၂. ဒုကံ

၂၁၂. ဟေတူဟိ ဓမ္မေဟိ ယေ ဓမ္မာ။ ဟေတူဟိ စေဝ သဟေတုကေဟိ စ ဓမ္မေဟိ ယေ ဓမ္မာ။ ဟေတူဟိ စေဝ ဟေတုသမ္ပယုတ္တေဟိ စ ဓမ္မေဟိ ယေ ဓမ္မာ ခန္ဓသင်္ဂဟေန အသင်္ဂဟိတာ အာယတနသင်္ဂဟေန အသင်္ဂဟိတာ ဓာတုသင်္ဂဟေန အသင်္ဂဟိတာ၊ တေဟိ ဓမ္မေဟိ ယေ ဓမ္မာ။ပေ။ တေ ဓမ္မာ ဒွီဟိ ခန္ဓေဟိ ဧကာဒသဟာယတနေဟိ သတ္တရသဟိ ဓာတူဟိ အသင်္ဂဟိတာ.

၂၁၃. သဟေတုကေဟိ ဓမ္မေဟိ ယေ ဓမ္မာ။ ဟေတုသမ္ပယုတ္တေဟိ ဓမ္မေဟိ ယေ ဓမ္မာ။ သဟေတုကေဟိ စေဝ န စ ဟေတူဟိ ဓမ္မေဟိ ယေ ဓမ္မာ။ ဟေတုသမ္ပယုတ္တေဟိ စေဝ န စ ဟေတူဟိ ဓမ္မေဟိ ယေ ဓမ္မာ။ န ဟေတုသဟေတုကေဟိ [န ဟေတူ သဟေတုကေဟိ (သီ.)၊ န ဟေတူဟိ သဟေတုကေဟိ (သျာ. က.)] ဓမ္မေဟိ ယေ ဓမ္မာ ခန္ဓသင်္ဂဟေန အသင်္ဂဟိတာ အာယတနသင်္ဂဟေန အသင်္ဂဟိတာ ဓာတုသင်္ဂဟေန အသင်္ဂဟိတာ၊ တေဟိ ဓမ္မေဟိ ယေ ဓမ္မာ။ပေ။ တေ ဓမ္မာ ဧကေန ခန္ဓေန ဒသဟာယတနေဟိ ဒသဟိ ဓာတူဟိ အသင်္ဂဟိတာ.

၂၁၄. အပ္ပစ္စယေဟိ ဓမ္မေဟိ ယေ ဓမ္မာ။ အသင်္ခတေဟိ ဓမ္မေဟိ ယေ ဓမ္မာ ခန္ဓသင်္ဂဟေန အသင်္ဂဟိတာ အာယတနသင်္ဂဟေန အသင်္ဂဟိတာ ဓာတုသင်္ဂဟေန အသင်္ဂဟိတာ၊ တေဟိ ဓမ္မေဟိ ယေ ဓမ္မာ။ပေ။ တေ ဓမ္မာ ဒွီဟိ ခန္ဓေဟိ ဧကာဒသဟာယတနေဟိ သတ္တရသဟိ ဓာတူဟိ အသင်္ဂဟိတာ.

၂၁၅. သနိဒဿနေဟိ ဓမ္မေဟိ ယေ ဓမ္မာ။ သပ္ပဋိဃေဟိ ဓမ္မေဟိ ယေ ဓမ္မာ ခန္ဓသင်္ဂဟေန အသင်္ဂဟိတာ အာယတနသင်္ဂဟေန အသင်္ဂဟိတာ ဓာတုသင်္ဂဟေန အသင်္ဂဟိတာ၊ တေဟိ ဓမ္မေဟိ ယေ ဓမ္မာ။ပေ။ တေ ဓမ္မာ စတူဟိ ခန္ဓေဟိ ဒွီဟာယတနေဟိ အဋ္ဌဟိ ဓာတူဟိ အသင်္ဂဟိတာ.

