(၆၂) ၁၀. ကာယကမ္မံ သနိဒဿနန္တိကထာ

၄၆၉. ကာယကမ္မံ သနိဒဿနန္တိ? အာမန္တာ. ရူပံ ရူပါယတနံ ရူပဓာတု နီလံ ပီတကံ လောဟိတကံ ဩဒါတံ စက္ခုဝိညေယျံ စက္ခုသ္မိံ ပဋိဟညတိ စက္ခုဿ အာပါထံ အာဂစ္ဆတီတိ? န ဟေဝံ ဝတ္တဗ္ဗေ။ပေ။.

ကာယကမ္မံ သနိဒဿနန္တိ? အာမန္တာ. စက္ခုဉ္စ ပဋိစ္စ ကာယကမ္မဉ္စ ဥပ္ပဇ္ဇတိ စက္ခုဝိညာဏန္တိ? န ဟေဝံ ဝတ္တဗ္ဗေ။ပေ။.

စက္ခုဉ္စ ပဋိစ္စ ကာယကမ္မဉ္စ ဥပ္ပဇ္ဇတိ စက္ခုဝိညာဏန္တိ? အာမန္တာ. ‘‘စက္ခုဉ္စ ပဋိစ္စ ကာယကမ္မဉ္စ ဥပ္ပဇ္ဇတိ စက္ခုဝိညာဏ’’န္တိ – အတ္ထေဝ သုတ္တန္တောတိ? နတ္ထိ. ‘‘စက္ခုဉ္စ ပဋိစ္စ ရူပေ စ ဥပ္ပဇ္ဇတိ စက္ခုဝိညာဏ’’န္တိ – အတ္ထေဝ သုတ္တန္တောတိ? အာမန္တာ. ဟဉ္စိ ‘‘စက္ခုဉ္စ ပဋိစ္စ ရူပေ စ ဥပ္ပဇ္ဇတိ စက္ခုဝိညာဏ’’န္တိ – အတ္ထေဝ သုတ္တန္တော၊ နော စ ဝတ ရေ ဝတ္တဗ္ဗေ – ‘‘စက္ခုဉ္စ ပဋိစ္စ ကာယကမ္မဉ္စ ဥပ္ပဇ္ဇတိ စက္ခုဝိညာဏ’’န္တိ.

၄၇၀. န ဝတ္တဗ္ဗံ – ‘‘ကာယကမ္မံ သနိဒဿန’’န္တိ? အာမန္တာ. နနု ပဿတိ အဘိက္ကမန္တံ ပဋိက္ကမန္တံ အာလောကေန္တံ ဝိလောကေန္တံ သမိဉ္ဇေန္တံ ပသာရေန္တန္တိ? အာမန္တာ. ဟဉ္စိ ပဿတိ အဘိက္ကမန္တံ ပဋိက္ကမန္တံ အာလောကေန္တံ ဝိလောကေန္တံ သမိဉ္ဇေန္တံ ပသာရေန္တံ၊ တေန ဝတ ရေ ဝတ္တဗ္ဗေ – ‘‘ကာယကမ္မံ သနိဒဿန’’န္တိ.

ကာယကမ္မံ သနိဒဿနန္တိကထာ နိဋ္ဌိတာ.

ဆဋ္ဌဝဂ္ဂေါ.

တဿုဒ္ဒါနံ –

နိယမော အသင်္ခတော၊ ပဋိစ္စသမုပ္ပါဒေါ အသင်္ခတော၊ စတ္တာရိ သစ္စာနိ အသင်္ခတာနိ၊ စတ္တာရော အာရုပ္ပါ အသင်္ခတာ၊ နိရောဓသမာပတ္တိ အသင်္ခတာ၊ အာကာသော အသင်္ခတော၊ အာကာသော သနိဒဿနော၊ စတ္တာရော မဟာဘူတာ၊ ပဉ္စိန္ဒြိယာနိ၊ တထေဝ ကာယကမ္မန္တိ.