ရူပဝိဘတ္တိ

ဧကကနိဒ္ဒေသော

၅၉၄. သဗ္ဗံ ရူပံ န ဟေတုမေဝ၊ အဟေတုကမေဝ၊ ဟေတုဝိပ္ပယုတ္တမေဝ၊ သပ္ပစ္စယမေဝ၊ သင်္ခတမေဝ၊ ရူပမေဝ၊ လောကိယမေဝ၊ သာသဝမေဝ၊ သံယောဇနိယမေဝ၊ ဂန္ထနိယမေဝ၊ ဩဃနိယမေဝ၊ ယောဂနိယမေဝ၊ နီဝရဏိယမေဝ၊ ပရာမဋ္ဌမေဝ၊ ဥပါဒါနိယမေဝ၊ သံကိလေသိကမေဝ၊ အဗျာကတမေဝ၊ အနာရမ္မဏမေဝ၊ အစေတသိကမေဝ၊ စိတ္တဝိပ္ပယုတ္တမေဝ၊ နေဝဝိပါကနဝိပါကဓမ္မဓမ္မမေဝ၊ အသံကိလိဋ္ဌသံကိလေသိကမေဝ၊ န သဝိတက္ကသဝိစာရမေဝ၊ န အဝိတက္ကဝိစာရမတ္တမေဝ၊ အဝိတက္ကအဝိစာရမေဝ၊ န ပီတိသဟဂတမေဝ၊ န သုခသဟဂတမေဝ၊ န ဥပေက္ခာသဟဂတမေဝ၊ နေဝ ဒဿနေန န ဘာဝနာယ ပဟာတဗ္ဗမေဝ၊ နေဝ ဒဿနေန န ဘာဝနာယ ပဟာတဗ္ဗဟေတုကမေဝ၊ နေဝ အာစယဂါမိ န အပစယဂါမိမေဝ၊ နေဝသေက္ခနာသေက္ခမေဝ၊ ပရိတ္တမေဝ၊ ကာမာဝစရမေဝ၊ န ရူပါဝစရမေဝ၊ န အရူပါဝစရမေဝ၊ ပရိယာပန္နမေဝ၊ နော အပရိယာပန္နမေဝ၊ အနိယတမေဝ၊ အနိယျာနိကမေဝ၊ ဥပ္ပန္နံ ဆဟိ ဝိညာဏေဟိ ဝိညေယျမေဝ၊ အနိစ္စမေဝ၊ ဇရာဘိဘူတမေဝ.

ဧဝံ ဧကဝိဓေန ရူပသင်္ဂဟော.

ဧကကနိဒ္ဒေသော.

ဒုကနိဒ္ဒေသော

ဥပါဒါဘာဇနီယံ

၅၉၅. ကတမံ တံ ရူပံ ဥပါဒါ? စက္ခာယတနံ၊ သောတာယတနံ၊ ဃာနာယတနံ၊ ဇိဝှါယတနံ၊ ကာယာယတနံ၊ ရူပါယတနံ၊ သဒ္ဒါယတနံ၊ ဂန္ဓာယတနံ၊ ရသာယတနံ၊ ဣတ္ထိန္ဒြိယံ၊ ပုရိသိန္ဒြိယံ၊ ဇီဝိတိန္ဒြိယံ၊ ကာယဝိညတ္တိ၊ ဝစီဝိညတ္တိ၊ အာကာသဓာတု၊ ရူပဿ လဟုတာ၊ ရူပဿ မုဒုတာ၊ ရူပဿ ကမ္မညတာ၊ ရူပဿ ဥပစယော၊ ရူပဿ သန္တတိ၊ ရူပဿ ဇရတာ၊ ရူပဿ အနိစ္စတာ၊ ကဗဠီကာရော အာဟာရော.

၅၉၆. ကတမံ တံ ရူပံ စက္ခာယတနံ? ယံ စက္ခု [စက္ခုံ (သီ. သျာ.)] စတုန္နံ မဟာဘူတာနံ ဥပါဒါယ ပသာဒေါ အတ္တဘာဝပရိယာပန္နော အနိဒဿနော သပ္ပဋိဃော၊ ယေန စက္ခုနာ အနိဒဿနေန သပ္ပဋိဃေန ရူပံ သနိဒဿနံ သပ္ပဋိဃံ ပဿိ ဝါ ပဿတိ ဝါ ပဿိဿတိ ဝါ ပဿေ ဝါ၊ စက္ခုံ ပေတံ စက္ခာယတနံ ပေတံ စက္ခုဓာတု ပေသာ စက္ခုန္ဒြိယံ ပေတံ လောကော ပေသော ဒွါရာ ပေသာ သမုဒ္ဒေါ ပေသော ပဏ္ဍရံ ပေတံ ခေတ္တံ ပေတံ ဝတ္ထုံ ပေတံ နေတ္တံ ပေတံ နယနံ ပေတံ ဩရိမံ တီရံ ပေတံ သုညော ဂါမောပေသော – ဣဒံ တံ ရူပံ စက္ခာယတနံ.

၅၉၇. ကတမံ တံ ရူပံ စက္ခာယတနံ? ယံ စက္ခု စတုန္နံ မဟာဘူတာနံ ဥပါဒါယ ပသာဒေါ အတ္တဘာဝပရိယာပန္နော အနိဒဿနော သပ္ပဋိဃော၊ ယမှိ စက္ခုမှိ အနိဒဿနမှိ သပ္ပဋိဃမှိ ရူပံ သနိဒဿနံ သပ္ပဋိဃံ ပဋိဟညိ ဝါ ပဋိဟညတိ ဝါ ပဋိဟညိဿတိ ဝါ ပဋိဟညေ ဝါ၊ စက္ခုံ ပေတံ စက္ခာယတနံ ပေတံ စက္ခုဓာတု ပေသာ စက္ခုန္ဒြိယံ ပေတံ လောကော ပေသော ဒွါရာ ပေသာ သမုဒ္ဒေါ ပေသော ပဏ္ဍရံ ပေတံ ခေတ္တံ ပေတံ ဝတ္ထုံ ပေတံ နေတ္တံ ပေတံ နယနံ ပေတံ ဩရိမံ တီရံ ပေတံ သုညော ဂါမော ပေသော – ဣဒံ တံ ရူပံ စက္ခာယတနံ.

၅၉၈. ကတမံ တံ ရူပံ စက္ခာယတနံ? ယံ စက္ခု စတုန္နံ မဟာဘူတာနံ ဥပါဒါယ ပသာဒေါ အတ္တဘာဝပရိယာပန္နော အနိဒဿနော သပ္ပဋိဃော၊ ယံ စက္ခု အနိဒဿနံ သပ္ပဋိဃံ ရူပမှိ သနိဒဿနမှိ သပ္ပဋိဃမှိ ပဋိဟညိ ဝါ ပဋိဟညတိ ဝါ ပဋိဟညိဿတိ ဝါ ပဋိဟညေ ဝါ၊ စက္ခုံ ပေတံ စက္ခာယတနံ ပေတံ စက္ခုဓာတု ပေသာ စက္ခုန္ဒြိယံ ပေတံ လောကော ပေသော ဒွါရာ ပေသာ သမုဒ္ဒေါ ပေသော ပဏ္ဍရံ ပေတံ ခေတ္တံ ပေတံ ဝတ္ထုံ ပေတံ နေတ္တံ ပေတံ နယနံ ပေတံ ဩရိမံ တီရံ ပေတံ သုညော ဂါမော ပေသော – ဣဒံ တံ ရူပံ စက္ခာယတနံ.

၅၉၉. ကတမံ တံ ရူပံ စက္ခာယတနံ? ယံ စက္ခု စတုန္နံ မဟာဘူတာနံ ဥပါဒါယ ပသာဒေါ အတ္တဘာဝပရိယာပန္နော အနိဒဿနော သပ္ပဋိဃော၊ ယံ စက္ခုံ နိဿာယ ရူပံ အာရဗ္ဘ စက္ခုသမ္ဖဿော ဥပ္ပဇ္ဇိ ဝါ ဥပ္ပဇ္ဇတိ ဝါ ဥပ္ပဇ္ဇိဿတိ ဝါ ဥပ္ပဇ္ဇေ ဝါ။ပေ။ ယံ စက္ခုံ နိဿာယ ရူပံ အာရဗ္ဘ စက္ခုသမ္ဖဿဇာ ဝေဒနာ။ပေ။ သညာ။ပေ။ စေတနာ။ပေ။ စက္ခုဝိညာဏံ ဥပ္ပဇ္ဇိ ဝါ ဥပ္ပဇ္ဇတိ ဝါ ဥပ္ပဇ္ဇိဿတိ ဝါ ဥပ္ပဇ္ဇေ ဝါ။ပေ။ ယံ စက္ခုံ နိဿာယ ရူပါရမ္မဏော စက္ခုသမ္ဖဿော ဥပ္ပဇ္ဇိ ဝါ ဥပ္ပဇ္ဇတိ ဝါ ဥပ္ပဇ္ဇိဿတိ ဝါ ဥပ္ပဇ္ဇေ ဝါ။ပေ။ ယံ စက္ခုံ နိဿာယ ရူပါရမ္မဏာ စက္ခုသမ္ဖဿဇာ ဝေဒနာ။ပေ။ သညာ။ပေ။ စေတနာ။ပေ။ စက္ခုဝိညာဏံ ဥပ္ပဇ္ဇိ ဝါ ဥပ္ပဇ္ဇတိ ဝါ ဥပ္ပဇ္ဇိဿတိ ဝါ ဥပ္ပဇ္ဇေ ဝါ၊ စက္ခုံ ပေတံ စက္ခာယတနံ ပေတံ စက္ခုဓာတု ပေသာ စက္ခုန္ဒြိယံ ပေတံ လောကော ပေသော ဒွါရာ ပေသာ သမုဒ္ဒေါ ပေသော ပဏ္ဍရံ ပေတံ ခေတ္တံ ပေတံ ဝတ္ထုံ ပေတံ နေတ္တံ ပေတံ နယနံ ပေတံ ဩရိမံ တီရံ ပေတံ သုညော ဂါမော ပေသော – ဣဒံ တံ ရူပံ စက္ခာယတနံ.

၆၀၀. ကတမံ တံ ရူပံ သောတာယတနံ? ယံ သောတံ စတုန္နံ မဟာဘူတာနံ ဥပါဒါယ ပသာဒေါ အတ္တဘာဝပရိယာပန္နော အနိဒဿနော သပ္ပဋိဃော၊ ယေန သောတေန အနိဒဿနေန သပ္ပဋိဃေန သဒ္ဒံ အနိဒဿနံ သပ္ပဋိဃံ သုဏိ ဝါ သုဏာတိ ဝါ သုဏိဿတိ ဝါ သုဏေ ဝါ၊ သောတံ ပေတံ သောတာယတနံ ပေတံ သောတဓာတု ပေသာ သောတိန္ဒြိယံ ပေတံ လောကော ပေသော ဒွါရာ ပေသာ သမုဒ္ဒေါ ပေသော ပဏ္ဍရံ ပေတံ ခေတ္တံ ပေတံ ဝတ္ထုံ ပေတံ ဩရိမံ တီရံ ပေတံ သုညော ဂါမော ပေသော – ဣဒံ တံ ရူပံ သောတာယတနံ.

၆၀၁. ကတမံ တံ ရူပံ သောတာယတနံ? ယံ သောတံ စတုန္နံ မဟာဘူတာနံ ဥပါဒါယ ပသာဒေါ အတ္တဘာဝပရိယာပန္နော အနိဒဿနော သပ္ပဋိဃော၊ ယမှိ သောတမှိ အနိဒဿနမှိ သပ္ပဋိဃမှိ သဒ္ဒေါ အနိဒဿနော သပ္ပဋိဃော ပဋိဟညိ ဝါ ပဋိဟညတိ ဝါ ပဋိဟညိဿတိ ဝါ ပဋိဟညေ ဝါ၊ သောတံ ပေတံ သောတာယတနံ ပေတံ သောတဓာတု ပေသာ သောတိန္ဒြိယံ ပေတံ လောကော ပေသော ဒွါရာ ပေသာ သမုဒ္ဒေါ ပေသော ပဏ္ဍရံ ပေတံ ခေတ္တံ ပေတံ ဝတ္ထုံ ပေတံ ဩရိမံ တီရံ ပေတံ သုညော ဂါမော ပေသော – ဣဒံ တံ ရူပံ သောတာယတနံ.

၆၀၂. ကတမံ တံ ရူပံ သောတာယတနံ? ယံ သောတံ စတုန္နံ မဟာဘူတာနံ ဥပါဒါယ ပသာဒေါ အတ္တဘာဝပရိယာပန္နော အနိဒဿနော သပ္ပဋိဃော၊ ယံ သောတံ အနိဒဿနံ သပ္ပဋိဃံ သဒ္ဒမှိ အနိဒဿနမှိ သပ္ပဋိဃမှိ ပဋိဟညိ ဝါ ပဋိဟညတိ ဝါ ပဋိဟညိဿတိ ဝါ ပဋိဟညေ ဝါ၊ သောတံ ပေတံ သောတာယတနံ ပေတံ သောတဓာတု ပေသာ သောတိန္ဒြိယံ ပေတံ လောကော ပေသော ဒွါရာ ပေသာ သမုဒ္ဒေါ ပေသော ပဏ္ဍရံ ပေတံ ခေတ္တံ ပေတံ ဝတ္ထုံ ပေတံ ဩရိမံ တီရံ ပေတံ သုညော ဂါမော ပေသော – ဣဒံ တံ ရူပံ သောတာယတနံ.

