(၁၀၆-၁၀၈) ၁-၃. တိဿောပိ အနုသယကထာ

၆၀၅. အနုသယာ အဗျာကတာတိ? အာမန္တာ. ဝိပါကာဗျာကတာ ကိရိယာဗျာကတာ ရူပံ နိဗ္ဗာနံ စက္ခာယတနံ။ပေ။ ဖောဋ္ဌဗ္ဗာယတနန္တိ? န ဟေဝံ ဝတ္တဗ္ဗေ။ပေ။.

ကာမရာဂါနုသယော အဗျာကတောတိ? အာမန္တာ. ကာမရာဂေါ ကာမရာဂပရိယုဋ္ဌာနံ ကာမရာဂသံယောဇနံ ကာမောဃော ကာမယောဂေါ ကာမစ္ဆန္ဒနီဝရဏံ အဗျာကတန္တိ? န ဟေဝံ ဝတ္တဗ္ဗေ။ပေ။ ကာမရာဂေါ ကာမရာဂပရိယုဋ္ဌာနံ။ပေ။ ကာမစ္ဆန္ဒနီဝရဏံ အကုသလန္တိ? အာမန္တာ. ကာမရာဂါနုသယော အကုသလောတိ? န ဟေဝံ ဝတ္တဗ္ဗေ။ပေ။.

ပဋိဃာနုသယော အဗျာကတောတိ? အာမန္တာ. ပဋိဃံ ပဋိဃပရိယုဋ္ဌာနံ ပဋိဃသံယောဇနံ အဗျာကတန္တိ? န ဟေဝံ ဝတ္တဗ္ဗေ။ပေ။ ပဋိဃံ ပဋိဃပရိယုဋ္ဌာနံ ပဋိဃသံယောဇနံ အကုသလန္တိ? အာမန္တာ. ပဋိဃာနုသယော အကုသလောတိ? န ဟေဝံ ဝတ္တဗ္ဗေ။ပေ။.

မာနာနုသယော အဗျာကတောတိ? အာမန္တာ. မာနော မာနပရိယုဋ္ဌာနံ မာနသံယောဇနံ အဗျာကတန္တိ? န ဟေဝံ ဝတ္တဗ္ဗေ ။ပေ။ မာနော မာနပရိယုဋ္ဌာနံ မာနသံယောဇနံ အကုသလန္တိ? အာမန္တာ. မာနာနုသယော အကုသလောတိ? န ဟေဝံ ဝတ္တဗ္ဗေ ။ပေ။.

ဒိဋ္ဌာနုသယော အဗျာကတောတိ? အာမန္တာ. ဒိဋ္ဌိ ဒိဋ္ဌောဃော ဒိဋ္ဌိယောဂေါ ဒိဋ္ဌိပရိယုဋ္ဌာနံ ဒိဋ္ဌိသံယောဇနံ အဗျာကတန္တိ? န ဟေဝံ ဝတ္တဗ္ဗေ။ပေ။ ဒိဋ္ဌိ ဒိဋ္ဌောဃော ဒိဋ္ဌိယောဂေါ ဒိဋ္ဌိပရိယုဋ္ဌာနံ ဒိဋ္ဌိသံယောဇနံ အကုသလန္တိ? အာမန္တာ. ဒိဋ္ဌာနုသယော အကုသလောတိ? န ဟေဝံ ဝတ္တဗ္ဗေ။ပေ။.

ဝိစိကိစ္ဆာနုသယော အဗျာကတောတိ? အာမန္တာ. ဝိစိကိစ္ဆာ ဝိစိကိစ္ဆာပရိယုဋ္ဌာနံ ဝိစိကိစ္ဆာသံယောဇနံ ဝိစိကိစ္ဆာနီဝရဏံ အဗျာကတန္တိ? န ဟေဝံ ဝတ္တဗ္ဗေ။ပေ။ ဝိစိကိစ္ဆာ ဝိစိကိစ္ဆာပရိယုဋ္ဌာနံ ဝိစိကိစ္ဆာသံယောဇနံ ဝိစိကိစ္ဆာနီဝရဏံ အကုသလန္တိ? အာမန္တာ. ဝိစိကိစ္ဆာနုသယော အကုသလောတိ? န ဟေဝံ ဝတ္တဗ္ဗေ။ပေ။.

ဘဝရာဂါနုသယော အဗျာကတောတိ? အာမန္တာ. ဘဝရာဂေါ ဘဝရာဂပရိယုဋ္ဌာနံ ဘဝရာဂသံယောဇနံ အဗျာကတန္တိ? န ဟေဝံ ဝတ္တဗ္ဗေ။ပေ။ ဘဝရာဂေါ ဘဝရာဂပရိယုဋ္ဌာနံ ဘဝရာဂသံယောဇနံ အကုသလန္တိ? အာမန္တာ. ဘဝရာဂါနုသယော အကုသလောတိ? န ဟေဝံ ဝတ္တဗ္ဗေ။ပေ။.

