၁. ပဌမနယော

၁. သင်္ဂဟာသင်္ဂဟပဒနိဒ္ဒေသော

၁. ခန္ဓော

၆. ရူပက္ခန္ဓော ကတိဟိ ခန္ဓေဟိ ကတိဟာယတနေဟိ ကတိဟိ ဓာတူဟိ သင်္ဂဟိတော? ရူပက္ခန္ဓော ဧကေန ခန္ဓေန ဧကာဒသဟာယတနေဟိ ဧကာဒသဟိ ဓာတူဟိ သင်္ဂဟိတော. ကတိဟိ အသင်္ဂဟိတော? စတူဟိ ခန္ဓေဟိ ဧကေနာယတနေန သတ္တဟိ ဓာတူဟိ အသင်္ဂဟိတော.

၇. ဝေဒနာက္ခန္ဓော ကတိဟိ ခန္ဓေဟိ ကတိဟာယတနေဟိ ကတိဟိ ဓာတူဟိ သင်္ဂဟိတော? ဝေဒနာက္ခန္ဓော ဧကေန ခန္ဓေန ဧကေနာယတနေန ဧကာယ ဓာတုယာ သင်္ဂဟိတော. ကတိဟိ အသင်္ဂဟိတော? စတူဟိ ခန္ဓေဟိ ဧကာဒသဟာယတနေဟိ သတ္တရသဟိ ဓာတူဟိ အသင်္ဂဟိတော.

၈. သညာက္ခန္ဓော ကတိဟိ ခန္ဓေဟိ ကတိဟာယတနေဟိ ကတိဟိ ဓာတူဟိ သင်္ဂဟိတော? သညာက္ခန္ဓော ဧကေန ခန္ဓေန ဧကေနာယတနေန ဧကာယ ဓာတုယာ သင်္ဂဟိတော. ကတိဟိ အသင်္ဂဟိတော? စတူဟိ ခန္ဓေဟိ ဧကာဒသဟာယတနေဟိ သတ္တရသဟိ ဓာတူဟိ အသင်္ဂဟိတော.

၉. သင်္ခါရက္ခန္ဓော ကတိဟိ ခန္ဓေဟိ ကတိဟာယတနေဟိ ကတိဟိ ဓာတူဟိ သင်္ဂဟိတော? သင်္ခါရက္ခန္ဓော ဧကေန ခန္ဓေန ဧကေနာယတနေန ဧကာယ ဓာတုယာ သင်္ဂဟိတော. ကတိဟိ အသင်္ဂဟိတော? စတူဟိ ခန္ဓေဟိ ဧကာဒသဟာယတနေဟိ သတ္တရသဟိ ဓာတူဟိ အသင်္ဂဟိတော.

၁၀. ဝိညာဏက္ခန္ဓော ကတိဟိ ခန္ဓေဟိ ကတိဟာယတနေဟိ ကတိဟိ ဓာတူဟိ သင်္ဂဟိတော? ဝိညာဏက္ခန္ဓော ဧကေန ခန္ဓေန ဧကေနာယတနေန သတ္တဟိ ဓာတူဟိ သင်္ဂဟိတော. ကတိဟိ အသင်္ဂဟိတော? စတူဟိ ခန္ဓေဟိ ဧကာဒသဟာယတနေဟိ ဧကာဒသဟိ ဓာတူဟိ အသင်္ဂဟိတော.

(ဧကမူလကံ.)

၁၁. ရူပက္ခန္ဓော စ ဝေဒနာက္ခန္ဓော စ ကတိဟိ ခန္ဓေဟိ ကတိဟာယတနေဟိ ကတိဟိ ဓာတူဟိ သင်္ဂဟိတာ? ရူပက္ခန္ဓော စ ဝေဒနာက္ခန္ဓော စ ဒွီဟိ ခန္ဓေဟိ ဧကာဒသဟာယတနေဟိ ဧကာဒသဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? တီဟိ ခန္ဓေဟိ ဧကေနာယတနေန သတ္တဟိ ဓာတူဟိ အသင်္ဂဟိတာ.

၁၂. ရူပက္ခန္ဓော စ သညာက္ခန္ဓော စ။ပေ။ ဒွီဟိ ခန္ဓေဟိ ဧကာဒသဟာယတနေဟိ ဧကာဒသဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? တီဟိ ခန္ဓေဟိ ဧကေနာယတနေန သတ္တဟိ ဓာတူဟိ အသင်္ဂဟိတာ.

၁၃. ရူပက္ခန္ဓော စ သင်္ခါရက္ခန္ဓော စ။ပေ။ ဒွီဟိ ခန္ဓေဟိ ဧကာဒသဟာယတနေဟိ ဧကာဒသဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? တီဟိ ခန္ဓေဟိ ဧကေနာယတနေန သတ္တဟိ ဓာတူဟိ အသင်္ဂဟိတာ.

၁၄. ရူပက္ခန္ဓော စ ဝိညာဏက္ခန္ဓော စ။ပေ။ ဒွီဟိ ခန္ဓေဟိ ဒွါဒသဟာယတနေဟိ အဋ္ဌာရသဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? တီဟိ ခန္ဓေဟိ၊ န ကေဟိစိ အာယတနေဟိ န ကာဟိစိ ဓာတူဟိ အသင်္ဂဟိတာ.

(ဒုကမူလကံ.)

၁၅. ရူပက္ခန္ဓော စ ဝေဒနာက္ခန္ဓော စ သညာက္ခန္ဓော စ ကတိဟိ ခန္ဓေဟိ ကတိဟာယတနေဟိ ကတိဟိ ဓာတူဟိ သင်္ဂဟိတာ? ရူပက္ခန္ဓော စ ဝေဒနာက္ခန္ဓော စ သညာက္ခန္ဓော စ တီဟိ ခန္ဓေဟိ ဧကာဒသဟာယတနေဟိ ဧကာဒသဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? ဒွီဟိ ခန္ဓေဟိ ဧကေနာယတနေန သတ္တဟိ ဓာတူဟိ အသင်္ဂဟိတာ.

၁၆. ရူပက္ခန္ဓော စ ဝေဒနာက္ခန္ဓော စ သင်္ခါရက္ခန္ဓော စ။ပေ။ တီဟိ ခန္ဓေဟိ ဧကာဒသဟာယတနေဟိ ဧကာဒသဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? ဒွီဟိ ခန္ဓေဟိ ဧကေနာယတနေန သတ္တဟိ ဓာတူဟိ အသင်္ဂဟိတာ.

၁၇. ရူပက္ခန္ဓော စ ဝေဒနာက္ခန္ဓော စ ဝိညာဏက္ခန္ဓော စ။ပေ။ တီဟိ ခန္ဓေဟိ ဒွါဒသဟာယတနေဟိ အဋ္ဌာရသဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? ဒွီဟိ ခန္ဓေဟိ၊ န ကေဟိစိ အာယတနေဟိ န ကာဟိစိ ဓာတူဟိ အသင်္ဂဟိတာ.

(တိကမူလကံ.)

