၅. သုဒ္ဓိကသံသန္ဒနံ

၁၇. ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေန၊ ရူပဉ္စ ဥပလဗ္ဘတိ သစ္စိကဋ္ဌပရမတ္ထေနာတိ? အာမန္တာ. အညံ ရူပံ အညော ပုဂ္ဂလောတိ? န ဟေဝံ ဝတ္တဗ္ဗေ.

အာဇာနာဟိ နိဂ္ဂဟံ. ဟဉ္စိ ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေန၊ ရူပဉ္စ ဥပလဗ္ဘတိ သစ္စိကဋ္ဌပရမတ္ထေန၊ တေန ဝတ ရေ ဝတ္တဗ္ဗေ – ‘‘အညံ ရူပံ အညော ပုဂ္ဂလော’’တိ. ယံ တတ္ထ ဝဒေသိ – ‘‘ဝတ္တဗ္ဗေ ခေါ – ‘ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေန၊ ရူပဉ္စ ဥပလဗ္ဘတိ သစ္စိကဋ္ဌပရမတ္ထေန၊’ နော စ ဝတ္တဗ္ဗေ – ‘အညံ ရူပံ အညော ပုဂ္ဂလော’’’တိ မိစ္ဆာ.

နော စေ ပန ဝတ္တဗ္ဗေ – ‘‘အညံ ရူပံ အညော ပုဂ္ဂလော’’တိ၊ နော စ ဝတ ရေ ဝတ္တဗ္ဗေ – ‘‘ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေန၊ ရူပဉ္စ ဥပလဗ္ဘတိ သစ္စိကဋ္ဌပရမတ္ထေနာ’’တိ. ယံ တတ္ထ ဝဒေသိ – ‘‘ဝတ္တဗ္ဗေ ခေါ – ‘ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေန၊ ရူပဉ္စ ဥပလဗ္ဘတိ သစ္စိကဋ္ဌပရမတ္ထေန’၊ နော စ ဝတ္တဗ္ဗေ – ‘အညံ ရူပံ အညော ပုဂ္ဂလော’’’တိ မိစ္ဆာ။ပေ။.

၁၈. ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေန၊ ဝေဒနာ စ ဥပလဗ္ဘတိ သစ္စိကဋ္ဌပရမတ္ထေန။ပေ။ သညာ စ ဥပလဗ္ဘတိ။ပေ။ သင်္ခါရာ စ ဥပလဗ္ဘန္တိ။ပေ။ ဝိညာဏဉ္စ ဥပလဗ္ဘတိ သစ္စိကဋ္ဌပရမတ္ထေနာတိ? အာမန္တာ. အညံ ဝိညာဏံ အညော ပုဂ္ဂလောတိ? န ဟေဝံ ဝတ္တဗ္ဗေ.

အာဇာနာဟိ နိဂ္ဂဟံ. ဟဉ္စိ ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေန၊ ဝိညာဏဉ္စ ဥပလဗ္ဘတိ သစ္စိကဋ္ဌပရမတ္ထေန၊ တေန ဝတ ရေ ဝတ္တဗ္ဗေ – ‘‘အညံ ဝိညာဏံ အညော ပုဂ္ဂလော’’တိ. ယံ တတ္ထ ဝဒေသိ – ‘‘ဝတ္တဗ္ဗေ ခေါ – ‘ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေန၊ ဝိညာဏဉ္စ ဥပလဗ္ဘတိ သစ္စိကဋ္ဌပရမတ္ထေန၊’ နော စ ဝတ္တဗ္ဗေ – ‘အညံ ဝိညာဏံ အညော ပုဂ္ဂလော’’’တိ မိစ္ဆာ.