၆၀၃. ကတမံ တံ ရူပံ သောတာယတနံ? ယံ သောတံ စတုန္နံ မဟာဘူတာနံ ဥပါဒါယ ပသာဒေါ အတ္တဘာဝပရိယာပန္နော အနိဒဿနော သပ္ပဋိဃော၊ ယံ သောတံ နိဿာယ သဒ္ဒံ အာရဗ္ဘ သောတသမ္ဖဿော ဥပ္ပဇ္ဇိ ဝါ ဥပ္ပဇ္ဇတိ ဝါ ဥပ္ပဇ္ဇိဿတိ ဝါ ဥပ္ပဇ္ဇေ ဝါ။ပေ။ ယံ သောတံ နိဿာယ သဒ္ဒံ အာရဗ္ဘ သောတသမ္ဖဿဇာ ဝေဒနာ။ပေ။ သညာ။ပေ။ စေတနာ။ပေ။ သောတဝိညာဏံ ဥပ္ပဇ္ဇိ ဝါ ဥပ္ပဇ္ဇတိ ဝါ ဥပ္ပဇ္ဇိဿတိ ဝါ ဥပ္ပဇ္ဇေ ဝါ။ပေ။ ယံ သောတံ နိဿာယ သဒ္ဒါရမ္မဏော သောတသမ္ဖဿော ဥပ္ပဇ္ဇိ ဝါ ဥပ္ပဇ္ဇတိ ဝါ ဥပ္ပဇ္ဇိဿတိ ဝါ ဥပ္ပဇ္ဇေ ဝါ။ပေ။ ယံ သောတံ နိဿာယ သဒ္ဒါရမ္မဏာ သောတသမ္ဖဿဇာ ဝေဒနာ။ပေ။ သညာ။ပေ။ စေတနာ။ပေ။ သောတဝိညာဏံ ဥပ္ပဇ္ဇိ ဝါ ဥပ္ပဇ္ဇတိ ဝါ ဥပ္ပဇ္ဇိဿတိ ဝါ ဥပ္ပဇ္ဇေ ဝါ၊ သောတံ ပေတံ သောတာယတနံ ပေတံ သောတဓာတု ပေသာ သောတိန္ဒြိယံ ပေတံ လောကော ပေသော ဒွါရာ ပေသာ သမုဒ္ဒေါ ပေသော ပဏ္ဍရံ ပေတံ ခေတ္တံ ပေတံ ဝတ္ထုံ ပေတံ ဩရိမံ တီရံ ပေတံ သုညော ဂါမော ပေသော – ဣဒံ တံ ရူပံ သောတာယတနံ.

၆၀၄. ကတမံ တံ ရူပံ ဃာနာယတနံ? ယံ ဃာနံ စတုန္နံ မဟာဘူတာနံ ဥပါဒါယ ပသာဒေါ အတ္တဘာဝပရိယာပန္နော အနိဒဿနော သပ္ပဋိဃော၊ ယေန ဃာနေန အနိဒဿနေန သပ္ပဋိဃေန ဂန္ဓံ အနိဒဿနံ သပ္ပဋိဃံ ဃာယိ ဝါ ဃာယတိ ဝါ ဃာယိဿတိ ဝါ ဃာယေ ဝါ၊ ဃာနံ ပေတံ ဃာနာယတနံ ပေတံ ဃာနဓာတု ပေသာ ဃာနိန္ဒြိယံ ပေတံ လောကော ပေသော ဒွါရာ ပေသာ သမုဒ္ဒေါ ပေသော ပဏ္ဍရံ ပေတံ ခေတ္တံ ပေတံ ဝတ္ထုံ ပေတံ ဩရိမံ တီရံ ပေတံ သုညော ဂါမော ပေသော – ဣဒံ တံ ရူပံ ဃာနာယတနံ.

၆၀၅. ကတမံ တံ ရူပံ ဃာနာယတနံ? ယံ ဃာနံ စတုန္နံ မဟာဘူတာနံ ဥပါဒါယ ပသာဒေါ အတ္တဘာဝပရိယာပန္နော အနိဒဿနော သပ္ပဋိဃော၊ ယမှိ ဃာနမှိ အနိဒဿနမှိ သပ္ပဋိဃမှိ ဂန္ဓော အနိဒဿနော သပ္ပဋိဃော ပဋိဟညိ ဝါ ပဋိဟညတိ ဝါ ပဋိဟညိဿတိ ဝါ ပဋိဟညေ ဝါ၊ ဃာနံ ပေတံ ဃာနာယတနံ ပေတံ ဃာနဓာတု ပေသာ ဃာနိန္ဒြိယံ ပေတံ လောကော ပေသော ဒွါရာ ပေသာ သမုဒ္ဒေါ ပေသော ပဏ္ဍရံ ပေတံ ခေတ္တံ ပေတံ ဝတ္ထုံ ပေတံ ဩရိမံ တီရံ ပေတံ သုညော ဂါမော ပေသော – ဣဒံ တံ ရူပံ ဃာနာယတနံ.

၆၀၆. ကတမံ တံ ရူပံ ဃာနာယတနံ? ယံ ဃာနံ စတုန္နံ မဟာဘူတာနံ ဥပါဒါယ ပသာဒေါ အတ္တဘာဝပရိယာပန္နော အနိဒဿနော သပ္ပဋိဃော၊ ယံ ဃာနံ အနိဒဿနံ သပ္ပဋိဃံ ဂန္ဓမှိ အနိဒဿနမှိ သပ္ပဋိဃမှိ ပဋိဟညိ ဝါ ပဋိဟညတိ ဝါ ပဋိဟညိဿတိ ဝါ ပဋိဟညေ ဝါ၊ ဃာနံ ပေတံ ဃာနာယတနံ ပေတံ ဃာနဓာတု ပေသာ ဃာနိန္ဒြိယံ ပေတံ လောကော ပေသော ဒွါရာ ပေသာ သမုဒ္ဒေါ ပေသော ပဏ္ဍရံ ပေတံ ခေတ္တံ ပေတံ ဝတ္ထုံ ပေတံ ဩရိမံ တီရံ ပေတံ သုညော ဂါမောပေသော – ဣဒံ တံ ရူပံ ဃာနာယတနံ.

၆၀၇. ကတမံ တံ ရူပံ ဃာနာယတနံ? ယံ ဃာနံ စတုန္နံ မဟာဘူတာနံ ဥပါဒါယ ပသာဒေါ အတ္တဘာဝပရိယာပန္နော အနိဒဿနော သပ္ပဋိဃော၊ ယံ ဃာနံ နိဿာယ ဂန္ဓံ အာရဗ္ဘ ဃာနသမ္ဖဿော ဥပ္ပဇ္ဇိ ဝါ ဥပ္ပဇ္ဇတိ ဝါ ဥပ္ပဇ္ဇိဿတိ ဝါ ဥပ္ပဇ္ဇေ ဝါ။ပေ။ ယံ ဃာနံ နိဿာယ ဂန္ဓံ အာရဗ္ဘ ဃာနသမ္ဖဿဇာ ဝေဒနာ။ပေ။ သညာ။ပေ။ စေတနာ။ပေ။ ဃာနဝိညာဏံ ဥပ္ပဇ္ဇိ ဝါ ဥပ္ပဇ္ဇတိ ဝါ ဥပ္ပဇ္ဇိဿတိ ဝါ ဥပ္ပဇ္ဇေ ဝါ။ပေ။ ယံ ဃာနံ နိဿာယ ဂန္ဓာရမ္မဏော ဃာနသမ္ဖဿော ဥပ္ပဇ္ဇိ ဝါ ဥပ္ပဇ္ဇတိ ဝါ ဥပ္ပဇ္ဇိဿတိ ဝါ ဥပ္ပဇ္ဇေ ဝါ။ပေ။ ယံ ဃာနံ နိဿာယ ဂန္ဓာရမ္မဏာ ဃာနသမ္ဖဿဇာ ဝေဒနာ။ပေ။ သညာ။ပေ။ စေတနာ။ပေ။ ဃာနဝိညာဏံ ဥပ္ပဇ္ဇိ ဝါ ဥပ္ပဇ္ဇတိ ဝါ ဥပ္ပဇ္ဇိဿတိ ဝါ ဥပ္ပဇ္ဇေ ဝါ၊ ဃာနံ ပေတံ ဃာနာယတနံ ပေတံ ဃာနဓာတု ပေသာ ဃာနိန္ဒြိယံ ပေတံ လောကော ပေသော ဒွါရာ ပေသာ သမုဒ္ဒေါ ပေသော ပဏ္ဍရံ ပေတံ ခေတ္တံ ပေတံ ဝတ္ထုံ ပေတံ ဩရိမံ တီရံ ပေတံ သုညော ဂါမော ပေသော – ဣဒံ တံ ရူပံ ဃာနာယတနံ.

၆၀၈. ကတမံ တံ ရူပံ ဇိဝှါယတနံ? ယာ ဇိဝှါ စတုန္နံ မဟာဘူတာနံ ဥပါဒါယ ပသာဒေါ အတ္တဘာဝပရိယာပန္နော အနိဒဿနော သပ္ပဋိဃော၊ ယာယ ဇိဝှါယ အနိဒဿနာယ သပ္ပဋိဃာယ ရသံ အနိဒဿနံ သပ္ပဋိဃံ သာယိ ဝါ သာယတိ ဝါ သာယိဿတိ ဝါ သာယေ ဝါ၊ ဇိဝှါ ပေသာ ဇိဝှါယတနံ ပေတံ ဇိဝှါဓာတု ပေသာ ဇိဝှိန္ဒြိယံ ပေတံ လောကော ပေသော ဒွါရာ ပေသာ သမုဒ္ဒေါ ပေသော ပဏ္ဍရံ ပေတံ ခေတ္တံ ပေတံ ဝတ္ထုံ ပေတံ ဩရိမံ တီရံ ပေတံ သုညော ဂါမော ပေသော – ဣဒံ တံ ရူပံ ဇိဝှါယတနံ.

၆၀၉. ကတမံ တံ ရူပံ ဇိဝှါယတနံ? ယာ ဇိဝှါ စတုန္နံ မဟာဘူတာနံ ဥပါဒါယ ပသာဒေါ အတ္တဘာဝပရိယာပန္နော အနိဒဿနော သပ္ပဋိဃော၊ ယာယ ဇိဝှါယ အနိဒဿနာယ သပ္ပဋိဃာယ ရသော အနိဒဿနော သပ္ပဋိဃော ပဋိဟညိ ဝါ ပဋိဟညတိ ဝါ ပဋိဟညိဿတိ ဝါ ပဋိဟညေ ဝါ၊ ဇိဝှါ ပေသာ ဇိဝှါယတနံ ပေတံ ဇိဝှါဓာတု ပေသာ ဇိဝှိန္ဒြိယံ ပေတံ လောကော ပေသော ဒွါရာ ပေသာ သမုဒ္ဒေါ ပေသော ပဏ္ဍရံ ပေတံ ခေတ္တံ ပေတံ ဝတ္ထုံ ပေတံ ဩရိမံ တီရံ ပေတံ သုညော ဂါမော ပေသော – ဣဒံ တံ ရူပံ ဇိဝှါယတနံ.

၆၁၀. ကတမံ တံ ရူပံ ဇိဝှါယတနံ? ယာ ဇိဝှါ စတုန္နံ မဟာဘူတာနံ ဥပါဒါယ ပသာဒေါ အတ္တဘာဝပရိယာပန္နော အနိဒဿနော သပ္ပဋိဃော၊ ယာ ဇိဝှါ အနိဒဿနာ သပ္ပဋိဃာ ရသမှိ အနိဒဿနမှိ သပ္ပဋိဃမှိ ပဋိဟညိ ဝါ ပဋိဟညတိ ဝါ ပဋိဟညိဿတိ ဝါ ပဋိဟညေ ဝါ၊ ဇိဝှါ ပေသာ ဇိဝှါယတနံ ပေတံ ဇိဝှါဓာတု ပေသာ ဇိဝှိန္ဒြိယံ ပေတံ လောကော ပေသော ဒွါရာ ပေသာ သမုဒ္ဒေါ ပေသော ပဏ္ဍရံ ပေတံ ခေတ္တံ ပေတံ ဝတ္ထုံ ပေတံ ဩရိမံ တီရံ ပေတံ သုညော ဂါမော ပေသော – ဣဒံ တံ ရူပံ ဇိဝှါယတနံ.

၆၁၁. ကတမံ တံ ရူပံ ဇိဝှါယတနံ? ယာ ဇိဝှါ စတုန္နံ မဟာဘူတာနံ ဥပါဒါယ ပသာဒေါ အတ္တဘာဝပရိယာပန္နော အနိဒဿနော သပ္ပဋိဃော၊ ယံ ဇိဝှံ နိဿာယ ရသံ အာရဗ္ဘ ဇိဝှါသမ္ဖဿော ဥပ္ပဇ္ဇိ ဝါ ဥပ္ပဇ္ဇတိ ဝါ ဥပ္ပဇ္ဇိဿတိ ဝါ ဥပ္ပဇ္ဇေ ဝါ။ပေ။ ယံ ဇိဝှံ နိဿာယ ရသံ အာရဗ္ဘ ဇိဝှါသမ္ဖဿဇာ ဝေဒနာ။ပေ။ သညာ။ပေ။ စေတနာ။ပေ။ ဇိဝှါဝိညာဏံ ဥပ္ပဇ္ဇိ ဝါ ဥပ္ပဇ္ဇတိ ဝါ ဥပ္ပဇ္ဇိဿတိ ဝါ ဥပ္ပဇ္ဇေ ဝါ။ပေ။ ယံ ဇိဝှံ နိဿာယ ရသာရမ္မဏော ဇိဝှါသမ္ဖဿော ဥပ္ပဇ္ဇိ ဝါ ဥပ္ပဇ္ဇတိ ဝါ ဥပ္ပဇ္ဇိဿတိ ဝါ ဥပ္ပဇ္ဇေ ဝါ။ပေ။ ယံ ဇိဝှံ နိဿာယ ရသာရမ္မဏာ ဇိဝှါသမ္ဖဿဇာ ဝေဒနာ။ပေ။ သညာ။ပေ။ စေတနာ။ပေ။ ဇိဝှါဝိညာဏံ ဥပ္ပဇ္ဇိ ဝါ ဥပ္ပဇ္ဇတိ ဝါ ဥပ္ပဇ္ဇိဿတိ ဝါ ဥပ္ပဇ္ဇေ ဝါ၊ ဇိဝှါ ပေသာ ဇိဝှါယတနံ ပေတံ ဇိဝှါဓာတု ပေသာ ဇိဝှိန္ဒြိယံ ပေတံ လောကော ပေသော ဒွါရာ ပေသာ သမုဒ္ဒေါ ပေသော ပဏ္ဍရံ ပေတံ ခေတ္တံ ပေတံ ဝတ္ထုံ ပေတံ ဩရိမံ တီရံ ပေတံ သုညော ဂါမော ပေသော – ဣဒံ တံ ရူပံ ဇိဝှါယတနံ.

