၁၁. ဧကာဒသမဝဂ္ဂေါ

(၁၁၅) ၁၀. အနိစ္စတာကထာ

၆၂၈. အနိစ္စတာ ပရိနိပ္ဖန္နာတိ? အာမန္တာ. တာယ အနိစ္စတာယ အနိစ္စတာ ပရိနိပ္ဖန္နာတိ? န ဟေဝံ ဝတ္တဗ္ဗေ။ပေ။ တာယ အနိစ္စတာယ အနိစ္စတာ ပရိနိပ္ဖန္နာတိ? အာမန္တာ. တာယ တာယေဝ နတ္ထိ ဒုက္ခဿန္တကိရိယာ၊ နတ္ထိ ဝဋ္ဋုပစ္ဆေဒေါ၊ နတ္ထိ အနုပါဒါပရိနိဗ္ဗာနန္တိ? န ဟေဝံ ဝတ္တဗ္ဗေ.

ဇရာ ပရိနိပ္ဖန္နာတိ? အာမန္တာ. တာယ ဇရာယ ဇရာ ပရိနိပ္ဖန္နာတိ? န ဟေဝံ ဝတ္တဗ္ဗေ။ပေ။ တာယ ဇရာယ ဇရာ ပရိနိပ္ဖန္နာတိ? အာမန္တာ. တာယ တာယေဝ နတ္ထိ ဒုက္ခဿန္တကိရိယာ၊ နတ္ထိ ဝဋ္ဋုပစ္ဆေဒေါ၊ နတ္ထိ အနုပါဒါပရိနိဗ္ဗာနန္တိ? န ဟေဝံ ဝတ္တဗ္ဗေ။ပေ။.

မရဏံ ပရိနိပ္ဖန္နန္တိ? အာမန္တာ. တဿ မရဏဿ မရဏံ ပရိနိပ္ဖန္နန္တိ? န ဟေဝံ ဝတ္တဗ္ဗေ. တဿ မရဏဿ မရဏံ ပရိနိပ္ဖန္နန္တိ? အာမန္တာ. တဿ တဿေဝ နတ္ထိ ဒုက္ခဿန္တကိရိယာ၊ နတ္ထိ ဝဋ္ဋုပစ္ဆေဒေါ၊ နတ္ထိ အနုပါဒါပရိနိဗ္ဗာနန္တိ? န ဟေဝံ ဝတ္တဗ္ဗေ။ပေ။.

၆၂၉. ရူပံ ပရိနိပ္ဖန္နံ၊ ရူပဿ အနိစ္စတာ အတ္ထီတိ? အာမန္တာ. အနိစ္စတာ ပရိနိပ္ဖန္နာ၊ အနိစ္စတာယ အနိစ္စတာ အတ္ထီတိ? န ဟေဝံ ဝတ္တဗ္ဗေ။ပေ။ ရူပံ ပရိနိပ္ဖန္နံ၊ ရူပဿ ဇရာ အတ္ထီတိ? အာမန္တာ. ဇရာ ပရိနိပ္ဖန္နာ၊ ဇရာယ ဇရာ အတ္ထီတိ? န ဟေဝံ ဝတ္တဗ္ဗေ။ပေ။.

ရူပံ ပရိနိပ္ဖန္နံ၊ ရူပဿ ဘေဒေါ အတ္ထိ၊ အန္တရဓာနံ အတ္ထီတိ? အာမန္တာ. မရဏံ ပရိနိပ္ဖန္နံ၊ မရဏဿ ဘေဒေါ အတ္ထိ၊ အန္တရဓာနံ အတ္ထီတိ? န ဟေဝံ ဝတ္တဗ္ဗေ။ပေ။.

ဝေဒနာ ။ပေ။ သညာ။ သင်္ခါရာ။ပေ။ ဝိညာဏံ ပရိနိပ္ဖန္နံ၊ ဝိညာဏဿ အနိစ္စတာ အတ္ထီတိ? အာမန္တာ. အနိစ္စတာ ပရိနိပ္ဖန္နာ၊ အနိစ္စတာယ အနိစ္စတာ အတ္ထီတိ? န ဟေဝံ ဝတ္တဗ္ဗေ ။ပေ။ ဝိညာဏံ ပရိနိပ္ဖန္နံ၊ ဝိညာဏဿ ဇရာ အတ္ထီတိ? အာမန္တာ. ဇရာ ပရိနိပ္ဖန္နာ၊ ဇရာယ ဇရာ အတ္ထီတိ? န ဟေဝံ ဝတ္တဗ္ဗေ။ပေ။.

ဝိညာဏံ ပရိနိပ္ဖန္နံ၊ ဝိညာဏဿ ဘေဒေါ အတ္ထိ၊ အန္တရဓာနံ အတ္ထီတိ? အာမန္တာ. မရဏံ ပရိနိပ္ဖန္နံ၊ မရဏဿ ဘေဒေါ အတ္ထိ၊ အန္တရဓာနံ အတ္ထီတိ? န ဟေဝံ ဝတ္တဗ္ဗေ။ပေ။.

အနိစ္စတာကထာ နိဋ္ဌိတာ.

ဧကာဒသမဝဂ္ဂေါ.

တဿုဒ္ဒါနံ –

အနုသယာ အဗျာကတာ၊ အဟေတုကာ၊ စိတ္တဝိပ္ပယုတ္တာ၊ အညာဏေ ဝိဂတေ ဉာဏီ၊ ဉာဏံ စိတ္တဝိပ္ပယုတ္တံ၊ ယတ္ထ သဒ္ဒေ [ယတ္ထ သဒ္ဒေါ (သီ.)၊ ယထာသဒ္ဒံ (?)] ဉာဏံ ပဝတ္တတိ၊ ဣဒ္ဓိဗလေန သမန္နာဂတော ကပ္ပံ တိဋ္ဌေယျ၊ စိတ္တသန္တတိ သမာဓိ၊ ဓမ္မဋ္ဌိတတာ၊ အနိစ္စတာတိ.