(၁၃၂) ၇. သမာပန္နော အဿာဒေတိကထာ

၆၇၁. သမာပန္နော အဿာဒေတိ၊ ဈာနနိကန္တိ ဈာနာရမ္မဏာတိ? အာမန္တာ. တံ ဈာနံ တဿ ဈာနဿ အာရမ္မဏန္တိ? န ဟေဝံ ဝတ္တဗ္ဗေ။ပေ။ တံ ဈာနံ တဿ ဈာနဿ အာရမ္မဏန္တိ? အာမန္တာ. တေန ဖဿေန တံ ဖဿံ ဖုသတိ၊ တာယ ဝေဒနာယ တံ ဝေဒနံ ဝေဒေတိ၊ တာယ သညာယ တံ သညံ သဉ္ဇာနာတိ၊ တာယ စေတနာယ တံ စေတနံ စေတေတိ၊ တေန စိတ္တေန တံ စိတ္တံ စိန္တေတိ၊ တေန ဝိတက္ကေန တံ ဝိတက္ကံ ဝိတက္ကေတိ၊ တေန ဝိစာရေန တံ ဝိစာရံ ဝိစာရေတိ၊ တာယ ပီတိယာ တံ ပီတိ ပိယာယတိ၊ တာယ သတိယာ တံ သတိံ သရတိ၊ တာယ ပညာယ တံ ပညံ ပဇာနာတီတိ? န ဟေဝံ ဝတ္တဗ္ဗေ။ပေ။.

ဈာနနိကန္တိ စိတ္တသမ္ပယုတ္တာ၊ ဈာနံ စိတ္တသမ္ပယုတ္တန္တိ? အာမန္တာ. ဒွိန္နံ ဖဿာနံ။ပေ။ ဒွိန္နံ စိတ္တာနံ သမောဓာနံ ဟောတီတိ? န ဟေဝံ ဝတ္တဗ္ဗေ။ပေ။.

ဈာနနိကန္တိ အကုသလံ၊ ဈာနံ ကုသလန္တိ? အာမန္တာ. ကုသလာကုသလာ သာဝဇ္ဇာနဝဇ္ဇာ ဟီနပဏီတာ ကဏှသုက္ကသပ္ပဋိဘာဂါ ဓမ္မာ သမ္မုခီဘာဝံ အာဂစ္ဆန္တီတိ? န ဟေဝံ ဝတ္တဗ္ဗေ။ပေ။.

၆၇၂. ကုသလာကုသလာ သာဝဇ္ဇာနဝဇ္ဇာ ဟီနပဏီတာ ကဏှသုက္ကသပ္ပဋိဘာဂါ ဓမ္မာ သမ္မုခီဘာဝံ အာဂစ္ဆန္တီတိ? အာမန္တာ. နနု ဝုတ္တံ ဘဂဝတာ – ‘‘စတ္တာရိမာနိ၊ ဘိက္ခဝေ၊ သုဝိဒူရဝိဒူရာနိ! ကတမာနိ စတ္တာရိ? နဘဉ္စ၊ ဘိက္ခဝေ၊ ပထဝီ စ – ဣဒံ ပဌမံ သုဝိဒူရဝိဒူရံ။ပေ။ တသ္မာ သတံ ဓမ္မော အသဗ္ဘိ အာရကာ’’တိ. အတ္ထေဝ သုတ္တန္တောတိ? အာမန္တာ. တေန ဟိ န ဝတ္တဗ္ဗံ – ‘‘ကုသလာကုသလာ သာဝဇ္ဇာနဝဇ္ဇာ ဟီနပဏီတာ ကဏှသုက္ကသပ္ပဋိဘာဂါ ဓမ္မာ သမ္မုခီဘာဝံ အာဂစ္ဆန္တီ’’တိ.

၆၇၃. န ဝတ္တဗ္ဗံ – ‘‘သမာပန္နော အဿာဒေတိ၊ ဈာနနိကန္တိ ဈာနာရမ္မဏာ’’တိ? အာမန္တာ. နနု ဝုတ္တံ ဘဂဝတာ – ‘‘ဣဓ၊ ဘိက္ခဝေ၊ ဘိက္ခု ဝိဝိစ္စေဝ ကာမေဟိ ဝိဝိစ္စ အကုသလေဟိ ဓမ္မေဟိ ပဌမံ ဈာနံ ဥပသမ္ပဇ္ဇ ဝိဟရတိ၊ သော တံ အဿာဒေတိ တံ နိကာမေတိ တေန စ ဝိတ္တိံ အာပဇ္ဇတိ၊ ဝိတက္ကဝိစာရာနံ ဝူပသမာ။ပေ။ ဒုတိယံ ဈာနံ။ပေ။ တတိယံ ဈာနံ။ပေ။ စတုတ္ထံ ဈာနံ ဥပသမ္ပဇ္ဇ ဝိဟရတိ၊ သော တံ အဿာဒေတိ တံ နိကာမေတိ တေန စ ဝိတ္တိံ အာပဇ္ဇတီ’’တိ [အ. နိ. ၄.၁၂၃]! အတ္ထေဝ သုတ္တန္တောတိ? အာမန္တာ. တေန ဟိ သမာပန္နော အဿာဒေတိ၊ ဈာနနိကန္တိ ဈာနာရမ္မဏာတိ.

သမာပန္နော အဿာဒေတိကထာ နိဋ္ဌိတာ.