၆၁၂. ကတမံ တံ ရူပံ ကာယာယတနံ? ယော ကာယော စတုန္နံ မဟာဘူတာနံ ဥပါဒါယ ပသာဒေါ အတ္တဘာဝပရိယာပန္နော အနိဒဿနော သပ္ပဋိဃော၊ ယေန ကာယေန အနိဒဿနေန သပ္ပဋိဃေန ဖောဋ္ဌဗ္ဗံ အနိဒဿနသပ္ပဋိဃံ ဖုသိ ဝါ ဖုသတိ ဝါ ဖုသိဿတိ ဝါ ဖုသေ ဝါ၊ ကာယော ပေသော ကာယာယတနံ ပေတံ ကာယဓာတု ပေသာ ကာယိန္ဒြိယံ ပေတံ လောကော ပေသော ဒွါရာ ပေသာ သမုဒ္ဒေါ ပေသော ပဏ္ဍရံ ပေတံ ခေတ္တံ ပေတံ ဝတ္ထုံ ပေတံ ဩရိမံ တီရံ ပေတံ သုညော ဂါမော ပေသော – ဣဒံ တံ ရူပံ ကာယာယတနံ.

၆၁၃. ကတမံ တံ ရူပံ ကာယာယတနံ? ယော ကာယော စတုန္နံ မဟာဘူတာနံ ဥပါဒါယ ပသာဒေါ အတ္တဘာဝပရိယာပန္နော အနိဒဿနော သပ္ပဋိဃော၊ ယမှိ ကာယမှိ အနိဒဿနမှိ သပ္ပဋိဃမှိ ဖောဋ္ဌဗ္ဗော အနိဒဿနော သပ္ပဋိဃော ပဋိဟညိ ဝါ ပဋိဟညတိ ဝါ ပဋိဟညိဿတိ ဝါ ပဋိဟညေ ဝါ၊ ကာယော ပေသော ကာယာယတနံ ပေတံ ကာယဓာတု ပေသာ ကာယိန္ဒြိယံ ပေတံ လောကော ပေသော ဒွါရာ ပေသာ သမုဒ္ဒေါ ပေသော ပဏ္ဍရံ ပေတံ ခေတ္တံ ပေတံ ဝတ္ထုံ ပေတံ ဩရိမံ တီရံ ပေတံ သုညော ဂါမော ပေသော – ဣဒံ တံ ရူပံ ကာယာယတနံ.

၆၁၄. ကတမံ တံ ရူပံ ကာယာယတနံ? ယော ကာယော စတုန္နံ မဟာဘူတာနံ ဥပါဒါယ ပသာဒေါ အတ္တဘာဝပရိယာပန္နော အနိဒဿနော သပ္ပဋိဃော၊ ယော ကာယော အနိဒဿနော သပ္ပဋိဃော ဖောဋ္ဌဗ္ဗမှိ အနိဒဿနမှိ သပ္ပဋိဃမှိ ပဋိဟညိ ဝါ ပဋိဟညတိ ဝါ ပဋိဟညိဿတိ ဝါ ပဋိဟညေ ဝါ၊ ကာယော ပေသော ကာယာယတနံ ပေတံ ကာယဓာတု ပေသာ ကာယိန္ဒြိယံ ပေတံ လောကော ပေသော ဒွါရာ ပေသာ သမုဒ္ဒေါ ပေသော ပဏ္ဍရံ ပေတံ ခေတ္တံ ပေတံ ဝတ္ထုံ ပေတံ ဩရိမံ တီရံ ပေတံ သုညော ဂါမော ပေသော – ဣဒံ တံ ရူပံ ကာယာယတနံ.

၆၁၅. ကတမံ တံ ရူပံ ကာယာယတနံ? ယော ကာယော စတုန္နံ မဟာဘူတာနံ ဥပါဒါယ ပသာဒေါ အတ္တဘာဝပရိယာပန္နော အနိဒဿနော သပ္ပဋိဃော၊ ယံ ကာယံ နိဿာယ ဖောဋ္ဌဗ္ဗံ အာရဗ္ဘ ကာယသမ္ဖဿော ဥပ္ပဇ္ဇိ ဝါ ဥပ္ပဇ္ဇတိ ဝါ ဥပ္ပဇ္ဇိဿတိ ဝါ ဥပ္ပဇ္ဇေ ဝါ။ပေ။ ယံ ကာယံ နိဿာယ ဖောဋ္ဌဗ္ဗံ အာရဗ္ဘ ကာယသမ္ဖဿဇာ ဝေဒနာ။ပေ။ သညာ။ပေ။ စေတနာ။ပေ။ ကာယဝိညာဏံ ဥပ္ပဇ္ဇိ ဝါ ဥပ္ပဇ္ဇတိ ဝါ ဥပ္ပဇ္ဇိဿတိ ဝါ ဥပ္ပဇ္ဇေ ဝါ။ပေ။ ယံ ကာယံ နိဿာယ ဖောဋ္ဌဗ္ဗာရမ္မဏော ကာယသမ္ဖဿော ဥပ္ပဇ္ဇိ ဝါ ဥပ္ပဇ္ဇတိ ဝါ ဥပ္ပဇ္ဇိဿတိ ဝါ ဥပ္ပဇ္ဇေ ဝါ။ပေ။ ယံ ကာယံ နိဿာယ ဖောဋ္ဌဗ္ဗာရမ္မဏာ ကာယသမ္ဖဿဇာ ဝေဒနာ။ပေ။ သညာ။ပေ။ စေတနာ။ပေ။ ကာယဝိညာဏံ ဥပ္ပဇ္ဇိ ဝါ ဥပ္ပဇ္ဇတိ ဝါ ဥပ္ပဇ္ဇိဿတိ ဝါ ဥပ္ပဇ္ဇေ ဝါ၊ ကာယော ပေသော ကာယာယတနံ ပေတံ ကာယဓာတု ပေသာ ကာယိန္ဒြိယံ ပေတံ လောကော ပေသော ဒွါရာ ပေသာ သမုဒ္ဒေါ ပေသော ပဏ္ဍရံ ပေတံ ခေတ္တံ ပေတံ ဝတ္ထုံ ပေတံ ဩရိမံ တီရံ ပေတံ သုညော ဂါမော ပေသော – ဣဒံ တံ ရူပံ ကာယာယတနံ.

၆၁၆. ကတမံ တံ ရူပံ ရူပါယတနံ? ယံ ရူပံ စတုန္နံ မဟာဘူတာနံ ဥပါဒါယ ဝဏ္ဏနိဘာ သနိဒဿနံ သပ္ပဋိဃံ နီလံ ပီတကံ လောဟိတကံ ဩဒါတံ ကာဠကံ မဉ္ဇိဋ္ဌကံ [မဉ္ဇေဋ္ဌကံ (သီ. သျာ.)] ဟရိ ဟရိဝဏ္ဏံ အမ္ဗင်္ကုရဝဏ္ဏံ ဒီဃံ ရဿံ အဏုံ ထူလံ ဝဋ္ဋံ ပရိမဏ္ဍလံ စတုရံသံ [စတုရဿံ (သီ. က.)] ဆဠံသံ အဋ္ဌံသံ သောဠသံသံ နိန္နံ ထလံ ဆာယာ အာတပေါ အာလောကော အန္ဓကာရော အဗ္ဘာ မဟိကာ ဓူမော ရဇော စန္ဒမဏ္ဍလဿ ဝဏ္ဏနိဘာ သူရိယမဏ္ဍလဿ [သုရိယမဏ္ဍလဿ (သီ. သျာ.)] ဝဏ္ဏနိဘာ တာရကရူပါနံ ဝဏ္ဏနိဘာ အာဒါသမဏ္ဍလဿ ဝဏ္ဏနိဘာ မဏိသင်္ခမုတ္တာဝေဠုရိယဿ ဝဏ္ဏနိဘာ ဇာတရူပရဇတဿ ဝဏ္ဏနိဘာ၊ ယံ ဝါ ပနညမ္ပိ အတ္ထိ ရူပံ စတုန္နံ မဟာဘူတာနံ ဥပါဒါယ ဝဏ္ဏနိဘာ သနိဒဿနံ သပ္ပဋိဃံ၊ ယံ ရူပံ သနိဒဿနံ သပ္ပဋိဃံ စက္ခုနာ အနိဒဿနေန သပ္ပဋိဃေန ပဿိ ဝါ ပဿတိ ဝါ ပဿိဿတိ ဝါ ပဿေ ဝါ၊ ရူပံ ပေတံ ရူပါယတနံ ပေတံ ရူပဓာတု ပေသာ – ဣဒံ တံ ရူပံ ရူပါယတနံ.

၆၁၇. ကတမံ တံ ရူပံ ရူပါယတနံ? ယံ ရူပံ စတုန္နံ မဟာဘူတာနံ ဥပါဒါယ ဝဏ္ဏနိဘာ သနိဒဿနံ သပ္ပဋိဃံ နီလံ ပီတကံ လောဟိတကံ ဩဒါတံ ကာဠကံ မဉ္ဇိဋ္ဌကံ ဟရိ ဟရိဝဏ္ဏံ အမ္ဗင်္ကုရဝဏ္ဏံ ဒီဃံ ရဿံ အဏုံ ထူလံ ဝဋ္ဋံ ပရိမဏ္ဍလံ စတုရံသံ ဆဠံသံ အဋ္ဌံသံ သောဠသံသံ နိန္နံ ထလံ ဆာယာ အာတပေါ အာလောကော အန္ဓကာရော အဗ္ဘာ မဟိကာ ဓူမော ရဇော စန္ဒမဏ္ဍလဿ ဝဏ္ဏနိဘာ သူရိယမဏ္ဍလဿ ဝဏ္ဏနိဘာ တာရကရူပါနံ ဝဏ္ဏနိဘာ အာဒါသမဏ္ဍလဿ ဝဏ္ဏနိဘာ မဏိသင်္ခမုတ္တာဝေဠုရိယဿ ဝဏ္ဏနိဘာ ဇာတရူပရဇတဿ ဝဏ္ဏနိဘာ၊ ယံ ဝါ ပနညမ္ပိ အတ္ထိ ရူပံ စတုန္နံ မဟာဘူတာနံ ဥပါဒါယ ဝဏ္ဏနိဘာ သနိဒဿနံ သပ္ပဋိဃံ၊ ယမှိ ရူပမှိ သနိဒဿနမှိ သပ္ပဋိဃမှိ စက္ခုံ အနိဒဿနံ သပ္ပဋိဃံ ပဋိဟညိ ဝါ ပဋိဟညတိ ဝါ ပဋိဟညိဿတိ ဝါ ပဋိဟညေ ဝါ၊ ရူပံ ပေတံ ရူပါယတနံ ပေတံ ရူပဓာတု ပေသာ – ဣဒံ တံ ရူပံ ရူပါယတနံ.

၆၁၈. ကတမံ တံ ရူပံ ရူပါယတနံ? ယံ ရူပံ စတုန္နံ မဟာဘူတာနံ ဥပါဒါယ ဝဏ္ဏနိဘာ သနိဒဿနံ သပ္ပဋိဃံ နီလံ ပီတကံ လောဟိတကံ ဩဒါတံ ကာဠကံ မဉ္ဇိဋ္ဌကံ ဟရိ ဟရိဝဏ္ဏံ အမ္ဗင်္ကုရဝဏ္ဏံ ဒီဃံ ရဿံ အဏုံ ထူလံ ဝဋ္ဋံ ပရိမဏ္ဍလံ စတုရံသံ ဆဠံသံ အဋ္ဌံသံ သောဠသံသံ နိန္နံ ထလံ ဆာယာ အာတပေါ အာလောကော အန္ဓကာရော အဗ္ဘာ မဟိကာ ဓူမော ရဇော စန္ဒမဏ္ဍလဿ ဝဏ္ဏနိဘာ သူရိယမဏ္ဍလဿ ဝဏ္ဏနိဘာ တာရကရူပါနံ ဝဏ္ဏနိဘာ အာဒါသမဏ္ဍလဿ ဝဏ္ဏနိဘာ မဏိသင်္ခမုတ္တာဝေဠုရိယဿ ဝဏ္ဏနိဘာ ဇာတရူပရဇတဿ ဝဏ္ဏနိဘာ၊ ယံ ဝါ ပနညမ္ပိ အတ္ထိ ရူပံ စတုန္နံ မဟာဘူတာနံ ဥပါဒါယ ဝဏ္ဏနိဘာ သနိဒဿနံ သပ္ပဋိဃံ၊ ယံ ရူပံ သနိဒဿနံ သပ္ပဋိဃံ စက္ခုမှိ အနိဒဿနမှိ သပ္ပဋိဃမှိ ပဋိဟညိ ဝါ ပဋိဟညတိ ဝါ ပဋိဟညိဿတိ ဝါ ပဋိဟညေ ဝါ၊ ရူပံ ပေတံ ရူပါယတနံ ပေတံ ရူပဓာတု ပေသာ – ဣဒံ တံ ရူပံ ရူပါယတနံ.