၂၁၆. ရူပီဟိ ဓမ္မေဟိ ယေ ဓမ္မာ ခန္ဓသင်္ဂဟေန အသင်္ဂဟိတာ အာယတနသင်္ဂဟေန အသင်္ဂဟိတာ ဓာတုသင်္ဂဟေန အသင်္ဂဟိတာ၊ တေဟိ ဓမ္မေဟိ ယေ ဓမ္မာ။ပေ။ တေ ဓမ္မာ ဧကေန ခန္ဓေန ဧကေနာယတနေန သတ္တဟိ ဓာတူဟိ အသင်္ဂဟိတာ.

၂၁၇. အရူပီဟိ ဓမ္မေဟိ ယေ ဓမ္မာ။ လောကုတ္တရေဟိ ဓမ္မေဟိ ယေ ဓမ္မာ ခန္ဓသင်္ဂဟေန အသင်္ဂဟိတာ အာယတနသင်္ဂဟေန အသင်္ဂဟိတာ ဓာတုသင်္ဂဟေန အသင်္ဂဟိတာ၊ တေဟိ ဓမ္မေဟိ ယေ ဓမ္မာ။ပေ။ တေ ဓမ္မာ ဧကေန ခန္ဓေန ဒသဟာယတနေဟိ ဒသဟိ ဓာတူဟိ အသင်္ဂဟိတာ.

၂၁၈. အာသဝေဟိ ဓမ္မေဟိ ယေ ဓမ္မာ။ အာသဝေဟိ စေဝ သာသဝေဟိ စ ဓမ္မေဟိ ယေ ဓမ္မာ။ အာသဝေဟိ စေဝ အာသဝသမ္ပယုတ္တေဟိ စ ဓမ္မေဟိ ယေ ဓမ္မာ ခန္ဓသင်္ဂဟေန အသင်္ဂဟိတာ အာယတနသင်္ဂဟေန အသင်္ဂဟိတာ ဓာတုသင်္ဂဟေန အသင်္ဂဟိတာ၊ တေဟိ ဓမ္မေဟိ ယေ ဓမ္မာ။ပေ။ တေ ဓမ္မာ ဒွီဟိ ခန္ဓေဟိ ဧကာဒသဟာယတနေဟိ သတ္တရသဟိ ဓာတူဟိ အသင်္ဂဟိတာ.

၂၁၉. အနာသဝေဟိ ဓမ္မေဟိ ယေ ဓမ္မာ။ အာသဝသမ္ပယုတ္တေဟိ ဓမ္မေဟိ ယေ ဓမ္မာ။ အာသဝသမ္ပယုတ္တေဟိ စေဝ နော စ အာသဝေဟိ ဓမ္မေဟိ ယေ ဓမ္မာ။ အာသဝဝိပ္ပယုတ္တေဟိ အနာသဝေဟိ ဓမ္မေဟိ ယေ ဓမ္မာ ခန္ဓသင်္ဂဟေန အသင်္ဂဟိတာ အာယတနသင်္ဂဟေန အသင်္ဂဟိတာ ဓာတုသင်္ဂဟေန အသင်္ဂဟိတာ၊ တေဟိ ဓမ္မေဟိ ယေ ဓမ္မာ။ပေ။ တေ ဓမ္မာ ဧကေန ခန္ဓေန ဒသဟာယတနေဟိ ဒသဟိ ဓာတူဟိ အသင်္ဂဟိတာ.

