(၃၂) ၁၂. နေဝသညာနာသညာယတနကထာ

၃၈၄. နေဝသညာနာသညာယတနေ န ဝတ္တဗ္ဗံ – ‘‘သညာ အတ္ထီ’’တိ? အာမန္တာ. အသညဘဝေါ အသညဂတိ အသညသတ္တာဝါသော အသညသံသာရော အသညယောနိ အသညတ္တဘာဝပဋိလာဘောတိ? န ဟေဝံ ဝတ္တဗ္ဗေ။ပေ။.

နနု သညာဘဝေါ သညာဂတိ သညာသတ္တာဝါသော သညာသံသာရော သညာယောနိ သညတ္တဘာဝပဋိလာဘောတိ? အာမန္တာ. ဟဉ္စိ သညာဘဝေါ သညာဂတိ။ပေ။ သညတ္တဘာဝပဋိလာဘော၊ နော စ ဝတ ရေ ဝတ္တဗ္ဗေ – ‘‘နေဝသညာနာသညာယတနေ န ဝတ္တဗ္ဗံ – ‘သညာ အတ္ထီ’’’တိ.

နေဝသညာနာသညာယတနေ န ဝတ္တဗ္ဗံ – ‘‘သညာ အတ္ထီ’’တိ? အာမန္တာ. ဧကဝေါကာရဘဝေါ ဂတိ။ပေ။ အတ္တဘာဝပဋိလာဘောတိ? န ဟေဝံ ဝတ္တဗ္ဗေ။ပေ။.

နနု စတုဝေါကာရဘဝေါ ဂတိ။ပေ။ အတ္တဘာဝပဋိလာဘောတိ? အာမန္တာ. ဟဉ္စိ စတုဝေါကာရဘဝေါ ဂတိ။ပေ။ အတ္တဘာဝပဋိလာဘော၊ နော စ ဝတ ရေ ဝတ္တဗ္ဗေ – ‘‘နေဝသညာနာသညာယတနေ န ဝတ္တဗ္ဗံ – ‘သညာ အတ္ထီ’’’တိ.

၃၈၅. အသညသတ္တေသု န ဝတ္တဗ္ဗံ – ‘‘သညာ အတ္ထိ’’၊ သော စ အသညဘဝေါ အသညဂတိ အသညသတ္တာဝါသော အသညသံသာရော အသညယောနိ အသညတ္တဘာဝပဋိလာဘောတိ? အာမန္တာ. နေဝသညာနာသညာယတနေ န ဝတ္တဗ္ဗံ – ‘‘သညာ အတ္ထိ၊’’ သော စ အသညဘဝေါ အသညဂတိ အသညသတ္တာဝါသော အသညသံသာရော အသညယောနိ အသညတ္တဘာဝပဋိလာဘောတိ? န ဟေဝံ ဝတ္တဗ္ဗေ။ပေ။.

အသညသတ္တေသု န ဝတ္တဗ္ဗံ – ‘‘သညာ အတ္ထိ၊’’ သော စ ဧကဝေါကာရဘဝေါ ဂတိ။ပေ။ အတ္တဘာဝပဋိလာဘောတိ? အာမန္တာ. နေဝသညာနာသညာယတနေ န ဝတ္တဗ္ဗံ – ‘‘သညာ အတ္ထိ၊’’ သော စ ဧကဝေါကာရဘဝေါ ဂတိ သတ္တာဝါသော သံသာရော ယောနိ အတ္တဘာဝပဋိလာဘောတိ? န ဟေဝံ ဝတ္တဗ္ဗေ။ပေ။.

နေဝသညာနာသညာယတနေ န ဝတ္တဗ္ဗံ – ‘‘သညာ အတ္ထိ၊’’ သော စ သညာဘဝေါ သညာဂတိ။ပေ။ သညတ္တဘာဝပဋိလာဘောတိ? အာမန္တာ. အသညသတ္တေသု န ဝတ္တဗ္ဗံ – ‘‘သညာ အတ္ထိ၊’’ သော စ သညာဘဝေါ သညာဂတိ။ပေ။ သညတ္တဘာဝပဋိလာဘောတိ? န ဟေဝံ ဝတ္တဗ္ဗေ။ပေ။.

