၁၀. ဒသမဝဂ္ဂေါ

(၁၀၅) ၁၁. အဝိညတ္တိ ဒုဿိလျန္တိကထာ

၆၀၃. အဝိညတ္တိ ဒုဿိလျန္တိ? အာမန္တာ. ပါဏာတိပါတောတိ? န ဟေဝံ ဝတ္တဗ္ဗေ။ပေ။ အဒိန္နာဒါနန္တိ? န ဟေဝံ ဝတ္တဗ္ဗေ။ပေ။ ကာမေသုမိစ္ဆာစာရောတိ? န ဟေဝံ ဝတ္တဗ္ဗေ။ပေ။ မုသာဝါဒေါတိ? န ဟေဝံ ဝတ္တဗ္ဗေ။ပေ။ သုရာမေရယမဇ္ဇပမာဒဋ္ဌာနန္တိ? န ဟေဝံ ဝတ္တဗ္ဗေ။ပေ။.

ပါပကမ္မံ သမာဒိယိတွာ ဒါနံ ဒဒန္တဿ ပုညဉ္စ အပုညဉ္စ ဥဘော ဝဍ္ဎန္တီတိ? န ဟေဝံ ဝတ္တဗ္ဗေ။ပေ။ ပုညဉ္စ အပုညဉ္စ ဥဘော ဝဍ္ဎန္တီတိ? အာမန္တာ. ဒွိန္နံ ဖဿာနံ။ပေ။ ဒွိန္နံ စိတ္တာနံ သမောဓာနံ ဟောတီတိ? န ဟေဝံ ဝတ္တဗ္ဗေ။ပေ။ ဒွိန္နံ ဖဿာနံ။ပေ။ ဒွိန္နံ စိတ္တာနံ သမောဓာနံ ဟောတီတိ? အာမန္တာ. ကုသလာကုသလာ သာဝဇ္ဇာနဝဇ္ဇာ ဟီနပဏီတာ ကဏှသုက္ကသပ္ပဋိဘာဂါ ဓမ္မာ သမ္မုခီဘာဝံ အာဂစ္ဆန္တီတိ? န ဟေဝံ ဝတ္တဗ္ဗေ။ပေ။.

ကုသလာကုသလာ သာဝဇ္ဇာနဝဇ္ဇာ ဟီနပဏီတာ ကဏှသုက္ကသပ္ပဋိဘာဂါ ဓမ္မာ သမ္မုခီဘာဝံ အာဂစ္ဆန္တီတိ? အာမန္တာ. နနု ဝုတ္တံ ဘဂဝတာ – ‘‘စတ္တာရိမာနိ၊ ဘိက္ခဝေ၊ သုဝိဒူရဝိဒူရာနိ! ကတမာနိ စတ္တာရိ? နဘဉ္စ၊ ဘိက္ခဝေ၊ ပထဝီ စ – ဣဒံ ပဌမံ သုဝိဒူရဝိဒူရံ။ပေ။ တသ္မာ သတံ ဓမ္မော အသဗ္ဘိ အာရကာ’’တိ. အတ္ထေဝ သုတ္တန္တောတိ? အာမန္တာ. တေန ဟိ န ဝတ္တဗ္ဗံ – ‘‘ကုသလာကုသလာ သာဝဇ္ဇာနဝဇ္ဇာ ဟီနပဏီတာ ကဏှသုက္ကသပ္ပဋိဘာဂါ ဓမ္မာ သမ္မုခီဘာဝံ အာဂစ္ဆန္တီ’’တိ.

၆၀၄. န ဝတ္တဗ္ဗံ – ‘‘အဝိညတ္တိ ဒုဿိလျ’’န္တိ? အာမန္တာ. နနု ပါပကမ္မံ သမာဒိန္နော အာသီတိ? အာမန္တာ. ဟဉ္စိ ပါပကမ္မံ သမာဒိန္နော အာသိ၊ တေန ဝတ ရေ ဝတ္တဗ္ဗေ – ‘‘အဝိညတ္တိ ဒုဿိလျ’’န္တိ.

အဝိညတ္တိ ဒုဿိလျန္တိကထာ နိဋ္ဌိတာ.

ဒသမဝဂ္ဂေါ.

တဿုဒ္ဒါနံ –

ဥပပတ္တေသိယေ ပဉ္စက္ခန္ဓေ အနိရုဒ္ဓေ ကိရိယာ ပဉ္စက္ခန္ဓာ ဥပ္ပဇ္ဇန္တိ၊ မဂ္ဂသမင်္ဂိဿ ရူပံ မဂ္ဂေါ၊ ပဉ္စဝိညာဏသမင်္ဂိဿ အတ္ထိ မဂ္ဂဘာဝနာ၊ ပဉ္စဝိညာဏာ ကုသလာပိ အကုသလာပိ၊ ပဉ္စဝိညာဏာ သာဘောဂါ၊ မဂ္ဂသမင်္ဂီ ဒွီဟိ သီလေဟိ သမန္နာဂတော၊ သီလံ အစေတသိကံ၊ သီလံ န စိတ္တာနုပရိဝတ္တိ၊ သမာဒါနဟေတုကံ သီလံ ဝဍ္ဎတီတိ၊ ဝိညတ္တိသီလံ အဝိညတ္တိ ဒုဿိလျန္တိ.

ဒုတိယော ပဏ္ဏာသကော.

တဿုဒ္ဒါနံ –

နိယာမသင်္ဂဟဂတာနိသံသတာ စ နိရောဓောတိ [နိယာမ သင်္ဂဟဂတာနိသံသတာ အတ္ထိ ပဉ္စဝေါကာရဘဝေါ နိရောဓော မဂ္ဂသမင်္ဂိဿ ပဉ္စဝေါကာရဘဝေါတိ (သီ. သျာ. က.)၊ နိယာမ သင်္ဂဟ ဂတာနိသံသတာ အတ္ထိ ပဉ္စဝေါကာရဘဝေါ မဂ္ဂသမင်္ဂိဿ နော ပဉ္စဝေါကာရဘဝေါ (ပီ.)].