(၁၄၂) ၇. ပရိယာပန္နကထာ

၇၀၃. ရူပရာဂေါ ရူပဓာတုံ အနုသေတိ၊ ရူပဓာတုပရိယာပန္နောတိ? အာမန္တာ. သမာပတ္တေသိယော ဥပပတ္တေသိယော ဒိဋ္ဌဓမ္မသုခဝိဟာရော၊ သမာပတ္တေသိယေန စိတ္တေန ဥပပတ္တေသိယေန စိတ္တေန ဒိဋ္ဌဓမ္မသုခဝိဟာရေန စိတ္တေန သဟဂတော သဟဇာတော သံသဋ္ဌော သမ္ပယုတ္တော ဧကုပ္ပါဒေါ ဧကနိရောဓော ဧကဝတ္ထုကော ဧကာရမ္မဏောတိ? န ဟေဝံ ဝတ္တဗ္ဗေ။ပေ။ နနု န သမာပတ္တေသိယော န ဥပပတ္တေသိယော န ဒိဋ္ဌဓမ္မသုခဝိဟာရော၊ န သမာပတ္တေသိယေန စိတ္တေန န ဥပပတ္တေသိယေန စိတ္တေန န ဒိဋ္ဌဓမ္မသုခဝိဟာရေန စိတ္တေန သဟဂတော သဟဇာတော သံသဋ္ဌော သမ္ပယုတ္တော ဧကုပ္ပါဒေါ ဧကနိရောဓော ဧကဝတ္ထုကော ဧကာရမ္မဏောတိ? အာမန္တာ. ဟဉ္စိ န သမာပတ္တေသိယော န ဥပပတ္တေသိယော န ဒိဋ္ဌဓမ္မသုခဝိဟာရော။ပေ။ ဧကာရမ္မဏော၊ နော စ ဝတ ရေ ဝတ္တဗ္ဗေ – ‘‘ရူပရာဂေါ ရူပဓာတုံ အနုသေတိ၊ ရူပဓာတုပရိယာပန္နော’’တိ။ပေ။.

ရူပရာဂေါ ရူပဓာတုံ အနုသေတိ၊ ရူပဓာတုပရိယာပန္နောတိ? အာမန္တာ. သဒ္ဒရာဂေါ သဒ္ဒဓာတုံ အနုသေတိ၊ သဒ္ဒဓာတုပရိယာပန္နောတိ? န ဟေဝံ ဝတ္တဗ္ဗေ။ပေ။ ရူပရာဂေါ ရူပဓာတုံ အနုသေတိ၊ ရူပဓာတုပရိယာပန္နောတိ? အာမန္တာ. ဂန္ဓရာဂေါ။ပေ။ ရသရာဂေါ။ပေ။ ဖောဋ္ဌဗ္ဗရာဂေါ ဖောဋ္ဌဗ္ဗဓာတုံ အနုသေတိ၊ ဖောဋ္ဌဗ္ဗဓာတုပရိယာပန္နောတိ? န ဟေဝံ ဝတ္တဗ္ဗေ။ပေ။.

သဒ္ဒရာဂေါ သဒ္ဒဓာတုံ အနုသေတိ၊ န ဝတ္တဗ္ဗံ – ‘‘သဒ္ဒဓာတုပရိယာပန္နော’’တိ? အာမန္တာ. ရူပရာဂေါ ရူပဓာတုံ အနုသေတိ၊ န ဝတ္တဗ္ဗံ – ‘‘ရူပဓာတုပရိယာပန္နော’’တိ? န ဟေဝံ ဝတ္တဗ္ဗေ။ပေ။ ဂန္ဓရာဂေါ။ပေ။ ရသရာဂေါ။ပေ။ ဖောဋ္ဌဗ္ဗရာဂေါ ဖောဋ္ဌဗ္ဗဓာတုံ အနုသေတိ၊ န ဝတ္တဗ္ဗံ – ‘‘ဖောဋ္ဌဗ္ဗဓာတုပရိယာပန္နော’’တိ? အာမန္တာ. ရူပရာဂေါ ရူပဓာတုံ အနုသေတိ၊ န ဝတ္တဗ္ဗံ – ‘‘ရူပဓာတုပရိယာပန္နော’’တိ? န ဟေဝံ ဝတ္တဗ္ဗေ။ပေ။.

