၁၁. ဧကာဒသမဝဂ္ဂေါ

(၁၁၂) ၇. ဣဒ္ဓိဗလကထာ

၆၂၁. ဣဒ္ဓိဗလေန သမန္နာဂတော ကပ္ပံ တိဋ္ဌေယျာတိ? အာမန္တာ. ဣဒ္ဓိမယိကော သော အာယု၊ ဣဒ္ဓိမယိကာ သာ ဂတိ၊ ဣဒ္ဓိမယိကော သော အတ္တဘာဝပ္ပဋိလာဘောတိ? န ဟေဝံ ဝတ္တဗ္ဗေ။ပေ။.

ဣဒ္ဓိဗလေန သမန္နာဂတော ကပ္ပံ တိဋ္ဌေယျာတိ? အာမန္တာ. အတီတံ ကပ္ပံ တိဋ္ဌေယျ၊ အနာဂတံ ကပ္ပံ တိဋ္ဌေယျာတိ? န ဟေဝံ ဝတ္တဗ္ဗေ။ပေ။ ဣဒ္ဓိဗလေန သမန္နာဂတော ကပ္ပံ တိဋ္ဌေယျာတိ? အာမန္တာ. ဒွေ ကပ္ပေ တိဋ္ဌေယျ၊ တယော ကပ္ပေ တိဋ္ဌေယျ၊ စတ္တာရော ကပ္ပေ တိဋ္ဌေယျာတိ? န ဟေဝံ ဝတ္တဗ္ဗေ။ပေ။ ဣဒ္ဓိဗလေန သမန္နာဂတော ကပ္ပံ တိဋ္ဌေယျာတိ? အာမန္တာ. သတိ ဇီဝိတေ ဇီဝိတာဝသေသေ တိဋ္ဌေယျ၊ အသတိ ဇီဝိတေ ဇီဝိတာဝသေသေ တိဋ္ဌေယျာတိ? သတိ ဇီဝိတေ ဇီဝိတာဝသေသေ တိဋ္ဌေယျာတိ. ဟဉ္စိ သတိ ဇီဝိတေ ဇီဝိတာဝသေသေ တိဋ္ဌေယျ၊ နော စ ဝတ ရေ ဝတ္တဗ္ဗေ – ‘‘ဣဒ္ဓိဗလေန သမန္နာဂတော ကပ္ပံ တိဋ္ဌေယျာ’’တိ. အသတိ ဇီဝိတေ ဇီဝိတာဝသေသေ တိဋ္ဌေယျာတိ၊ မတော တိဋ္ဌေယျ၊ ကာလင်္ကတော တိဋ္ဌေယျာတိ? န ဟေဝံ ဝတ္တဗ္ဗေ။ပေ။.

၆၂၂. ဣဒ္ဓိဗလေန သမန္နာဂတော ကပ္ပံ တိဋ္ဌေယျာတိ? အာမန္တာ. ဥပ္ပန္နော ဖဿော မာ နိရုဇ္ဈီတိ လဗ္ဘာ ဣဒ္ဓိယာ ပဂ္ဂဟေတုန္တိ? န ဟေဝံ ဝတ္တဗ္ဗေ။ပေ။ ဥပ္ပန္နာ ဝေဒနာ။ပေ။ ဥပ္ပန္နာ သညာ ။ပေ။ ဥပ္ပန္နာ စေတနာ။ပေ။ ဥပ္ပန္နံ စိတ္တံ။ ဥပ္ပန္နာ သဒ္ဓါ။ ဥပ္ပန္နံ ဝီရိယံ။ ဥပ္ပန္နာ သတိ။ ဥပ္ပန္နော သမာဓိ ။ပေ။ ဥပ္ပန္နာ ပညာ မာ နိရုဇ္ဈီတိ လဗ္ဘာ ဣဒ္ဓိယာ ပဂ္ဂဟေတုန္တိ? န ဟေဝံ ဝတ္တဗ္ဗေ။ပေ။.

ဣဒ္ဓိဗလေန သမန္နာဂတော ကပ္ပံ တိဋ္ဌေယျာတိ? အာမန္တာ. ရူပံ နိစ္စံ ဟောတူတိ လဗ္ဘာ ဣဒ္ဓိယာ ပဂ္ဂဟေတုန္တိ? န ဟေဝံ ဝတ္တဗ္ဗေ။ပေ။ ဝေဒနာ။ပေ။ သညာ။ သင်္ခါရာ။ ဝိညာဏံ နိစ္စံ ဟောတူတိ လဗ္ဘာ ဣဒ္ဓိယာ ပဂ္ဂဟေတုန္တိ? န ဟေဝံ ဝတ္တဗ္ဗေ။ပေ။.

