(၉၈) ၄. ပဉ္စဝိညာဏာ ကုသလာပိ အကုသလာပီတိကထာ

၅၈၀. ပဉ္စဝိညာဏာ ကုသလာပိ အကုသလာပီတိ? အာမန္တာ. နနု ပဉ္စဝိညာဏာ ဥပ္ပန္နဝတ္ထုကာ ဥပ္ပန္နာရမ္မဏာတိ? အာမန္တာ. ဟဉ္စိ ပဉ္စဝိညာဏာ ဥပ္ပန္နဝတ္ထုကာ ဥပ္ပန္နာရမ္မဏာ၊ နော စ ဝတ ရေ ဝတ္တဗ္ဗေ – ‘‘ပဉ္စဝိညာဏာ ကုသလာပိ အကုသလာပီ’’တိ. နနု ပဉ္စဝိညာဏာ ပုရေဇာတဝတ္ထုကာ ပုရေဇာတာရမ္မဏာ အဇ္ဈတ္တိကဝတ္ထုကာ ဗာဟိရာရမ္မဏာ အသမ္ဘိန္နဝတ္ထုကာ အသမ္ဘိန္နာရမ္မဏာ နာနာဝတ္ထုကာ နာနာရမ္မဏာ န အညမညဿ ဂေါစရဝိသယံ ပစ္စနုဘောန္တိ၊ န အသမန္နာဟာရာ ဥပ္ပဇ္ဇန္တိ၊ န အမနသိကာရာ ဥပ္ပဇ္ဇန္တိ၊ န အဗ္ဗောကိဏ္ဏာ ဥပ္ပဇ္ဇန္တိ၊ န အပုဗ္ဗံ အစရိမံ ဥပ္ပဇ္ဇန္တိ၊ န အညမညဿ သမနန္တရာ ဥပ္ပဇ္ဇန္တိ၊ နနု ပဉ္စဝိညာဏာ အနာဘောဂါတိ? အာမန္တာ. ဟဉ္စိ ပဉ္စဝိညာဏာ အနာဘောဂါ၊ နော စ ဝတ ရေ ဝတ္တဗ္ဗေ – ‘‘ပဉ္စဝိညာဏာ ကုသလာပိ အကုသလာပီ’’တိ.

၅၈၁. စက္ခုဝိညာဏံ ကုသလန္တိ? အာမန္တာ. စက္ခုဝိညာဏံ သုညတံ အာရဗ္ဘ ဥပ္ပဇ္ဇတီတိ? န ဟေဝံ ဝတ္တဗ္ဗေ။ပေ။ စက္ခုဝိညာဏံ သုညတံ အာရဗ္ဘ ဥပ္ပဇ္ဇတီတိ? အာမန္တာ. စက္ခုဉ္စ ပဋိစ္စ သုညတဉ္စ ဥပ္ပဇ္ဇတိ စက္ခုဝိညာဏန္တိ? န ဟေဝံ ဝတ္တဗ္ဗေ. စက္ခုဉ္စ ပဋိစ္စ သုညတဉ္စ ဥပ္ပဇ္ဇတိ စက္ခုဝိညာဏန္တိ? အာမန္တာ. စက္ခုဉ္စ ပဋိစ္စ သုညတဉ္စ ဥပ္ပဇ္ဇတိ စက္ခုဝိညာဏ’’န္တိ – အတ္ထေဝ သုတ္တန္တောတိ? နတ္ထိ. ‘‘စက္ခုဉ္စ ပဋိစ္စ ရူပေ စ ဥပ္ပဇ္ဇတိ စက္ခုဝိညာဏ’’န္တိ – အတ္ထေဝ သုတ္တန္တောတိ? အာမန္တာ. ဟဉ္စိ ‘‘စက္ခုဉ္စ ပဋိစ္စ ရူပေ စ ဥပ္ပဇ္ဇတိ စက္ခုဝိညာဏ’’န္တိ – အတ္ထေဝ သုတ္တန္တော၊ နော စ ဝတ ရေ ဝတ္တဗ္ဗေ – ‘‘စက္ခုဉ္စ ပဋိစ္စ သုညတဉ္စ ဥပ္ပဇ္ဇတိ စက္ခုဝိညာဏ’’န္တိ.

