(၂၁) ၁. ဗလကထာ

၃၅၄. တထာဂတဗလံ သာဝကသာဓာရဏန္တိ? အာမန္တာ. တထာဂတဗလံ သာဝကဗလံ၊ သာဝကဗလံ တထာဂတဗလန္တိ? န ဟေဝံ ဝတ္တဗ္ဗေ။ပေ။.

တထာဂတဗလံ သာဝကသာဓာရဏန္တိ? အာမန္တာ. တညေဝ တထာဂတဗလံ တံ သာဝကဗလံ၊ တညေဝ သာဝကဗလံ တံ တထာဂတဗလန္တိ? န ဟေဝံ ဝတ္တဗ္ဗေ။ပေ။.

တထာဂတဗလံ သာဝကသာဓာရဏန္တိ? အာမန္တာ. ယာဒိသံ တထာဂတဗလံ တာဒိသံ သာဝကဗလံ၊ ယာဒိသံ သာဝကဗလံ တာဒိသံ တထာဂတဗလန္တိ? န ဟေဝံ ဝတ္တဗ္ဗေ။ပေ။.

တထာဂတဗလံ သာဝကသာဓာရဏန္တိ? အာမန္တာ. ယာဒိသော တထာဂတဿ ပုဗ္ဗယောဂေါ ပုဗ္ဗစရိယာ ဓမ္မက္ခာနံ ဓမ္မဒေသနာ တာဒိသော သာဝကဿ ပုဗ္ဗယောဂေါ ပုဗ္ဗစရိယာ ဓမ္မက္ခာနံ ဓမ္မဒေသနာတိ? န ဟေဝံ ဝတ္တဗ္ဗေ။ပေ။.

တထာဂတဗလံ သာဝကသာဓာရဏန္တိ? အာမန္တာ. တထာဂတော ဇိနော သတ္ထာ သမ္မာသမ္ဗုဒ္ဓေါ သဗ္ဗညူ သဗ္ဗဒဿာဝီ ဓမ္မဿာမီ ဓမ္မပ္ပဋိသရဏောတိ? အာမန္တာ. သာဝကော ဇိနော သတ္ထာ သမ္မာသမ္ဗုဒ္ဓေါ သဗ္ဗညူ သဗ္ဗဒဿာဝီ ဓမ္မဿာမီ ဓမ္မပ္ပဋိသရဏောတိ? န ဟေဝံ ဝတ္တဗ္ဗေ။ပေ။.

တထာဂတဗလံ သာဝကသာဓာရဏန္တိ? အာမန္တာ. တထာဂတော အနုပ္ပန္နဿ မဂ္ဂဿ ဥပ္ပါဒေတာ အသဉ္ဇာတဿ မဂ္ဂဿ သဉ္ဇနေတာ အနက္ခာတဿ မဂ္ဂဿ အက္ခာတာ မဂ္ဂညူ မဂ္ဂဝိဒူ မဂ္ဂကောဝိဒေါတိ? အာမန္တာ. သာဝကော အနုပ္ပန္နဿ မဂ္ဂဿ ဥပ္ပါဒေတာ အသဉ္ဇာတဿ မဂ္ဂဿ သဉ္ဇနေတာ အနက္ခာတဿ မဂ္ဂဿ အက္ခာတာ မဂ္ဂညူ မဂ္ဂဝိဒူ မဂ္ဂကောဝိဒေါတိ? န ဟေဝံ ဝတ္တဗ္ဗေ။ပေ။.

ဣန္ဒြိယပရောပရိယတ္တံ ယထာဘူတံ ဉာဏံ တထာဂတဗလံ သာဝကသာဓာရဏန္တိ? အာမန္တာ. သာဝကော သဗ္ဗညူ သဗ္ဗဒဿာဝီတိ? န ဟေဝံ ဝတ္တဗ္ဗေ။ပေ။.

၃၅၅. သာဝကော ဌာနာဌာနံ ဇာနာတီတိ? အာမန္တာ. ဟဉ္စိ သာဝကော ဌာနာဌာနံ ဇာနာတိ၊ တေန ဝတ ရေ ဝတ္တဗ္ဗေ – ‘‘ဌာနာဌာနံ ယထာဘူတံ ဉာဏံ တထာဂတဗလံ သာဝကသာဓာရဏ’’န္တိ.