၆၁၉. ကတမံ တံ ရူပံ ရူပါယတနံ? ယံ ရူပံ စတုန္နံ မဟာဘူတာနံ ဥပါဒါယ ဝဏ္ဏနိဘာ သနိဒဿနံ သပ္ပဋိဃံ နီလံ ပီတကံ လောဟိတကံ ဩဒါတံ ကာဠကံ မဉ္ဇိဋ္ဌကံ ဟရိ ဟရိဝဏ္ဏံ အမ္ဗင်္ကုရဝဏ္ဏံ ဒီဃံ ရဿံ အဏုံ ထူလံ ဝဋ္ဋံ ပရိမဏ္ဍလံ စတုရံသံ ဆဠံသံ အဋ္ဌံသံ သောဠသံသံ နိန္နံ ထလံ ဆာယာ အာတပေါ အာလောကော အန္ဓကာရော အဗ္ဘာ မဟိကာ ဓူမော ရဇော စန္ဒမဏ္ဍလဿ ဝဏ္ဏနိဘာ သူရိယမဏ္ဍလဿ ဝဏ္ဏနိဘာ တာရကရူပါနံ ဝဏ္ဏနိဘာ အာဒါသမဏ္ဍလဿ ဝဏ္ဏနိဘာ မဏိသင်္ခမုတ္တာဝေဠုရိယဿ ဝဏ္ဏနိဘာ ဇာတရူပရဇတဿ ဝဏ္ဏနိဘာ၊ ယံ ဝါ ပနညမ္ပိ အတ္ထိ ရူပံ စတုန္နံ မဟာဘူတာနံ ဥပါဒါယ ဝဏ္ဏနိဘာ သနိဒဿနံ သပ္ပဋိဃံ၊ ယံ ရူပံ အာရဗ္ဘ စက္ခုံ နိဿာယ စက္ခုသမ္ဖဿော ဥပ္ပဇ္ဇိ ဝါ ဥပ္ပဇ္ဇတိ ဝါ ဥပ္ပဇ္ဇိဿတိ ဝါ ဥပ္ပဇ္ဇေ ဝါ။ပေ။ ယံ ရူပံ အာရဗ္ဘ စက္ခုံ နိဿာယ စက္ခုသမ္ဖဿဇာ ဝေဒနာ။ပေ။ သညာ။ပေ။ စေတနာ။ပေ။ စက္ခုဝိညာဏံ ဥပ္ပဇ္ဇိ ဝါ ဥပ္ပဇ္ဇတိ ဝါ ဥပ္ပဇ္ဇိဿတိ ဝါ ဥပ္ပဇ္ဇေ ဝါ။ပေ။ ယံ ရူပါရမ္မဏော စက္ခုံ နိဿာယ စက္ခုသမ္ဖဿော ဥပ္ပဇ္ဇိ ဝါ ဥပ္ပဇ္ဇတိ ဝါ ဥပ္ပဇ္ဇိဿတိ ဝါ ဥပ္ပဇ္ဇေ ဝါ။ပေ။ ယံ ရူပါရမ္မဏာ စက္ခုံ နိဿာယ စက္ခုသမ္ဖဿဇာ ဝေဒနာ။ပေ။ သညာ။ပေ။ စေတနာ။ပေ။ စက္ခုဝိညာဏံ ဥပ္ပဇ္ဇိ ဝါ ဥပ္ပဇ္ဇတိ ဝါ ဥပ္ပဇ္ဇိဿတိ ဝါ ဥပ္ပဇ္ဇေ ဝါ၊ ရူပံ ပေတံ ရူပါယတနံ ပေတံ ရူပဓာတု ပေသာ – ဣဒံ တံ ရူပံ ရူပါယတနံ.

၆၂၀. ကတမံ တံ ရူပံ သဒ္ဒါယတနံ? ယော သဒ္ဒေါ စတုန္နံ မဟာဘူတာနံ ဥပါဒါယ အနိဒဿနော သပ္ပဋိဃော ဘေရိသဒ္ဒေါ မုဒိင်္ဂသဒ္ဒေါ သင်္ခသဒ္ဒေါ ပဏဝသဒ္ဒေါ ဂီတသဒ္ဒေါ ဝါဒိတသဒ္ဒေါ သမ္မသဒ္ဒေါ ပါဏိသဒ္ဒေါ သတ္တာနံ နိဂ္ဃေါသသဒ္ဒေါ ဓာတူနံ သန္နိဃာတသဒ္ဒေါ ဝါတသဒ္ဒေါ ဥဒကသဒ္ဒေါ မနုဿသဒ္ဒေါ အမနုဿသဒ္ဒေါ၊ ယော ဝါ ပနညောပိ အတ္ထိ သဒ္ဒေါ စတုန္နံ မဟာဘူတာနံ ဥပါဒါယ အနိဒဿနော သပ္ပဋိဃော၊ ယံ သဒ္ဒံ အနိဒဿနံ သပ္ပဋိဃံ သောတေန အနိဒဿနေန သပ္ပဋိဃေန သုဏိ ဝါ သုဏာတိ ဝါ သုဏိဿတိ ဝါ သုဏေ ဝါ၊ သဒ္ဒေါ ပေသော သဒ္ဒါယတနံ ပေတံ သဒ္ဒဓာတု ပေသာ – ဣဒံ တံ ရူပံ သဒ္ဒါယတနံ.

၆၂၁. ကတမံ တံ ရူပံ သဒ္ဒါယတနံ? ယော သဒ္ဒေါ စတုန္နံ မဟာဘူတာနံ ဥပါဒါယ အနိဒဿနော သပ္ပဋိဃော ဘေရိသဒ္ဒေါ မုဒိင်္ဂသဒ္ဒေါ သင်္ခသဒ္ဒေါ ပဏဝသဒ္ဒေါ ဂီတသဒ္ဒေါ ဝါဒိတသဒ္ဒေါ သမ္မသဒ္ဒေါ ပါဏိသဒ္ဒေါ သတ္တာနံ နိဂ္ဃေါသသဒ္ဒေါ ဓာတူနံ သန္နိဃာတသဒ္ဒေါ ဝါတသဒ္ဒေါ ဥဒကသဒ္ဒေါ မနုဿသဒ္ဒေါ အမနုဿသဒ္ဒေါ၊ ယော ဝါ ပနညောပိ အတ္ထိ သဒ္ဒေါ စတုန္နံ မဟာဘူတာနံ ဥပါဒါယ အနိဒဿနော သပ္ပဋိဃော၊ ယမှိ သဒ္ဒမှိ အနိဒဿနမှိ သပ္ပဋိဃမှိ သောတံ အနိဒဿနံ သပ္ပဋိဃံ ပဋိဟညိ ဝါ ပဋိဟညတိ ဝါ ပဋိဟညိဿတိ ဝါ ပဋိဟညေ ဝါ၊ သဒ္ဒေါ ပေသော သဒ္ဒါယတနံ ပေတံ သဒ္ဒဓာတု ပေသာ – ဣဒံ တံ ရူပံ သဒ္ဒါယတနံ.

၆၂၂. ကတမံ တံ ရူပံ သဒ္ဒါယတနံ? ယော သဒ္ဒေါ စတုန္နံ မဟာဘူတာနံ ဥပါဒါယ အနိဒဿနော သပ္ပဋိဃော ဘေရိသဒ္ဒေါ မုဒိင်္ဂသဒ္ဒေါ သင်္ခသဒ္ဒေါ ပဏဝသဒ္ဒေါ ဂီတသဒ္ဒေါ ဝါဒိတသဒ္ဒေါ သမ္မသဒ္ဒေါ ပါဏိသဒ္ဒေါ သတ္တာနံ နိဂ္ဃေါသသဒ္ဒေါ ဓာတူနံ သန္နိဃာတသဒ္ဒေါ ဝါတသဒ္ဒေါ ဥဒကသဒ္ဒေါ မနုဿသဒ္ဒေါ အမနုဿသဒ္ဒေါ၊ ယော ဝါ ပနညောပိ အတ္ထိ သဒ္ဒေါ စတုန္နံ မဟာဘူတာနံ ဥပါဒါယ အနိဒဿနော သပ္ပဋိဃော၊ ယော သဒ္ဒေါ အနိဒဿနော သပ္ပဋိဃော သောတမှိ အနိဒဿနမှိ သပ္ပဋိဃမှိ ပဋိဟညိ ဝါ ပဋိဟညတိ ဝါ ပဋိဟညိဿတိ ဝါ ပဋိဟညေ ဝါ၊ သဒ္ဒေါ ပေသော သဒ္ဒါယတနံ ပေတံ သဒ္ဒဓာတု ပေသာ – ဣဒံ တံ ရူပံ သဒ္ဒါယတနံ.

၆၂၃. ကတမံ တံ ရူပံ သဒ္ဒါယတနံ? ယော သဒ္ဒေါ စတုန္နံ မဟာဘူတာနံ ဥပါဒါယ အနိဒဿနော သပ္ပဋိဃော ဘေရိသဒ္ဒေါ မုဒိင်္ဂသဒ္ဒေါ သင်္ခသဒ္ဒေါ ပဏဝသဒ္ဒေါ ဂီတသဒ္ဒေါ ဝါဒိတသဒ္ဒေါ သမ္မသဒ္ဒေါ ပါဏိသဒ္ဒေါ သတ္တာနံ နိဂ္ဃေါသသဒ္ဒေါ ဓာတူနံ သန္နိဃာတသဒ္ဒေါ ဝါတသဒ္ဒေါ ဥဒကသဒ္ဒေါ မနုဿသဒ္ဒေါ အမနုဿသဒ္ဒေါ၊ ယော ဝါ ပနညောပိ အတ္ထိ သဒ္ဒေါ စတုန္နံ မဟာဘူတာနံ ဥပါဒါယ အနိဒဿနော သပ္ပဋိဃော၊ ယံ သဒ္ဒံ အာရဗ္ဘ သောတံ နိဿာယ သောတသမ္ဖဿော ဥပ္ပဇ္ဇိ ဝါ ဥပ္ပဇ္ဇတိ ဝါ ဥပ္ပဇ္ဇိဿတိ ဝါ ဥပ္ပဇ္ဇေ ဝါ။ပေ။ ယံ သဒ္ဒံ အာရဗ္ဘ သောတံ နိဿာယ သောတသမ္ဖဿဇာ ဝေဒနာ။ပေ။ သညာ။ပေ။ စေတနာ။ပေ။ သောတဝိညာဏံ ဥပ္ပဇ္ဇိ ဝါ ဥပ္ပဇ္ဇတိ ဝါ ဥပ္ပဇ္ဇိဿတိ ဝါ ဥပ္ပဇ္ဇေ ဝါ။ပေ။ ယံ သဒ္ဒါရမ္မဏော သောတံ နိဿာယ သောတသမ္ဖဿော ဥပ္ပဇ္ဇိ ဝါ ဥပ္ပဇ္ဇတိ ဝါ ဥပ္ပဇ္ဇိဿတိ ဝါ ဥပ္ပဇ္ဇေ ဝါ။ပေ။ ယံ သဒ္ဒါရမ္မဏာ သောတံ နိဿာယ သောတသမ္ဖဿဇာ ဝေဒနာ။ပေ။ သညာ။ပေ။ စေတနာ။ပေ။ သောတဝိညာဏံ ဥပ္ပဇ္ဇိ ဝါ ဥပ္ပဇ္ဇတိ ဝါ ဥပ္ပဇ္ဇိဿတိ ဝါ ဥပ္ပဇ္ဇေ ဝါ၊ သဒ္ဒေါ ပေသော သဒ္ဒါယတနံ ပေတံ သဒ္ဒဓာတု ပေသာ – ဣဒံ တံ ရူပံ သဒ္ဒါယတနံ.

၆၂၄. ကတမံ တံ ရူပံ ဂန္ဓာယတနံ? ယော ဂန္ဓော စတုန္နံ မဟာဘူတာနံ ဥပါဒါယ အနိဒဿနော သပ္ပဋိဃော မူလဂန္ဓော သာရဂန္ဓော တစဂန္ဓော ပတ္တဂန္ဓော ပုပ္ဖဂန္ဓော ဖလဂန္ဓော အာမကဂန္ဓော ဝိဿဂန္ဓော သုဂန္ဓော ဒုဂ္ဂန္ဓော၊ ယော ဝါ ပနညောပိ အတ္ထိ ဂန္ဓော စတုန္နံ မဟာဘူတာနံ ဥပါဒါယ အနိဒဿနော သပ္ပဋိဃော၊ ယံ ဂန္ဓံ အနိဒဿနံ သပ္ပဋိဃံ ဃာနေန အနိဒဿနေန သပ္ပဋိဃေန ဃာယိ ဝါ ဃာယတိ ဝါ ဃာယိဿတိ ဝါ ဃာယေ ဝါ၊ ဂန္ဓော ပေသော ဂန္ဓာယတနံ ပေတံ ဂန္ဓဓာတု ပေသာ – ဣဒံ တံ ရူပံ ဂန္ဓာယတနံ.