နေဝသညာနာသညာယတနေ န ဝတ္တဗ္ဗံ – ‘‘သညာ အတ္ထိ၊’’ သော စ စတုဝေါကာရဘဝေါ ဂတိ။ပေ။ အတ္တဘာဝပဋိလာဘောတိ? အာမန္တာ. အသညသတ္တေသု န ဝတ္တဗ္ဗံ – ‘‘သညာ အတ္ထိ၊’’ သော စ စတုဝေါကာရဘဝေါ ဂတိ။ပေ။ အတ္တဘာဝပဋိလာဘောတိ? န ဟေဝံ ဝတ္တဗ္ဗေ။ပေ။.

နေဝသညာနာသညာယတနေ န ဝတ္တဗ္ဗံ – ‘‘သညာ အတ္ထီ’’တိ? အာမန္တာ. နနု နေဝသညာနာသညာယတနံ စတုဝေါကာရဘဝေါတိ? အာမန္တာ. ဟဉ္စိ နေဝသညာနာသညာယတနံ စတုဝေါကာရဘဝေါ၊ နော စ ဝတ ရေ ဝတ္တဗ္ဗေ – ‘‘နေဝသညာနာသညာယတနေ န ဝတ္တဗ္ဗံ – ‘သညာ အတ္ထီ’’’တိ.

၃၈၆. နေဝသညာနာသညာယတနံ စတုဝေါကာရဘဝေါ နေဝသညာနာသညာယတနေ န ဝတ္တဗ္ဗံ – ‘‘သညာ အတ္ထီ’’တိ? အာမန္တာ. အာကာသာနဉ္စာယတနံ စတုဝေါကာရဘဝေါ အာကာသာနဉ္စာယတနေ န ဝတ္တဗ္ဗံ – ‘‘သညာ အတ္ထီ’’တိ? န ဟေဝံ ဝတ္တဗ္ဗေ။ပေ။.

နေဝသညာနာသညာယတနံ စတုဝေါကာရဘဝေါ၊ နေဝသညာနာသညာယတနေ န ဝတ္တဗ္ဗံ – ‘‘သညာ အတ္ထီ’’တိ? အာမန္တာ. ဝိညာဏဉ္စာယတနံ။ပေ။ အာကိဉ္စညာယတနံ စတုဝေါကာရဘဝေါ၊ အာကိဉ္စညာယတနေ န ဝတ္တဗ္ဗံ – ‘‘သညာ အတ္ထီ’’တိ? န ဟေဝံ ဝတ္တဗ္ဗေ။ပေ။.

အာကာသာနဉ္စာယတနံ စတုဝေါကာရဘဝေါ၊ အတ္ထိ တတ္ထ သညာတိ? အာမန္တာ. နေဝသညာနာသညာယတနံ စတုဝေါကာရဘဝေါ၊ အတ္ထိ တတ္ထ သညာတိ? န ဟေဝံ ဝတ္တဗ္ဗေ။ပေ။.

ဝိညာဏဉ္စာယတနံ။ပေ။ အာကိဉ္စညာယတနံ စတုဝေါကာရဘဝေါ၊ အတ္ထိ တတ္ထ သညာတိ? အာမန္တာ. နေဝသညာနာသညာယတနံ စတုဝေါကာရဘဝေါ၊ အတ္ထိ တတ္ထ သညာတိ? န ဟေဝံ ဝတ္တဗ္ဗေ။ပေ။.