၁၈. ရူပက္ခန္ဓော စ ဝေဒနာက္ခန္ဓော စ သညာက္ခန္ဓော စ သင်္ခါရက္ခန္ဓော စ ကတိဟိ ခန္ဓေဟိ ကတိဟာယတနေဟိ ကတိဟိ ဓာတူဟိ သင်္ဂဟိတာ? ရူပက္ခန္ဓော စ ဝေဒနာက္ခန္ဓော စ သညာက္ခန္ဓော စ သင်္ခါရက္ခန္ဓော စ စတူဟိ ခန္ဓေဟိ ဧကာဒသဟာယတနေဟိ ဧကာဒသဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? ဧကေန ခန္ဓေန ဧကေနာယတနေန သတ္တဟိ ဓာတူဟိ အသင်္ဂဟိတာ.

၁၉. ရူပက္ခန္ဓော စ ဝေဒနာက္ခန္ဓော စ သညာက္ခန္ဓော စ ဝိညာဏက္ခန္ဓော စ။ပေ။ စတူဟိ ခန္ဓေဟိ ဒွါဒသဟာယတနေဟိ အဋ္ဌာရသဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? ဧကေန ခန္ဓေန၊ န ကေဟိစိ အာယတနေဟိ န ကာဟိစိ ဓာတူဟိ အသင်္ဂဟိတာ.

(စတုက္ကမူလကံ.)

၂၀. ရူပက္ခန္ဓော စ ဝေဒနာက္ခန္ဓော စ သညာက္ခန္ဓော စ သင်္ခါရက္ခန္ဓော စ ဝိညာဏက္ခန္ဓော စ ကတိဟိ ခန္ဓေဟိ ကတိဟာယတနေဟိ ကတိဟိ ဓာတူဟိ သင်္ဂဟိတာ? ရူပက္ခန္ဓော စ ဝေဒနာက္ခန္ဓော စ သညာက္ခန္ဓော စ သင်္ခါရက္ခန္ဓော စ ဝိညာဏက္ခန္ဓော စ ပဉ္စဟိ ခန္ဓေဟိ ဒွါဒသာယတနေဟိ အဋ္ဌာရသဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? န ကေဟိစိ ခန္ဓေဟိ န ကေဟိစိ အာယတနေဟိ န ကာဟိစိ ဓာတူဟိ အသင်္ဂဟိတာ.

၂၁. ပဉ္စက္ခန္ဓာ ကတိဟိ ခန္ဓေဟိ ကတိဟာယတနေဟိ ကတိဟိ ဓာတူဟိ သင်္ဂဟိတာ? ပဉ္စက္ခန္ဓာ ပဉ္စဟိ ခန္ဓေဟိ ဒွါဒသဟာယတနေဟိ အဋ္ဌာရသဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? န ကေဟိစိ ခန္ဓေဟိ န ကေဟိစိ အာယတနေဟိ န ကာဟိစိ ဓာတူဟိ အသင်္ဂဟိတာ.

(ပဉ္စကံ.)

၂. အာယတနံ

၂၂. စက္ခာယတနံ ကတိဟိ ခန္ဓေဟိ ကတိဟာယတနေဟိ ကတိဟိ ဓာတူဟိ သင်္ဂဟိတံ? စက္ခာယတနံ ဧကေန ခန္ဓေန ဧကေနာယတနေန ဧကာယ ဓာတုယာ သင်္ဂဟိတံ. ကတိဟိ အသင်္ဂဟိတံ? စတူဟိ ခန္ဓေဟိ ဧကာဒသဟာယတနေဟိ သတ္တရသဟိ ဓာတူဟိ အသင်္ဂဟိတံ.

၂၃. သောတာယတနံ ။ ဃာနာယတနံ။ ဇိဝှါယတနံ။ ကာယာယတနံ။ ရူပါယတနံ။ သဒ္ဒါယတနံ။ ဂန္ဓာယတနံ။ ရသာယတနံ။ ဖောဋ္ဌဗ္ဗာယတနံ။ပေ။ ဧကေန ခန္ဓေန ဧကေနာယတနေန ဧကာယ ဓာတုယာ သင်္ဂဟိတံ. ကတိဟိ အသင်္ဂဟိတံ? စတူဟိ ခန္ဓေဟိ ဧကာဒသဟာယတနေဟိ သတ္တရသဟိ ဓာတူဟိ အသင်္ဂဟိတံ.

၂၄. မနာယတနံ ဧကေန ခန္ဓေန ဧကေနာယတနေန သတ္တဟိ ဓာတူဟိ သင်္ဂဟိတံ. ကတိဟိ အသင်္ဂဟိတံ? စတူဟိ ခန္ဓေဟိ ဧကာဒသဟာယတနေဟိ ဧကာဒသဟိ ဓာတူဟိ အသင်္ဂဟိတံ.

၂၅. ဓမ္မာယတနံ အသင်္ခတံ ခန္ဓတော ဌပေတွာ စတူဟိ ခန္ဓေဟိ ဧကေနာယတနေန ဧကာယ ဓာတုယာ သင်္ဂဟိတံ. ကတိဟိ အသင်္ဂဟိတံ? ဧကေန ခန္ဓေန ဧကာဒသဟာယတနေဟိ သတ္တရသဟိ ဓာတူဟိ အသင်္ဂဟိတံ.

(ဧကမူလကံ.)

၂၆. စက္ခာယတနဉ္စ သောတာယတနဉ္စ ဧကေန ခန္ဓေန ဒွီဟာယတနေဟိ ဒွီဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? စတူဟိ ခန္ဓေဟိ ဒသဟာယတနေဟိ သောဠသဟိ ဓာတူဟိ အသင်္ဂဟိတာ.

၂၇. စက္ခာယတနဉ္စ ဃာနာယတနဉ္စ။ စက္ခာယတနဉ္စ ဇိဝှါယတနဉ္စ။ စက္ခာယတနဉ္စ ကာယာယတနဉ္စ။ စက္ခာယတနဉ္စ ရူပါယတနဉ္စ။ စက္ခာယတနဉ္စ သဒ္ဒါယတနဉ္စ။ စက္ခာယတနဉ္စ ဂန္ဓာယတနဉ္စ။ စက္ခာယတနဉ္စ ရသာယတနဉ္စ။ စက္ခာယတနဉ္စ ဖောဋ္ဌဗ္ဗာယတနဉ္စ ဧကေန ခန္ဓေန ဒွီဟာယတနေဟိ ဒွီဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? စတူဟိ ခန္ဓေဟိ ဒသဟာယတနေဟိ သောဠသဟိ ဓာတူဟိ အသင်္ဂဟိတာ.

၂၈. စက္ခာယတနဉ္စ မနာယတနဉ္စ ဒွီဟိ ခန္ဓေဟိ ဒွီဟာယတနေဟိ အဋ္ဌဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? တီဟိ ခန္ဓေဟိ ဒသဟာယတနေဟိ ဒသဟိ ဓာတူဟိ အသင်္ဂဟိတာ.

၂၉. စက္ခာယတနဉ္စ ဓမ္မာယတနဉ္စ အသင်္ခတံ ခန္ဓတော ဌပေတွာ စတူဟိ ခန္ဓေဟိ ဒွီဟာယတနေဟိ ဒွီဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? ဧကေန ခန္ဓေန ဒသဟာယတနေဟိ သောဠသဟိ ဓာတူဟိ အသင်္ဂဟိတာ.

(ဒုကမူလကံ.)