၂၂၀. သံယောဇနေဟိ ဓမ္မေဟိ ယေ ဓမ္မာ။ ဂန္ထေဟိ ဓမ္မေဟိ ယေ ဓမ္မာ။ ဩဃေဟိ ဓမ္မေဟိ ယေ ဓမ္မာ။ ယောဂေဟိ ဓမ္မေဟိ ယေ ဓမ္မာ။ နီဝရဏေဟိ ဓမ္မေဟိ ယေ ဓမ္မာ။ ပရာမာသေဟိ ဓမ္မေဟိ ယေ ဓမ္မာ။ ပရာမာသေဟိ စေဝ ပရာမဋ္ဌေဟိ စ ဓမ္မေဟိ ယေ ဓမ္မာ ခန္ဓသင်္ဂဟေန အသင်္ဂဟိတာ အာယတနသင်္ဂဟေန အသင်္ဂဟိတာ ဓာတုသင်္ဂဟေန အသင်္ဂဟိတာ၊ တေဟိ ဓမ္မေဟိ ယေ ဓမ္မာ။ပေ။ တေ ဓမ္မာ ဒွီဟိ ခန္ဓေဟိ ဧကာဒသဟာယတနေဟိ သတ္တရသဟိ ဓာတူဟိ အသင်္ဂဟိတာ.

၂၂၁. အပရာမဋ္ဌေဟိ ဓမ္မေဟိ ယေ ဓမ္မာ။ ပရာမာသသမ္ပယုတ္တေဟိ ဓမ္မေဟိ ယေ ဓမ္မာ။ ပရာမာသဝိပ္ပယုတ္တေဟိ အပရာမဋ္ဌေဟိ ဓမ္မေဟိ ယေ ဓမ္မာ။ သာရမ္မဏေဟိ ဓမ္မေဟိ ယေ ဓမ္မာ ခန္ဓသင်္ဂဟေန အသင်္ဂဟိတာ အာယတနသင်္ဂဟေန အသင်္ဂဟိတာ ဓာတုသင်္ဂဟေန အသင်္ဂဟိတာ၊ တေဟိ ဓမ္မေဟိ ယေ ဓမ္မာ။ပေ။ တေ ဓမ္မာ ဧကေန ခန္ဓေန ဒသဟာယတနေဟိ ဒသဟိ ဓာတူဟိ အသင်္ဂဟိတာ.

၂၂၂. အနာရမ္မဏေဟိ ဓမ္မေဟိ ယေ ဓမ္မာ။ နော စိတ္တေဟိ ဓမ္မေဟိ ယေ ဓမ္မာ။ စိတ္တဝိပ္ပယုတ္တေဟိ ဓမ္မေဟိ ယေ ဓမ္မာ။ စိတ္တဝိသံသဋ္ဌေဟိ ဓမ္မေဟိ ယေ ဓမ္မာ။ စိတ္တသမုဋ္ဌာနေဟိ ဓမ္မေဟိ ယေ ဓမ္မာ။ စိတ္တသဟဘူဟိ ဓမ္မေဟိ ယေ ဓမ္မာ။ စိတ္တာနုပရိဝတ္တီဟိ ဓမ္မေဟိ ယေ ဓမ္မာ။ ဗာဟိရေဟိ ဓမ္မေဟိ ယေ ဓမ္မာ။ ဥပါဒါဓမ္မေဟိ ယေ ဓမ္မာ ခန္ဓသင်္ဂဟေန အသင်္ဂဟိတာ အာယတနသင်္ဂဟေန အသင်္ဂဟိတာ ဓာတုသင်္ဂဟေန အသင်္ဂဟိတာ၊ တေဟိ ဓမ္မေဟိ ယေ ဓမ္မာ။ပေ။ တေ ဓမ္မာ ဧကေန ခန္ဓေန ဧကေနာယတနေန သတ္တဟိ ဓာတူဟိ အသင်္ဂဟိတာ.

၂၂၃. စိတ္တေဟိ ဓမ္မေဟိ ယေ ဓမ္မာ ခန္ဓသင်္ဂဟေန အသင်္ဂဟိတာ အာယတနသင်္ဂဟေန အသင်္ဂဟိတာ ဓာတုသင်္ဂဟေန အသင်္ဂဟိတာ၊ တေဟိ ဓမ္မေဟိ ယေ ဓမ္မာ။ပေ။ တေ ဓမ္မာ စတူဟိ ခန္ဓေဟိ ဧကာဒသဟာယတနေဟိ ဧကာဒသဟိ ဓာတူဟိ အသင်္ဂဟိတာ.