နေဝသညာနာသညာယတနေ န ဝတ္တဗ္ဗံ – ‘‘သညာ အတ္ထီ’’တိ ဝါ ‘‘နတ္ထီ’’တိ ဝါတိ? အာမန္တာ. နနု နေဝသညာနာသညာယတနံ စတုဝေါကာရဘဝေါတိ? အာမန္တာ. ဟဉ္စိ နေဝသညာနာသညာယတနံ စတုဝေါကာရဘဝေါ၊ နော စ ဝတ ရေ ဝတ္တဗ္ဗေ – ‘‘နေဝသညာနာသညာယတနေ န ဝတ္တဗ္ဗံ – ‘သညာ အတ္ထီ’တိ ဝါ ‘နတ္ထီ’တိ ဝါ’’တိ.

နေဝသညာနာသညာယတနံ စတုဝေါကာရဘဝေါ၊ နေဝသညာနာသညာယတနေ န ဝတ္တဗ္ဗံ – ‘‘သညာ အတ္ထီ’’တိ ဝါ ‘‘နတ္ထီ’’တိ ဝါတိ? အာမန္တာ. အာကာသာနဉ္စာယတနံ။ပေ။ ဝိညာဏဉ္စာယတနံ။ပေ။ အာကိဉ္စညာယတနံ စတုဝေါကာရဘဝေါ၊ အာကိဉ္စညာယတနေ န ဝတ္တဗ္ဗံ – ‘‘သညာ အတ္ထီ’’တိ ဝါ ‘‘နတ္ထီ’’တိ ဝါတိ? န ဟေဝံ ဝတ္တဗ္ဗေ။ပေ။.

နေဝသညာနာသညာယတနေ န ဝတ္တဗ္ဗံ [နေဝသညာနာသညာယတနေ ဝတ္တဗ္ဗံ (?)] – ‘‘သညာ အတ္ထီ’’တိ ဝါ ‘‘နတ္ထီ’’တိ ဝါတိ? အာမန္တာ. နနု နေဝသညာနာသညာယတနန္တိ? အာမန္တာ. ဟဉ္စိ နေဝသညာနာသညာယတနံ၊ တေန ဝတ ရေ ဝတ္တဗ္ဗေ – ‘‘နေဝသညာနာသညာယတနေ န ဝတ္တဗ္ဗံ – ‘သညာ အတ္ထီ’တိ ဝါ ‘နတ္ထီ’တိ ဝါ’’တိ.

နေဝသညာနာသညာယတနန္တိ ကတွာ နေဝသညာနာသညာယတနေ န ဝတ္တဗ္ဗံ – ‘‘သညာ အတ္ထီ’’တိ ဝါ ‘‘နတ္ထီ’’တိ ဝါတိ? အာမန္တာ. အဒုက္ခမသုခါ ဝေဒနာတိ ကတွာ အဒုက္ခမသုခါယ ဝေဒနာယ [အဒုက္ခမသုခါ ဝေဒနာ (သီ. က.)] န ဝတ္တဗ္ဗံ – ‘‘ဝေဒနာ’’တိ ဝါ ‘‘အဝေဒနာ’’တိ ဝါတိ? န ဟေဝံ ဝတ္တဗ္ဗေ။ပေ။.

နေဝသညာနာသညာယတနကထာ နိဋ္ဌိတာ.

တတိယဝဂ္ဂေါ.

တဿုဒ္ဒါနံ –

ဗလံ သာဓာရဏံ အရိယံ၊ သရာဂံ စိတ္တံ ဝိမုစ္စတိ၊

ဝိမုတ္တံ ဝိမုစ္စမာနံ၊ အတ္ထိ စိတ္တံ ဝိမုစ္စမာနံ.

အဋ္ဌမကဿ ပုဂ္ဂလဿ၊ ဒိဋ္ဌိပရိယုဋ္ဌာနံ ပဟီနံ၊

အဋ္ဌမကဿ ပုဂ္ဂလဿ၊ နတ္ထိ ပဉ္စိန္ဒြိယာနိ စက္ခုံ.

သောတံ ဓမ္မုပတ္ထဒ္ဓံ၊ ယထာကမ္မူပဂတံ ဉာဏံ၊

ဒေဝေသု သံဝရော အသည-သတ္တေသု သညာ ဧဝမေဝ ဘဝဂ္ဂန္တိ.