၃၀. ဒွါဒသာယတနာနိ ကတိဟိ ခန္ဓေဟိ ကတိဟာယတနေဟိ ကတိဟိ ဓာတူဟိ သင်္ဂဟိတာ? ဒွါဒသာယတနာနိ အသင်္ခတံ ခန္ဓတော ဌပေတွာ ပဉ္စဟိ ခန္ဓေဟိ ဒွါဒသဟာယတနေဟိ အဋ္ဌာရသဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? န ကေဟိစိ ခန္ဓေဟိ န ကေဟိစိ အာယတနေဟိ န ကာဟိစိ ဓာတူဟိ အသင်္ဂဟိတာ.

(ဒွါဒသကံ.)

၃. ဓာတု

၃၁. စက္ခုဓာတု ကတိဟိ ခန္ဓေဟိ ကတိဟာယတနေဟိ ကတိဟိ ဓာတူဟိ သင်္ဂဟိတာ? စက္ခုဓာတု ဧကေန ခန္ဓေန ဧကေနာယတနေန ဧကာယ ဓာတုယာ သင်္ဂဟိတာ. ကတိဟိ အသင်္ဂဟိတာ? စတူဟိ ခန္ဓေဟိ ဧကာဒသဟာယတနေဟိ သတ္တရသဟိ ဓာတူဟိ အသင်္ဂဟိတာ.

၃၂. သောတဓာတု။ ဃာနဓာတု။ ဇိဝှါဓာတု။ ကာယဓာတု။ ရူပဓာတု။ သဒ္ဒဓာတု။ ဂန္ဓဓာတု။ ရသဓာတု။ ဖောဋ္ဌဗ္ဗဓာတု။ စက္ခုဝိညာဏဓာတု။ သောတဝိညာဏဓာတု။ ဃာနဝိညာဏဓာတု။ ဇိဝှါဝိညာဏဓာတု။ ကာယဝိညာဏဓာတု။ မနောဓာတု။ မနောဝိညာဏဓာတု ဧကေန ခန္ဓေန ဧကေနာယတနေန ဧကာယ ဓာတုယာ သင်္ဂဟိတာ. ကတိဟိ အသင်္ဂဟိတာ? စတူဟိ ခန္ဓေဟိ ဧကာဒသဟာယတနေဟိ သတ္တရသဟိ ဓာတူဟိ အသင်္ဂဟိတာ.

၃၃. ဓမ္မဓာတု အသင်္ခတံ ခန္ဓတော ဌပေတွာ စတူဟိ ခန္ဓေဟိ ဧကေနာယတနေန ဧကာယ ဓာတုယာ သင်္ဂဟိတာ. ကတိဟိ အသင်္ဂဟိတာ? ဧကေန ခန္ဓေန ဧကာဒသဟာယတနေဟိ သတ္တရသဟိ ဓာတူဟိ အသင်္ဂဟိတာ.

(ဧကမူလကံ.)

၃၄. စက္ခုဓာတု စ သောတဓာတု စ ဧကေန ခန္ဓေန ဒွီဟာယတနေဟိ ဒွီဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? စတူဟိ ခန္ဓေဟိ ဒသဟာယတနေဟိ သောဠသဟိ ဓာတူဟိ အသင်္ဂဟိတာ.

၃၅. စက္ခုဓာတု စ ဃာနဓာတု စ။ စက္ခုဓာတု စ ဇိဝှါဓာတု စ။ စက္ခုဓာတု စ ကာယဓာတု စ။ စက္ခုဓာတု စ ရူပဓာတု စ။ စက္ခုဓာတု စ သဒ္ဒဓာတု စ။ စက္ခုဓာတု စ ဂန္ဓဓာတု စ။ စက္ခုဓာတု စ ရသဓာတု စ။ စက္ခုဓာတု စ ဖောဋ္ဌဗ္ဗဓာတု စ ဧကေန ခန္ဓေန ဒွီဟာယတနေဟိ ဒွီဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? စတူဟိ ခန္ဓေဟိ ဒသဟာယတနေဟိ သောဠသဟိ ဓာတူဟိ အသင်္ဂဟိတာ.

၃၆. စက္ခုဓာတု စ စက္ခုဝိညာဏဓာတု စ ဒွီဟိ ခန္ဓေဟိ ဒွီဟာယတနေဟိ ဒွီဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? တီဟိ ခန္ဓေဟိ ဒသဟာယတနေဟိ သောဠသဟိ ဓာတူဟိ အသင်္ဂဟိတာ.

၃၇. စက္ခုဓာတု စ သောတဝိညာဏဓာတု စ။ စက္ခုဓာတု စ ဃာနဝိညာဏဓာတု စ။ စက္ခုဓာတု စ ဇိဝှါဝိညာဏဓာတု စ။ စက္ခုဓာတု စ ကာယဝိညာဏဓာတု စ။ စက္ခုဓာတု စ မနောဓာတု စ။ စက္ခုဓာတု စ မနောဝိညာဏဓာတု စ ဒွီဟိ ခန္ဓေဟိ ဒွီဟာယတနေဟိ ဒွီဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? တီဟိ ခန္ဓေဟိ ဒသဟာယတနေဟိ သောဠသဟိ ဓာတူဟိ အသင်္ဂဟိတာ.

၃၈. စက္ခုဓာတု စ ဓမ္မဓာတု စ အသင်္ခတံ ခန္ဓတော ဌပေတွာ စတူဟိ ခန္ဓေဟိ ဒွီဟာယတနေဟိ ဒွီဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? ဧကေန ခန္ဓေန ဒသဟာယတနေဟိ သောဠသဟိ ဓာတူဟိ အသင်္ဂဟိတာ.

(ဒုကမူလကံ.)

၃၉. အဋ္ဌာရသ ဓာတုယော ကတိဟိ ခန္ဓေဟိ ကတိဟာယတနေဟိ ကတိဟိ ဓာတူဟိ သင်္ဂဟိတာ? အဋ္ဌာရသ ဓာတုယော အသင်္ခတံ ခန္ဓတော ဌပေတွာ ပဉ္စဟိ ခန္ဓေဟိ ဒွါဒသဟာယတနေဟိ အဋ္ဌာရသဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? န ကေဟိစိ ခန္ဓေဟိ န ကေဟိစိ အာယတနေဟိ န ကာဟိစိ ဓာတူဟိ အသင်္ဂဟိတာ.

(အဋ္ဌာရသကံ.)

၄. သစ္စံ

၄၀. ဒုက္ခသစ္စံ ကတိဟိ ခန္ဓေဟိ ကတိဟာယတနေဟိ ကတိဟိ ဓာတူဟိ သင်္ဂဟိတံ? ဒုက္ခသစ္စံ ပဉ္စဟိ ခန္ဓေဟိ ဒွါဒသဟာယတနေဟိ အဋ္ဌာရသဟိ ဓာတူဟိ သင်္ဂဟိတံ. ကတိဟိ အသင်္ဂဟိတံ? န ကေဟိစိ ခန္ဓေဟိ န ကေဟိစိ အာယတနေဟိ န ကာဟိစိ ဓာတူဟိ အသင်္ဂဟိတံ.

