(၅၁) ၉. ပဋုပ္ပန္နကထာ

၄၄၁. ပဋုပ္ပန္နေ [ပစ္စုပ္ပန္နေ (သီ. သျာ.)] ဉာဏံ အတ္ထီတိ? အာမန္တာ. တေန ဉာဏေန တံ ဉာဏံ ဇာနာတီတိ? န ဟေဝံ ဝတ္တဗ္ဗေ။ပေ။ တေန ဉာဏေန တံ ဉာဏံ ဇာနာတီတိ? အာမန္တာ. တေန ဉာဏေန တံ ဉာဏံ ‘‘ဉာဏ’’န္တိ ဇာနာတီတိ? န ဟေဝံ ဝတ္တဗ္ဗေ။ပေ။ တေန ဉာဏေန တံ ဉာဏံ ‘‘ဉာဏ’’န္တိ ဇာနာတီတိ? အာမန္တာ. တံ ဉာဏံ တဿ ဉာဏဿ အာရမ္မဏန္တိ? န ဟေဝံ ဝတ္တဗ္ဗေ။ပေ။.

တံ ဉာဏံ တဿ ဉာဏဿ အာရမ္မဏန္တိ? အာမန္တာ. တေန ဖဿေန တံ ဖဿံ ဖုသတိ၊ တာယ ဝေဒနာယ တံ ဝေဒနံ ဝေဒေတိ၊ တာယ သညာယ တံ သညံ သဉ္ဇာနာတိ၊ တာယ စေတနာယ တံ စေတနံ စေတေတိ၊ တေန စိတ္တေန တံ စိတ္တံ စိန္တေတိ၊ တေန ဝိတက္ကေန တံ ဝိတက္ကံ ဝိတက္ကေတိ၊ တေန ဝိစာရေန တံ ဝိစာရံ ဝိစာရေတိ၊ တာယ ပီတိယာ တံ ပီတိံ ပိယာယတိ၊ တာယ သတိယာ တံ သတိံ သရတိ၊ တာယ ပညာယ တံ ပညံ ပဇာနာတိ၊ တေန ခဂ္ဂေန တံ ခဂ္ဂံ ဆိန္ဒတိ၊ တေန ဖရသုနာ တံ ဖရသုံ တစ္ဆတိ၊ တာယ ကုဓာရိယာ တံ ကုဓာရိံ တစ္ဆတိ၊ တာယ ဝါသိယာ တံ ဝါသိံ တစ္ဆတိ၊ တာယ သူစိယာ တံ သူစိံ သိဗ္ဗေတိ၊ တေန အင်္ဂုလဂ္ဂေန တံ အင်္ဂုလဂ္ဂံ ပရာမသတိ၊ တေန နာသိကဂ္ဂေန တံ နာသိကဂ္ဂံ ပရာမသတိ၊ တေန မတ္ထကေန တံ မတ္ထကံ ပရာမသတိ၊ တေန ဂူထေန တံ ဂူထံ ဓောဝတိ၊ တေန မုတ္တေန တံ မုတ္တံ ဓောဝတိ၊ တေန ခေဠေန တံ ခေဠံ ဓောဝတိ၊ တေန ပုဗ္ဗေန တံ ပုဗ္ဗံ ဓောဝတိ၊ တေန လောဟိတေန တံ လောဟိတံ ဓောဝတီတိ? န ဟေဝံ ဝတ္တဗ္ဗေ ။ပေ။.

၄၄၂. န ဝတ္တဗ္ဗံ – ‘‘ပဋုပ္ပန္နေ ဉာဏံ အတ္ထီ’’တိ? အာမန္တာ. နနု သဗ္ဗသင်္ခါရေ အနိစ္စတော ဒိဋ္ဌေ တမ္ပိ ဉာဏံ အနိစ္စတော ဒိဋ္ဌံ ဟောတီတိ? အာမန္တာ. ဟဉ္စိ သဗ္ဗသင်္ခါရေ အနိစ္စတော ဒိဋ္ဌေ တမ္ပိ ဉာဏံ အနိစ္စတော ဒိဋ္ဌံ ဟောတိ၊ တေန ဝတ ရေ ဝတ္တဗ္ဗေ – ‘‘ပဋုပ္ပန္နေ ဉာဏံ အတ္ထီ’’တိ.

ပဋုပ္ပန္နဉာဏကထာ [ပစ္စုပ္ပန္နကထာ (သီ.)] နိဋ္ဌိတာ.