နော စေ ပန ဝတ္တဗ္ဗေ – ‘‘အညံ ဝိညာဏံ အညော ပုဂ္ဂလော’’တိ၊ နော စ ဝတ ရေ ဝတ္တဗ္ဗေ – ‘‘ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေန၊ ဝိညာဏဉ္စ ဥပလဗ္ဘတိ သစ္စိကဋ္ဌပရမတ္ထေနာ’’တိ. ယံ တတ္ထ ဝဒေသိ – ‘‘ဝတ္တဗ္ဗေ ခေါ – ‘ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေန၊ ဝိညာဏဉ္စ ဥပလဗ္ဘတိ သစ္စိကဋ္ဌပရမတ္ထေန၊’ နော စ ဝတ္တဗ္ဗေ – ‘အညံ ဝိညာဏံ အညော ပုဂ္ဂလော’’’တိ မိစ္ဆာ။ပေ။.

၁၉. ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေန၊ စက္ခာယတနဉ္စ ဥပလဗ္ဘတိ သစ္စိကဋ္ဌပရမတ္ထေန။ပေ။ သောတာယတနဉ္စ ဥပလဗ္ဘတိ။ ဃာနာယတနဉ္စ ဥပလဗ္ဘတိ။ ဇိဝှါယတနဉ္စ ဥပလဗ္ဘတိ။ ကာယာယတနဉ္စ ဥပလဗ္ဘတိ။ ရူပါယတနဉ္စ ဥပလဗ္ဘတိ။ သဒ္ဒါယတနဉ္စ ဥပလဗ္ဘတိ။ ဂန္ဓာယတနဉ္စ ဥပလဗ္ဘတိ။ ရသာယတနဉ္စ ဥပလဗ္ဘတိ။ ဖောဋ္ဌဗ္ဗာယတနဉ္စ ဥပလဗ္ဘတိ။ မနာယတနဉ္စ ဥပလဗ္ဘတိ။ ဓမ္မာယတနဉ္စ ဥပလဗ္ဘတိ သစ္စိကဋ္ဌပရမတ္ထေန။ပေ။.

၂၀. စက္ခုဓာတု စ ဥပလဗ္ဘတိ သစ္စိကဋ္ဌပရမတ္ထေန။ပေ။ သောတဓာတု စ ဥပလဗ္ဘတိ။ ဃာနဓာတု စ ဥပလဗ္ဘတိ။ ဇိဝှါဓာတု စ ဥပလဗ္ဘတိ။ ကာယဓာတု စ ဥပလဗ္ဘတိ။ ရူပဓာတု စ ဥပလဗ္ဘတိ။ သဒ္ဒဓာတု စ ဥပလဗ္ဘတိ။ ဂန္ဓဓာတု စ ဥပလဗ္ဘတိ။ ရသဓာတု စ ဥပလဗ္ဘတိ။ ဖောဋ္ဌဗ္ဗဓာတု စ ဥပလဗ္ဘတိ။ စက္ခုဝိညာဏဓာတု စ ဥပလဗ္ဘတိ။ သောတဝိညာဏဓာတု စ ဥပလဗ္ဘတိ။ ဃာနဝိညာဏဓာတု စ ဥပလဗ္ဘတိ။ ဇိဝှါဝိညာဏဓာတု စ ဥပလဗ္ဘတိ။ ကာယဝိညာဏဓာတု စ ဥပလဗ္ဘတိ။ မနောဓာတု စ ဥပလဗ္ဘတိ။ မနောဝိညာဏဓာတု စ ဥပလဗ္ဘတိ။ ဓမ္မဓာတု စ ဥပလဗ္ဘတိ သစ္စိကဋ္ဌပရမတ္ထေန။ပေ။.

