၃. တတိယဝဂ္ဂေါ

(၂၄) ၄. ဝိမုစ္စမာနကထာ

၃၆၆. ဝိမုတ္တံ ဝိမုစ္စမာနန္တိ? အာမန္တာ. ဧကဒေသံ ဝိမုတ္တံ၊ ဧကဒေသံ အဝိမုတ္တန္တိ? န ဟေဝံ ဝတ္တဗ္ဗေ။ပေ။.

ဧကဒေသံ ဝိမုတ္တံ၊ ဧကဒေသံ အဝိမုတ္တန္တိ? အာမန္တာ. ဧကဒေသံ သောတာပန္နော၊ ဧကဒေသံ န သောတာပန္နော၊ ဧကဒေသံ သောတာပတ္တိဖလပ္ပတ္တော ပဋိလဒ္ဓေါ အဓိဂတော သစ္ဆိကတော ဥပသမ္ပဇ္ဇ ဝိဟရတိ၊ ကာယေန ဖုသိတွာ ဝိဟရတိ၊ ဧကဒေသံ န ကာယေန ဖုသိတွာ ဝိဟရတိ၊ ဧကဒေသံ သတ္တက္ခတ္တုပရမော ကောလင်္ကောလော ဧကဗီဇီ ဗုဒ္ဓေ အဝေစ္စပ္ပသာဒေန သမန္နာဂတော ဓမ္မေ။ပေ။ သံဃေ။ပေ။ အရိယကန္တေဟိ သီလေဟိ သမန္နာဂတော၊ ဧကဒေသံ အရိယကန္တေဟိ သီလေဟိ န သမန္နာဂတောတိ? န ဟေဝံ ဝတ္တဗ္ဗေ။ပေ။.

ဧကဒေသံ ဝိမုတ္တံ၊ ဧကဒေသံ အဝိမုတ္တန္တိ? အာမန္တာ. ဧကဒေသံ သကဒါဂါမီ၊ ဧကဒေသံ န သကဒါဂါမီ၊ ဧကဒေသံ သကဒါဂါမိဖလပ္ပတ္တော ပဋိလဒ္ဓေါ အဓိဂတော သစ္ဆိကတော ဥပသမ္ပဇ္ဇ ဝိဟရတိ၊ ကာယေန ဖုသိတွာ ဝိဟရတိ၊ ဧကဒေသံ န ကာယေန ဖုသိတွာ ဝိဟရတီတိ? န ဟေဝံ ဝတ္တဗ္ဗေ။ပေ။.

ဧကဒေသံ ဝိမုတ္တံ၊ ဧကဒေသံ အဝိမုတ္တန္တိ? အာမန္တာ. ဧကဒေသံ အနာဂါမီ၊ ဧကဒေသံ န အနာဂါမီ၊ ဧကဒေသံ အနာဂါမိဖလပ္ပတ္တော ပဋိလဒ္ဓေါ အဓိဂတော သစ္ဆိကတော ဥပသမ္ပဇ္ဇ ဝိဟရတိ၊ ကာယေန ဖုသိတွာ ဝိဟရတိ၊ ဧကဒေသံ န ကာယေန ဖုသိတွာ ဝိဟရတိ၊ ဧကဒေသံ အန္တရာပရိနိဗ္ဗာယီ၊ ဥပဟစ္စပရိနိဗ္ဗာယီ၊ အသင်္ခါရပရိနိဗ္ဗာယီ၊ သသင်္ခါရပရိနိဗ္ဗာယီ၊ ဥဒ္ဓံသောတောအကနိဋ္ဌဂါမီ၊ ဧကဒေသံ န ဥဒ္ဓံသောတောအကနိဋ္ဌဂါမီတိ? န ဟေဝံ ဝတ္တဗ္ဗေ။ပေ။.

ဧကဒေသံ ဝိမုတ္တံ၊ ဧကဒေသံ အဝိမုတ္တန္တိ? အာမန္တာ. ဧကဒေသံ အရဟာ ဧကဒေသံ န အရဟာ၊ ဧကဒေသံ အရဟတ္တပ္ပတ္တော ပဋိလဒ္ဓေါ အဓိဂတော သစ္ဆိကတော ဥပသမ္ပဇ္ဇ ဝိဟရတိ၊ ကာယေန ဖုသိတွာ ဝိဟရတိ၊ ဧကဒေသံ န ကာယေန ဖုသိတွာ ဝိဟရတိ၊ ဧကဒေသံ ဝီတရာဂေါ ဝီတဒေါသော ဝီတမောဟော။ပေ။ ဧကဒေသံ သစ္ဆိကာတဗ္ဗံ သစ္ဆိကတံ၊ ဧကဒေသံ သစ္ဆိကာတဗ္ဗံ န သစ္ဆိကတန္တိ? န ဟေဝံ ဝတ္တဗ္ဗေ။ပေ။.