၄၁. သမုဒယသစ္စံ ။ မဂ္ဂသစ္စံ ဧကေန ခန္ဓေန ဧကေနာယတနေန ဧကာယ ဓာတုယာ သင်္ဂဟိတံ. ကတိဟိ အသင်္ဂဟိတံ? စတူဟိ ခန္ဓေဟိ ဧကာဒသဟာယတနေဟိ သတ္တရသဟိ ဓာတူဟိ အသင်္ဂဟိတံ.

၄၂. နိရောဓသစ္စံ န ကေဟိစိ ခန္ဓေဟိ ဧကေနာယတနေန ဧကာယ ဓာတုယာ သင်္ဂဟိတံ. ကတိဟိ အသင်္ဂဟိတံ? ပဉ္စဟိ ခန္ဓေဟိ ဧကာဒသဟာယတနေဟိ သတ္တရသဟိ ဓာတူဟိ အသင်္ဂဟိတံ.

(ဧကမူလကံ.)

၄၃. ဒုက္ခသစ္စဉ္စ သမုဒယသစ္စဉ္စ ပဉ္စဟိ ခန္ဓေဟိ ဒွါဒသဟာယတနေဟိ အဋ္ဌာရသဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? န ကေဟိစိ ခန္ဓေဟိ န ကေဟိစိ အာယတနေဟိ န ကာဟိစိ ဓာတူဟိ အသင်္ဂဟိတာ.

၄၄. ဒုက္ခသစ္စဉ္စ မဂ္ဂသစ္စဉ္စ ပဉ္စဟိ ခန္ဓေဟိ ဒွါဒသဟာယတနေဟိ အဋ္ဌာရသဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? န ကေဟိစိ ခန္ဓေဟိ န ကေဟိစိ အာယတနေဟိ န ကာဟိစိ ဓာတူဟိ အသင်္ဂဟိတာ.

၄၅. ဒုက္ခသစ္စဉ္စ နိရောဓသစ္စဉ္စ အသင်္ခတံ ခန္ဓတော ဌပေတွာ ပဉ္စဟိ ခန္ဓေဟိ ဒွါဒသဟာယတနေဟိ အဋ္ဌာရသဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? န ကေဟိစိ ခန္ဓေဟိ န ကေဟိစိ အာယတနေဟိ န ကာဟိစိ ဓာတူဟိ အသင်္ဂဟိတာ.

(ဒုကမူလကံ.)

၄၆. ဒုက္ခသစ္စဉ္စ သမုဒယသစ္စဉ္စ မဂ္ဂသစ္စဉ္စ ပဉ္စဟိ ခန္ဓေဟိ ဒွါဒသဟာယတနေဟိ အဋ္ဌာရသဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? န ကေဟိစိ ခန္ဓေဟိ န ကေဟိစိ အာယတနေဟိ န ကာဟိစိ ဓာတူဟိ အသင်္ဂဟိတာ.

၄၇. ဒုက္ခသစ္စဉ္စ သမုဒယသစ္စဉ္စ နိရောဓသစ္စဉ္စ အသင်္ခတံ ခန္ဓတော ဌပေတွာ ပဉ္စဟိ ခန္ဓေဟိ ဒွါဒသဟာယတနေဟိ အဋ္ဌာရသဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? န ကေဟိစိ ခန္ဓေဟိ န ကေဟိစိ အာယတနေဟိ န ကာဟိစိ ဓာတူဟိ အသင်္ဂဟိတာ.

(တိကမူလကံ.)

၄၈. ဒုက္ခသစ္စဉ္စ သမုဒယသစ္စဉ္စ မဂ္ဂသစ္စဉ္စ နိရောဓသစ္စဉ္စ အသင်္ခတံ ခန္ဓတော ဌပေတွာ ပဉ္စဟိ ခန္ဓေဟိ ဒွါဒသဟာယတနေဟိ အဋ္ဌာရသဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? န ကေဟိစိ ခန္ဓေဟိ န ကေဟိစိ အာယတနေဟိ န ကာဟိစိ ဓာတူဟိ အသင်္ဂဟိတာ.

၄၉. စတ္တာရိ သစ္စာနိ ကတိဟိ ခန္ဓေဟိ ကတိဟာယတနေဟိ ကတိဟိ ဓာတူဟိ သင်္ဂဟိတာနိ? စတ္တာရိ သစ္စာနိ အသင်္ခတံ ခန္ဓတော ဌပေတွာ ပဉ္စဟိ ခန္ဓေဟိ ဒွါဒသဟာယတနေဟိ အဋ္ဌာရသဟိ ဓာတူဟိ သင်္ဂဟိတာနိ. ကတိဟိ အသင်္ဂဟိတာနိ? န ကေဟိစိ ခန္ဓေဟိ န ကေဟိစိ အာယတနေဟိ န ကာဟိစိ ဓာတူဟိ အသင်္ဂဟိတာနိ.

(စတုက္ကံ.)

၅. ဣန္ဒြိယံ

၅၀. စက္ခုန္ဒြိယံ ကတိဟိ ခန္ဓေဟိ ကတိဟာယတနေဟိ ကတိဟိ ဓာတူဟိ သင်္ဂဟိတံ? စက္ခုန္ဒြိယံ ဧကေန ခန္ဓေန ဧကေနာယတနေန ဧကာယ ဓာတုယာ သင်္ဂဟိတံ. ကတိဟိ အသင်္ဂဟိတံ? စတူဟိ ခန္ဓေဟိ ဧကာဒသဟာယတနေဟိ သတ္တရသဟိ ဓာတူဟိ အသင်္ဂဟိတံ.

၅၁. သောတိန္ဒြိယံ။ ဃာနိန္ဒြိယံ။ ဇိဝှိန္ဒြိယံ။ ကာယိန္ဒြိယံ။ ဣတ္ထိန္ဒြိယံ ။ ပုရိသိန္ဒြိယံ ဧကေန ခန္ဓေန ဧကေနာယတနေန ဧကာယ ဓာတုယာ သင်္ဂဟိတံ. ကတိဟိ အသင်္ဂဟိတံ? စတူဟိ ခန္ဓေဟိ ဧကာဒသဟာယတနေဟိ သတ္တရသဟိ ဓာတူဟိ အသင်္ဂဟိတံ.

၅၂. မနိန္ဒြိယံ ဧကေန ခန္ဓေန ဧကေနာယတနေန သတ္တဟိ ဓာတူဟိ သင်္ဂဟိတံ. ကတိဟိ အသင်္ဂဟိတံ? စတူဟိ ခန္ဓေဟိ ဧကာဒသဟာယတနေဟိ ဧကာဒသဟိ ဓာတူဟိ အသင်္ဂဟိတံ.

၅၃. ဇီဝိတိန္ဒြိယံ ဒွီဟိ ခန္ဓေဟိ ဧကေနာယတနေန ဧကာယ ဓာတုယာ သင်္ဂဟိတံ. ကတိဟိ အသင်္ဂဟိတံ? တီဟိ ခန္ဓေဟိ ဧကာဒသဟာယတနေဟိ သတ္တရသဟိ ဓာတူဟိ အသင်္ဂဟိတံ.