၂၁. စက္ခုန္ဒြိယဉ္စ ဥပလဗ္ဘတိ သစ္စိကဋ္ဌပရမတ္ထေန။ပေ။ သောတိန္ဒြိယဉ္စ ဥပလဗ္ဘတိ။ ဃာနိန္ဒြိယဉ္စ ဥပလဗ္ဘတိ။ ဇိဝှိန္ဒြိယဉ္စ ဥပလဗ္ဘတိ။ ကာယိန္ဒြိယဉ္စ ဥပလဗ္ဘတိ ။ မနိန္ဒြိယဉ္စ ဥပလဗ္ဘတိ။ ဇီဝိတိန္ဒြိယဉ္စ ဥပလဗ္ဘတိ။ ဣတ္ထိန္ဒြိယဉ္စ ဥပလဗ္ဘတိ။ ပုရိသိန္ဒြိယဉ္စ ဥပလဗ္ဘတိ။ သုခိန္ဒြိယဉ္စ ဥပလဗ္ဘတိ။ ဒုက္ခိန္ဒြိယဉ္စ ဥပလဗ္ဘတိ။ သောမနဿိန္ဒြိယဉ္စ ဥပလဗ္ဘတိ။ ဒေါမနဿိန္ဒြိယဉ္စ ဥပလဗ္ဘတိ။ ဥပေက္ခိန္ဒြိယဉ္စ ဥပလဗ္ဘတိ။ သဒ္ဓိန္ဒြိယဉ္စ ဥပလဗ္ဘတိ။ ဝီရိယိန္ဒြိယဉ္စ ဥပလဗ္ဘတိ။ သတိန္ဒြိယဉ္စ ဥပလဗ္ဘတိ။ သမာဓိန္ဒြိယဉ္စ ဥပလဗ္ဘတိ။ ပညိန္ဒြိယဉ္စ ဥပလဗ္ဘတိ။ အနညာတညဿာမီတိန္ဒြိယဉ္စ ဥပလဗ္ဘတိ။ အညိန္ဒြိယဉ္စ ဥပလဗ္ဘတိ။ အညာတာဝိန္ဒြိယဉ္စ ဥပလဗ္ဘတိ သစ္စိကဋ္ဌပရမတ္ထေနာတိ? အာမန္တာ. အညံ အညာတာဝိန္ဒြိယံ အညော ပုဂ္ဂလောတိ? န ဟေဝံ ဝတ္တဗ္ဗေ.

အာဇာနာဟိ နိဂ္ဂဟံ. ဟဉ္စိ ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေန၊ အညာတာဝိန္ဒြိယဉ္စ ဥပလဗ္ဘတိ သစ္စိကဋ္ဌပရမတ္ထေန၊ တေန ဝတ ရေ ဝတ္တဗ္ဗေ – ‘‘အညံ အညာတာဝိန္ဒြိယံ အညော ပုဂ္ဂလော’’တိ. ယံ တတ္ထ ဝဒေသိ – ‘‘ဝတ္တဗ္ဗေ ခေါ – ‘ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေန၊ အညာတာဝိန္ဒြိယဉ္စ ဥပလဗ္ဘတိ သစ္စိကဋ္ဌပရမတ္ထေန၊’ နော စ ဝတ္တဗ္ဗေ – ‘အညံ အညာတာဝိန္ဒြိယံ အညော ပုဂ္ဂလော’’’တိ မိစ္ဆာ.

နော စေ ပန ဝတ္တဗ္ဗေ – ‘‘အညံ အညာတာဝိန္ဒြိယံ အညော ပုဂ္ဂလော’’တိ၊ နော စ ဝတ ရေ ဝတ္တဗ္ဗေ – ‘‘ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေန၊ အညာတာဝိန္ဒြိယဉ္စ ဥပလဗ္ဘတိ သစ္စိကဋ္ဌပရမတ္ထေနာ’’တိ. ယံ တတ္ထ ဝဒေသိ – ‘‘ဝတ္တဗ္ဗေ ခေါ – ‘ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေန၊ အညာတာဝိန္ဒြိယဉ္စ ဥပလဗ္ဘတိ သစ္စိကဋ္ဌပရမတ္ထေန၊’ နော စ ဝတ္တဗ္ဗေ – ‘အညံ အညာတာဝိန္ဒြိယံ အညော ပုဂ္ဂလော’’’တိ မိစ္ဆာ။ပေ။.

