၁၂. ဒွါဒသမဝဂ္ဂေါ

(၁၁၈) ၃. သဒ္ဒေါ ဝိပါကောတိကထာ

၆၃၆. သဒ္ဒေါ ဝိပါကောတိ? အာမန္တာ. သုခဝေဒနိယော ဒုက္ခဝေဒနိယော အဒုက္ခမသုခဝေဒနိယော၊ သုခါယ ဝေဒနာယ သမ္ပယုတ္တော၊ ဒုက္ခာယ ဝေဒနာယ သမ္ပယုတ္တော၊ အဒုက္ခမသုခါယ ဝေဒနာယ သမ္ပယုတ္တော၊ ဖဿေန သမ္ပယုတ္တော၊ ဝေဒနာယ သမ္ပယုတ္တော၊ သညာယ သမ္ပယုတ္တော၊ စေတနာယ သမ္ပယုတ္တော၊ စိတ္တေန သမ္ပယုတ္တော၊ သာရမ္မဏော၊ အတ္ထိ တဿ အာဝဋ္ဋနာ အာဘောဂေါ သမန္နာဟာရော မနသိကာရော စေတနာ ပတ္ထနာ ပဏိဓီတိ? န ဟေဝံ ဝတ္တဗ္ဗေ။ပေ။ နနု န သုခဝေဒနိယော န ဒုက္ခဝေဒနိယော။ပေ။ အနာရမ္မဏော၊ နတ္ထိ တဿ အာဝဋ္ဋနာ။ပေ။ ပဏိဓီတိ? အာမန္တာ. ဟဉ္စိ န သုခဝေဒနိယော။ပေ။ အနာရမ္မဏော၊ နတ္ထိ တဿ အာဝဋ္ဋနာ။ပေ။ ပဏိဓိ၊ နော စ ဝတ ရေ ဝတ္တဗ္ဗေ – ‘‘သဒ္ဒေါ ဝိပါကော’’တိ.

ဖဿော ဝိပါကော၊ ဖဿော သုခဝေဒနိယော။ပေ။ သာရမ္မဏော၊ အတ္ထိ တဿ အာဝဋ္ဋနာ။ပေ။ ပဏိဓီတိ? အာမန္တာ. သဒ္ဒေါ ဝိပါကော၊ သဒ္ဒေါ သုခဝေဒနိယော။ပေ။ သာရမ္မဏော၊ အတ္ထိ တဿ အာဝဋ္ဋနာ။ပေ။ ပဏိဓီတိ? န ဟေဝံ ဝတ္တဗ္ဗေ။ပေ။.

သဒ္ဒေါ ဝိပါကော၊ သဒ္ဒေါ န သုခဝေဒနိယော။ပေ။ အနာရမ္မဏော၊ နတ္ထိ တဿ အာဝဋ္ဋနာ။ပေ။ ပဏိဓီတိ? အာမန္တာ. ဖဿော ဝိပါကော၊ ဖဿော န သုခဝေဒနိယော၊ န ဒုက္ခဝေဒနိယော။ပေ။ အနာရမ္မဏော၊ နတ္ထိ တဿ အာဝဋ္ဋနာ။ပေ။ ပဏိဓီတိ? န ဟေဝံ ဝတ္တဗ္ဗေ။ပေ။.

၆၃၇. န ဝတ္တဗ္ဗံ – ‘‘သဒ္ဒေါ ဝိပါကော’’တိ? အာမန္တာ. နနု ဝုတ္တံ ဘဂဝတာ – ‘‘သော တဿ ကမ္မဿ ကတတ္တာ ဥပစိတတ္တာ ဥဿန္နတ္တာ ဝိပုလတ္တာ ဗြဟ္မဿရော ဟောတိ ကရဝိကဘာဏီ’’တိ [ဒီဃနိကာယေ]! အတ္ထေဝ သုတ္တန္တောတိ? အာမန္တာ. တေန ဟိ သဒ္ဒေါ ဝိပါကောတိ.

သဒ္ဒေါ ဝိပါကောတိကထာ နိဋ္ဌိတာ.