၂၂၄. စေတသိကေဟိ ဓမ္မေဟိ ယေ ဓမ္မာ။ စိတ္တသမ္ပယုတ္တေဟိ ဓမ္မေဟိ ယေ ဓမ္မာ။ စိတ္တသံသဋ္ဌေဟိ ဓမ္မေဟိ ယေ ဓမ္မာ။ စိတ္တသံသဋ္ဌသမုဋ္ဌာနေဟိ ဓမ္မေဟိ ယေ ဓမ္မာ။ စိတ္တသံသဋ္ဌသမုဋ္ဌာနသဟဘူဟိ ဓမ္မေဟိ ယေ ဓမ္မာ။ စိတ္တသံသဋ္ဌသမုဋ္ဌာနာနုပရိဝတ္တီဟိ ဓမ္မေဟိ ယေ ဓမ္မာ ခန္ဓသင်္ဂဟေန အသင်္ဂဟိတာ အာယတနသင်္ဂဟေန အသင်္ဂဟိတာ ဓာတုသင်္ဂဟေန အသင်္ဂဟိတာ၊ တေဟိ ဓမ္မေဟိ ယေ ဓမ္မာ။ပေ။ တေ ဓမ္မာ ဒွီဟိ ခန္ဓေဟိ ဧကာဒသဟာယတနေဟိ သတ္တရသဟိ ဓာတူဟိ အသင်္ဂဟိတာ.

၂၂၅. အဇ္ဈတ္တိကေဟိ ဓမ္မေဟိ ယေ ဓမ္မာ ခန္ဓသင်္ဂဟေန အသင်္ဂဟိတာ အာယတနသင်္ဂဟေန အသင်္ဂဟိတာ ဓာတုသင်္ဂဟေန အသင်္ဂဟိတာ တေဟိ ဓမ္မေဟိ ယေ ဓမ္မာ။ပေ။ တေ ဓမ္မာ တီဟိ ခန္ဓေဟိ ဧကေနာယတနေန ဧကာယ ဓာတုယာ အသင်္ဂဟိတာ.

၂၂၆. ဥပါဒါနေဟိ ဓမ္မေဟိ ယေ ဓမ္မာ။ ကိလေသေဟိ ဓမ္မေဟိ ယေ ဓမ္မာ။ ကိလေသေဟိ စေဝ သံကိလေသိကေဟိ စ ဓမ္မေဟိ ယေ ဓမ္မာ။ ကိလေသေဟိ စေဝ သံကိလိဋ္ဌေဟိ စ ဓမ္မေဟိ ယေ ဓမ္မာ။ ကိလေသေဟိ စေဝ ကိလေသသမ္ပယုတ္တေဟိ စ ဓမ္မေဟိ ယေ ဓမ္မာ ခန္ဓသင်္ဂဟေန အသင်္ဂဟိတာ အာယတနသင်္ဂဟေန အသင်္ဂဟိတာ ဓာတုသင်္ဂဟေန အသင်္ဂဟိတာ၊ တေဟိ ဓမ္မေဟိ ယေ ဓမ္မာ။ပေ။ တေ ဓမ္မာ ဒွီဟိ ခန္ဓေဟိ ဧကာဒသဟာယတနေဟိ သတ္တရသဟိ ဓာတူဟိ အသင်္ဂဟိတာ.