၂၂. [ပု. ပ. မာတိကာ ၄.၂၄၊ အ. နိ. ၄.၉၅-၉၆] ပုဂ္ဂလော နုပလဗ္ဘတိ သစ္စိကဋ္ဌပရမတ္ထေနာတိ? အာမန္တာ. ဝုတ္တံ ဘဂဝတာ – ‘‘အတ္ထိ ပုဂ္ဂလော အတ္တဟိတာယ ပဋိပန္နော၊’’ ရူပဉ္စ ဥပလဗ္ဘတိ သစ္စိကဋ္ဌပရမတ္ထေနာတိ? အာမန္တာ. အညံ ရူပံ အညော ပုဂ္ဂလောတိ? န ဟေဝံ ဝတ္တဗ္ဗေ.

အာဇာနာဟိ ပဋိကမ္မံ. ဟဉ္စိ ဝုတ္တံ ဘဂဝတာ – ‘‘အတ္ထိ ပုဂ္ဂလော အတ္တဟိတာယ ပဋိပန္နော၊’’ ရူပဉ္စ ဥပလဗ္ဘတိ သစ္စိကဋ္ဌပရမတ္ထေန၊ တေန ဝတ ရေ ဝတ္တဗ္ဗေ – ‘‘အညံ ရူပံ အညော ပုဂ္ဂလော’’တိ. ယံ တတ္ထ ဝဒေသိ – ‘‘ဝတ္တဗ္ဗေ ခေါ – ‘ဝုတ္တံ ဘဂဝတာ – အတ္ထိ ပုဂ္ဂလော အတ္တဟိတာယ ပဋိပန္နော၊ ရူပဉ္စ ဥပလဗ္ဘတိ သစ္စိကဋ္ဌပရမတ္ထေန၊’ နော စ ဝတ္တဗ္ဗေ – ‘အညံ ရူပံ အညော ပုဂ္ဂလော’’’တိ မိစ္ဆာ.

နော စေ ပန ဝတ္တဗ္ဗေ – ‘‘အညံ ရူပံ အညော ပုဂ္ဂလော’’တိ၊ နော စ ဝတ ရေ ဝတ္တဗ္ဗေ – ‘‘ဝုတ္တံ ဘဂဝတာ – ‘အတ္ထိ ပုဂ္ဂလော အတ္တဟိတာယ ပဋိပန္နော၊’ ရူပဉ္စ ဥပလဗ္ဘတိ သစ္စိကဋ္ဌပရမတ္ထေနာ’’တိ. ယံ တတ္ထ ဝဒေသိ – ‘‘ဝတ္တဗ္ဗေ ခေါ – ‘ဝုတ္တံ ဘဂဝတာ – အတ္ထိ ပုဂ္ဂလော အတ္တဟိတာယ ပဋိပန္နော၊ ရူပဉ္စ ဥပလဗ္ဘတိ သစ္စိကဋ္ဌပရမတ္ထေန၊’ နော စ ဝတ္တဗ္ဗေ – ‘အညံ ရူပံ အညော ပုဂ္ဂလော’’’တိ မိစ္ဆာ။ပေ။.

၂၃. ပုဂ္ဂလော နုပလဗ္ဘတိ သစ္စိကဋ္ဌပရမတ္ထေနာတိ? အာမန္တာ. ဝုတ္တံ ဘဂဝတာ – ‘‘အတ္ထိ ပုဂ္ဂလော အတ္တဟိတာယ ပဋိပန္နော၊’’ ဝေဒနာ စ ဥပလဗ္ဘတိ။ပေ။ သညာ စ ဥပလဗ္ဘတိ။ပေ။ သင်္ခါရာ စ ဥပလဗ္ဘန္တိ။ပေ။ ဝိညာဏဉ္စ ဥပလဗ္ဘတိ သစ္စိကဋ္ဌပရမတ္ထေနာတိ? အာမန္တာ. အညံ ဝိညာဏံ အညော ပုဂ္ဂလောတိ? န ဟေဝံ ဝတ္တဗ္ဗေ.

