(၂၉) ၉. ယထာကမ္မူပဂတဉာဏကထာ

၃၇၇. ယထာကမ္မူပဂတံ ဉာဏံ [ယထာကမ္မူပဂတဉာဏံ (သျာ. ကံ.)] ဒိဗ္ဗစက္ခုန္တိ? အာမန္တာ. ယထာကမ္မူပဂတဉ္စ မနသိ ကရောတိ၊ ဒိဗ္ဗေန စက္ခုနာ ရူပံ ပဿတီတိ? န ဟေဝံ ဝတ္တဗ္ဗေ။ပေ။.

ယထာကမ္မူပဂတဉ္စ မနသိ ကရောတိ၊ ဒိဗ္ဗေန စက္ခုနာ ရူပံ ပဿတီတိ? အာမန္တာ. ဒွိန္နံ ဖဿာနံ ဒွိန္နံ စိတ္တာနံ သမောဓာနံ ဟောတီတိ? န ဟေဝံ ဝတ္တဗ္ဗေ။ပေ။.

ယထာကမ္မူပဂတံ ဉာဏံ ဒိဗ္ဗစက္ခုန္တိ? အာမန္တာ. ‘‘ဣမေ ဝတ ဘောန္တော သတ္တာ’’တိ စ မနသိ ကရောတိ၊ ‘‘ကာယဒုစ္စရိတေန သမန္နာဂတာ’’တိ စ မနသိ ကရောတိ၊ ‘‘ဝစီဒုစ္စရိတေန သမန္နာဂတာ’’တိ စ မနသိ ကရောတိ၊ ‘‘မနောဒုစ္စရိတေန သမန္နာဂတာ’’တိ စ မနသိ ကရောတိ၊ ‘‘အရိယာနံ ဥပဝါဒကာ’’တိ စ မနသိ ကရောတိ၊ ‘‘မိစ္ဆာဒိဋ္ဌိကာ’’တိ စ မနသိ ကရောတိ၊ ‘‘မိစ္ဆာဒိဋ္ဌိကမ္မသမာဒါနာ’’တိ စ မနသိ ကရောတိ၊ ‘‘တေ ကာယဿ ဘေဒါ ပရံ မရဏာ အပါယံ ဒုဂ္ဂတိံ ဝိနိပါတံ နိရယံ ဥပပန္နာ’’တိ စ မနသိ ကရောတိ၊ ‘‘ဣမေ ဝါ ပန ဘောန္တော သတ္တာ’’တိ စ မနသိ ကရောတိ၊ ‘‘ကာယသုစရိတေန သမန္နာဂတာ’’တိ စ မနသိ ကရောတိ၊ ‘‘ဝစီသုစရိတေန သမန္နာဂတာ’’တိ စ မနသိ ကရောတိ၊ ‘‘မနောသုစရိတေန သမန္နာဂတာ’’တိ စ မနသိ ကရောတိ၊ ‘‘အရိယာနံ အနုပဝါဒကာ’’တိ စ မနသိ ကရောတိ၊ ‘‘သမ္မာဒိဋ္ဌိကာ’’တိ စ မနသိ ကရောတိ၊ ‘‘သမ္မာဒိဋ္ဌိကမ္မသမ္မာဒါနာ’’တိ စ မနသိ ကရောတိ၊ ‘‘တေ ကာယဿ ဘေဒါ ပရံ မရဏာ သုဂတိံ သဂ္ဂံ လောကံ ဥပပန္နာ’’တိ စ မနသိ ကရောတိ၊ ဒိဗ္ဗေန စက္ခုနာ ရူပံ ပဿတီတိ? န ဟေဝံ ဝတ္တဗ္ဗေ။ပေ။.

‘‘တေ ကာယဿ ဘေဒါ ပရံ မရဏာ သုဂတိံ သဂ္ဂံ လောကံ ဥပပန္နာ’’တိ စ မနသိ ကရောတိ၊ ဒိဗ္ဗေန စက္ခုနာ ရူပံ ပဿတီတိ? အာမန္တာ. ဒွိန္နံ ဖဿာနံ ဒွိန္နံ စိတ္တာနံ သမောဓာနံ ဟောတီတိ? န ဟေဝံ ဝတ္တဗ္ဗေ။ပေ။.

၃၇၈. ယထာကမ္မူပဂတံ ဉာဏံ ဒိဗ္ဗစက္ခုန္တိ? အာမန္တာ. အတ္ထိ ကောစိ အဒိဗ္ဗစက္ခုကော ဒိဗ္ဗစက္ခုံ အပ္ပဋိလဒ္ဓေါ အနဓိဂတော အသစ္ဆိကတော ယထာကမ္မူပဂတံ ဇာနာတီတိ? အာမန္တာ. ဟဉ္စိ အတ္ထိ ကောစိ အဒိဗ္ဗစက္ခုကော ဒိဗ္ဗစက္ခုံ အပ္ပဋိလဒ္ဓေါ အနဓိဂတော အသစ္ဆိကတော ယထာကမ္မူပဂတံ ဇာနာတိ၊ နော စ ဝတ ရေ ဝတ္တဗ္ဗေ – ‘‘ယထာကမ္မူပဂတံ ဉာဏံ ဒိဗ္ဗစက္ခု’’န္တိ.

ယထာကမ္မူပဂတံ ဉာဏံ ဒိဗ္ဗစက္ခုန္တိ? အာမန္တာ. အာယသ္မာ သာရိပုတ္တော ယထာကမ္မူပဂတံ ဉာဏံ ဇာနာတီတိ? အာမန္တာ. ဟဉ္စိ အာယသ္မာ သာရိပုတ္တော ယထာကမ္မူပဂတံ ဉာဏံ ဇာနာတိ၊ နော စ ဝတ ရေ ဝတ္တဗ္ဗေ – ‘‘ယထာကမ္မူပဂတံ ဉာဏံ ဒိဗ္ဗစက္ခု’’န္တိ.

ယထာကမ္မူပဂတံ ဉာဏံ ဒိဗ္ဗစက္ခုန္တိ? အာမန္တာ. အာယသ္မာ သာရိပုတ္တော ယထာကမ္မူပဂတံ ဉာဏံ ဇာနာတီတိ? အာမန္တာ. အတ္ထာယသ္မတော သာရိပုတ္တဿ ဒိဗ္ဗစက္ခုန္တိ? န ဟေဝံ ဝတ္တဗ္ဗေ။ပေ။.

အတ္ထာယသ္မတော သာရိပုတ္တဿ ဒိဗ္ဗစက္ခုန္တိ? အာမန္တာ. နနု အာယသ္မာ သာရိပုတ္တော ဧတဒဝေါစ –

‘‘နေဝ ပုဗ္ဗေနိဝါသာယ၊ နပိ ဒိဗ္ဗဿ စက္ခုနော၊

စေတောပရိယာယ ဣဒ္ဓိယာ၊ သောတဓာတုဝိသုဒ္ဓိယာ၊

စုတိယာ ဥပပတ္တိယာ၊ ပဏိဓိ မေ န ဝိဇ္ဇတီ’’တိ [ထေရဂါ. ၉၉၆ ထေရဂါထာယံ].

အတ္ထေဝ သုတ္တန္တောတိ? အာမန္တာ. တေန ဟိ န ဝတ္တဗ္ဗံ – ‘‘ယထာကမ္မူပဂတံ ဉာဏံ ဒိဗ္ဗစက္ခု’’န္တိ.

ယထာကမ္မူပဂတဉာဏကထာ နိဋ္ဌိတာ.