၃. သုတ္တသာဓနပရိဟာနိ
၂၆၅. ပရိဟာယတိ အရဟာ အရဟတ္တာတိ? အာမန္တာ. နနု ဝုတ္တံ ဘဂဝတာ –
‘‘ဥစ္စာဝစာ ဟိ ပဋိပဒါ [ပဋိပါဒါ (အဋ္ဌ.)]၊ သမဏေန ပကာသိတာ၊
န ပါရံ ဒိဂုဏံ ယန္တိ၊ နယိဒံ ဧကဂုဏံ မုတ’’န္တိ [သု. နိ. ၇၁၉ သုတ္တနိပါတေ].
အတ္ထေဝ သုတ္တန္တောတိ? အာမန္တာ. တေန ဟိ န ဝတ္တဗ္ဗံ – ‘‘ပရိဟာယတိ အရဟာ အရဟတ္တာ’’တိ.
ပရိဟာယတိ အရဟာ အရဟတ္တာတိ? အာမန္တာ. အတ္ထိ ဆိန္နဿ ဆေဒိယန္တိ? န ဟေဝံ ဝတ္တဗ္ဗေ.
အတ္ထိ ဆိန္နဿ ဆေဒိယန္တိ? အာမန္တာ. နနု ဝုတ္တံ ဘဂဝတာ –
‘‘ဝီတတဏှော အနာဒါနော၊ ကိစ္စံ ယဿ န ဝိဇ္ဇတိ၊
ဆိန္နဿ ဆေဒိယံ နတ္ထိ၊ ဩဃပါသော သမူဟတော’’တိ.
အတ္ထေဝ သုတ္တန္တောတိ? အာမန္တာ. တေန ဟိ န ဝတ္တဗ္ဗံ – ‘‘အတ္ထိ ဆိန္နဿ ဆေဒိယ’’န္တိ.
၂၆၆. ပရိဟာယတိ အရဟာ အရဟတ္တာတိ? အာမန္တာ. အတ္ထိ ကတဿ ပတိစယောတိ? န ဟေဝံ ဝတ္တဗ္ဗေ.
အတ္ထိ ကတဿ ပတိစယောတိ? အာမန္တာ. နနု ဝုတ္တံ ဘဂဝတာ –
‘‘တဿ သမ္မာ ဝိမုတ္တဿ၊ သန္တစိတ္တဿ ဘိက္ခုနော၊
ကတဿ ပတိစယော နတ္ထိ၊ ကရဏီယံ န ဝိဇ္ဇတိ.
‘‘သေလော ယထာ ဧကဂ္ဃနော၊ ဝါတေန န သမီရတိ၊
ဧဝံ ရူပါ ရသာ သဒ္ဒါ၊ ဂန္ဓာ ဖဿာ စ ကေဝလာ.
‘‘ဣဋ္ဌာ ဓမ္မာ အနိဋ္ဌာ စ၊ နပ္ပဝေဓေန္တိ တာဒိနော၊
ဌိတံ စိတ္တံ ဝိပ္ပမုတ္တံ၊ ဝယံ စဿာနုပဿတီ’’တိ [မဟာဝ. ၂၄၄၊ အ. နိ. ၆.၅၅].
အတ္ထေဝ သုတ္တန္တောတိ? အာမန္တာ. တေန ဟိ န ဝတ္တဗ္ဗံ – ‘‘အတ္ထိ ကတဿ ပတိစယော’’တိ.
၂၆၇. န ဝတ္တဗ္ဗံ – ‘‘ပရိဟာယတိ အရဟာ အရဟတ္တာ’’တိ? အာမန္တာ. နနု ဝုတ္တံ ဘဂဝတာ – ‘‘ပဉ္စိမေ၊ ဘိက္ခဝေ၊ ဓမ္မာ သမယဝိမုတ္တဿ ဘိက္ခုနော ပရိဟာနာယ သံဝတ္တန္တိ. ကတမေ ပဉ္စ? ကမ္မာရာမတာ၊ ဘဿာရာမတာ၊ နိဒ္ဒါရာမတာ၊ သင်္ဂဏိကာရာမတာ၊ ယထာဝိမုတ္တံ စိတ္တံ န ပစ္စဝေက္ခတိ. ဣမေ ခေါ၊ ဘိက္ခဝေ၊ ပဉ္စ ဓမ္မာ သမယဝိမုတ္တဿ ဘိက္ခုနော ပရိဟာနာယ သံဝတ္တန္တီ’’တိ [အ. နိ. ၅.၁၄၉]. အတ္ထေဝ သုတ္တန္တောတိ? အာမန္တာ. တေန ဟိ ပရိဟာယတိ အရဟာ အရဟတ္တာတိ.