၆၂၅. ကတမံ တံ ရူပံ ဂန္ဓာယတနံ? ယော ဂန္ဓော စတုန္နံ မဟာဘူတာနံ ဥပါဒါယ အနိဒဿနော သပ္ပဋိဃော မူလဂန္ဓော သာရဂန္ဓော တစဂန္ဓော ပတ္တဂန္ဓော ပုပ္ဖဂန္ဓော ဖလဂန္ဓော အာမကဂန္ဓော ဝိဿဂန္ဓော သုဂန္ဓော ဒုဂ္ဂန္ဓော၊ ယော ဝါ ပနညောပိ အတ္ထိ ဂန္ဓော စတုန္နံ မဟာဘူတာနံ ဥပါဒါယ အနိဒဿနော သပ္ပဋိဃော၊ ယမှိ ဂန္ဓမှိ အနိဒဿနမှိ သပ္ပဋိဃမှိ ဃာနံ အနိဒဿနံ သပ္ပဋိဃံ ပဋိဟညိ ဝါ ပဋိဟညတိ ဝါ ပဋိဟညိဿတိ ဝါ ပဋိဟညေ ဝါ၊ ဂန္ဓော ပေသော ဂန္ဓာယတနံ ပေတံ ဂန္ဓဓာတု ပေသာ – ဣဒံ တံ ရူပံ ဂန္ဓာယတနံ.

၆၂၆. ကတမံ တံ ရူပံ ဂန္ဓာယတနံ? ယော ဂန္ဓော စတုန္နံ မဟာဘူတာနံ ဥပါဒါယ အနိဒဿနော သပ္ပဋိဃော မူလဂန္ဓော သာရဂန္ဓော တစဂန္ဓော ပတ္တဂန္ဓော ပုပ္ဖဂန္ဓော ဖလဂန္ဓော အာမကဂန္ဓော ဝိဿဂန္ဓော သုဂန္ဓော ဒုဂ္ဂန္ဓော၊ ယော ဝါ ပနညောပိ အတ္ထိ ဂန္ဓော စတုန္နံ မဟာဘူတာနံ ဥပါဒါယ အနိဒဿနော သပ္ပဋိဃော၊ ယော ဂန္ဓော အနိဒဿနော သပ္ပဋိဃော ဃာနမှိ အနိဒဿနမှိ သပ္ပဋိဃမှိ ပဋိဟညိ ဝါ ပဋိဟညတိ ဝါ ပဋိဟညိဿတိ ဝါ ပဋိဟညေ ဝါ၊ ဂန္ဓော ပေသော ဂန္ဓာယတနံ ပေတံ ဂန္ဓဓာတု ပေသာ – ဣဒံ တံ ရူပံ ဂန္ဓာယတနံ.

၆၂၇. ကတမံ တံ ရူပံ ဂန္ဓာယတနံ? ယော ဂန္ဓော စတုန္နံ မဟာဘူတာနံ ဥပါဒါယ အနိဒဿနော သပ္ပဋိဃော မူလဂန္ဓော သာရဂန္ဓော တစဂန္ဓော ပတ္တဂန္ဓော ပုပ္ဖဂန္ဓော ဖလဂန္ဓော အာမကဂန္ဓော ဝိဿဂန္ဓော သုဂန္ဓော ဒုဂ္ဂန္ဓော၊ ယော ဝါ ပနညောပိ အတ္ထိ ဂန္ဓော စတုန္နံ မဟာဘူတာနံ ဥပါဒါယ အနိဒဿနော သပ္ပဋိဃော၊ ယံ ဂန္ဓံ အာရဗ္ဘ ဃာနံ နိဿာယ ဃာနသမ္ဖဿော ဥပ္ပဇ္ဇိ ဝါ ဥပ္ပဇ္ဇတိ ဝါ ဥပ္ပဇ္ဇိဿတိ ဝါ ဥပ္ပဇ္ဇေ ဝါ။ပေ။ ယံ ဂန္ဓံ အာရဗ္ဘ ဃာနံ နိဿာယ ဃာနသမ္ဖဿဇာ ဝေဒနာ။ပေ။ သညာ။ပေ။ စေတနာ။ပေ။ ဃာနဝိညာဏံ ဥပ္ပဇ္ဇိ ဝါ ဥပ္ပဇ္ဇတိ ဝါ ဥပ္ပဇ္ဇိဿတိ ဝါ ဥပ္ပဇ္ဇေ ဝါ။ပေ။ ယံ ဂန္ဓာရမ္မဏော ဃာနံ နိဿာယ ဃာနသမ္ဖဿော ဥပ္ပဇ္ဇိ ဝါ ဥပ္ပဇ္ဇတိ ဝါ ဥပ္ပဇ္ဇိဿတိ ဝါ ဥပ္ပဇ္ဇေ ဝါ။ပေ။ ယံ ဂန္ဓာရမ္မဏာ ဃာနံ နိဿာယ ဃာနသမ္ဖဿဇာ ဝေဒနာ။ပေ။ သညာ။ပေ။ စေတနာ။ပေ။ ဃာနဝိညာဏံ ဥပ္ပဇ္ဇိ ဝါ ဥပ္ပဇ္ဇတိ ဝါ ဥပ္ပဇ္ဇိဿတိ ဝါ ဥပ္ပဇ္ဇေ ဝါ၊ ဂန္ဓော ပေသော ဂန္ဓာယတနံ ပေတံ ဂန္ဓဓာတု ပေသာ – ဣဒံ တံ ရူပံ ဂန္ဓာယတနံ.

၆၂၈. ကတမံ တံ ရူပံ ရသာယတနံ? ယော ရသော စတုန္နံ မဟာဘူတာနံ ဥပါဒါယ အနိဒဿနော သပ္ပဋိဃော မူလရသော ခန္ဓရသော တစရသော ပတ္တရသော ပုပ္ဖရသော ဖလရသော အမ္ဗိလံ မဓုရံ တိတ္တကံ ကဋုကံ လောဏိကံ ခါရိကံ လမ္ဗိလံ [လပိလကံ (သီ.)] ကသာဝေါ သာဒု အသာဒု၊ ယော ဝါ ပနညောပိ အတ္ထိ ရသော စတုန္နံ မဟာဘူတာနံ ဥပါဒါယ အနိဒဿနော သပ္ပဋိဃော၊ ယံ ရသံ အနိဒဿနံ သပ္ပဋိဃံ ဇိဝှါယ အနိဒဿနာယ သပ္ပဋိဃာယ သာယိ ဝါ သာယတိ ဝါ သာယိဿတိ ဝါ သာယေ ဝါ၊ ရသော ပေသော ရသာယတနံ ပေတံ ရသဓာတု ပေသာ – ဣဒံ တံ ရူပံ ရသာယတနံ.

၆၂၉. ကတမံ တံ ရူပံ ရသာယတနံ? ယော ရသော စတုန္နံ မဟာဘူတာနံ ဥပါဒါယ အနိဒဿနော သပ္ပဋိဃော မူလရသော ခန္ဓရသော တစရသော ပတ္တရသော ပုပ္ဖရသော ဖလရသော အမ္ဗိလံ မဓုရံ တိတ္တကံ ကဋုကံ လောဏိကံ ခါရိကံ လမ္ဗိလံ ကသာဝေါ သာဒု အသာဒု၊ ယော ဝါ ပနညောပိ အတ္ထိ ရသော စတုန္နံ မဟာဘူတာနံ ဥပါဒါယ အနိဒဿနော သပ္ပဋိဃော၊ ယမှိ ရသမှိ အနိဒဿနမှိ သပ္ပဋိဃမှိ ဇိဝှါ အနိဒဿနာ သပ္ပဋိဃာ ပဋိဟညိ ဝါ ပဋိဟညတိ ဝါ ပဋိဟညိဿတိ ဝါ ပဋိဟညေ ဝါ၊ ရသော ပေသော ရသာယတနံ ပေတံ ရသဓာတု ပေသာ – ဣဒံ တံ ရူပံ ရသာယတနံ.

၆၃၀. ကတမံ တံ ရူပံ ရသာယတနံ? ယော ရသော စတုန္နံ မဟာဘူတာနံ ဥပါဒါယ အနိဒဿနော သပ္ပဋိဃော မူလရသော ခန္ဓရသော တစရသော ပတ္တရသော ပုပ္ဖရသော ဖလရသော အမ္ဗိလံ မဓုရံ တိတ္တကံ ကဋုကံ လောဏိကံ ခါရိကံ လမ္ဗိလံ ကသာဝေါ သာဒု အသာဒု၊ ယော ဝါ ပနညောပိ အတ္ထိ ရသော စတုန္နံ မဟာဘူတာနံ ဥပါဒါယ အနိဒဿနော သပ္ပဋိဃော၊ ယော ရသော အနိဒဿနော သပ္ပဋိဃော ဇိဝှါယ အနိဒဿနာယ သပ္ပဋိဃာယ ပဋိဟညိ ဝါ ပဋိဟညတိ ဝါ ပဋိဟညိဿတိ ဝါ ပဋိဟညေ ဝါ၊ ရသော ပေသော ရသာယတနံ ပေတံ ရသဓာတု ပေသာ – ဣဒံ တံ ရူပံ ရသာယတနံ.

၆၃၁. ကတမံ တံ ရူပံ ရသာယတနံ? ယော ရသော စတုန္နံ မဟာဘူတာနံ ဥပါဒါယ အနိဒဿနော သပ္ပဋိဃော မူလရသော ခန္ဓရသော တစရသော ပတ္တရသော ပုပ္ဖရသော ဖလရသော အမ္ဗိလံ မဓုရံ တိတ္တကံ ကဋုကံ လောဏိကံ ခါရိကံ လမ္ဗိလံ ကသာဝေါ သာဒု အသာဒု၊ ယော ဝါ ပနညောပိ အတ္ထိ ရသော စတုန္နံ မဟာဘူတာနံ ဥပါဒါယ အနိဒဿနော သပ္ပဋိဃော၊ ယံ ရသံ အာရဗ္ဘ ဇိဝှံ နိဿာယ ဇိဝှါသမ္ဖဿော ဥပ္ပဇ္ဇိ ဝါ ဥပ္ပဇ္ဇတိ ဝါ ဥပ္ပဇ္ဇိဿတိ ဝါ ဥပ္ပဇ္ဇေ ဝါ။ပေ။ ယံ ရသံ အာရဗ္ဘ ဇိဝှံ နိဿာယ ဇိဝှါသမ္ဖဿဇာ ဝေဒနာ။ပေ။ သညာ။ပေ။ စေတနာ။ပေ။ ဇိဝှါဝိညာဏံ ဥပ္ပဇ္ဇိ ဝါ ဥပ္ပဇ္ဇတိ ဝါ ဥပ္ပဇ္ဇိဿတိ ဝါ ဥပ္ပဇ္ဇေ ဝါ။ပေ။ ယံ ရသာရမ္မဏော ဇိဝှံ နိဿာယ ဇိဝှါသမ္ဖဿော ဥပ္ပဇ္ဇိ ဝါ ဥပ္ပဇ္ဇတိ ဝါ ဥပ္ပဇ္ဇိဿတိ ဝါ ဥပ္ပဇ္ဇေ ဝါ။ပေ။ ယံ ရသာရမ္မဏာ ဇိဝှံ နိဿာယ ဇိဝှါသမ္ဖဿဇာ ဝေဒနာ။ပေ။ သညာ။ပေ။ စေတနာ။ပေ။ ဇိဝှါဝိညာဏံ ဥပ္ပဇ္ဇိ ဝါ ဥပ္ပဇ္ဇတိ ဝါ ဥပ္ပဇ္ဇိဿတိ ဝါ ဥပ္ပဇ္ဇေ ဝါ၊ ရသော ပေသော ရသာယတနံ ပေတံ ရသဓာတု ပေသာ – ဣဒံ တံ ရူပံ ရသာယတနံ.

၆၃၂. ကတမံ တံ ရူပံ ဣတ္ထိန္ဒြိယံ? ယံ ဣတ္ထိယာ ဣတ္ထိလိင်္ဂံ ဣတ္ထိနိမိတ္တံ ဣတ္ထိကုတ္တံ ဣတ္ထာကပ္ပေါ ဣတ္ထတ္တံ ဣတ္ထိဘာဝေါ [ဣတ္ထိတ္တံ ဣတ္ထီဘာဝေါ (သျာ.)] – ဣဒံ တံ ရူပံ ဣတ္ထိန္ဒြိယံ.

၆၃၃. ကတမံ တံ ရူပံ ပုရိသိန္ဒြိယံ? ယံ ပုရိသဿ ပုရိသလိင်္ဂံ ပုရိသနိမိတ္တံ ပုရိသကုတ္တံ ပုရိသာကပ္ပေါ ပုရိသတ္တံ ပုရိသဘာဝေါ – ဣဒံ တံ ရူပံ ပုရိသိန္ဒြိယံ.

၆၃၄. ကတမံ တံ ရူပံ ဇီဝိတိန္ဒြိယံ? ယော တေသံ ရူပီနံ ဓမ္မာနံ အာယု ဌိတိ ယပနာ ယာပနာ ဣရိယနာ ဝတ္တနာ ပါလနာ ဇီဝိတံ ဇီဝိတိန္ဒြိယံ – ဣဒံ တံ ရူပံ ဇီဝိတိန္ဒြိယံ.

၆၃၅. ကတမံ တံ ရူပံ ကာယဝိညတ္တိ? ယာ ကုသလစိတ္တဿ ဝါ အကုသလစိတ္တဿ ဝါ အဗျာကတစိတ္တဿ ဝါ အဘိက္ကမန္တဿ ဝါ ပဋိက္ကမန္တဿ ဝါ အာလောကေန္တဿ ဝါ ဝိလောကေန္တဿ ဝါ သမိဉ္ဇေန္တဿ ဝါ ပသာရေန္တဿ ဝါ ကာယဿ ထမ္ဘနာ သန္ထမ္ဘနာ သန္ထမ္ဘိတတ္တံ ဝိညတ္တိ ဝိညာပနာ ဝိညာပိတတ္တံ – ဣဒံ တံ ရူပံ ကာယဝိညတ္တိ.