၅၄. သုခိန္ဒြိယံ ။ ဒုက္ခိန္ဒြိယံ။ သောမနဿိန္ဒြိယံ။ ဒေါမနဿိန္ဒြိယံ။ ဥပေက္ခိန္ဒြိယံ။ သဒ္ဓိန္ဒြိယံ။ ဝီရိယိန္ဒြိယံ။ သတိန္ဒြိယံ။ သမာဓိန္ဒြိယံ။ ပညိန္ဒြိယံ။ အနညာတညဿာမီတိန္ဒြိယံ။ အညိန္ဒြိယံ။ အညာတာဝိန္ဒြိယံ ဧကေန ခန္ဓေန ဧကေနာယတနေန ဧကာယ ဓာတုယာ သင်္ဂဟိတံ. ကတိဟိ အသင်္ဂဟိတံ? စတူဟိ ခန္ဓေဟိ ဧကာဒသဟာယတနေဟိ သတ္တရသဟိ ဓာတူဟိ အသင်္ဂဟိတံ.

(ဧကမူလကံ.)

၅၅. စက္ခုန္ဒြိယဉ္စ သောတိန္ဒြိယဉ္စ ဧကေန ခန္ဓေန ဒွီဟာယတနေဟိ ဒွီဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? စတူဟိ ခန္ဓေဟိ ဒသဟာယတနေဟိ သောဠသဟိ ဓာတူဟိ အသင်္ဂဟိတာ.

၅၆. စက္ခုန္ဒြိယဉ္စ ဃာနိန္ဒြိယဉ္စ။ စက္ခုန္ဒြိယဉ္စ ဇိဝှိန္ဒြိယဉ္စ။ စက္ခုန္ဒြိယဉ္စ ကာယိန္ဒြိယဉ္စ။ စက္ခုန္ဒြိယဉ္စ ဣတ္ထိန္ဒြိယဉ္စ။ စက္ခုန္ဒြိယဉ္စ ပုရိသိန္ဒြိယဉ္စ ဧကေန ခန္ဓေန ဒွီဟာယတနေဟိ ဒွီဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? စတူဟိ ခန္ဓေဟိ ဒသဟာယတနေဟိ သောဠသဟိ ဓာတူဟိ အသင်္ဂဟိတာ.

၅၇. စက္ခုန္ဒြိယဉ္စ မနိန္ဒြိယဉ္စ ဒွီဟိ ခန္ဓေဟိ ဒွီဟာယတနေဟိ အဋ္ဌဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? တီဟိ ခန္ဓေဟိ ဒသဟာယတနေဟိ ဒသဟိ ဓာတူဟိ အသင်္ဂဟိတာ.

၅၈. စက္ခုန္ဒြိယဉ္စ ဇီဝိတိန္ဒြိယဉ္စ ဒွီဟိ ခန္ဓေဟိ ဒွီဟာယတနေဟိ ဒွီဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? တီဟိ ခန္ဓေဟိ ဒသဟာယတနေဟိ သောဠသဟိ ဓာတူဟိ အသင်္ဂဟိတာ.

၅၉. စက္ခုန္ဒြိယဉ္စ သုခိန္ဒြိယဉ္စ။ စက္ခုန္ဒြိယဉ္စ ဒုက္ခိန္ဒြိယဉ္စ။ စက္ခုန္ဒြိယဉ္စ သောမနဿိန္ဒြိယဉ္စ။ စက္ခုန္ဒြိယဉ္စ ဒေါမနဿိန္ဒြိယဉ္စ။ စက္ခုန္ဒြိယဉ္စ ဥပေက္ခိန္ဒြိယဉ္စ။ စက္ခုန္ဒြိယဉ္စ သဒ္ဓိန္ဒြိယဉ္စ။ စက္ခုန္ဒြိယဉ္စ ဝီရိယိန္ဒြိယဉ္စ။ စက္ခုန္ဒြိယဉ္စ သတိန္ဒြိယဉ္စ။ စက္ခုန္ဒြိယဉ္စ သမာဓိန္ဒြိယဉ္စ။ စက္ခုန္ဒြိယဉ္စ ပညိန္ဒြိယဉ္စ။ စက္ခုန္ဒြိယဉ္စ အနညာတညဿာမီတိန္ဒြိယဉ္စ။ စက္ခုန္ဒြိယဉ္စ အညိန္ဒြိယဉ္စ။ စက္ခုန္ဒြိယဉ္စ အညာတာဝိန္ဒြိယဉ္စ ဒွီဟိ ခန္ဓေဟိ ဒွီဟာယတနေဟိ ဒွီဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? တီဟိ ခန္ဓေဟိ ဒသဟာယတနေဟိ သောဠသဟိ ဓာတူဟိ အသင်္ဂဟိတာ.

(ဒုကမူလကံ.)

၆၀. ဗာဝီသတိန္ဒြိယာနိ ကတိဟိ ခန္ဓေဟိ ကတိဟာယတနေဟိ ကတိဟိ ဓာတူဟိ သင်္ဂဟိတာနိ? ဗာဝီသတိန္ဒြိယာနိ စတူဟိ ခန္ဓေဟိ သတ္တဟာယတနေဟိ တေရသဟိ ဓာတူဟိ သင်္ဂဟိတာနိ. ကတိဟိ အသင်္ဂဟိတာနိ? ဧကေန ခန္ဓေန ပဉ္စဟာယတနေဟိ ပဉ္စဟိ ဓာတူဟိ အသင်္ဂဟိတာနိ.

၆. ပဋိစ္စသမုပ္ပါဒါဒိ

၆၁. အဝိဇ္ဇာ ဧကေန ခန္ဓေန ဧကေနာယတနေန ဧကာယ ဓာတုယာ သင်္ဂဟိတာ. ကတိဟိ အသင်္ဂဟိတာ? စတူဟိ ခန္ဓေဟိ ဧကာဒသဟာယတနေဟိ သတ္တရသဟိ ဓာတူဟိ အသင်္ဂဟိတာ.

၆၂. အဝိဇ္ဇာပစ္စယာ သင်္ခါရာ ဧကေန ခန္ဓေန ဧကေနာယတနေန ဧကာယ ဓာတုယာ သင်္ဂဟိတာ. ကတိဟိ အသင်္ဂဟိတာ? စတူဟိ ခန္ဓေဟိ ဧကာဒသဟာယတနေဟိ သတ္တရသဟိ ဓာတူဟိ အသင်္ဂဟိတာ.

၆၃. သင်္ခါရပစ္စယာ ဝိညာဏံ ဧကေန ခန္ဓေန ဧကေနာယတနေန သတ္တဟိ ဓာတူဟိ သင်္ဂဟိတံ. ကတိဟိ အသင်္ဂဟိတံ? စတူဟိ ခန္ဓေဟိ ဧကာဒသဟာယတနေဟိ ဧကာဒသဟိ ဓာတူဟိ အသင်္ဂဟိတံ.

၆၄. ဝိညာဏပစ္စယာ နာမရူပံ စတူဟိ ခန္ဓေဟိ ဧကာဒသဟာယတနေဟိ ဧကာဒသဟိ ဓာတူဟိ သင်္ဂဟိတံ. ကတိဟိ အသင်္ဂဟိတံ? ဧကေန ခန္ဓေန ဧကေနာယတနေန သတ္တဟိ ဓာတူဟိ အသင်္ဂဟိတံ.