၂၂၇. အသံကိလေသိကေဟိ ဓမ္မေဟိ ယေ ဓမ္မာ။ သံကိလိဋ္ဌေဟိ ဓမ္မေဟိ ယေ ဓမ္မာ။ ကိလေသသမ္ပယုတ္တေဟိ ဓမ္မေဟိ ယေ ဓမ္မာ။ သံကိလိဋ္ဌေဟိ စေဝ နော စ ကိလေသေဟိ ဓမ္မေဟိ ယေ ဓမ္မာ။ ကိလေသသမ္ပယုတ္တေဟိ စေဝ နော စ ကိလေသေဟိ ဓမ္မေဟိ ယေ ဓမ္မာ။ ကိလေသဝိပ္ပယုတ္တေဟိ အသံကိလေသိကေဟိ ဓမ္မေဟိ ယေ ဓမ္မာ။ ဒဿနေန ပဟာတဗ္ဗေဟိ ဓမ္မေဟိ ယေ ဓမ္မာ။ ဘာဝနာယ ပဟာတဗ္ဗေဟိ ဓမ္မေဟိ ယေ ဓမ္မာ။ ဒဿနေန ပဟာတဗ္ဗဟေတုကေဟိ ဓမ္မေဟိ ယေ ဓမ္မာ။ ဘာဝနာယ ပဟာတဗ္ဗဟေတုကေဟိ ဓမ္မေဟိ ယေ ဓမ္မာ။ သဝိတက္ကေဟိ ဓမ္မေဟိ ယေ ဓမ္မာ။ သဝိစာရေဟိ ဓမ္မေဟိ ယေ ဓမ္မာ။ သပ္ပီတိကေဟိ ဓမ္မေဟိ ယေ ဓမ္မာ။ ပီတိသဟဂတေဟိ ဓမ္မေဟိ ယေ ဓမ္မာ။ သုခသဟဂတေဟိ ဓမ္မေဟိ ယေ ဓမ္မာ။ ဥပေက္ခာသဟဂတေဟိ ဓမ္မေဟိ ယေ ဓမ္မာ။ န ကာမာဝစရေဟိ ဓမ္မေဟိ ယေ ဓမ္မာ။ ရူပါဝစရေဟိ ဓမ္မေဟိ ယေ ဓမ္မာ။ အရူပါဝစရေဟိ ဓမ္မေဟိ ယေ ဓမ္မာ။ အပရိယာပန္နေဟိ ဓမ္မေဟိ ယေ ဓမ္မာ။ နိယျာနိကေဟိ ဓမ္မေဟိ ယေ ဓမ္မာ။ နိယတေဟိ ဓမ္မေဟိ ယေ ဓမ္မာ။ အနုတ္တရေဟိ ဓမ္မေဟိ ယေ ဓမ္မာ။ သရဏေဟိ ဓမ္မေဟိ ယေ ဓမ္မာ ခန္ဓသင်္ဂဟေန အသင်္ဂဟိတာ အာယတနသင်္ဂဟေန အသင်္ဂဟိတာ ဓာတုသင်္ဂဟေန အသင်္ဂဟိတာ၊ တေဟိ ဓမ္မေဟိ ယေ ဓမ္မာ ခန္ဓသင်္ဂဟေန အသင်္ဂဟိတာ အာယတနသင်္ဂဟေန အသင်္ဂဟိတာ ဓာတုသင်္ဂဟေန အသင်္ဂဟိတာ၊ တေ ဓမ္မာ ကတိဟိ ခန္ဓေဟိ ကတိဟာယတနေဟိ ကတိဟိ ဓာတူဟိ အသင်္ဂဟိတာ? တေ ဓမ္မာ ဧကေန ခန္ဓေန ဒသဟာယတနေဟိ ဒသဟိ ဓာတူဟိ အသင်္ဂဟိတာ.

ရူပဉ္စ ဓမ္မာယတနံ ဓမ္မဓာတု၊ ဣတ္ထိပုမံ ဇီဝိတံ နာမရူပံ၊

ဒွေ ဘဝါ ဇာတိ ဇရာ မစ္စုရူပံ၊ အနာရမ္မဏံ နော စိတ္တံ စိတ္တေန ဝိပ္ပယုတ္တံ.

ဝိသံသဋ္ဌံ သမုဋ္ဌာန-သဟဘု အနုပရိဝတ္တိ၊

ဗာဟိရံ ဥပါဒါ ဒွေ၊ ဝိသယော [ဒွေဝီသတိ (သျာ.)] ဧသနယော သုဗုဒ္ဓေါ.

အသင်္ဂဟိတေနအသင်္ဂဟိတပဒနိဒ္ဒေသော ပဉ္စမော.