၆၃၆. ကတမံ တံ ရူပံ ဝစီဝိညတ္တိ? ယာ ကုသလစိတ္တဿ ဝါ အကုသလစိတ္တဿ ဝါ အဗျာကတစိတ္တဿ ဝါ ဝါစာ ဂိရာ ဗျပ္ပထော ဥဒီရဏံ ဃောသော ဃောသကမ္မံ ဝါစာ ဝစီဘေဒေါ – အယံ ဝုစ္စတိ ဝါစာ. ယာ တာယ ဝါစာယ ဝိညတ္တိ ဝိညာပနာ ဝိညာပိတတ္တံ – ဣဒံ တံ ရူပံ ဝစီဝိညတ္တိ.

၆၃၇. ကတမံ တံ ရူပံ အာကာသဓာတု? ယော အာကာသော အာကာသဂတံ အဃံ အဃဂတံ ဝိဝရော ဝိဝရဂတံ အသမ္ဖုဋ္ဌံ စတူဟိ မဟာဘူတေဟိ – ဣဒံ တံ ရူပံ အာကာသဓာတု.

၆၃၈. ကတမံ တံ ရူပံ ရူပဿ လဟုတာ? ယာ ရူပဿ လဟုတာ လဟုပရိဏာမတာ အဒန္ဓနတာ အဝိတ္ထနတာ – ဣဒံ တံ ရူပံ ရူပဿ လဟုတာ.

၆၃၉. ကတမံ တံ ရူပံ ရူပဿ မုဒုတာ? ယာ ရူပဿ မုဒုတာ မဒ္ဒဝတာ အကက္ခဠတာ အကထိနတာ – ဣဒံ တံ ရူပံ ရူပဿ မုဒုတာ.

၆၄၀. ကတမံ တံ ရူပံ ရူပဿ ကမ္မညတာ? ယာ ရူပဿ ကမ္မညတာ ကမ္မညတ္တံ ကမ္မညဘာဝေါ – ဣဒံ တံ ရူပံ ရူပဿ ကမ္မညတာ.

၆၄၁. ကတမံ တံ ရူပံ ရူပဿ ဥပစယော? ယော အာယတနာနံ အာစယော၊ သော ရူပဿ ဥပစယော – ဣဒံ တံ ရူပံ ရူပဿ ဥပစယော.

၆၄၂. ကတမံ တံ ရူပံ ရူပဿ သန္တတိ? ယော ရူပဿ ဥပစယော၊ သာ ရူပဿ သန္တတိ – ဣဒံ တံ ရူပံ ရူပဿ သန္တတိ.

၆၄၃. ကတမံ တံ ရူပံ ရူပဿ ဇရတာ? ယာ ရူပဿ ဇရာ ဇီရဏတာ ခဏ္ဍိစ္စံ ပါလိစ္စံ ဝလိတ္တစတာ အာယုနော သံဟာနိ ဣန္ဒြိယာနံ ပရိပါကော – ဣဒံ တံ ရူပံ ရူပဿ ဇရတာ.

၆၄၄. ကတမံ တံ ရူပံ ရူပဿ အနိစ္စတာ? ယော ရူပဿ ခယော ဝယော ဘေဒေါ ပရိဘေဒေါ အနိစ္စတာ အန္တရဓာနံ – ဣဒံ တံ ရူပံ ရူပဿ အနိစ္စတာ.

၆၄၅. ကတမံ တံ ရူပံ ကဗဠီကာရော အာဟာရော? ဩဒနော ကုမ္မာသော သတ္တု မစ္ဆော မံသံ ခီရံ ဒဓိ သပ္ပိ နဝနီတံ တေလံ မဓု ဖာဏိတံ၊ ယံ ဝါ ပနညမ္ပိ အတ္ထိ ရူပံ ယမှိ ယမှိ ဇနပဒေ တေသံ တေသံ သတ္တာနံ မုခါသိယံ ဒန္တဝိခါဒနံ ဂလဇ္ဈောဟရဏီယံ ကုစ္ဆိဝိတ္ထမ္ဘနံ၊ ယာယ ဩဇာယ သတ္တာ ယာပေန္တိ – ဣဒံ တံ ရူပံ ကဗဠီကာရော အာဟာရော.

ဣဒံ တံ ရူပံ ဥပါဒါ.

ဥပါဒါဘာဇနီယံ.

ရူပကဏ္ဍေ ပဌမဘာဏဝါရော.

၆၄၆. ကတမံ တံ ရူပံ နော ဥပါဒါ? ဖောဋ္ဌဗ္ဗာယတနံ၊ အာပေါဓာတု.

၆၄၇. ကတမံ တံ ရူပံ ဖောဋ္ဌဗ္ဗာယတနံ? ပထဝီဓာတု တေဇောဓာတု ဝါယောဓာတု ကက္ခဠံ မုဒုကံ သဏှံ ဖရုသံ သုခသမ္ဖဿံ ဒုက္ခသမ္ဖဿံ ဂရုကံ လဟုကံ၊ ယံ ဖောဋ္ဌဗ္ဗံ အနိဒဿနံ သပ္ပဋိဃံ ကာယေန အနိဒဿနေန သပ္ပဋိဃေန ဖုသိ ဝါ ဖုသတိ ဝါ ဖုသိဿတိ ဝါ ဖုသေ ဝါ ဖောဋ္ဌဗ္ဗော ပေသော ဖောဋ္ဌဗ္ဗာယတနံ ပေတံ ဖောဋ္ဌဗ္ဗဓာတု ပေသာ – ဣဒံ တံ ရူပံ ဖောဋ္ဌဗ္ဗာယတနံ.

၆၄၈. ကတမံ တံ ရူပံ ဖောဋ္ဌဗ္ဗာယတနံ? ပထဝီဓာတု တေဇောဓာတု ဝါယောဓာတု ကက္ခဠံ မုဒုကံ သဏှံ ဖရုသံ သုခသမ္ဖဿံ ဒုက္ခသမ္ဖဿံ ဂရုကံ လဟုကံ၊ ယမှိ ဖောဋ္ဌဗ္ဗမှိ အနိဒဿနမှိ သပ္ပဋိဃမှိ ကာယော အနိဒဿနော သပ္ပဋိဃော ပဋိဟညိ ဝါ ပဋိဟညတိ ဝါ ပဋိဟညိဿတိ ဝါ ပဋိဟညေ ဝါ၊ ဖောဋ္ဌဗ္ဗော ပေသော ဖောဋ္ဌဗ္ဗာယတနံ ပေတံ ဖောဋ္ဌဗ္ဗဓာတု ပေသာ – ဣဒံ တံ ရူပံ ဖောဋ္ဌဗ္ဗာယတနံ.

၆၄၉. ကတမံ တံ ရူပံ ဖောဋ္ဌဗ္ဗာယတနံ? ပထဝီဓာတု တေဇောဓာတု ဝါယောဓာတု ကက္ခဠံ မုဒုကံ သဏှံ ဖရုသံ သုခသမ္ဖဿံ ဒုက္ခသမ္ဖဿံ ဂရုကံ လဟုကံ၊ ယော ဖောဋ္ဌဗ္ဗော အနိဒဿနော သပ္ပဋိဃော ကာယမှိ အနိဒဿနမှိ သပ္ပဋိဃမှိ ပဋိဟညိ ဝါ ပဋိဟညတိ ဝါ ပဋိဟညိဿတိ ဝါ ပဋိဟညေ ဝါ၊ ဖောဋ္ဌဗ္ဗော ပေသော ဖောဋ္ဌဗ္ဗာယတနံ ပေတံ ဖောဋ္ဌဗ္ဗဓာတု ပေသာ – ဣဒံ တံ ရူပံ ဖောဋ္ဌဗ္ဗာယတနံ.

၆၅၀. ကတမံ တံ ရူပံ ဖောဋ္ဌဗ္ဗာယတနံ? ပထဝီဓာတု တေဇောဓာတု ဝါယောဓာတု ကက္ခဠံ မုဒုကံ သဏှံ ဖရုသံ သုခသမ္ဖဿံ ဒုက္ခသမ္ဖဿံ ဂရုကံ လဟုကံ၊ ယံ ဖောဋ္ဌဗ္ဗံ အာရဗ္ဘ ကာယံ နိဿာယ ကာယသမ္ဖဿော ဥပ္ပဇ္ဇိ ဝါ ဥပ္ပဇ္ဇတိ ဝါ ဥပ္ပဇ္ဇိဿတိ ဝါ ဥပ္ပဇ္ဇေ ဝါ။ပေ။ ယံ ဖောဋ္ဌဗ္ဗံ အာရဗ္ဘ ကာယံ နိဿာယ ကာယသမ္ဖဿဇာ ဝေဒနာ။ပေ။ သညာ။ပေ။ စေတနာ။ပေ။ ကာယဝိညာဏံ ဥပ္ပဇ္ဇိ ဝါ ဥပ္ပဇ္ဇတိ ဝါ ဥပ္ပဇ္ဇိဿတိ ဝါ ဥပ္ပဇ္ဇေ ဝါ။ပေ။ ယံ ဖောဋ္ဌဗ္ဗာရမ္မဏော ကာယံ နိဿာယ ကာယသမ္ဖဿော ဥပ္ပဇ္ဇိ ဝါ ဥပ္ပဇ္ဇတိ ဝါ ဥပ္ပဇ္ဇိဿတိ ဝါ ဥပ္ပဇ္ဇေ ဝါ။ပေ။ ယံ ဖောဋ္ဌဗ္ဗာရမ္မဏာ ကာယံ နိဿာယ ကာယသမ္ဖဿဇာ ဝေဒနာ။ပေ။ သညာ။ပေ။ စေတနာ။ပေ။ ကာယဝိညာဏံ ဥပ္ပဇ္ဇိ ဝါ ဥပ္ပဇ္ဇတိ ဝါ ဥပ္ပဇ္ဇိဿတိ ဝါ ဥပ္ပဇ္ဇေ ဝါ၊ ဖောဋ္ဌဗ္ဗော ပေသော ဖောဋ္ဌဗ္ဗာယတနံ ပေတံ ဖောဋ္ဌဗ္ဗဓာတု ပေသာ – ဣဒံ တံ ရူပံ ဖောဋ္ဌဗ္ဗာယတနံ.

၆၅၁. ကတမံ တံ ရူပံ အာပေါဓာတု? ယံ အာပေါ အာပေါဂတံ သိနေဟော သိနေဟဂတံ ဗန္ဓနတ္တံ ရူပဿ – ဣဒံ တံ ရူပံ အာပေါဓာတု.

ဣဒံ တံ ရူပံ နော ဥပါဒါ.

၆၅၂. ကတမံ တံ ရူပံ ဥပါဒိဏ္ဏံ? စက္ခာယတနံ သောတာယတနံ ဃာနာယတနံ ဇိဝှါယတနံ ကာယာယတနံ ဣတ္ထိန္ဒြိယံ ပုရိသိန္ဒြိယံ ဇီဝိတိန္ဒြိယံ၊ ယံ ဝါ ပနညမ္ပိ အတ္ထိ ရူပံ ကမ္မဿ ကတတ္တာ ရူပါယတနံ ဂန္ဓာယတနံ ရသာယတနံ ဖောဋ္ဌဗ္ဗာယတနံ အာကာသဓာတု အာပေါဓာတု ရူပဿ ဥပစယော ရူပဿ သန္တတိ ကဗဠီကာရော အာဟာရော – ဣဒံ တံ ရူပံ ဥပါဒိဏ္ဏံ.

၆၅၃. ကတမံ တံ ရူပံ အနုပါဒိဏ္ဏံ? သဒ္ဒါယတနံ ကာယဝိညတ္တိ ဝစီဝိညတ္တိ ရူပဿ လဟုတာ ရူပဿ မုဒုတာ ရူပဿ ကမ္မညတာ ရူပဿ ဇရတာ ရူပဿ အနိစ္စတာ၊ ယံ ဝါ ပနညမ္ပိ အတ္ထိ ရူပံ န ကမ္မဿ ကတတ္တာ ရူပါယတနံ ဂန္ဓာယတနံ ရသာယတနံ ဖောဋ္ဌဗ္ဗာယတနံ အာကာသဓာတု အာပေါဓာတု ရူပဿ ဥပစယော ရူပဿ သန္တတိ ကဗဠီကာရော အာဟာရော – ဣဒံ တံ ရူပံ အနုပါဒိဏ္ဏံ.

၆၅၄. ကတမံ တံ ရူပံ ဥပါဒိဏ္ဏုပါဒါနိယံ? စက္ခာယတနံ။ပေ။ ကာယာယတနံ ဣတ္ထိန္ဒြိယံ ပုရိသိန္ဒြိယံ ဇီဝိတိန္ဒြိယံ၊ ယံ ဝါ ပနညမ္ပိ အတ္ထိ ရူပံ ကမ္မဿ ကတတ္တာ ရူပါယတနံ ဂန္ဓာယတနံ ရသာယတနံ ဖောဋ္ဌဗ္ဗာယတနံ အာကာသဓာတု အာပေါဓာတု ရူပဿ ဥပစယော ရူပဿ သန္တတိ ကဗဠီကာရော အာဟာရော – ဣဒံ တံ ရူပံ ဥပါဒိဏ္ဏုပါဒါနိယံ.