သာဝကော အတီတာနာဂတပစ္စုပ္ပန္နာနံ ကမ္မသမာဒါနာနံ ဌာနသော ဟေတုသော ဝိပါကံ ဇာနာတီတိ? အာမန္တာ. ဟဉ္စိ သာဝကော အတီတာနာဂတပစ္စုပ္ပန္နာနံ ကမ္မသမာဒါနာနံ ဌာနသော ဟေတုသော ဝိပါကံ ဇာနာတိ၊ တေန ဝတ ရေ ဝတ္တဗ္ဗေ – ‘‘အတီတာနာဂတပစ္စုပ္ပန္နာနံ ကမ္မသမာဒါနာနံ ဌာနသော ဟေတုသော ဝိပါကံ ယထာဘူတံ ဉာဏံ တထာဂတဗလံ သာဝကသာဓာရဏ’’န္တိ.

သာဝကော သဗ္ဗတ္ထဂါမိနိံ ပဋိပဒံ ဇာနာတီတိ? အာမန္တာ. ဟဉ္စိ သာဝကော သဗ္ဗတ္ထဂါမိနိံ ပဋိပဒံ ဇာနာတိ၊ တေန ဝတ ရေ ဝတ္တဗ္ဗေ – ‘‘သဗ္ဗတ္ထဂါမိနိံ ပဋိပဒံ ယထာဘူတံ ဉာဏံ တထာဂတဗလံ သာဝကသာဓာရဏ’’န္တိ.

သာဝကော အနေကဓာတုံ နာနာဓာတုံ လောကံ ဇာနာတီတိ? အာမန္တာ. ဟဉ္စိ သာဝကော အနေကဓာတုံ နာနာဓာတုံ လောကံ ဇာနာတိ၊ တေန ဝတ ရေ ဝတ္တဗ္ဗေ – ‘‘အနေကဓာတုံ နာနာဓာတုံ လောကံ ယထာဘူတံ ဉာဏံ တထာဂတဗလံ သာဝကသာဓာရဏ’’န္တိ.

သာဝကော သတ္တာနံ နာနာဓိမုတ္တိကတံ ဇာနာတီတိ? အာမန္တာ. ဟဉ္စိ သာဝကော သတ္တာနံ နာနာဓိမုတ္တိကတံ ဇာနာတိ၊ တေန ဝတ ရေ ဝတ္တဗ္ဗေ – ‘‘သတ္တာနံ နာနာဓိမုတ္တိကတံ ယထာဘူတံ ဉာဏံ တထာဂတဗလံ သာဝကသာဓာရဏ’’န္တိ.

သာဝကော ဈာနဝိမောက္ခသမာဓိသမာပတ္တီနံ သံကိလေသံ ဝေါဒါနံ ဝုဋ္ဌာနံ ဇာနာတီတိ? အာမန္တာ. ဟဉ္စိ သာဝကော ဈာနဝိမောက္ခသမာဓိသမာပတ္တီနံ သံကိလေသံ ဝေါဒါနံ ဝုဋ္ဌာနံ ဇာနာတိ၊ တေန ဝတ ရေ ဝတ္တဗ္ဗေ – ‘‘ဈာနဝိမောက္ခသမာဓိသမာပတ္တီနံ သံကိလေသံ ဝေါဒါနံ ဝုဋ္ဌာနံ ယထာဘူတံ ဉာဏံ တထာဂတဗလံ သာဝကသာဓာရဏ’’န္တိ.

သာဝကော ပုဗ္ဗေနိဝါသာနုဿတိံ ဇာနာတီတိ? အာမန္တာ. ဟဉ္စိ သာဝကော ပုဗ္ဗေနိဝါသာနုဿတိံ ဇာနာတိ၊ တေန ဝတ ရေ ဝတ္တဗ္ဗေ – ‘‘ပုဗ္ဗေနိဝါသာနုဿတိ ယထာဘူတံ ဉာဏံ တထာဂတဗလံ သာဝကသာဓာရဏ’’န္တိ.

သာဝကော သတ္တာနံ စုတူပပါတံ ဇာနာတီတိ? အာမန္တာ. ဟဉ္စိ သာဝကော သတ္တာနံ စုတူပပါတံ ဇာနာတိ၊ တေန ဝတ ရေ ဝတ္တဗ္ဗေ – ‘‘သတ္တာနံ စုတူပပါတံ ယထာဘူတံ ဉာဏံ တထာဂတဗလံ သာဝကသာဓာရဏ’’န္တိ.