အတ္ထိ အရဟတော ကမ္မာရာမတာတိ? န ဟေဝံ ဝတ္တဗ္ဗေ.
အတ္ထိ အရဟတော ကမ္မာရာမတာတိ? အာမန္တာ. အတ္ထိ အရဟတော ရာဂေါ ကာမရာဂေါ ကာမရာဂပရိယုဋ္ဌာနံ ကာမရာဂသံယောဇနံ ကာမောဃော ကာမယောဂေါ ကာမစ္ဆန္ဒနီဝရဏန္တိ? န ဟေဝံ ဝတ္တဗ္ဗေ.
အတ္ထိ အရဟတော ဘဿာရာမတာ၊ အတ္ထိ အရဟတော နိဒ္ဒါရာမတာ၊ အတ္ထိ အရဟတော သင်္ဂဏိကာရာမတာတိ? န ဟေဝံ ဝတ္တဗ္ဗေ.
အတ္ထိ အရဟတော သင်္ဂဏိကာရာမတာတိ? အာမန္တာ. အတ္ထိ အရဟတော ရာဂေါ ကာမရာဂေါ ကာမရာဂပရိယုဋ္ဌာနံ ကာမရာဂသံယောဇနံ ကာမောဃော ကာမယောဂေါ ကာမစ္ဆန္ဒနီဝရဏန္တိ? န ဟေဝံ ဝတ္တဗ္ဗေ.
၂၆၈. ပရိဟာယတိ အရဟာ အရဟတ္တာတိ? အာမန္တာ. အရဟာ အရဟတ္တာ ပရိဟာယမာနော ကိံ ပရိယုဋ္ဌိတော ပရိဟာယတီတိ? ရာဂပရိယုဋ္ဌိတော ပရိဟာယတီတိ. ပရိယုဋ္ဌာနံ ကိံ ပဋိစ္စ ဥပ္ပဇ္ဇတီတိ? အနုသယံ ပဋိစ္စ ဥပ္ပဇ္ဇတီတိ. အတ္ထိ အရဟတော အနုသယာတိ? န ဟေဝံ ဝတ္တဗ္ဗေ.
အတ္ထိ အရဟတော အနုသယာတိ? အာမန္တာ. အတ္ထိ အရဟတော ကာမရာဂါနုသယော ပဋိဃာနုသယော မာနာနုသယော ဒိဋ္ဌာနုသယော ဝိစိကိစ္ဆာနုသယော ဘဝရာဂါနုသယော အဝိဇ္ဇာနုသယောတိ? န ဟေဝံ ဝတ္တဗ္ဗေ.
ဒေါသပရိယုဋ္ဌိတော ပရိဟာယတီတိ။ပေ။ မောဟပရိယုဋ္ဌိတော ပရိဟာယတီတိ။. ပရိယုဋ္ဌာနံ ကိံ ပဋိစ္စ ဥပ္ပဇ္ဇတီတိ? အနုသယံ ပဋိစ္စ ဥပ္ပဇ္ဇတီတိ. အတ္ထိ အရဟတော အနုသယာတိ? န ဟေဝံ ဝတ္တဗ္ဗေ။ပေ။.
အတ္ထိ အရဟတော အနုသယာတိ? အာမန္တာ. အတ္ထိ အရဟတော ကာမရာဂါနုသယော။ပေ။ အဝိဇ္ဇာနုသယောတိ? န ဟေဝံ ဝတ္တဗ္ဗေ.