၆၅၅. ကတမံ တံ ရူပံ အနုပါဒိဏ္ဏုပါဒါနိယံ? သဒ္ဒါယတနံ ကာယဝိညတ္တိ ဝစီဝိညတ္တိ ရူပဿ လဟုတာ ရူပဿ မုဒုတာ ရူပဿ ကမ္မညတာ ရူပဿ ဇရတာ ရူပဿ အနိစ္စတာ၊ ယံ ဝါ ပနညမ္ပိ အတ္ထိ ရူပံ န ကမ္မဿ ကတတ္တာ၊ ရူပါယတနံ ဂန္ဓာယတနံ ရသာယတနံ ဖောဋ္ဌဗ္ဗာယတနံ အာကာသဓာတု အာပေါဓာတု ရူပဿ ဥပစယော ရူပဿ သန္တတိ ကဗဠီကာရော အာဟာရော – ဣဒံ တံ ရူပံ အနုပါဒိဏ္ဏုပါဒါနိယံ.

၆၅၆. ကတမံ တံ ရူပံ သနိဒဿနံ? ရူပါယတနံ – ဣဒံ တံ ရူပံ သနိဒဿနံ.

၆၅၇. ကတမံ တံ ရူပံ အနိဒဿနံ? စက္ခာယတနံ။ပေ။ ကဗဠီကာရော အာဟာရော – ဣဒံ တံ ရူပံ အနိဒဿနံ.

၆၅၈. ကတမံ တံ ရူပံ သပ္ပဋိဃံ? စက္ခာယတနံ သောတာယတနံ ဃာနာယတနံ ဇိဝှါယတနံ ကာယာယတနံ ရူပါယတနံ သဒ္ဒါယတနံ ဂန္ဓာယတနံ ရသာယတနံ ဖောဋ္ဌဗ္ဗာယတနံ – ဣဒံ တံ ရူပံ သပ္ပဋိဃံ.

၆၅၉. ကတမံ တံ ရူပံ အပ္ပဋိဃံ? ဣတ္ထိန္ဒြိယံ။ပေ။ ကဗဠီကာရော အာဟာရော – ဣဒံ တံ ရူပံ အပ္ပဋိဃံ.

၆၆၀. ကတမံ တံ ရူပံ ဣန္ဒြိယံ? စက္ခုန္ဒြိယံ သောတိန္ဒြိယံ ဃာနိန္ဒြိယံ ဇိဝှိန္ဒြိယံ ကာယိန္ဒြိယံ ဣတ္ထိန္ဒြိယံ ပုရိသိန္ဒြိယံ ဇီဝိတိန္ဒြိယံ – ဣဒံ တံ ရူပံ ဣန္ဒြိယံ.

၆၆၁. ကတမံ တံ ရူပံ န ဣန္ဒြိယံ? ရူပါယတနံ။ပေ။ ကဗဠီကာရော အာဟာရော – ဣဒံ တံ ရူပံ န ဣန္ဒြိယံ.

၆၆၂. ကတမံ တံ ရူပံ မဟာဘူတံ? ဖောဋ္ဌဗ္ဗာယတနံ အာပေါဓာတု – ဣဒံ တံ ရူပံ မဟာဘူတံ.

၆၆၃. ကတမံ တံ ရူပံ န မဟာဘူတံ? စက္ခာယတနံ။ပေ။ ကဗဠီကာရော အာဟာရော – ဣဒံ တံ ရူပံ န မဟာဘူတံ.

၆၆၄. ကတမံ တံ ရူပံ ဝိညတ္တိ? ကာယဝိညတ္တိ ဝစီဝိညတ္တိ – ဣဒံ တံ ရူပံ ဝိညတ္တိ.

၆၆၅. ကတမံ တံ ရူပံ န ဝိညတ္တိ? စက္ခာယတနံ။ပေ။ ကဗဠီကာရော အာဟာရော – ဣဒံ တံ ရူပံ န ဝိညတ္တိ.

၆၆၆. ကတမံ တံ ရူပံ စိတ္တသမုဋ္ဌာနံ? ကာယဝိညတ္တိ ဝစီဝိညတ္တိ ယံ ဝါ ပနညမ္ပိ အတ္ထိ ရူပံ စိတ္တဇံ စိတ္တဟေတုကံ စိတ္တသမုဋ္ဌာနံ ရူပါယတနံ သဒ္ဒါယတနံ ဂန္ဓာယတနံ ရသာယတနံ ဖောဋ္ဌဗ္ဗာယတနံ အာကာသဓာတု အာပေါဓာတု ရူပဿ လဟုတာ ရူပဿ မုဒုတာ ရူပဿ ကမ္မညတာ ရူပဿ ဥပစယော ရူပဿ သန္တတိ ကဗဠီကာရော အာဟာရော – ဣဒံ တံ ရူပံ စိတ္တသမုဋ္ဌာနံ.

၆၆၇. ကတမံ တံ ရူပံ န စိတ္တသမုဋ္ဌာနံ? စက္ခာယတနံ။ပေ။ ကာယာယတနံ ဣတ္ထိန္ဒြိယံ ပုရိသိန္ဒြိယံ ဇီဝိတိန္ဒြိယံ ရူပဿ ဇရတာ ရူပဿ အနိစ္စတာ၊ ယံ ဝါ ပနညမ္ပိ အတ္ထိ ရူပံ န စိတ္တဇံ န စိတ္တဟေတုကံ န စိတ္တသမုဋ္ဌာနံ ရူပါယတနံ သဒ္ဒါယတနံ ဂန္ဓာယတနံ ရသာယတနံ ဖောဋ္ဌဗ္ဗာယတနံ အာကာသဓာတု အာပေါဓာတု ရူပဿ လဟုတာ ရူပဿ မုဒုတာ ရူပဿ ကမ္မညတာ ရူပဿ ဥပစယော ရူပဿ သန္တတိ ကဗဠီကာရော အာဟာရော – ဣဒံ တံ ရူပံ န စိတ္တသမုဋ္ဌာနံ.

၆၆၈. ကတမံ တံ ရူပံ စိတ္တသဟဘု? ကာယဝိညတ္တိ ဝစီဝိညတ္တိ – ဣဒံ တံ ရူပံ စိတ္တသဟဘု.

၆၆၉. ကတမံ တံ ရူပံ န စိတ္တသဟဘု? စက္ခာယတနံ။ပေ။ ကဗဠီကာရော အာဟာရော – ဣဒံ တံ ရူပံ န စိတ္တသဟဘု.

၆၇၀. ကတမံ တံ ရူပံ စိတ္တာနုပရိဝတ္တိ? ကာယဝိညတ္တိ ဝစီဝိညတ္တိ – ဣဒံ တံ ရူပံ စိတ္တာနုပရိဝတ္တိ.

၆၇၁. ကတမံ တံ ရူပံ န စိတ္တာနုပရိဝတ္တိ? စက္ခာယတနံ။ပေ။ ကဗဠီကာရော အာဟာရော – ဣဒံ တံ ရူပံ န စိတ္တာနုပရိဝတ္တိ.

၆၇၂. ကတမံ တံ ရူပံ အဇ္ဈတ္တိကံ? စက္ခာယတနံ။ပေ။ ကာယာယတနံ – ဣဒံ တံ ရူပံ အဇ္ဈတ္တိကံ.

၆၇၃. ကတမံ တံ ရူပံ ဗာဟိရံ? ရူပါယတနံ။ပေ။ ကဗဠီကာရော အာဟာရော – ဣဒံ တံ ရူပံ ဗာဟိရံ.

၆၇၄. ကတမံ တံ ရူပံ ဩဠာရိကံ? စက္ခာယတနံ။ပေ။ ဖောဋ္ဌဗ္ဗာယတနံ – ဣဒံ တံ ရူပံ ဩဠာရိကံ.

၆၇၅. ကတမံ တံ ရူပံ သုခုမံ? ဣတ္ထိန္ဒြိယံ။ပေ။ ကဗဠီကာရော အာဟာရော – ဣဒံ တံ ရူပံ သုခုမံ.

၆၇၆. ကတမံ တံ ရူပံ ဒူရေ? ဣတ္ထိန္ဒြိယံ။ပေ။ ကဗဠီကာရော အာဟာရော – ဣဒံ တံ ရူပံ ဒူရေ.

၆၇၇. ကတမံ တံ ရူပံ သန္တိကေ? စက္ခာယတနံ။ပေ။ ဖောဋ္ဌဗ္ဗာယတနံ – ဣဒံ တံ ရူပံ သန္တိကေ.

၆၇၈. ကတမံ တံ ရူပံ စက္ခုသမ္ဖဿဿ ဝတ္ထု? စက္ခာယတနံ – ဣဒံ တံ ရူပံ စက္ခုသမ္ဖဿဿ ဝတ္ထု.

၆၇၉. ကတမံ တံ ရူပံ စက္ခုသမ္ဖဿဿ န ဝတ္ထု? သောတာယတနံ။ပေ။ ကဗဠီကာရော အာဟာရော – ဣဒံ တံ ရူပံ စက္ခုသမ္ဖဿဿ န ဝတ္ထု.

၆၈၀. ကတမံ တံ ရူပံ စက္ခုသမ္ဖဿဇာယ ဝေဒနာယ။ပေ။ သညာယ။ပေ။ စေတနာယ ။ပေ။ စက္ခုဝိညာဏဿ ဝတ္ထု? စက္ခာယတနံ – ဣဒံ တံ ရူပံ စက္ခုဝိညာဏဿ ဝတ္ထု.

၆၈၁. ကတမံ တံ ရူပံ စက္ခုဝိညာဏဿ န ဝတ္ထု? သောတာယတနံ။ပေ။ ကဗဠီကာရော အာဟာရော – ဣဒံ တံ ရူပံ စက္ခုဝိညာဏဿ န ဝတ္ထု.

၆၈၂. ကတမံ တံ ရူပံ သောတသမ္ဖဿဿ။ပေ။ ဃာနသမ္ဖဿဿ။ပေ။ ဇိဝှါသမ္ဖဿဿ။ပေ။ ကာယသမ္ဖဿဿ ဝတ္ထု? ကာယာယတနံ – ဣဒံ တံ ရူပံ ကာယသမ္ဖဿဿ ဝတ္ထု.

၆၈၃. ကတမံ တံ ရူပံ ကာယသမ္ဖဿဿ န ဝတ္ထု? စက္ခာယတနံ။ပေ။ ကဗဠီကာရော အာဟာရော – ဣဒံ တံ ရူပံ ကာယသမ္ဖဿဿ န ဝတ္ထု.

၆၈၄. ကတမံ တံ ရူပံ ကာယသမ္ဖဿဇာယ ဝေဒနာယ။ပေ။ သညာယ။ပေ။ စေတနာယ။ပေ။ ကာယဝိညာဏဿ ဝတ္ထု? ကာယာယတနံ – ဣဒံ တံ ရူပံ ကာယဝိညာဏဿ ဝတ္ထု.

၆၈၅. ကတမံ တံ ရူပံ ကာယဝိညာဏဿ န ဝတ္ထု? စက္ခာယတနံ။ပေ။ ကဗဠီကာရော အာဟာရော – ဣဒံ တံ ရူပံ ကာယဝိညာဏဿ န ဝတ္ထု.

၆၈၆. ကတမံ တံ ရူပံ စက္ခုသမ္ဖဿဿ အာရမ္မဏံ? ရူပါယတနံ – ဣဒံ တံ ရူပံ စက္ခုသမ္ဖဿဿ အာရမ္မဏံ.

၆၈၇. ကတမံ တံ ရူပံ စက္ခုသမ္ဖဿဿ န အာရမ္မဏံ? စက္ခာယတနံ။ပေ။ ကဗဠီကာရော အာဟာရော – ဣဒံ တံ ရူပံ စက္ခုသမ္ဖဿဿ န အာရမ္မဏံ.

၆၈၈. ကတမံ တံ ရူပံ စက္ခုသမ္ဖဿဇာယ ဝေဒနာယ။ပေ။ သညာယ။ပေ။ စေတနာယ။ပေ။ စက္ခုဝိညာဏဿ အာရမ္မဏံ? ရူပါယတနံ – ဣဒံ တံ ရူပံ စက္ခုဝိညာဏဿ အာရမ္မဏံ.

၆၈၉. ကတမံ တံ ရူပံ စက္ခုဝိညာဏဿ န အာရမ္မဏံ? စက္ခာယတနံ။ပေ။ ကဗဠီကာရော အာဟာရော – ဣဒံ တံ ရူပံ စက္ခုဝိညာဏဿ န အာရမ္မဏံ.

၆၉၀. ကတမံ တံ ရူပံ သောတသမ္ဖဿဿ။ပေ။ ဃာနသမ္ဖဿဿ ။ပေ။ ဇိဝှါသမ္ဖဿဿ။ပေ။ ကာယသမ္ဖဿဿ အာရမ္မဏံ? ဖောဋ္ဌဗ္ဗာယတနံ – ဣဒံ တံ ရူပံ ကာယသမ္ဖဿဿ အာရမ္မဏံ.

၆၉၁. ကတမံ တံ ရူပံ ကာယသမ္ဖဿဿ န အာရမ္မဏံ? စက္ခာယတနံ။ပေ။ ကဗဠီကာရော အာဟာရော – ဣဒံ တံ ရူပံ ကာယသမ္ဖဿဿ န အာရမ္မဏံ.

၆၉၂. ကတမံ တံ ရူပံ ကာယသမ္ဖဿဇာယ ဝေဒနာယ။ပေ။ သညာယ။ပေ။ စေတနာယ။ပေ။ ကာယဝိညာဏဿ အာရမ္မဏံ? ဖောဋ္ဌဗ္ဗာယတနံ – ဣဒံ တံ ရူပံ ကာယဝိညာဏဿ အာရမ္မဏံ.