ဣဒ္ဓိဗလေန သမန္နာဂတော ကပ္ပံ တိဋ္ဌေယျာတိ? အာမန္တာ. ဇာတိဓမ္မာ သတ္တာ မာ ဇာယိံသူတိ လဗ္ဘာ ဣဒ္ဓိယာ ပဂ္ဂဟေတုန္တိ? န ဟေဝံ ဝတ္တဗ္ဗေ။ပေ။ ဇရာဓမ္မာ သတ္တာ မာ ဇီရိံသူတိ။ပေ။ ဗျာဓိဓမ္မာ သတ္တာ မာ ဗျာဓိယိံသူတိ။ပေ။ မရဏဓမ္မာ သတ္တာ မာ မီယိံသူတိ လဗ္ဘာ ဣဒ္ဓိယာ ပဂ္ဂဟေတုန္တိ? န ဟေဝံ ဝတ္တဗ္ဗေ။ပေ။.

၆၂၃. န ဝတ္တဗ္ဗံ – ‘‘ဣဒ္ဓိဗလေန သမန္နာဂတော ကပ္ပံ တိဋ္ဌေယျာ’’တိ? အာမန္တာ. နနု ဝုတ္တံ ဘဂဝတာ – ‘‘ယဿ ကဿစိ၊ အာနန္ဒ၊ စတ္တာရော ဣဒ္ဓိပါဒါ ဘာဝိတာ ဗဟုလီကတာ ယာနီကတာ ဝတ္ထုကတာ အနုဋ္ဌိတာ ပရိစိတာ သုသမာရဒ္ဓါ၊ သော အာကင်္ခမာနော ကပ္ပံ ဝါ တိဋ္ဌေယျ ကပ္ပါဝသေသံ ဝါ’’တိ [ဒီ. နိ. ၂.၁၆၆၊ သံ. နိ. ၅.၈၂၂၊ ဥဒါ. ၅၁]! အတ္ထေဝ သုတ္တန္တောတိ? အာမန္တာ. တေန ဟိ ဣဒ္ဓိဗလေန သမန္နာဂတော ကပ္ပံ တိဋ္ဌေယျာတိ.

၆၂၄. ဣဒ္ဓိဗလေန သမန္နာဂတော ကပ္ပံ တိဋ္ဌေယျာတိ? အာမန္တာ. နနု ဝုတ္တံ ဘဂဝတာ – ‘‘စတုန္နံ၊ ဘိက္ခဝေ၊ ဓမ္မာနံ နတ္ထိ ကောစိ ပါဋိဘောဂေါ သမဏော ဝါ ဗြာဟ္မဏော ဝါ ဒေဝေါ ဝါ မာရော ဝါ ဗြဟ္မာ ဝါ ကောစိ ဝါ လောကသ္မိံ! ကတမေသံ စတုန္နံ? ဇရာဓမ္မော ‘‘မာ ဇီရီ’’တိ နတ္ထိ ကောစိ ပါဋိဘောဂေါ သမဏော ဝါ ဗြာဟ္မဏော ဝါ ဒေဝေါ ဝါ မာရော ဝါ ဗြဟ္မာ ဝါ ကောစိ ဝါ လောကသ္မိံ. ဗျာဓိဓမ္မော ‘‘မာ ဗျာဓိယီ’’တိ။ပေ။ မရဏဓမ္မော ‘‘မာ မီယီ’’တိ။ပေ။ ယာနိ ခေါ ပန တာနိ ပုဗ္ဗေ ကတာနိ ပါပကာနိ ကမ္မာနိ သံကိလေသိကာနိ ပေါနောဗ္ဘဝိကာနိ [ပေါနောဘဝိကာနိ (သီ. ပီ.)] သဒရာနိ [နိဿာရာနိ (သီ. ပီ. က.)၊ ဒုက္ခုဒြယာနိ (သျာ.)] ဒုက္ခဝိပါကာနိ အာယတိံ ဇာတိဇရာမရဏိယာနိ တေသံ ဝိပါကော ‘‘မာ နိဗ္ဗတ္တီ’’တိ နတ္ထိ ကောစိ ပါဋိဘောဂေါ သမဏော ဝါ ဗြာဟ္မဏော ဝါ ဒေဝေါ ဝါ မာရော ဝါ ဗြဟ္မာ ဝါ ကောစိ ဝါ လောကသ္မိံ. ဣမေသံ ခေါ၊ ဘိက္ခဝေ၊ စတုန္နံ ဓမ္မာနံ နတ္ထိ ကောစိ ပါဋိဘောဂေါ သမဏော ဝါ ဗြာဟ္မဏော ဝါ ဒေဝေါ ဝါ မာရော ဝါ ဗြဟ္မာ ဝါ ကောစိ ဝါ လောကသ္မိ’’န္တိ [အ. နိ. ၄.၁၈၂]. အတ္ထေဝ သုတ္တန္တောတိ? အာမန္တာ. တေန ဟိ န ဝတ္တဗ္ဗံ – ‘‘ဣဒ္ဓိဗလေန သမန္နာဂတော ကပ္ပံ တိဋ္ဌေယျာ’’တိ.

ဣဒ္ဓိဗလကထာ နိဋ္ဌိတာ.