၁၃. တေရသမဝဂ္ဂေါ

(၁၂၇) ၂. ကုသလပဋိလာဘကထာ

၆၅၈. ကပ္ပဋ္ဌော ကုသလံ စိတ္တံ န ပဋိလဘေယျာတိ? အာမန္တာ. ကပ္ပဋ္ဌော ဒါနံ ဒဒေယျာတိ? အာမန္တာ. ဟဉ္စိ ကပ္ပဋ္ဌော ဒါနံ ဒဒေယျ၊ နော စ ဝတ ရေ ဝတ္တဗ္ဗေ – ‘‘ကပ္ပဋ္ဌော ကုသလံ စိတ္တံ န ပဋိလဘေယျာ’’တိ.

ကပ္ပဋ္ဌော ကုသလံ စိတ္တံ န ပဋိလဘေယျာတိ? အာမန္တာ. ကပ္ပဋ္ဌော စီဝရံ ဒဒေယျ။ပေ။ ပိဏ္ဍပါတံ ဒဒေယျ။ပေ။ သေနာသနံ ဒဒေယျ။ပေ။ ဂိလာနပစ္စယဘေသဇ္ဇပရိက္ခာရံ ဒဒေယျ ။ ခါဒနီယံ ဒဒေယျ။ ဘောဇနီယံ ဒဒေယျ။ ပါနီယံ ဒဒေယျ။ စေတိယံ ဝန္ဒေယျ။ စေတိယေ မာလံ အာရောပေယျ။ ဂန္ဓံ အာရောပေယျ။ ဝိလေပနံ အာရောပေယျ။ပေ။ စေတိယံ အဘိဒက္ခိဏံ [ပဒက္ခိဏံ (ပီ.)] ကရေယျာတိ? အာမန္တာ. ဟဉ္စိ ကပ္ပဋ္ဌော စေတိယံ အဘိဒက္ခိဏံ ကရေယျ၊ နော စ ဝတ ရေ ဝတ္တဗ္ဗေ – ‘‘ကပ္ပဋ္ဌော ကုသလံ စိတ္တံ န ပဋိလဘေယျာ’’တိ။ပေ။.

၆၅၉. ကပ္ပဋ္ဌော ကုသလံ စိတ္တံ ပဋိလဘေယျာတိ? အာမန္တာ. တတော ဝုဋ္ဌာနံ ကုသလံ စိတ္တံ ပဋိလဘေယျာတိ? အာမန္တာ. ရူပါဝစရံ။ပေ။ အရူပါဝစရံ။ပေ။ လောကုတ္တရံ ကုသလံ စိတ္တံ ပဋိလဘေယျာတိ? န ဟေဝံ ဝတ္တဗ္ဗေ။ပေ။.

ကုသလပဋိလာဘကထာ နိဋ္ဌိတာ.