိ? အာမန္တာ. နနု ဝုတ္တံ ဘဂဝတာ – ‘‘မိစ္ဆာဒိဋ္ဌိ ခေါ၊ ဝစ္ဆ၊ အကုသလာ [အကုသလံ (မ. နိ. ၂.၁၉၄)]၊ သမ္မာဒိဋ္ဌိ ကုသလာ’’ [ကုသလံ (မ. နိ. ၂.၁၀၄)] တိ [မ. နိ. ၂.၁၉၄]! အတ္ထေဝ သုတ္တန္တောတိ? အာမန္တာ. တေန ဟိ န ဝတ္တဗ္ဗံ – ‘‘ဒိဋ္ဌိဂတံ အဗျာကတ’’န္တိ.

ဒိဋ္ဌိဂတံ အဗျာကတန္တိ? အာမန္တာ. နနု ဝုတ္တံ ဘဂဝတာ – ‘‘မိစ္ဆာဒိဋ္ဌိဿ ခေါ အဟံ၊ ပုဏ္ဏ၊ ဒွိန္နံ ဂတီနံ အညတရံ ဂတိံ ဝဒါမိ – နိရယံ ဝါ တိရစ္ဆာနယောနိံ ဝါ’’တိ [မ. နိ. ၂.၇၉]! အတ္ထေဝ သုတ္တန္တောတိ? အာမန္တာ. တေန ဟိ န ဝတ္တဗ္ဗံ – ‘‘ဒိဋ္ဌိဂတံ အဗျာကတ’’န္တိ.

၇၀၈. န ဝတ္တဗ္ဗံ – ‘‘ဒိဋ္ဌိဂတံ အဗျာကတ’’န္တိ? အာမန္တာ. နနု ဝုတ္တံ ဘဂဝတာ – ‘‘‘သဿတော လောကော’တိ ခေါ၊ ဝစ္ဆ၊ အဗျာကတမေတံ၊ ‘အသဿတော လောကော’တိ ခေါ၊ ဝစ္ဆ၊ အဗျာကတမေတံ၊ ‘အန္တဝါ လောကော’တိ ခေါ၊ ဝစ္ဆ၊ အဗျာကတမေတံ၊ ‘အနန္တဝါ လောကော’တိ ခေါ၊ ဝစ္ဆ။ပေ။ ‘တံ ဇီဝံ တံ သရီရ’န္တိ ခေါ၊ ဝစ္ဆ။ပေ။ ‘အညံ ဇီဝံ အညံ သရီရ’န္တိ ခေါ၊ ဝစ္ဆ။ပေ။ ‘ဟောတိ တထာဂတော ပရံ မရဏာ’တိ ခေါ၊ ဝစ္ဆ။ပေ။ ‘န ဟောတိ တထာဂတော ပရံ မရဏာ’တိ ခေါ၊ ဝစ္ဆ။ပေ။ ‘ဟောတိ စ န စ ဟောတိ တထာဂတော ပရံ မရဏာ’တိ ခေါ၊ ဝစ္ဆ။ပေ။ ‘နေဝ ဟောတိ န န ဟောတိ တထာဂတော ပရံ မရဏာ’တိ ခေါ၊ ဝစ္ဆ၊ အဗျာကတမေတ’’န္တိ [သံ. နိ. ၄.၄၁၆၊ ထောကံ ပန ဝိသဒိသံ]! အတ္ထေဝ သုတ္တန္တောတိ? အာမန္တာ. တေန ဟိ ဒိဋ္ဌိဂတံ အဗျာကတန္တိ.

ဒိဋ္ဌိဂတံ အဗျာကတန္တိ? အာမန္တာ. နနု ဝုတ္တံ ဘဂဝတာ – ‘‘မိစ္ဆာဒိဋ္ဌိကဿ၊ ဘိက္ခဝေ၊ ပုရိသပုဂ္ဂလဿ ယဉ္စေဝ ကာယကမ္မံ ယထာဒိဋ္ဌိသမတ္တံ သမာဒိန္နံ၊ ယဉ္စ ဝစီကမ္မံ။ပေ။ ယဉ္စ မနောကမ္မံ၊ ယာ စ စေတနာ၊ ယာ စ ပတ္ထနာ၊ ယော စ ပဏိဓိ၊ ယေ စ သင်္ခါရာ၊ သဗ္ဗေ တေ ဓမ္မာ အနိဋ္ဌာယ အကန္တာယ အမနာပါယ အဟိတာယ ဒုက္ခာယ သံဝတ္တန္တီ’’တိ [အ. နိ. ၁.၃၀၆]! အတ္ထေဝ သုတ္တန္တောတိ? အာမန္တာ. တေန ဟိ န ဝတ္တဗ္ဗံ – ‘‘ဒိဋ္ဌိဂတံ အဗျာကတ’’န္တိ.

အဗျာကတကထာ နိဋ္ဌိတာ.