ဝိမုတ္တံ ဝိမုစ္စမာနန္တိ? အာမန္တာ. ဥပ္ပါဒက္ခဏေ ဝိမုတ္တံ၊ ဘင်္ဂက္ခဏေ ဝိမုစ္စမာနန္တိ? န ဟေဝံ ဝတ္တဗ္ဗေ။ပေ။.

၃၆၇. န ဝတ္တဗ္ဗံ – ‘‘ဝိမုတ္တံ ဝိမုစ္စမာန’’န္တိ? အာမန္တာ. နနု ဝုတ္တံ ဘဂဝတာ – ‘‘တဿ ဧဝံ ဇာနတော ဧဝံ ပဿတော ကာမာသဝါပိ စိတ္တံ ဝိမုစ္စတိ၊ ဘဝါသဝါပိ စိတ္တံ ဝိမုစ္စတိ၊ အဝိဇ္ဇာသဝါပိ စိတ္တံ ဝိမုစ္စတီ’’တိ [ဒီ. နိ. ၁.၂၄၈ အာဒယော]! အတ္ထေဝ သုတ္တန္တောတိ? အာမန္တာ. တေန ဟိ ဝတ္တဗ္ဗံ [တေန ဟိ (သီ. သျာ. ကံ.)၊ တေန ဟိ န ဝတ္တဗ္ဗံ (က.)] – ‘‘ဝိမုတ္တံ ဝိမုစ္စမာန’’န္တိ.

ဝိမုတ္တံ ဝိမုစ္စမာနန္တိ? အာမန္တာ. နနု ဝုတ္တံ ဘဂဝတာ – ‘‘သော ဧဝံ သမာဟိတေ စိတ္တေ ပရိသုဒ္ဓေ ပရိယောဒါတေ အနင်္ဂဏေ ဝိဂတူပက္ကိလေသေ မုဒုဘူတေ ကမ္မနိယေ ဌိတေ အာနေဉ္ဇပ္ပတ္တေ အာသဝါနံ ခယဉာဏာယ စိတ္တံ အဘိနိန္နာမေတီ’’တိ! အတ္ထေဝ သုတ္တန္တောတိ? အာမန္တာ. တေန ဟိ န ဝတ္တဗ္ဗံ – ‘‘ဝိမုတ္တံ ဝိမုစ္စမာန’’န္တိ.

အတ္ထိ စိတ္တံ ဝိမုစ္စမာနန္တိ? အာမန္တာ. အတ္ထိ စိတ္တံ ရဇ္ဇမာနံ ဒုဿမာနံ မုယှမာနံ ကိလိဿမာနန္တိ? န ဟေဝံ ဝတ္တဗ္ဗေ။ပေ။ နနု ရတ္တဉ္စေဝ အရတ္တဉ္စ၊ ဒုဋ္ဌဉ္စေဝ အဒုဋ္ဌဉ္စ၊ မူဠှဉ္စေဝ အမူဠှဉ္စ၊ ဆိန္နဉ္စေဝ အဆိန္နဉ္စ၊ ဘိန္နဉ္စေဝ အဘိန္နဉ္စ၊ ကတဉ္စေဝ အကတဉ္စာတိ? အာမန္တာ. ဟဉ္စိ ရတ္တဉ္စေဝ အရတ္တဉ္စ၊ ဒုဋ္ဌဉ္စေဝ အဒုဋ္ဌဉ္စ၊ မူဠှဉ္စေဝ အမူဠှဉ္စ၊ ဆိန္နဉ္စေဝ အဆိန္နဉ္စ၊ ဘိန္နဉ္စေဝ အဘိန္နဉ္စ၊ ကတဉ္စေဝ အကတဉ္စ၊ နော စ ဝတ ရေ ဝတ္တဗ္ဗေ – ‘‘အတ္ထိ စိတ္တံ ဝိမုစ္စမာန’’န္တိ.

ဝိမုစ္စမာနကထာ နိဋ္ဌိတာ.