၅. ပဉ္စမဝဂ္ဂေါ

(၄၇) ၅. ပဋိသမ္ဘိဒါကထာ

၄၃၂. သဗ္ဗံ ဉာဏံ ပဋိသမ္ဘိဒါတိ? အာမန္တာ. သမ္မုတိဉာဏံ ပဋိသမ္ဘိဒါတိ? န ဟေဝံ ဝတ္တဗ္ဗေ။ပေ။ သမ္မုတိဉာဏံ ပဋိသမ္ဘိဒါတိ? အာမန္တာ. ယေ ကေစိ သမ္မုတိံ ဇာနန္တိ၊ သဗ္ဗေ တေ ပဋိသမ္ဘိဒါပတ္တာတိ? န ဟေဝံ ဝတ္တဗ္ဗေ။ပေ။ သဗ္ဗံ ဉာဏံ ပဋိသမ္ဘိဒါတိ? အာမန္တာ. စေတောပရိယာယေ ဉာဏံ ပဋိသမ္ဘိဒါတိ? န ဟေဝံ ဝတ္တဗ္ဗေ။ပေ။ စေတောပရိယာယေ ဉာဏံ ပဋိသမ္ဘိဒါတိ? အာမန္တာ. ယေ ကေစိ ပရစိတ္တံ ဇာနန္တိ၊ သဗ္ဗေ တေ ပဋိသမ္ဘိဒါပတ္တာတိ? န ဟေဝံ ဝတ္တဗ္ဗေ။ပေ။.

သဗ္ဗံ ဉာဏံ ပဋိသမ္ဘိဒါတိ? အာမန္တာ. သဗ္ဗာ ပညာ ပဋိသမ္ဘိဒါတိ? န ဟေဝံ ဝတ္တဗ္ဗေ။ပေ။ သဗ္ဗာ ပညာ ပဋိသမ္ဘိဒါတိ? အာမန္တာ. ပထဝီကသိဏံ သမာပတ္တိံ သမာပန္နဿ အတ္ထိ ပညာ၊ သာ ပညာ ပဋိသမ္ဘိဒါတိ? န ဟေဝံ ဝတ္တဗ္ဗေ။ပေ။ အာပေါကသိဏံ။ပေ။ တေဇောကသိဏံ။ပေ။ ဝါယောကသိဏံ။ပေ။ နီလကသိဏံ။ပေ။ ပီတကသိဏံ။ပေ။ လောဟိတကသိဏံ။ပေ။ ဩဒါတကသိဏံ။ပေ။ အာကာသာနဉ္စာယတနံ။ပေ။ ဝိညာဏဉ္စာယတနံ။ပေ။ အာကိဉ္စညာယတနံ။ပေ။ နေဝသညာနာသညာယတနံ သမာပန္နဿ။ပေ။ ဒါနံ ဒဒန္တဿ။ပေ။ စီဝရံ ဒဒန္တဿ။ပေ။ ပိဏ္ဍပါတံ ဒဒန္တဿ။ပေ။ သေနာသနံ ဒဒန္တဿ။ပေ။ ဂိလာနပစ္စယဘေသဇ္ဇပရိက္ခာရံ ဒဒန္တဿ အတ္ထိ ပညာ၊ သာ ပညာ ပဋိသမ္ဘိဒါတိ? န ဟေဝံ ဝတ္တဗ္ဗေ။ပေ။.

၄၃၃. န ဝတ္တဗ္ဗံ – ‘‘သဗ္ဗံ ဉာဏံ ပဋိသမ္ဘိဒါ’’တိ? အာမန္တာ. အတ္ထိ လောကုတ္တရာ ပညာ၊ သာ ပညာ န ပဋိသမ္ဘိဒါတိ? န ဟေဝံ ဝတ္တဗ္ဗေ။ပေ။ တေန ဟိ သဗ္ဗံ ဉာဏံ ပဋိသမ္ဘိဒါတိ.

ပဋိသမ္ဘိဒါကထာ နိဋ္ဌိတာ.