၆. ဆဋ္ဌဝဂ္ဂေါ

(၆၁) ၉. စက္ခုန္ဒြိယံ သနိဒဿနန္တိအာဒိကထာ

၄၆၇. စက္ခုန္ဒြိယံ သနိဒဿနန္တိ? အာမန္တာ. ရူပံ ရူပါယတနံ ရူပဓာတု။ပေ။ စက္ခုဿ အာပါထံ အာဂစ္ဆတီတိ? န ဟေဝံ ဝတ္တဗ္ဗေ။ပေ။.

စက္ခုန္ဒြိယံ သနိဒဿနန္တိ? အာမန္တာ. စက္ခုဉ္စ ပဋိစ္စ စက္ခုန္ဒြိယဉ္စ ဥပ္ပဇ္ဇတိ စက္ခုဝိညာဏန္တိ? န ဟေဝံ ဝတ္တဗ္ဗေ။ပေ။.

စက္ခုဉ္စ ပဋိစ္စ စက္ခုန္ဒြိယဉ္စ ဥပ္ပဇ္ဇတိ စက္ခုဝိညာဏန္တိ? အာမန္တာ. ‘‘စက္ခုဉ္စ ပဋိစ္စ စက္ခုန္ဒြိယဉ္စ ဥပ္ပဇ္ဇတိ စက္ခုဝိညာဏ’’န္တိ – အတ္ထေဝ သုတ္တန္တောတိ? နတ္ထိ. ‘‘စက္ခုဉ္စ ပဋိစ္စ ရူပေ စ ဥပ္ပဇ္ဇတိ စက္ခုဝိညာဏ’’န္တိ – အတ္ထေဝ သုတ္တန္တောတိ? အာမန္တာ. ဟဉ္စိ ‘‘စက္ခုဉ္စ ပဋိစ္စ ရူပေ စ ဥပ္ပဇ္ဇတိ စက္ခုဝိညာဏ’’န္တိ – အတ္ထေဝ သုတ္တန္တော၊ နော စ ဝတ ရေ ဝတ္တဗ္ဗေ – ‘‘စက္ခုဉ္စ ပဋိစ္စ စက္ခုန္ဒြိယဉ္စ ဥပ္ပဇ္ဇတိ စက္ခုဝိညာဏ’’န္တိ.

၄၆၈. န ဝတ္တဗ္ဗံ – ‘‘ပဉ္စိန္ဒြိယာနိ သနိဒဿနာနီ’’တိ? အာမန္တာ. နနု ပဿတိ စက္ခုံ သောတံ ဃာနံ ဇိဝှံ ကာယန္တိ? အာမန္တာ. ဟဉ္စိ ပဿတိ စက္ခုံ သောတံ ဃာနံ ဇိဝှံ ကာယံ၊ တေန ဝတ ရေ ဝတ္တဗ္ဗေ – ‘‘ပဉ္စိန္ဒြိယာနိ သနိဒဿနာနီ’’တိ။ပေ။.

စက္ခုန္ဒြိယံ သနိဒဿနန္တိအာဒိကထာ နိဋ္ဌိတာ.