၅၈၂. စက္ခုဝိညာဏံ ကုသလမ္ပိ အကုသလမ္ပီတိ? အာမန္တာ. စက္ခုဝိညာဏံ အတီတာနာဂတံ အာရဗ္ဘ ဥပ္ပဇ္ဇတီတိ? န ဟေဝံ ဝတ္တဗ္ဗေ။ပေ။. စက္ခုဝိညာဏံ ကုသလမ္ပိ အကုသလမ္ပီတိ? အာမန္တာ. စက္ခုဝိညာဏံ ဖဿံ အာရဗ္ဘ။ပေ။ စိတ္တံ အာရဗ္ဘ။ စက္ခုံ အာရဗ္ဘ။ပေ။ ကာယံ အာရဗ္ဘ။ သဒ္ဒံ အာရဗ္ဘ။ပေ။ ဖောဋ္ဌဗ္ဗံ အာရဗ္ဘ ဥပ္ပဇ္ဇတီတိ? န ဟေဝံ ဝတ္တဗ္ဗေ။ပေ။.

မနောဝိညာဏံ ကုသလမ္ပိ အကုသလမ္ပိ၊ မနောဝိညာဏံ သုညတံ အာရဗ္ဘ ဥပ္ပဇ္ဇတီတိ? အာမန္တာ. စက္ခုဝိညာဏံ ကုသလမ္ပိ အကုသလမ္ပိ၊ စက္ခုဝိညာဏံ သုညတံ အာရဗ္ဘ ဥပ္ပဇ္ဇတီတိ? န ဟေဝံ ဝတ္တဗ္ဗေ။ပေ။ မနောဝိညာဏံ ကုသလမ္ပိ အကုသလမ္ပိ၊ မနောဝိညာဏံ အတီတာနာဂတံ အာရဗ္ဘ ဥပ္ပဇ္ဇတီတိ? အာမန္တာ. စက္ခုဝိညာဏံ ကုသလမ္ပိ အကုသလမ္ပိ၊ စက္ခုဝိညာဏံ အတီတာနာဂတံ အာရဗ္ဘ ဥပ္ပဇ္ဇတီတိ? န ဟေဝံ ဝတ္တဗ္ဗေ။ပေ။ မနောဝိညာဏံ ကုသလမ္ပိ အကုသလမ္ပိ၊ မနောဝိညာဏံ ဖဿံ အာရဗ္ဘ။ပေ။ စိတ္တံ အာရဗ္ဘ။ပေ။ ကာယံ အာရဗ္ဘ ။ သဒ္ဒံ အာရဗ္ဘ ။ပေ။ ဖောဋ္ဌဗ္ဗံ အာရဗ္ဘ ဥပ္ပဇ္ဇတီတိ? အာမန္တာ. စက္ခုဝိညာဏံ ကုသလမ္ပိ အကုသလမ္ပိ၊ စက္ခုဝိညာဏံ ဖဿံ အာရဗ္ဘ။ပေ။ ဖောဋ္ဌဗ္ဗံ အာရဗ္ဘ ဥပ္ပဇ္ဇတီတိ? န ဟေဝံ ဝတ္တဗ္ဗေ။ပေ။.

၅၈၃. န ဝတ္တဗ္ဗံ – ‘‘ပဉ္စဝိညာဏာ ကုသလာပိ အကုသလာပီ’’တိ? အာမန္တာ. နနု ဝုတ္တံ ဘဂဝတာ – ‘‘ဣဓ၊ ဘိက္ခဝေ၊ ဘိက္ခု စက္ခုနာ ရူပံ ဒိသွာ နိမိတ္တဂ္ဂါဟီ ဟောတိ။ပေ။ န နိမိတ္တဂ္ဂါဟီ ဟောတိ။ပေ။ သောတေန သဒ္ဒံ သုတွာ။ပေ။ ကာယေန ဖောဋ္ဌဗ္ဗံ ဖုသိတွာ နိမိတ္တဂ္ဂါဟီ ဟောတိ။ပေ။ န နိမိတ္တဂ္ဂါဟီ ဟောတီ’’တိ! အတ္ထေဝ သုတ္တန္တောတိ? အာမန္တာ. တေန ဟိ ပဉ္စဝိညာဏာ ကုသလာပိ အကုသလာပီတိ.

ပဉ္စဝိညာဏာ ကုသလာပိ အကုသလာပီတိကထာ နိဋ္ဌိတာ.