အဝိဇ္ဇာနုသယော အဗျာကတောတိ? အာမန္တာ. အဝိဇ္ဇာ အဝိဇ္ဇောဃော အဝိဇ္ဇာယောဂေါ အဝိဇ္ဇာပရိယုဋ္ဌာနံ အဝိဇ္ဇာသံယောဇနံ အဝိဇ္ဇာနီဝရဏံ အဗျာကတန္တိ? န ဟေဝံ ဝတ္တဗ္ဗေ။ပေ။ အဝိဇ္ဇာ အဝိဇ္ဇောဃော အဝိဇ္ဇာယောဂေါ အဝိဇ္ဇာပရိယုဋ္ဌာနံ အဝိဇ္ဇာသံယောဇနံ အဝိဇ္ဇာနီဝရဏံ အကုသလန္တိ? အာမန္တာ. အဝိဇ္ဇာနုသယော အကုသလောတိ? န ဟေဝံ ဝတ္တဗ္ဗေ။ပေ။.

၆၀၆. န ဝတ္တဗ္ဗံ – ‘‘အနုသယာ အဗျာကတာ’’တိ? အာမန္တာ. ပုထုဇ္ဇနော ကုသလာဗျာကတေ စိတ္တေ ဝတ္တမာနေ ‘‘သာနုသယော’’တိ ဝတ္တဗ္ဗောတိ? အာမန္တာ. ကုသလာကုသလာ ဓမ္မာ သမ္မုခီဘာဝံ အာဂစ္ဆန္တီတိ? န ဟေဝံ ဝတ္တဗ္ဗေ။ပေ။ တေန ဟိ အနုသယာ အဗျာကတာတိ. ပုထုဇ္ဇနော ကုသလာဗျာကတေ စိတ္တေ ဝတ္တမာနေ ‘‘သရာဂေါ’’တိ ဝတ္တဗ္ဗောတိ? အာမန္တာ. ကုသလာကုသလာ ဓမ္မာ သမ္မုခီဘာဝံ အာဂစ္ဆန္တီတိ? န ဟေဝံ ဝတ္တဗ္ဗေ။ပေ။ တေန ဟိ ရာဂေါ အဗျာကတောတိ.

၆၀၇. အနုသယာ အဟေတုကာတိ? အာမန္တာ. ရူပံ နိဗ္ဗာနံ စက္ခာယတနံ။ပေ။ ဖောဋ္ဌဗ္ဗာယတနန္တိ? န ဟေဝံ ဝတ္တဗ္ဗေ။ပေ။.

ကာမရာဂါနုသယော အဟေတုကောတိ? အာမန္တာ. ကာမရာဂေါ ကာမရာဂပရိယုဋ္ဌာနံ ကာမရာဂသံယောဇနံ ကာမစ္ဆန္ဒနီဝရဏံ အဟေတုကန္တိ? န ဟေဝံ ဝတ္တဗ္ဗေ။ပေ။ ကာမရာဂေါ ကာမရာဂပရိယုဋ္ဌာနံ။ပေ။ ကာမစ္ဆန္ဒနီဝရဏံ သဟေတုကန္တိ? အာမန္တာ. ကာမရာဂါနုသယော သဟေတုကောတိ? န ဟေဝံ ဝတ္တဗ္ဗေ။ပေ။ ပဋိဃာနုသယော။ပေ။ မာနာနုသယော။ ဒိဋ္ဌာနုသယော။ ဝိစိကိစ္ဆာနုသယော။ ဘဝရာဂါနုသယော။ အဝိဇ္ဇာနုသယော အဟေတုကောတိ? အာမန္တာ. အဝိဇ္ဇာ အဝိဇ္ဇောဃော အဝိဇ္ဇာယောဂေါ အဝိဇ္ဇာပရိယုဋ္ဌာနံ အဝိဇ္ဇာသံယောဇနံ အဝိဇ္ဇာနီဝရဏံ အဟေတုကန္တိ? န ဟေဝံ ဝတ္တဗ္ဗေ ။ပေ။ အဝိဇ္ဇာ အဝိဇ္ဇောဃော။ပေ။ အဝိဇ္ဇာနီဝရဏံ သဟေတုကန္တိ? အာမန္တာ. အဝိဇ္ဇာနုသယော သဟေတုကောတိ? န ဟေဝံ ဝတ္တဗ္ဗေ။ပေ။.

၆၀၈. န ဝတ္တဗ္ဗံ – ‘‘အနုသယာ အဟေတုကာ’’တိ? အာမန္တာ. ပုထုဇ္ဇနော ကုသလာဗျာကတေ စိတ္တေ ဝတ္တမာနေ ‘‘သာနုသယော’’တိ ဝတ္တဗ္ဗောတိ? အာမန္တာ. အနုသယာ တေန ဟေတုနာ သဟေတုကာတိ? န ဟေဝံ ဝတ္တဗ္ဗေ။ပေ။ တေန ဟိ အနုသယာ အဟေတုကာတိ. ပုထုဇ္ဇနော ကုသလာဗျာကတေ စိတ္တေ ဝတ္တမာနေ ‘‘သရာဂေါ’’တိ ဝတ္တဗ္ဗောတိ? အာမန္တာ. ရာဂေါ တေန ဟေတုနာ သဟေတုကောတိ? န ဟေဝံ ဝတ္တဗ္ဗေ။ပေ။ တေန ဟိ ရာဂေါ အဟေတုကောတိ.

၆၀၉. အနုသယာ စိတ္တဝိပ္ပယုတ္တာတိ? အာမန္တာ. ရူပံ နိဗ္ဗာနံ စက္ခာယတနံ။ပေ။ ဖောဋ္ဌဗ္ဗာယတနန္တိ? န ဟေဝံ ဝတ္တဗ္ဗေ။ပေ။.

ကာမရာဂါနုသယော စိတ္တဝိပ္ပယုတ္တောတိ? အာမန္တာ. ကာမရာဂေါ ကာမရာဂပရိယုဋ္ဌာနံ ကာမရာဂသံယောဇနံ ကာမောဃော ကာမယောဂေါ ကာမစ္ဆန္ဒနီဝရဏံ စိတ္တဝိပ္ပယုတ္တန္တိ? န ဟေဝံ ဝတ္တဗ္ဗေ။ပေ။ ကာမရာဂေါ ကာမရာဂပရိယုဋ္ဌာနံ။ပေ။ ကာမစ္ဆန္ဒနီဝရဏံ စိတ္တသမ္ပယုတ္တန္တိ? အာမန္တာ. ကာမရာဂါနုသယော စိတ္တသမ္ပယုတ္တောတိ? န ဟေဝံ ဝတ္တဗ္ဗေ။ပေ။.

၆၁၀. ကာမရာဂါနုသယော စိတ္တဝိပ္ပယုတ္တောတိ? အာမန္တာ. ကတမက္ခန္ဓပရိယာပန္နောတိ? သင်္ခါရက္ခန္ဓပရိယာပန္နောတိ. သင်္ခါရက္ခန္ဓော စိတ္တဝိပ္ပယုတ္တောတိ? န ဟေဝံ ဝတ္တဗ္ဗေ. သင်္ခါရက္ခန္ဓော စိတ္တဝိပ္ပယုတ္တောတိ? အာမန္တာ. ဝေဒနာက္ခန္ဓော သညာက္ခန္ဓော စိတ္တဝိပ္ပယုတ္တောတိ? န ဟေဝံ ဝတ္တဗ္ဗေ။ပေ။.

ကာမရာဂါနုသယော သင်္ခါရက္ခန္ဓပရိယာပန္နော စိတ္တဝိပ္ပယုတ္တောတိ? အာမန္တာ. ကာမရာဂေါ သင်္ခါရက္ခန္ဓပရိယာပန္နော စိတ္တဝိပ္ပယုတ္တောတိ? န ဟေဝံ ဝတ္တဗ္ဗေ။ပေ။ ကာမရာဂေါ သင်္ခါရက္ခန္ဓပရိယာပန္နော စိတ္တသမ္ပယုတ္တောတိ? အာမန္တာ. ကာမရာဂါနုသယော သင်္ခါရက္ခန္ဓပရိယာပန္နော စိတ္တသမ္ပယုတ္တောတိ? န ဟေဝံ ဝတ္တဗ္ဗေ။ပေ။.

ကာမရာဂါနုသယော သင်္ခါရက္ခန္ဓပရိယာပန္နော စိတ္တဝိပ္ပယုတ္တော၊ ကာမရာဂေါ သင်္ခါရက္ခန္ဓပရိယာပန္နော စိတ္တသမ္ပယုတ္တောတိ? အာမန္တာ. သင်္ခါရက္ခန္ဓော ဧကဒေသော စိတ္တသမ္ပယုတ္တော ဧကဒေသော စိတ္တဝိပ္ပယုတ္တောတိ? န ဟေဝံ ဝတ္တဗ္ဗေ။ပေ။.

သင်္ခါရက္ခန္ဓော ဧကဒေသော စိတ္တသမ္ပယုတ္တော ဧကဒေသော စိတ္တဝိပ္ပယုတ္တောတိ? အာမန္တာ. ဝေဒနာက္ခန္ဓော သညာက္ခန္ဓော ဧကဒေသော စိတ္တသမ္ပယုတ္တော ဧကဒေသော စိတ္တဝိပ္ပယုတ္တောတိ? န ဟေဝံ ဝတ္တဗ္ဗေ။ပေ။.

၆၁၁. ပဋိဃာနုသယော မာနာနုသယော ဒိဋ္ဌာနုသယော ဝိစိကိစ္ဆာနုသယော ဘဝရာဂါနုသယော အဝိဇ္ဇာနုသယော စိတ္တဝိပ္ပယုတ္တောတိ? အာမန္တာ. အဝိဇ္ဇာ အဝိဇ္ဇောဃော အဝိဇ္ဇာယောဂေါ အဝိဇ္ဇာနီဝရဏံ စိတ္တဝိပ္ပယုတ္တန္တိ? န ဟေဝံ ဝတ္တဗ္ဗေ။ပေ။ အဝိဇ္ဇာ အဝိဇ္ဇောဃော အဝိဇ္ဇာယောဂေါ အဝိဇ္ဇာနီဝရဏံ စိတ္တသမ္ပယုတ္တန္တိ? အာမန္တာ. အဝိဇ္ဇာနုသယော စိတ္တသမ္ပယုတ္တောတိ? န ဟေဝံ ဝတ္တဗ္ဗေ။ပေ။.

၆၁၂. အဝိဇ္ဇာနုသယော စိတ္တဝိပ္ပယုတ္တောတိ? အာမန္တာ. ကတမက္ခန္ဓပရိယာပန္နောတိ? သင်္ခါရက္ခန္ဓပရိယာပန္နောတိ. သင်္ခါရက္ခန္ဓော စိတ္တဝိပ္ပယုတ္တောတိ? န ဟေဝံ ဝတ္တဗ္ဗေ. သင်္ခါရက္ခန္ဓော စိတ္တဝိပ္ပယုတ္တောတိ? အာမန္တာ. ဝေဒနာက္ခန္ဓော သညာက္ခန္ဓော စိတ္တဝိပ္ပယုတ္တောတိ? န ဟေဝံ ဝတ္တဗ္ဗေ။ပေ။.

အဝိဇ္ဇာနုသယော သင်္ခါရက္ခန္ဓပရိယာပန္နော စိတ္တဝိပ္ပယုတ္တောတိ? အာမန္တာ. အဝိဇ္ဇာ သင်္ခါရက္ခန္ဓပရိယာပန္နာ စိတ္တဝိပ္ပယုတ္တာတိ? န ဟေဝံ ဝတ္တဗ္ဗေ။ပေ။ အဝိဇ္ဇာ သင်္ခါရက္ခန္ဓပရိယာပန္နာ စိတ္တသမ္ပယုတ္တာတိ? အာမန္တာ. အဝိဇ္ဇာနုသယော သင်္ခါရက္ခန္ဓပရိယာပန္နော စိတ္တသမ္ပယုတ္တောတိ? န ဟေဝံ ဝတ္တဗ္ဗေ။ပေ။.

အဝိဇ္ဇာနုသယော သင်္ခါရက္ခန္ဓပရိယာပန္နော စိတ္တဝိပ္ပယုတ္တော၊ အဝိဇ္ဇာသင်္ခါရက္ခန္ဓပရိယာပန္နာ စိတ္တသမ္ပယုတ္တာတိ? အာမန္တာ. သင်္ခါရက္ခန္ဓော ဧကဒေသော စိတ္တသမ္ပယုတ္တော ဧကဒေသော စိတ္တဝိပ္ပယုတ္တောတိ? န ဟေဝံ ဝတ္တဗ္ဗေ.

၆၁၃. န ဝတ္တဗ္ဗံ – ‘‘အနုသယာ စိတ္တဝိပ္ပယုတ္တာ’’တိ? အာမန္တာ. ပုထုဇ္ဇနော ကုသလာဗျာကတေ စိတ္တေ ဝတ္တမာနေ ‘‘သာနုသယော’’တိ ဝတ္တဗ္ဗောတိ? အာမန္တာ. အနုသယာ တေန စိတ္တေန သမ္ပယုတ္တာတိ? န ဟေဝံ ဝတ္တဗ္ဗေ. တေန ဟိ အနုသယာ စိတ္တဝိပ္ပယုတ္တာတိ. ပုထုဇ္ဇနော ကုသလာဗျာကတေ စိတ္တေ ဝတ္တမာနေ ‘‘သရာဂေါ’’တိ ဝတ္တဗ္ဗောတိ? အာမန္တာ. ရာဂေါ တေန စိတ္တေန သမ္ပယုတ္တောတိ? န ဟေဝံ ဝတ္တဗ္ဗေ. တေန ဟိ ရာဂေါ စိတ္တဝိပ္ပယုတ္တောတိ.

တိဿောပိ အနုသယကထာ နိဋ္ဌိတာ.