(၁၁၀) ၅. ဉာဏံ စိတ္တဝိပ္ပယုတ္တန္တိကထာ

၆၁၆. ဉာဏံ စိတ္တဝိပ္ပယုတ္တန္တိ? အာမန္တာ. ရူပံ နိဗ္ဗာနံ စက္ခာယတနံ။ပေ။ ဖောဋ္ဌဗ္ဗာယတနန္တိ? န ဟေဝံ ဝတ္တဗ္ဗေ။ပေ။ ဉာဏံ စိတ္တဝိပ္ပယုတ္တန္တိ? အာမန္တာ. ပညာ ပညိန္ဒြိယံ ပညာဗလံ သမ္မာဒိဋ္ဌိ ဓမ္မဝိစယသမ္ဗောဇ္ဈင်္ဂေါ စိတ္တဝိပ္ပယုတ္တောတိ? န ဟေဝံ ဝတ္တဗ္ဗေ။ပေ။ ပညာ ပညိန္ဒြိယံ ပညာဗလံ သမ္မာဒိဋ္ဌိ ဓမ္မဝိစယသမ္ဗောဇ္ဈင်္ဂေါ စိတ္တသမ္ပယုတ္တောတိ? အာမန္တာ. ဉာဏံ စိတ္တသမ္ပယုတ္တန္တိ? န ဟေဝံ ဝတ္တဗ္ဗေ။ပေ။.

ဉာဏံ စိတ္တဝိပ္ပယုတ္တန္တိ? အာမန္တာ. ကတမက္ခန္ဓပရိယာပန္နန္တိ? သင်္ခါရက္ခန္ဓပရိယာပန္နန္တိ. သင်္ခါရက္ခန္ဓော စိတ္တဝိပ္ပယုတ္တောတိ? န ဟေဝံ ဝတ္တဗ္ဗေ။ပေ။ သင်္ခါရက္ခန္ဓော စိတ္တဝိပ္ပယုတ္တောတိ? အာမန္တာ. ဝေဒနာက္ခန္ဓော သညာက္ခန္ဓော စိတ္တဝိပ္ပယုတ္တောတိ? န ဟေဝံ ဝတ္တဗ္ဗေ။ပေ။ ဉာဏံ သင်္ခါရက္ခန္ဓပရိယာပန္နံ စိတ္တဝိပ္ပယုတ္တန္တိ? အာမန္တာ. ပညာ သင်္ခါရက္ခန္ဓပရိယာပန္နာ စိတ္တဝိပ္ပယုတ္တာတိ? န ဟေဝံ ဝတ္တဗ္ဗေ။ပေ။ ပညာ သင်္ခါရက္ခန္ဓပရိယာပန္နာ စိတ္တသမ္ပယုတ္တာတိ? အာမန္တာ. ဉာဏံ သင်္ခါရက္ခန္ဓပရိယာပန္နံ စိတ္တသမ္ပယုတ္တန္တိ? န ဟေဝံ ဝတ္တဗ္ဗေ။ပေ။ ဉာဏံ သင်္ခါရက္ခန္ဓပရိယာပန္နံ စိတ္တဝိပ္ပယုတ္တံ၊ ပညာ သင်္ခါရက္ခန္ဓပရိယာပန္နာ စိတ္တသမ္ပယုတ္တာတိ? အာမန္တာ. သင်္ခါရက္ခန္ဓော ဧကဒေသော စိတ္တသမ္ပယုတ္တော ဧကဒေသော စိတ္တဝိပ္ပယုတ္တောတိ? န ဟေဝံ ဝတ္တဗ္ဗေ။ပေ။ သင်္ခါရက္ခန္ဓော ဧကဒေသော စိတ္တသမ္ပယုတ္တော ဧကဒေသော စိတ္တဝိပ္ပယုတ္တောတိ? အာမန္တာ. ဝေဒနာက္ခန္ဓော သညာက္ခန္ဓော ဧကဒေသော စိတ္တသမ္ပယုတ္တော ဧကဒေသော စိတ္တဝိပ္ပယုတ္တောတိ? န ဟေဝံ ဝတ္တဗ္ဗေ။ပေ။.

၆၁၇. န ဝတ္တဗ္ဗံ – ‘‘ဉာဏံ စိတ္တဝိပ္ပယုတ္တ’’န္တိ? အာမန္တာ. အရဟာ စက္ခုဝိညာဏသမင်္ဂီ ‘‘ဉာဏီ’’တိ ဝတ္တဗ္ဗောတိ? အာမန္တာ. ဉာဏံ တေန စိတ္တေန သမ္ပယုတ္တန္တိ? န ဟေဝံ ဝတ္တဗ္ဗေ. တေန ဟိ ဉာဏံ စိတ္တဝိပ္ပယုတ္တန္တိ.

အရဟာ စက္ခုဝိညာဏသမင်္ဂီ ‘‘ပညဝါ’’တိ ဝတ္တဗ္ဗောတိ [သကဝါဒီပုစ္ဆာ ဝိယ ဒိဿတိ]? အာမန္တာ. ပညာ တေန စိတ္တေန သမ္ပယုတ္တာတိ? န ဟေဝံ ဝတ္တဗ္ဗေ. တေန ဟိ ပညာ စိတ္တဝိပ္ပယုတ္တာတိ.

ဉာဏံ စိတ္တဝိပ္ပယုတ္တန္တိကထာ နိဋ္ဌိတာ.