ပရိဟာယတိ အရဟာ အရဟတ္တာတိ? အာမန္တာ. အရဟတော အရဟတ္တာ ပရိဟာယမာနဿ ကိံ ဥပစယံ ဂစ္ဆတီတိ? ရာဂေါ ဥပစယံ ဂစ္ဆတီတိ. သက္ကာယဒိဋ္ဌိ ဥပစယံ ဂစ္ဆတီတိ၊ ဝိစိကိစ္ဆာ ဥပစယံ ဂစ္ဆတီတိ၊ သီလဗ္ဗတပရာမာသော ဥပစယံ ဂစ္ဆတီတိ? န ဟေဝံ ဝတ္တဗ္ဗေ. ဒေါသော ဥပစယံ ဂစ္ဆတီတိ။ပေ။ မောဟော ဥပစယံ ဂစ္ဆတီတိ၊ သက္ကာယဒိဋ္ဌိ ဥပစယံ ဂစ္ဆတီတိ၊ ဝိစိကိစ္ဆာ ဥပစယံ ဂစ္ဆတီတိ၊ သီလဗ္ဗတပရာမာသော ဥပစယံ ဂစ္ဆတီတိ? န ဟေဝံ ဝတ္တဗ္ဗေ.
ပရိဟာယတိ အရဟာ အရဟတ္တာတိ? အာမန္တာ. အရဟာ အာစိနတီတိ? န ဟေဝံ ဝတ္တဗ္ဗေ. အရဟာ အပစိနတီတိ? န ဟေဝံ ဝတ္တဗ္ဗေ. အရဟာ ပဇဟတီတိ? န ဟေဝံ ဝတ္တဗ္ဗေ. အရဟာ ဥပါဒိယတီတိ? န ဟေဝံ ဝတ္တဗ္ဗေ. အရဟာ ဝိသိနေတီတိ? န ဟေဝံ ဝတ္တဗ္ဗေ. အရဟာ ဥဿိနေတီတိ? န ဟေဝံ ဝတ္တဗ္ဗေ. အရဟာ ဝိဓူပေတီတိ? န ဟေဝံ ဝတ္တဗ္ဗေ. အရဟာ သန္ဓူပေတီတိ? န ဟေဝံ ဝတ္တဗ္ဗေ.
နနု အရဟာ နေဝါစိနတိ န အပစိနတိ အပစိနိတွာ ဌိတောတိ? အာမန္တာ. ဟဉ္စိ အရဟာ နေဝါစိနတိ န အပစိနတိ အပစိနိတွာ ဌိတော၊ နော စ ဝတ ရေ ဝတ္တဗ္ဗေ – ‘‘ပရိဟာယတိ အရဟာ အရဟတ္တာ’’တိ.
နနု အရဟာ နေဝ ပဇဟတိ န ဥပါဒိယတိ ပဇဟိတွာ ဌိတောတိ? အာမန္တာ. ဟဉ္စိ အရဟာ နေဝ ပဇဟတိ န ဥပါဒိယတိ ပဇဟိတွာ ဌိတော၊ နော စ ဝတ ရေ ဝတ္တဗ္ဗေ – ‘‘ပရိဟာယတိ အရဟာ အရဟတ္တာ’’တိ.
နနု အရဟာ နေဝ ဝိသိနေတိ န ဥဿိနေတိ ဝိသိနိတွာ ဌိတောတိ? အာမန္တာ. ဟဉ္စိ အရဟာ နေဝ ဝိသိနေတိ န ဥဿိနေတိ ဝိသိနိတွာ ဌိတော၊ နော စ ဝတ ရေ ဝတ္တဗ္ဗေ – ‘‘ပရိဟာယတိ အရဟာ အရဟတ္တာ’’တိ.
နနု အရဟာ နေဝ ဝိဓူပေတိ န သန္ဓူပေတိ ဝိဓူပေတွာ ဌိတောတိ? အာမန္တာ. ဟဉ္စိ အရဟာ နေဝ ဝိဓူပေတိ န သန္ဓူပေတိ ဝိဓူပေတွာ ဌိတော၊ နော စ ဝတ ရေ ဝတ္တဗ္ဗေ – ‘‘ပရိဟာယတိ အရဟာ အရဟတ္တာ’’တိ.
ပရိဟာနိကထာ နိဋ္ဌိတာ.