(၂၇) ၇. ဒိဗ္ဗစက္ခုကထာ

၃၇၃. မံသစက္ခုံ ဓမ္မုပတ္ထဒ္ဓံ ဒိဗ္ဗစက္ခုံ ဟောတီတိ? အာမန္တာ. မံသစက္ခုံ ဒိဗ္ဗစက္ခုံ၊ ဒိဗ္ဗစက္ခုံ မံသစက္ခုန္တိ? န ဟေဝံ ဝတ္တဗ္ဗေ။ပေ။.

မံသစက္ခုံ ဓမ္မုပတ္ထဒ္ဓံ ဒိဗ္ဗစက္ခုံ ဟောတီတိ? အာမန္တာ. ယာဒိသံ မံသစက္ခုံ တာဒိသံ ဒိဗ္ဗစက္ခုံ၊ ယာဒိသံ ဒိဗ္ဗစက္ခုံ တာဒိသံ မံသစက္ခုန္တိ? န ဟေဝံ ဝတ္တဗ္ဗေ။ပေ။.

မံသစက္ခုံ ဓမ္မုပတ္ထဒ္ဓံ ဒိဗ္ဗစက္ခုံ ဟောတီတိ? အာမန္တာ. တညေဝ မံသစက္ခုံ တံ ဒိဗ္ဗစက္ခုံ၊ တံ ဒိဗ္ဗစက္ခုံ တံ မံသစက္ခုန္တိ? န ဟေဝံ ဝတ္တဗ္ဗေ။ပေ။.

မံသစက္ခုံ ဓမ္မုပတ္ထဒ္ဓံ ဒိဗ္ဗစက္ခုံ ဟောတီတိ? အာမန္တာ. ယာဒိသော မံသစက္ခုဿ ဝိသယော အာနုဘာဝေါ ဂေါစရော တာဒိသော ဒိဗ္ဗဿ စက္ခုဿ ဝိသယော အာနုဘာဝေါ ဂေါစရောတိ? န ဟေဝံ ဝတ္တဗ္ဗေ။ပေ။.

မံသစက္ခုံ ဓမ္မုပတ္ထဒ္ဓံ ဒိဗ္ဗစက္ခုံ ဟောတီတိ? အာမန္တာ. ဥပါဒိဏ္ဏံ [ဥပါဒိန္နံ (သျာ. ကံ.)] ဟုတွာ အနုပါဒိဏ္ဏံ ဟောတီတိ? န ဟေဝံ ဝတ္တဗ္ဗေ။ပေ။.

ဥပါဒိဏ္ဏံ ဟုတွာ အနုပါဒိဏ္ဏံ ဟောတီတိ? အာမန္တာ. ကာမာဝစရံ ဟုတွာ ရူပါဝစရံ ဟောတီတိ? န ဟေဝံ ဝတ္တဗ္ဗေ။ပေ။.

ကာမာဝစရံ ဟုတွာ ရူပါဝစရံ ဟောတီတိ? အာမန္တာ. ရူပါဝစရံ ဟုတွာ အရူပါဝစရံ ဟောတီတိ? န ဟေဝံ ဝတ္တဗ္ဗေ။ပေ။.

ရူပါဝစရံ ဟုတွာ အရူပါဝစရံ ဟောတီတိ? အာမန္တာ. ပရိယာပန္နံ ဟုတွာ အပရိယာပန္နံ ဟောတီတိ? န ဟေဝံ ဝတ္တဗ္ဗေ။ပေ။.

၃၇၄. မံသစက္ခုံ ဓမ္မုပတ္ထဒ္ဓံ ဒိဗ္ဗစက္ခုံ ဟောတီတိ? အာမန္တာ. ဒိဗ္ဗစက္ခုံ ဓမ္မုပတ္ထဒ္ဓံ မံသစက္ခုံ ဟောတီတိ? န ဟေဝံ ဝတ္တဗ္ဗေ။ပေ။.

မံသစက္ခုံ ဓမ္မုပတ္ထဒ္ဓံ ဒိဗ္ဗစက္ခုံ ဟောတီတိ? အာမန္တာ. ဒိဗ္ဗစက္ခုံ ဓမ္မုပတ္ထဒ္ဓံ ပညာစက္ခုံ ဟောတီတိ? န ဟေဝံ ဝတ္တဗ္ဗေ။ပေ။.

မံသစက္ခုံ ဓမ္မုပတ္ထဒ္ဓံ ဒိဗ္ဗစက္ခုံ ဟောတီတိ? အာမန္တာ. ဒိဗ္ဗစက္ခုံ ဓမ္မုပတ္ထဒ္ဓံ မံသစက္ခုံ ဟောတီတိ? န ဟေဝံ ဝတ္တဗ္ဗေ။ပေ။.

မံသစက္ခုံ ဓမ္မုပတ္ထဒ္ဓံ ဒိဗ္ဗစက္ခုံ ဟောတီတိ? အာမန္တာ. ဒွေဝ စက္ခူနီတိ? န ဟေဝံ ဝတ္တဗ္ဗေ။ပေ။ ဒွေဝ စက္ခူနီတိ? အာမန္တာ. နနု တီဏိ စက္ခူနိ ဝုတ္တာနိ ဘဂဝတာ – မံသစက္ခုံ၊ ဒိဗ္ဗစက္ခုံ၊ ပညာစက္ခုန္တိ? အာမန္တာ. ဟဉ္စိ တီဏိ စက္ခူနိ ဝုတ္တာနိ ဘဂဝတာ – မံသစက္ခုံ၊ ဒိဗ္ဗစက္ခုံ၊ ပညာစက္ခုံ၊ နော စ ဝတ ရေ ဝတ္တဗ္ဗေ – ‘‘ဒွေဝ စက္ခူနီ’’တိ.

ဒွေဝ စက္ခူနီတိ? အာမန္တာ. နနု ဝုတ္တံ ဘဂဝတာ – ‘‘တီဏိမာနိ၊ ဘိက္ခဝေ၊ စက္ခူနိ! ကတမာနိ တီဏိ? မံသစက္ခုံ၊ ဒိဗ္ဗစက္ခုံ၊ ပညာစက္ခုန္တိ – ဣမာနိ ခေါ၊ ဘိက္ခဝေ၊ တီဏိ စက္ခူနီ’’တိ.

‘‘မံသစက္ခုံ ဒိဗ္ဗစက္ခုံ၊ ပညာစက္ခုံ အနုတ္တရံ၊

ဧတာနိ တီဏိ စက္ခူနိ၊ အက္ခာသိ ပုရိသုတ္တမော.

‘‘မံသစက္ခုဿ ဥပ္ပါဒေါ၊ မဂ္ဂေါ ဒိဗ္ဗဿ စက္ခုနော၊

ယဒါ စ ဉာဏံ ဥဒပါဒိ၊ ပညာစက္ခုံ အနုတ္တရံ၊

တဿ စက္ခုဿ ပဋိလာဘာ၊ သဗ္ဗဒုက္ခာ ပမုစ္စတီ’’တိ [ဣတိဝု. ၆၁ ဣတိဝုတ္တကေ].

အတ္ထေဝ သုတ္တန္တောတိ? အာမန္တာ. တေန ဟိ န ဝတ္တဗ္ဗံ – ‘‘ဒွေဝ စက္ခူနီ’’တိ.

ဒိဗ္ဗစက္ခုကထာ နိဋ္ဌိတာ.