၇၀၄. အရူပရာဂေါ အရူပဓာတုံ အနုသေတိ၊ အရူပဓာတုပရိယာပန္နောတိ? အာမန္တာ. သမာပတ္တေသိယော ဥပပတ္တေသိယော ဒိဋ္ဌဓမ္မသုခဝိဟာရော၊ သမာပတ္တေသိယေန စိတ္တေန ဥပပတ္တေသိယေန စိတ္တေန ဒိဋ္ဌဓမ္မသုခဝိဟာရေန စိတ္တေန သဟဂတော သဟဇာတော သံသဋ္ဌော သမ္ပယုတ္တော ဧကုပ္ပါဒေါ ဧကနိရောဓော ဧကဝတ္ထုကော ဧကာရမ္မဏောတိ? န ဟေဝံ ဝတ္တဗ္ဗေ။ပေ။. နနု န သမာပတ္တေသိယော န ဥပပတ္တေသိယော န ဒိဋ္ဌဓမ္မသုခဝိဟာရော၊ န သမာပတ္တေသိယေန စိတ္တေန။ပေ။ ဧကာရမ္မဏောတိ? အာမန္တာ. ဟဉ္စိ န သမာပတ္တေသိယော န ဥပပတ္တေသိယော။ပေ။ ဧကာရမ္မဏော၊ နော စ ဝတ ရေ ဝတ္တဗ္ဗေ – ‘‘အရူပရာဂေါ အရူပဓာတုံ အနုသေတိ၊ အရူပဓာတုပရိယာပန္နော’’တိ.

အရူပရာဂေါ အရူပဓာတုံ အနုသေတိ၊ အရူပဓာတုပရိယာပန္နောတိ? အာမန္တာ. သဒ္ဒရာဂေါ သဒ္ဒဓာတုံ အနုသေတိ၊ သဒ္ဒဓာတုပရိယာပန္နောတိ? န ဟေဝံ ဝတ္တဗ္ဗေ။ပေ။ အရူပရာဂေါ အရူပဓာတုံ အနုသေတိ၊ အရူပဓာတုပရိယာပန္နောတိ? အာမန္တာ. ဂန္ဓရာဂေါ။ပေ။ ရသရာဂေါ။ပေ။ ဖောဋ္ဌဗ္ဗရာဂေါ ဖောဋ္ဌဗ္ဗဓာတုံ အနုသေတိ၊ ဖောဋ္ဌဗ္ဗဓာတုပရိယာပန္နောတိ? န ဟေဝံ ဝတ္တဗ္ဗေ။ပေ။.

သဒ္ဒရာဂေါ သဒ္ဒဓာတုံ အနုသေတိ၊ န ဝတ္တဗ္ဗံ – ‘‘သဒ္ဒဓာတုပရိယာပန္နော’’တိ? အာမန္တာ. အရူပရာဂေါ အရူပဓာတုံ အနုသေတိ၊ န ဝတ္တဗ္ဗံ – ‘‘အရူပဓာတုပရိယာပန္နော’’တိ၊ န ဟေဝံ ဝတ္တဗ္ဗေ။ပေ။ ဂန္ဓရာဂေါ။ပေ။ ရသရာဂေါ။ပေ။ ဖောဋ္ဌဗ္ဗရာဂေါ ဖောဋ္ဌဗ္ဗဓာတုံ အနုသေတိ၊ န ဝတ္တဗ္ဗံ – ‘‘ဖောဋ္ဌဗ္ဗဓာတုပရိယာပန္နော’’တိ? အာမန္တာ. အရူပရာဂေါ အရူပဓာတုံ အနုသေတိ၊ န ဝတ္တဗ္ဗံ – ‘‘အရူပဓာတုပရိယာပန္နော’’တိ? န ဟေဝံ ဝတ္တဗ္ဗေ။ပေ။.

၇၀၅. န ဝတ္တဗ္ဗံ – ‘‘ရူပရာဂေါ ရူပဓာတုံ အနုသေတိ ရူပဓာတုပရိယာပန္နော၊ အရူပရာဂေါ အရူပဓာတုံ အနုသေတိ အရူပဓာတုပရိယာပန္နော’’တိ? အာမန္တာ. နနု ကာမရာဂေါ ကာမဓာတုံ အနုသေတိ၊ ကာမဓာတုပရိယာပန္နောတိ? အာမန္တာ. ဟဉ္စိ ကာမရာဂေါ ကာမဓာတုံ အနုသေတိ ကာမဓာတုပရိယာပန္နော၊ တေန ဝတ ရေ ဝတ္တဗ္ဗေ – ‘‘ရူပရာဂေါ ရူပဓာတုံ အနုသေတိ ရူပဓာတုပရိယာပန္နော၊ အရူပရာဂေါ အရူပဓာတုံ အနုသေတိ အရူပဓာတုပရိယာပန္နော’’တိ.

ပရိယာပန္နကထာ နိဋ္ဌိတာ.