နနု တထာဂတဿာပိ အာသဝါ ခီဏာ သာဝကဿာပိ အာသဝါ ခီဏာတိ? အာမန္တာ. အတ္ထိ ကိဉ္စိ နာနာကရဏံ တထာဂတဿ ဝါ သာဝကဿ ဝါ အာသဝက္ခယေန ဝါ အာသဝက္ခယံ ဝိမုတ္တိယာ ဝါ ဝိမုတ္တီတိ? နတ္ထိ. ဟဉ္စိ နတ္ထိ ကိဉ္စိ နာနာကရဏံ တထာဂတဿ ဝါ သာဝကဿ ဝါ အာသဝက္ခယေန ဝါ အာသဝက္ခယံ ဝိမုတ္တိယာ ဝါ ဝိမုတ္တိ၊ တေန ဝတ ရေ ဝတ္တဗ္ဗေ – ‘‘အာသဝါနံ ခယေ ယထာဘူတံ ဉာဏံ တထာဂတဗလံ သာဝကသာဓာရဏ’’န္တိ.

၃၅၆. အာသဝါနံ ခယေ ယထာဘူတံ ဉာဏံ တထာဂတဗလံ သာဝကသာဓာရဏန္တိ? အာမန္တာ. ဌာနာဌာနေ ယထာဘူတံ ဉာဏံ တထာဂတဗလံ သာဝကသာဓာရဏန္တိ? န ဟေဝံ ဝတ္တဗ္ဗေ။ပေ။.

အာသဝါနံ ခယေ ယထာဘူတံ ဉာဏံ တထာဂတဗလံ သာဝကသာဓာရဏန္တိ? အာမန္တာ. သတ္တာနံ စုတူပပါတေ ယထာဘူတံ ဉာဏံ တထာဂတဗလံ သာဝကသာဓာရဏန္တိ? န ဟေဝံ ဝတ္တဗ္ဗေ။ပေ။.

ဌာနာဌာနေ ယထာဘူတံ ဉာဏံ တထာဂတဗလံ သာဝကအသာဓာရဏန္တိ? အာမန္တာ. အာသဝါနံ ခယေ ယထာဘူတံ ဉာဏံ တထာဂတဗလံ သာဝကအသာဓာရဏန္တိ? န ဟေဝံ ဝတ္တဗ္ဗေ။ပေ။.

သတ္တာနံ စုတူပပါတေ ယထာဘူတံ ဉာဏံ တထာဂတဗလံ သာဝကအသာဓာရဏန္တိ? အာမန္တာ. အာသဝါနံ ခယေ ယထာဘူတံ ဉာဏံ တထာဂတဗလံ သာဝကအသာဓာရဏန္တိ? န ဟေဝံ ဝတ္တဗ္ဗေ။ပေ။.

ဣန္ဒြိယပရောပရိယတ္တံ ယထာဘူတံ ဉာဏံ တထာဂတဗလံ သာဝကအသာဓာရဏန္တိ? အာမန္တာ. ဌာနာဌာနေ ယထာဘူတံ ဉာဏံ တထာဂတဗလံ သာဝကအသာဓာရဏန္တိ? န ဟေဝံ ဝတ္တဗ္ဗေ [အယမေတ္ထ သာဓာရဏပက္ခံ သန္ဓာယ ပဋိက္ခေပေါ (ဋီကာ ဩလောကေတဗ္ဗာ)] ။ပေ။.

ဣန္ဒြိယပရောပရိယတ္တံ ယထာဘူတံ ဉာဏံ တထာဂတဗလံ သာဝကအသာဓာရဏန္တိ? အာမန္တာ။ပေ။. အာသဝါနံ ခယေ ယထာဘူတံ ဉာဏံ တထာဂတဗလံ သာဝကအသာဓာရဏန္တိ? န ဟေဝံ ဝတ္တဗ္ဗေ။ပေ။.

ဌာနာဌာနေ ယထာဘူတံ ဉာဏံ တထာဂတဗလံ သာဝကသာဓာရဏန္တိ? အာမန္တာ. ဣန္ဒြိယပရောပရိယတ္တံ ယထာဘူတံ ဉာဏံ တထာဂတဗလံ သာဝကသာဓာရဏန္တိ? န ဟေဝံ ဝတ္တဗ္ဗေ။ပေ။.

အာသဝါနံ ခယေ ယထာဘူတံ ဉာဏံ တထာဂတဗလံ သာဝကသာဓာရဏန္တိ? အာမန္တာ. ဣန္ဒြိယပရောပရိယတ္တံ ယထာဘူတံ ဉာဏံ တထာဂတဗလံ သာဝကသာဓာရဏန္တိ? န ဟေဝံ ဝတ္တဗ္ဗေ။ပေ။.

ဗလကထာ နိဋ္ဌိတာ.