အာဇာနာဟိ ပဋိကမ္မံ. ဟဉ္စိ ဝုတ္တံ ဘဂဝတာ – ‘‘အတ္ထိ ပုဂ္ဂလော အတ္တဟိတာယ ပဋိပန္နော၊’’ ဝိညာဏဉ္စ ဥပလဗ္ဘတိ သစ္စိကဋ္ဌပရမတ္ထေန၊ တေန ဝတ ရေ ဝတ္တဗ္ဗေ – ‘‘အညံ ဝိညာဏံ အညော ပုဂ္ဂလော’’တိ. ယံ တတ္ထ ဝဒေသိ – ‘‘ဝတ္တဗ္ဗေ ခေါ – ‘ဝုတ္တံ ဘဂဝတာ – အတ္ထိ ပုဂ္ဂလော အတ္တဟိတာယ ပဋိပန္နော၊ ဝိညာဏဉ္စ ဥပလဗ္ဘတိ သစ္စိကဋ္ဌပရမတ္ထေန၊’ နော စ ဝတ္တဗ္ဗေ – ‘အညံ ဝိညာဏံ အညော ပုဂ္ဂလော’’’တိ မိစ္ဆာ.

နော စေ ပန ဝတ္တဗ္ဗေ – ‘‘အညံ ဝိညာဏံ အညော ပုဂ္ဂလော’’တိ၊ နော စ ဝတ ရေ ဝတ္တဗ္ဗေ – ‘‘ဝုတ္တံ ဘဂဝတာ – ‘အတ္ထိ ပုဂ္ဂလော အတ္တဟိတာယ ပဋိပန္နော၊’ ဝိညာဏဉ္စ ဥပလဗ္ဘတိ သစ္စိကဋ္ဌပရမတ္ထေနာ’’တိ. ယံ တတ္ထ ဝဒေသိ – ‘‘ဝတ္တဗ္ဗေ ခေါ – ‘ဝုတ္တံ ဘဂဝတာ – အတ္ထိ ပုဂ္ဂလော အတ္တဟိတာယ ပဋိပန္နော၊’ ဝိညာဏဉ္စ ဥပလဗ္ဘတိ သစ္စိကဋ္ဌပရမတ္ထေန၊ နော စ ဝတ္တဗ္ဗေ – ‘အညံ ဝိညာဏံ အညော ပုဂ္ဂလော’’’တိ မိစ္ဆာ။ပေ။.

၂၄. ပုဂ္ဂလော နုပလဗ္ဘတိ သစ္စိကဋ္ဌပရမတ္ထေနာတိ? အာမန္တာ. ဝုတ္တံ ဘဂဝတာ – ‘‘အတ္ထိ ပုဂ္ဂလော အတ္တဟိတာယ ပဋိပန္နော၊’’ စက္ခာယတနဉ္စ ဥပလဗ္ဘတိ သစ္စိကဋ္ဌပရမတ္ထေန။ပေ။ သောတာယတနဉ္စ ဥပလဗ္ဘတိ။ပေ။ ဓမ္မာယတနဉ္စ ဥပလဗ္ဘတိ သစ္စိကဋ္ဌပရမတ္ထေန။ပေ။.

၂၅. စက္ခုဓာတု စ ဥပလဗ္ဘတိ သစ္စိကဋ္ဌပရမတ္ထေန။ပေ။ ကာယဓာတု စ ဥပလဗ္ဘတိ။ပေ။ ရူပဓာတု စ ဥပလဗ္ဘတိ။ပေ။ ဖောဋ္ဌဗ္ဗဓာတု စ ဥပလဗ္ဘတိ။ပေ။ စက္ခုဝိညာဏဓာတု စ ဥပလဗ္ဘတိ။ပေ။ မနောဝိညာဏဓာတု စ ဥပလဗ္ဘတိ။ပေ။ ဓမ္မဓာတု စ ဥပလဗ္ဘတိ သစ္စိကဋ္ဌပရမတ္ထေန။ပေ။.