၆၅. နာမရူပပစ္စယာ သဠာယတနံ ဒွီဟိ ခန္ဓေဟိ ဆဟာယတနေဟိ ဒွါဒသဟိ ဓာတူဟိ သင်္ဂဟိတံ. ကတိဟိ အသင်္ဂဟိတံ? တီဟိ ခန္ဓေဟိ ဆဟာယတနေဟိ ဆဟိ ဓာတူဟိ အသင်္ဂဟိတံ.

၆၆. သဠာယတနပစ္စယာ ဖဿော။ ဖဿပစ္စယာ ဝေဒနာ။ ဝေဒနာပစ္စယာ တဏှာ။ တဏှာပစ္စယာ ဥပါဒါနံ။ ကမ္မဘဝေါ [ဥပါဒါနပစ္စယာ ကမ္မဘဝေါ (သီ. သျာ.)] ဧကေန ခန္ဓေန ဧကေနာယတနေန ဧကာယ ဓာတုယာ သင်္ဂဟိတော. ကတိဟိ အသင်္ဂဟိတော? စတူဟိ ခန္ဓေဟိ ဧကာဒသဟာယတနေဟိ သတ္တရသဟိ ဓာတူဟိ အသင်္ဂဟိတော.

၆၇. ဥပပတ္တိဘဝေါ ။ ကာမဘဝေါ။ သညာဘဝေါ။ ပဉ္စဝေါကာရဘဝေါ ပဉ္စဟိ ခန္ဓေဟိ ဧကာဒသဟာယတနေဟိ သတ္တရသဟိ ဓာတူဟိ သင်္ဂဟိတော. ကတိဟိ အသင်္ဂဟိတော? န ကေဟိစိ ခန္ဓေဟိ ဧကေနာယတနေန ဧကာယ ဓာတုယာ အသင်္ဂဟိတော.

၆၈. ရူပဘဝေါ ပဉ္စဟိ ခန္ဓေဟိ ပဉ္စဟာယတနေဟိ အဋ္ဌဟိ ဓာတူဟိ သင်္ဂဟိတော. ကတိဟိ အသင်္ဂဟိတော? န ကေဟိစိ ခန္ဓေဟိ သတ္တဟာယတနေဟိ ဒသဟိ ဓာတူဟိ အသင်္ဂဟိတော.

၆၉. အရူပဘဝေါ။ နေဝသညာနာသညာဘဝေါ။ စတုဝေါကာရဘဝေါ စတူဟိ ခန္ဓေဟိ ဒွီဟာယတနေဟိ ဒွီဟိ ဓာတူဟိ သင်္ဂဟိတော. ကတိဟိ အသင်္ဂဟိတော? ဧကေန ခန္ဓေန ဒသဟာယတနေဟိ သောဠသဟိ ဓာတူဟိ အသင်္ဂဟိတော.

၇၀. အသညာဘဝေါ။ ဧကဝေါကာရဘဝေါ ဧကေန ခန္ဓေန ဒွီဟာယတနေဟိ ဒွီဟိ ဓာတူဟိ သင်္ဂဟိတော. ကတိဟိ အသင်္ဂဟိတော? စတူဟိ ခန္ဓေဟိ ဒသဟာယတနေဟိ သောဠသဟိ ဓာတူဟိ အသင်္ဂဟိတော.

၇၁. ဇာတိ ဒွီဟိ ခန္ဓေဟိ။ ဇရာ ဒွီဟိ ခန္ဓေဟိ။ မရဏံ ဒွီဟိ ခန္ဓေဟိ ဧကေနာယတနေန ဧကာယ ဓာတုယာ သင်္ဂဟိတံ. ကတိဟိ အသင်္ဂဟိတံ? တီဟိ ခန္ဓေဟိ ဧကာဒသဟာယတနေဟိ သတ္တရသဟိ ဓာတူဟိ အသင်္ဂဟိတံ.

၇၂. သောကော။ ပရိဒေဝေါ။ ဒုက္ခံ။ ဒေါမနဿံ။ ဥပါယာသော။ သတိပဋ္ဌာနံ။ သမ္မပ္ပဓာနံ ဧကေန ခန္ဓေန ဧကေနာယတနေန ဧကာယ ဓာတုယာ သင်္ဂဟိတံ. ကတိဟိ အသင်္ဂဟိတံ? စတူဟိ ခန္ဓေဟိ ဧကာဒသဟာယတနေဟိ သတ္တရသဟိ ဓာတူဟိ အသင်္ဂဟိတံ.

၇၃. ဣဒ္ဓိပါဒေါ ဒွီဟိ ခန္ဓေဟိ ဒွီဟာယတနေဟိ ဒွီဟိ ဓာတူဟိ သင်္ဂဟိတော. ကတိဟိ အသင်္ဂဟိတော? တီဟိ ခန္ဓေဟိ ဒသဟာယတနေဟိ သောဠသဟိ ဓာတူဟိ အသင်္ဂဟိတော.

၇၄. ဈာနံ ဒွီဟိ ခန္ဓေဟိ ဧကေနာယတနေန ဧကာယ ဓာတုယာ သင်္ဂဟိတံ. ကတိဟိ အသင်္ဂဟိတံ? တီဟိ ခန္ဓေဟိ ဧကာဒသဟာယတနေဟိ သတ္တရသဟိ ဓာတူဟိ အသင်္ဂဟိတံ.

၇၅. အပ္ပမညာ ။ ပဉ္စိန္ဒြိယာနိ။ ပဉ္စ ဗလာနိ။ သတ္တ ဗောဇ္ဈင်္ဂါ။ အရိယော အဋ္ဌင်္ဂိကော မဂ္ဂေါ။ ဖဿော။ ဝေဒနာ။ သညာ။ စေတနာ။ အဓိမောက္ခော။ မနသိကာရော ဧကေန ခန္ဓေန ဧကေနာယတနေန ဧကာယ ဓာတုယာ သင်္ဂဟိတော. ကတိဟိ အသင်္ဂဟိတော? စတူဟိ ခန္ဓေဟိ ဧကာဒသဟာယတနေဟိ သတ္တရသဟိ ဓာတူဟိ အသင်္ဂဟိတော.

၇၆. စိတ္တံ ဧကေန ခန္ဓေန ဧကေနာယတနေန သတ္တဟိ ဓာတူဟိ သင်္ဂဟိတံ. ကတိဟိ အသင်္ဂဟိတံ? စတူဟိ ခန္ဓေဟိ ဧကာဒသဟာယတနေဟိ ဧကာဒသဟိ ဓာတူဟိ အသင်္ဂဟိတံ.

၇. တိကံ

၇၇. ကုသလာ ဓမ္မာ။ အကုသလာ ဓမ္မာ ကတိဟိ ခန္ဓေဟိ ကတိဟာယတနေဟိ ကတိဟိ ဓာတူဟိ သင်္ဂဟိတာ? ကုသလာ ဓမ္မာ။ အကုသလာ ဓမ္မာ စတူဟိ ခန္ဓေဟိ ဒွီဟာယတနေဟိ ဒွီဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? ဧကေန ခန္ဓေန ဒသဟာယတနေဟိ သောဠသဟိ ဓာတူဟိ အသင်္ဂဟိတာ.