၆၉၃. ကတမံ တံ ရူပံ ကာယဝိညာဏဿ န အာရမ္မဏံ? စက္ခာယတနံ။ပေ။ ကဗဠီကာရော အာဟာရော – ဣဒံ တံ ရူပံ ကာယဝိညာဏဿ န အာရမ္မဏံ.

၆၉၄. ကတမံ တံ ရူပံ စက္ခာယတနံ? ယံ စက္ခု စတုန္နံ မဟာဘူတာနံ ဥပါဒါယ ပသာဒေါ။ပေ။ သုညော ဂါမော ပေသော – ဣဒံ တံ ရူပံ စက္ခာယတနံ.

၆၉၅. ကတမံ တံ ရူပံ န စက္ခာယတနံ? သောတာယတနံ။ပေ။ ကဗဠီကာရော အာဟာရော – ဣဒံ တံ ရူပံ န စက္ခာယတနံ.

၆၉၆. ကတမံ တံ ရူပံ သောတာယတနံ။ပေ။ ဃာနာယတနံ။ပေ။ ဇိဝှါယတနံ။ပေ။ ကာယာယတနံ? ယော ကာယော စတုန္နံ မဟာဘူတာနံ ဥပါဒါယ ပသာဒေါ။ပေ။ သုညော ဂါမော ပေသော – ဣဒံ တံ ရူပံ ကာယာယတနံ.

၆၉၇. ကတမံ တံ ရူပံ န ကာယာယတနံ? စက္ခာယတနံ။ပေ။ ကဗဠီကာရော အာဟာရော – ဣဒံ တံ ရူပံ န ကာယာယတနံ.

၆၉၈. ကတမံ တံ ရူပံ ရူပါယတနံ? ယံ ရူပံ စတုန္နံ မဟာဘူတာနံ ဥပါဒါယ ဝဏ္ဏနိဘာ။ပေ။ ရူပဓာတု ပေသာ – ဣဒံ တံ ရူပံ ရူပါယတနံ.

၆၉၉. ကတမံ တံ ရူပံ န ရူပါယတနံ? စက္ခာယတနံ။ပေ။ ကဗဠီကာရော အာဟာရော – ဣဒံ တံ ရူပံ န ရူပါယတနံ.

၇၀၀. ကတမံ တံ ရူပံ သဒ္ဒါယတနံ။ပေ။ ဂန္ဓာယတနံ ။ပေ။ ရသာယတနံ။ပေ။ ဖောဋ္ဌဗ္ဗာယတနံ? ပထဝီဓာတု။ပေ။ ဖောဋ္ဌဗ္ဗဓာတု ပေသာ – ဣဒံ တံ ရူပံ ဖောဋ္ဌဗ္ဗာယတနံ.

၇၀၁. ကတမံ တံ ရူပံ န ဖောဋ္ဌဗ္ဗာယတနံ? စက္ခာယတနံ။ပေ။ ကဗဠီကာရော အာဟာရော – ဣဒံ တံ ရူပံ န ဖောဋ္ဌဗ္ဗာယတနံ.

၇၀၂. ကတမံ တံ ရူပံ စက္ခုဓာတု? စက္ခာယတနံ – ဣဒံ တံ ရူပံ စက္ခုဓာတု.

၇၀၃. ကတမံ တံ ရူပံ န စက္ခုဓာတု? သောတာယတနံ။ပေ။ ကဗဠီကာရော အာဟာရော – ဣဒံ တံ ရူပံ န စက္ခုဓာတု.

၇၀၄. ကတမံ တံ ရူပံ သောတဓာတု။ပေ။ ဃာနဓာတု။ပေ။ ဇိဝှါဓာတု။ပေ။ ကာယဓာတု? ကာယာယတနံ – ဣဒံ တံ ရူပံ ကာယဓာတု.

၇၀၅. ကတမံ တံ ရူပံ န ကာယဓာတု? စက္ခာယတနံ။ပေ။ ကဗဠီကာရော အာဟာရော – ဣဒံ တံ ရူပံ န ကာယဓာတု.

၇၀၆. ကတမံ တံ ရူပံ ရူပဓာတု? ရူပါယတနံ – ဣဒံ တံ ရူပံ ရူပဓာတု.

၇၀၇. ကတမံ တံ ရူပံ န ရူပဓာတု? စက္ခာယတနံ။ပေ။ ကဗဠီကာရော အာဟာရော – ဣဒံ တံ ရူပံ န ရူပဓာတု.

၇၀၈. ကတမံ တံ ရူပံ သဒ္ဒဓာတု။ပေ။ ဂန္ဓဓာတု။ပေ။ ရသဓာတု။ပေ။ ဖောဋ္ဌဗ္ဗဓာတု? ဖောဋ္ဌဗ္ဗာယတနံ – ဣဒံ တံ ရူပံ ဖောဋ္ဌဗ္ဗဓာတု.

၇၀၉. ကတမံ တံ ရူပံ န ဖောဋ္ဌဗ္ဗဓာတု? စက္ခာယတနံ။ပေ။ ကဗဠီကာရော အာဟာရော – ဣဒံ တံ ရူပံ န ဖောဋ္ဌဗ္ဗဓာတု.

၇၁၀. ကတမံ တံ ရူပံ စက္ခုန္ဒြိယံ? ယံ စက္ခု စတုန္နံ မဟာဘူတာနံ ဥပါဒါယ ပသာဒေါ။ပေ။ သုညော ဂါမော ပေသော – ဣဒံ တံ ရူပံ စက္ခုန္ဒြိယံ.

၇၁၁. ကတမံ တံ ရူပံ န စက္ခုန္ဒြိယံ? သောတာယတနံ။ပေ။ ကဗဠီကာရော အာဟာရော – ဣဒံ တံ ရူပံ န စက္ခုန္ဒြိယံ.

၇၁၂. ကတမံ တံ ရူပံ သောတိန္ဒြိယံ။ပေ။ ဃာနိန္ဒြိယံ။ပေ။ ဇိဝှိန္ဒြိယံ။ပေ။ ကာယိန္ဒြိယံ? ယော ကာယော စတုန္နံ မဟာဘူတာနံ ဥပါဒါယ ပသာဒေါ။ပေ။ သုညော ဂါမော ပေသော – ဣဒံ တံ ရူပံ ကာယိန္ဒြိယံ.

၇၁၃. ကတမံ တံ ရူပံ န ကာယိန္ဒြိယံ? စက္ခာယတနံ။ပေ။ ကဗဠီကာရော အာဟာရော – ဣဒံ တံ ရူပံ န ကာယိန္ဒြိယံ.

၇၁၄. ကတမံ တံ ရူပံ ဣတ္ထိန္ဒြိယံ? ယံ ဣတ္ထိယာ ဣတ္ထိလိင်္ဂံ ဣတ္ထိနိမိတ္တံ ဣတ္ထိကုတ္တံ ဣတ္ထာကပ္ပေါ ဣတ္ထတ္တံ ဣတ္ထိဘာဝေါ – ဣဒံ တံ ရူပံ ဣတ္ထိန္ဒြိယံ.

၇၁၅. ကတမံ တံ ရူပံ န ဣတ္ထိန္ဒြိယံ? စက္ခာယတနံ။ပေ။ ကဗဠီကာရော အာဟာရော – ဣဒံ တံ ရူပံ န ဣတ္ထိန္ဒြိယံ.

၇၁၆. ကတမံ တံ ရူပံ ပုရိသိန္ဒြိယံ? ယံ ပုရိသဿ ပုရိသလိင်္ဂံ ပုရိသနိမိတ္တံ ပုရိသကုတ္တံ ပုရိသာကပ္ပေါ ပုရိသတ္တံ ပုရိသဘာဝေါ – ဣဒံ တံ ရူပံ ပုရိသိန္ဒြိယံ.

၇၁၇. ကတမံ တံ ရူပံ န ပုရိသိန္ဒြိယံ? စက္ခာယတနံ။ပေ။ ကဗဠီကာရော အာဟာရော – ဣဒံ တံ ရူပံ န ပုရိသိန္ဒြိယံ.

၇၁၈. ကတမံ တံ ရူပံ ဇီဝိတိန္ဒြိယံ? ယော တေသံ ရူပီနံ ဓမ္မာနံ အာယု ဌိတိ ယပနာ ယာပနာ ဣရိယနာ ဝတ္တနာ ပါလနာ ဇီဝိတံ ဇီဝိတိန္ဒြိယံ – ဣဒံ တံ ရူပံ ဇီဝိတိန္ဒြိယံ.

၇၁၉. ကတမံ တံ ရူပံ န ဇီဝိတိန္ဒြိယံ? စက္ခာယတနံ။ပေ။ ကဗဠီကာရော အာဟာရော – ဣဒံ တံ ရူပံ န ဇီဝိတိန္ဒြိယံ.

၇၂၀. ကတမံ တံ ရူပံ ကာယဝိညတ္တိ? ယာ ကုသလစိတ္တဿ ဝါ အကုသလစိတ္တဿ ဝါ အဗျာကတစိတ္တဿ ဝါ အဘိက္ကမန္တဿ ဝါ ပဋိက္ကမန္တဿ ဝါ အာလောကေန္တဿ ဝါ ဝိလောကေန္တဿ ဝါ သမိဉ္ဇေန္တဿ ဝါ ပသာရေန္တဿ ဝါ ကာယဿ ထမ္ဘနာ သန္ထမ္ဘနာ သန္ထမ္ဘိတတ္တံ ဝိညတ္တိ ဝိညာပနာ ဝိညာပိတတ္တံ – ဣဒံ တံ ရူပံ ကာယဝိညတ္တိ.

၇၂၁. ကတမံ တံ ရူပံ န ကာယဝိညတ္တိ? စက္ခာယတနံ။ပေ။ ကဗဠီကာရော အာဟာရော – ဣဒံ တံ ရူပံ န ကာယဝိညတ္တိ.

၇၂၂. ကတမံ တံ ရူပံ ဝစီဝိညတ္တိ? ယာ ကုသလစိတ္တဿ ဝါ အကုသလစိတ္တဿ ဝါ အဗျာကတစိတ္တဿ ဝါ ဝါစာ ဂိရာ ဗျပ္ပထော ဥဒီရဏံ ဃောသော ဃောသကမ္မံ ဝါစာ ဝစီဘေဒေါ၊ အယံ ဝုစ္စတိ ဝါစာ. ယာ တာယ ဝါစာယ ဝိညတ္တိ ဝိညာပနာ ဝိညာပိတတ္တံ – ဣဒံ တံ ရူပံ ဝစီဝိညတ္တိ.

၇၂၃. ကတမံ တံ ရူပံ န ဝစီဝိညတ္တိ? စက္ခာယတနံ။ပေ။ ကဗဠီကာရော အာဟာရော – ဣဒံ တံ ရူပံ န ဝစီဝိညတ္တိ.

၇၂၄. ကတမံ တံ ရူပံ အာကာသဓာတု? ယော အာကာသော အာကာသဂတံ အဃံ အဃဂတံ ဝိဝရော ဝိဝရဂတံ အသမ္ဖုဋ္ဌံ စတူဟိ မဟာဘူတေဟိ – ဣဒံ တံ ရူပံ အာကာသဓာတု.

၇၂၅. ကတမံ တံ ရူပံ န အာကာသဓာတု? စက္ခာယတနံ ။ပေ။ ကဗဠီကာရော အာဟာရော – ဣဒံ တံ ရူပံ န အာကာသဓာတု.

၇၂၆. ကတမံ တံ ရူပံ အာပေါဓာတု? ယံ အာပေါ အာပေါဂတံ သိနေဟော သိနေဟဂတံ ဗန္ဓနတ္တံ ရူပဿ – ဣဒံ တံ ရူပံ အာပေါဓာတု.

၇၂၇. ကတမံ တံ ရူပံ န အာပေါဓာတု? စက္ခာယတနံ။ပေ။ ကဗဠီကာရော အာဟာရော – ဣဒံ တံ ရူပံ န အာပေါဓာတု.

၇၂၈. ကတမံ တံ ရူပံ ရူပဿ လဟုတာ? ယာ ရူပဿ လဟုတာ လဟုပရိဏာမတာ အဒန္ဓနတာ အဝိတ္ထနတာ – ဣဒံ တံ ရူပံ ရူပဿ လဟုတာ.

၇၂၉. ကတမံ တံ ရူပံ ရူပဿ န လဟုတာ? စက္ခာယတနံ။ပေ။ ကဗဠီကာရော အာဟာရော – ဣဒံ တံ ရူပံ ရူပဿ န လဟုတာ.

၇၃၀. ကတမံ တံ ရူပံ ရူပဿ မုဒုတာ? ယာ ရူပဿ မုဒုတာ မဒ္ဒဝတာ အကက္ခဠတာ အကထိနတာ – ဣဒံ တံ ရူပံ ရူပဿ မုဒုတာ.

၇၃၁. ကတမံ တံ ရူပံ ရူပဿ န မုဒုတာ? စက္ခာယတနံ။ပေ။ ကဗဠီကာရော အာဟာရော – ဣဒံ တံ ရူပံ ရူပဿ န မုဒုတာ.

၇၃၂. ကတမံ တံ ရူပံ ရူပဿ ကမ္မညတာ? ယာ ရူပဿ ကမ္မညတာ ကမ္မညတ္တံ ကမ္မညဘာဝေါ – ဣဒံ တံ ရူပံ ရူပဿ ကမ္မညတာ.

၇၃၃. ကတမံ တံ ရူပံ ရူပဿ န ကမ္မညတာ? စက္ခာယတနံ။ပေ။ ကဗဠီကာရော အာဟာရော – ဣဒံ တံ ရူပံ ရူပဿ န ကမ္မညတာ.