၂၆. စက္ခုန္ဒြိယဉ္စ ဥပလဗ္ဘတိ သစ္စိကဋ္ဌပရမတ္ထေန။ပေ။ သောတိန္ဒြိယဉ္စ ဥပလဗ္ဘတိ သစ္စိကဋ္ဌပရမတ္ထေန။ပေ။ အညိန္ဒြိယဉ္စ [အညာတာဝိန္ဒြိယဉ္စ (ဗဟူသု)] ဥပလဗ္ဘတိ သစ္စိကဋ္ဌပရမတ္ထေန။ပေ။.

၂၇. ပုဂ္ဂလော နုပလဗ္ဘတိ သစ္စိကဋ္ဌပရမတ္ထေနာတိ? အာမန္တာ. ဝုတ္တံ ဘဂဝတာ – ‘‘အတ္ထိ ပုဂ္ဂလော အတ္တဟိတာယ ပဋိပန္နော၊’’ အညာတာဝိန္ဒြိယဉ္စ ဥပလဗ္ဘတိ သစ္စိကဋ္ဌပရမတ္ထေနာတိ? အာမန္တာ. အညံ အညာတာဝိန္ဒြိယံ အညော ပုဂ္ဂလောတိ? န ဟေဝံ ဝတ္တဗ္ဗေ.

အာဇာနာဟိ ပဋိကမ္မံ. ဟဉ္စိ ဝုတ္တံ ဘဂဝတာ – ‘‘အတ္ထိ ပုဂ္ဂလော အတ္တဟိတာယ ပဋိပန္နော၊’’ အညာတာဝိန္ဒြိယဉ္စ ဥပလဗ္ဘတိ သစ္စိကဋ္ဌပရမတ္ထေန၊ တေန ဝတ ရေ ဝတ္တဗ္ဗေ – ‘‘အညံ အညာတာဝိန္ဒြိယံ အညော ပုဂ္ဂလော’’တိ. ယံ တတ္ထ ဝဒေသိ – ‘‘ဝတ္တဗ္ဗေ ခေါ – ‘ဝုတ္တံ ဘဂဝတာ – အတ္ထိ ပုဂ္ဂလော အတ္တဟိတာယ ပဋိပန္နော၊ အညာတာဝိန္ဒြိယဉ္စ ဥပလဗ္ဘတိ သစ္စိကဋ္ဌပရမတ္ထေန၊’ နော စ ဝတ္တဗ္ဗေ – ‘အညံ အညာတာဝိန္ဒြိယံ အညော ပုဂ္ဂလော’’’တိ မိစ္ဆာ.

နော စေ ပန ဝတ္တဗ္ဗေ – ‘‘အညံ အညာတာဝိန္ဒြိယံ အညော ပုဂ္ဂလော’’တိ၊ နော စ ဝတ ရေ ဝတ္တဗ္ဗေ – ‘‘ဝုတ္တံ ဘဂဝတာ – ‘အတ္ထိ ပုဂ္ဂလော အတ္တဟိတာယ ပဋိပန္နော၊’ အညာတာဝိန္ဒြိယဉ္စ ဥပလဗ္ဘတိ သစ္စိကဋ္ဌပရမတ္ထေနာ’’တိ. ယံ တတ္ထ ဝဒေသိ – ‘‘ဝတ္တဗ္ဗေ ခေါ – ‘ဝုတ္တံ ဘဂဝတာ – အတ္ထိ ပုဂ္ဂလော အတ္တဟိတာယ ပဋိပန္နော၊ အညာတာဝိန္ဒြိယဉ္စ ဥပလဗ္ဘတိ သစ္စိကဋ္ဌပရမတ္ထေန၊’ နော စ ဝတ္တဗ္ဗေ – ‘အညံ အညာတာဝိန္ဒြိယံ အညော ပုဂ္ဂလော’’’တိ မိစ္ဆာ။ပေ။.

သုဒ္ဓိကသံသန္ဒနာ.