၇၈. အဗျာကတာ ဓမ္မာ အသင်္ခတံ ခန္ဓတော ဌပေတွာ ပဉ္စဟိ ခန္ဓေဟိ ဒွါဒသဟာယတနေဟိ အဋ္ဌာရသဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? န ကေဟိစိ ခန္ဓေဟိ န ကေဟိစိ အာယတနေဟိ န ကာဟိစိ ဓာတူဟိ အသင်္ဂဟိတာ.

၇၉. သုခါယ ဝေဒနာယ သမ္ပယုတ္တာ ဓမ္မာ။ ဒုက္ခာယ ဝေဒနာယ သမ္ပယုတ္တာ ဓမ္မာ တီဟိ ခန္ဓေဟိ ဒွီဟာယတနေဟိ တီဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? ဒွီဟိ ခန္ဓေဟိ ဒသဟာယတနေဟိ ပန္နရသဟိ ဓာတူဟိ အသင်္ဂဟိတာ.

၈၀. အဒုက္ခမသုခါယ ဝေဒနာယ သမ္ပယုတ္တာ ဓမ္မာ တီဟိ ခန္ဓေဟိ ဒွီဟာယတနေဟိ သတ္တဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? ဒွီဟိ ခန္ဓေဟိ ဒသဟာယတနေဟိ ဧကာဒသဟိ ဓာတူဟိ အသင်္ဂဟိတာ.

၈၁. ဝိပါကာ ဓမ္မာ စတူဟိ ခန္ဓေဟိ ဒွီဟာယတနေဟိ အဋ္ဌဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? ဧကေန ခန္ဓေန ဒသဟာယတနေဟိ ဒသဟိ ဓာတူဟိ အသင်္ဂဟိတာ.

၈၂. ဝိပါကဓမ္မဓမ္မာ။ သံကိလိဋ္ဌသံကိလေသိကာ ဓမ္မာ စတူဟိ ခန္ဓေဟိ ဒွီဟာယတနေဟိ ဒွီဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? ဧကေန ခန္ဓေန ဒသဟာယတနေဟိ သောဠသဟိ ဓာတူဟိ အသင်္ဂဟိတာ.

၈၃. နေဝဝိပါကနဝိပါကဓမ္မဓမ္မာ အသင်္ခတံ ခန္ဓတော ဌပေတွာ ပဉ္စဟိ ခန္ဓေဟိ ဒွါဒသဟာယတနေဟိ တေရသဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? န ကေဟိစိ ခန္ဓေဟိ န ကေဟိစိ အာယတနေဟိ ပဉ္စဟိ ဓာတူဟိ အသင်္ဂဟိတာ.

၈၄. ဥပါဒိန္နုပါဒါနိယာ ဓမ္မာ ပဉ္စဟိ ခန္ဓေဟိ ဧကာဒသဟာယတနေဟိ သတ္တရသဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? န ကေဟိစိ ခန္ဓေဟိ ဧကေနာယတနေန ဧကာယ ဓာတုယာ အသင်္ဂဟိတာ.

၈၅. အနုပါဒိန္နုပါဒါနိယာ ဓမ္မာ ပဉ္စဟိ ခန္ဓေဟိ သတ္တဟာယတနေဟိ အဋ္ဌဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? န ကေဟိစိ ခန္ဓေဟိ ပဉ္စဟာယတနေဟိ ဒသဟိ ဓာတူဟိ အသင်္ဂဟိတာ.

၈၆. အနုပါဒိန္နအနုပါဒါနိယာ ဓမ္မာ။ အသံကိလိဋ္ဌအသံကိလေသိကာ ဓမ္မာ အသင်္ခတံ ခန္ဓတော ဌပေတွာ စတူဟိ ခန္ဓေဟိ ဒွီဟာယတနေဟိ ဒွီဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? ဧကေန ခန္ဓေန ဒသဟာယတနေဟိ သောဠသဟိ ဓာတူဟိ အသင်္ဂဟိတာ.

၈၇. အသံကိလိဋ္ဌသံကိလေသိကာ ဓမ္မာ ပဉ္စဟိ ခန္ဓေဟိ ဒွါဒသဟာယတနေဟိ အဋ္ဌာရသဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? န ကေဟိစိ ခန္ဓေဟိ န ကေဟိစိ အာယတနေဟိ န ကာဟိစိ ဓာတူဟိ အသင်္ဂဟိတာ.

၈၈. သဝိတက္ကသဝိစာရာ ဓမ္မာ စတူဟိ ခန္ဓေဟိ ဒွီဟာယတနေဟိ တီဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? ဧကေန ခန္ဓေန ဒသဟာယတနေဟိ ပန္နရသဟိ ဓာတူဟိ အသင်္ဂဟိတာ.

၈၉. အဝိတက္ကဝိစာရမတ္တာ ဓမ္မာ။ ပီတိသဟဂတာ ဓမ္မာ စတူဟိ ခန္ဓေဟိ ဒွီဟာယတနေဟိ ဒွီဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? ဧကေန ခန္ဓေန ဒသဟာယတနေဟိ သောဠသဟိ ဓာတူဟိ အသင်္ဂဟိတာ.

၉၀. အဝိတက္ကအဝိစာရာ ဓမ္မာ အသင်္ခတံ ခန္ဓတော ဌပေတွာ ပဉ္စဟိ ခန္ဓေဟိ ဒွါဒသဟာယတနေဟိ သတ္တရသဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? န ကေဟိစိ ခန္ဓေဟိ န ကေဟိစိ အာယတနေဟိ ဧကာယ ဓာတုယာ အသင်္ဂဟိတာ.

၉၁. သုခသဟဂတာ ဓမ္မာ တီဟိ ခန္ဓေဟိ ဒွီဟာယတနေဟိ တီဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? ဒွီဟိ ခန္ဓေဟိ ဒသဟာယတနေဟိ ပန္နရသဟိ ဓာတူဟိ အသင်္ဂဟိတာ.

၉၂. ဥပေက္ခာသဟဂတာ ဓမ္မာ တီဟိ ခန္ဓေဟိ ဒွီဟာယတနေဟိ သတ္တဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? ဒွီဟိ ခန္ဓေဟိ ဒသဟာယတနေဟိ ဧကာဒသဟိ ဓာတူဟိ အသင်္ဂဟိတာ.

၉၃. ဒဿနေန ပဟာတဗ္ဗာ ဓမ္မာ။ ဘာဝနာယ ပဟာတဗ္ဗာ ဓမ္မာ။ ဒဿနေန ပဟာတဗ္ဗဟေတုကာ ဓမ္မာ။ ဘာဝနာယ ပဟာတဗ္ဗဟေတုကာ ဓမ္မာ။ အာစယဂါမိနော ဓမ္မာ။ အပစယဂါမိနော ဓမ္မာ။ သေက္ခာ ဓမ္မာ။ အသေက္ခာ ဓမ္မာ။ မဟဂ္ဂတာ ဓမ္မာ စတူဟိ ခန္ဓေဟိ ဒွီဟာယတနေဟိ ဒွီဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? ဧကေန ခန္ဓေန ဒသဟာယတနေဟိ သောဠသဟိ ဓာတူဟိ အသင်္ဂဟိတာ.

၉၄. နေဝ ဒဿနေန န ဘာဝနာယ ပဟာတဗ္ဗာ ဓမ္မာ။ နေဝ ဒဿနေန န ဘာဝနာယ ပဟာတဗ္ဗဟေတုကာ ဓမ္မာ။ နေဝါစယဂါမိနာပစယဂါမိနော ဓမ္မာ။ နေဝသေက္ခနာသေက္ခာ ဓမ္မာ အသင်္ခတံ ခန္ဓတော ဌပေတွာ ပဉ္စဟိ ခန္ဓေဟိ ဒွါဒသဟာယတနေဟိ အဋ္ဌာရသဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? န ကေဟိစိ ခန္ဓေဟိ န ကေဟိစိ အာယတနေဟိ န ကာဟိစိ ဓာတူဟိ အသင်္ဂဟိတာ.

၉၅. ပရိတ္တာ ဓမ္မာ ပဉ္စဟိ ခန္ဓေဟိ ဒွါဒသဟာယတနေဟိ အဋ္ဌာရသဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? န ကေဟိစိ ခန္ဓေဟိ န ကေဟိစိ အာယတနေဟိ န ကာဟိစိ ဓာတူဟိ အသင်္ဂဟိတာ.

၉၆. အပ္ပမာဏာ ဓမ္မာ။ ပဏီတာ ဓမ္မာ အသင်္ခတံ ခန္ဓတော ဌပေတွာ စတူဟိ ခန္ဓေဟိ ဒွီဟာယတနေဟိ ဒွီဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? ဧကေန ခန္ဓေန ဒသဟာယတနေဟိ သောဠသဟိ ဓာတူဟိ အသင်္ဂဟိတာ.

၉၇. ပရိတ္တာရမ္မဏာ [ပရိတ္တာရမဏာ (?)] ဓမ္မာ စတူဟိ ခန္ဓေဟိ ဒွီဟာယတနေဟိ အဋ္ဌဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? ဧကေန ခန္ဓေန ဒသဟာယတနေဟိ ဒသဟိ ဓာတူဟိ အသင်္ဂဟိတာ.

၉၈. မဟဂ္ဂတာရမ္မဏာ ဓမ္မာ။ အပ္ပမာဏာရမ္မဏာ ဓမ္မာ။ ဟီနာ ဓမ္မာ။ မိစ္ဆတ္တနိယတာ ဓမ္မာ။ သမ္မတ္တနိယတာ ဓမ္မာ။ မဂ္ဂါရမ္မဏာ ဓမ္မာ။ မဂ္ဂဟေတုကာ ဓမ္မာ။ မဂ္ဂါဓိပတိနော ဓမ္မာ စတူဟိ ခန္ဓေဟိ ဒွီဟာယတနေဟိ ဒွီဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? ဧကေန ခန္ဓေန ဒသဟာယတနေဟိ သောဠသဟိ ဓာတူဟိ အသင်္ဂဟိတာ.

၉၉. မဇ္ဈိမာ ဓမ္မာ ပဉ္စဟိ ခန္ဓေဟိ ဒွါဒသဟာယတနေဟိ အဋ္ဌာရသဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? န ကေဟိစိ ခန္ဓေဟိ န ကေဟိစိ အာယတနေဟိ န ကာဟိစိ ဓာတူဟိ အသင်္ဂဟိတာ.

၁၀၀. အနိယတာ ဓမ္မာ အသင်္ခတံ ခန္ဓတော ဌပေတွာ ပဉ္စဟိ ခန္ဓေဟိ ဒွါဒသဟာယတနေဟိ အဋ္ဌာရသဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? န ကေဟိစိ ခန္ဓေဟိ န ကေဟိစိ အာယတနေဟိ န ကာဟိစိ ဓာတူဟိ အသင်္ဂဟိတာ.

၁၀၁. ဥပ္ပန္နာ ဓမ္မာ ပဉ္စဟိ ခန္ဓေဟိ ဒွါဒသဟာယတနေဟိ အဋ္ဌာရသဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? န ကေဟိစိ ခန္ဓေဟိ န ကေဟိစိ အာယတနေဟိ န ကာဟိစိ ဓာတူဟိ အသင်္ဂဟိတာ.

၁၀၂. အနုပ္ပန္နာ ဓမ္မာ ပဉ္စဟိ ခန္ဓေဟိ သတ္တဟာယတနေဟိ အဋ္ဌဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? န ကေဟိစိ ခန္ဓေဟိ ပဉ္စဟာယတနေဟိ ဒသဟိ ဓာတူဟိ အသင်္ဂဟိတာ.

၁၀၃. ဥပ္ပါဒိနော ဓမ္မာ ပဉ္စဟိ ခန္ဓေဟိ ဧကာဒသဟာယတနေဟိ သတ္တရသဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? န ကေဟိစိ ခန္ဓေဟိ ဧကေနာယတနေန ဧကာယ ဓာတုယာ အသင်္ဂဟိတာ.

၁၀၄. အတီတာ ဓမ္မာ။ အနာဂတာ ဓမ္မာ။ ပစ္စုပ္ပန္နာ ဓမ္မာ။ အဇ္ဈတ္တာ ဓမ္မာ။ အဇ္ဈတ္တဗဟိဒ္ဓါ ဓမ္မာ ပဉ္စဟိ ခန္ဓေဟိ ဒွါဒသဟာယတနေဟိ အဋ္ဌာရသဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? န ကေဟိစိ ခန္ဓေဟိ န ကေဟိစိ အာယတနေဟိ န ကာဟိစိ ဓာတူဟိ အသင်္ဂဟိတာ.

၁၀၅. ဗဟိဒ္ဓါ ဓမ္မာ အသင်္ခတံ ခန္ဓတော ဌပေတွာ ပဉ္စဟိ ခန္ဓေဟိ ဒွါဒသဟာယတနေဟိ အဋ္ဌာရသဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? န ကေဟိစိ ခန္ဓေဟိ န ကေဟိစိ အာယတနေဟိ န ကာဟိစိ ဓာတူဟိ အသင်္ဂဟိတာ.

၁၀၆. အတီတာရမ္မဏာ ဓမ္မာ။ အနာဂတာရမ္မဏာ ဓမ္မာ စတူဟိ ခန္ဓေဟိ ဒွီဟာယတနေဟိ ဒွီဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? ဧကေန ခန္ဓေန ဒသဟာယတနေဟိ သောဠသဟိ ဓာတူဟိ အသင်္ဂဟိတာ.

၁၀၇. ပစ္စုပ္ပန္နာရမ္မဏာ ဓမ္မာ။ အဇ္ဈတ္တာရမ္မဏာ ဓမ္မာ။ ဗဟိဒ္ဓါရမ္မဏာ ဓမ္မာ။ အဇ္ဈတ္တဗဟိဒ္ဓါရမ္မဏာ ဓမ္မာ စတူဟိ ခန္ဓေဟိ ဒွီဟာယတနေဟိ အဋ္ဌဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? ဧကေန ခန္ဓေန ဒသဟာယတနေဟိ ဒသဟိ ဓာတူဟိ အသင်္ဂဟိတာ.

၁၀၈. သနိဒဿနသပ္ပဋိဃာ ဓမ္မာ ဧကေန ခန္ဓေန ဧကေနာယတနေန ဧကာယ ဓာတုယာ သင်္ဂဟိတာ. ကတိဟိ အသင်္ဂဟိတာ? စတူဟိ ခန္ဓေဟိ ