၁၀. ဒသမဝဂ္ဂေါ

(၁၀၃) ၉. သမာဒါနဟေတုကထာ

၅၉၈. သမာဒါနဟေတုကံ သီလံ ဝဍ္ဎတီတိ? အာမန္တာ. သမာဒါနဟေတုကော ဖဿော ဝဍ္ဎတိ၊ ဝေဒနာ ဝဍ္ဎတိ၊ သညာ ဝဍ္ဎတိ၊ စေတနာ ဝဍ္ဎတိ၊ စိတ္တံ ဝဍ္ဎတိ၊ သဒ္ဓါ ဝဍ္ဎတိ၊ ဝီရိယံ ဝဍ္ဎတိ၊ သတိ ဝဍ္ဎတိ၊ သမာဓိ ဝဍ္ဎတိ၊ ပညာ ဝဍ္ဎတီတိ? န ဟေဝံ ဝတ္တဗ္ဗေ။ပေ။.

သမာဒါနဟေတုကံ သီလံ ဝဍ္ဎတီတိ? အာမန္တာ. လတာ ဝိယ ဝဍ္ဎတိ၊ မာလုဝါ ဝိယ ဝဍ္ဎတိ၊ ရုက္ခော ဝိယ ဝဍ္ဎတိ၊ တိဏံ ဝိယ ဝဍ္ဎတိ၊ မုဉ္ဇပုဉ္ဇော ဝိယ ဝဍ္ဎတီတိ? န ဟေဝံ ဝတ္တဗ္ဗေ။ပေ။.

၅၉၉. သမာဒါနဟေတုကံ သီလံ ဝဍ္ဎတီတိ? အာမန္တာ. သီလံ သမာဒိယိတွာ ကာမဝိတက္ကံ ဝိတက္ကေန္တဿ ဗျာပါဒဝိတက္ကံ ဝိတက္ကေန္တဿ ဝိဟိံသာဝိတက္ကံ ဝိတက္ကေန္တဿ သီလံ ဝဍ္ဎတီတိ? အာမန္တာ. ဒွိန္နံ ဖဿာနံ။ပေ။ ဒွိန္နံ စိတ္တာနံ သမောဓာနံ ဟောတီတိ? န ဟေဝံ ဝတ္တဗ္ဗေ။ပေ။ ဒွိန္နံ ဖဿာနံ။ပေ။ ဒွိန္နံ စိတ္တာနံ သမောဓာနံ ဟောတီတိ? အာမန္တာ. ကုသလာကုသလာ သာဝဇ္ဇာနဝဇ္ဇာ ဟီနပဏီတာ ကဏှသုက္ကသပ္ပဋိဘာဂါ ဓမ္မာ သမ္မုခီဘာဝံ အာဂစ္ဆန္တီတိ? န ဟေဝံ ဝတ္တဗ္ဗေ။ပေ။.

ကုသလာကုသလာ သာဝဇ္ဇာနဝဇ္ဇာ ဟီနပဏီတာ ကဏှသုက္ကသပ္ပဋိဘာဂါ ဓမ္မာ သမ္မုခီဘာဝံ အာဂစ္ဆန္တီတိ? အာမန္တာ. နနု ဝုတ္တံ ဘဂဝတာ – ‘‘စတ္တာရိမာနိ၊ ဘိက္ခဝေ၊ သုဝိဒူရဝိဒူရာနိ! ကတမာနိ စတ္တာရိ? နဘဉ္စ၊ ဘိက္ခဝေ၊ ပထဝီ စ – ဣဒံ ပဌမံ သုဝိဒူရဝိဒူရံ။ပေ။ တသ္မာ သတံ ဓမ္မော အသဗ္ဘိ အာရကာ’’တိ. အတ္ထေဝ သုတ္တန္တောတိ? အာမန္တာ. တေန ဟိ န ဝတ္တဗ္ဗံ – ‘‘ကုသလာကုသလာ သာဝဇ္ဇာနဝဇ္ဇာ ဟီနပဏီတာ ကဏှသုက္ကသပ္ပဋိဘာဂါ ဓမ္မာ သမ္မုခီဘာဝံ အာဂစ္ဆန္တီ’’တိ.

၆၀၀. န ဝတ္တဗ္ဗံ – ‘‘သမာဒါနဟေတုကံ သီလံ ဝဍ္ဎတီ’’တိ? အာမန္တာ. နနု ဝုတ္တံ ဘဂဝတာ – ‘‘အာရာမရောပါ ဝနရောပါ။ပေ။ ဓမ္မဋ္ဌာ သီလသမ္ပန္နာ တေ ဇနာ သဂ္ဂဂါမိနော’’တိ. အတ္ထေဝ သုတ္တန္တောတိ? အာမန္တာ. တေန ဟိ သမာဒါနဟေတုကံ သီလံ ဝဍ္ဎတီတိ.

သမာဒါနဟေတုကထာ နိဋ္ဌိတာ.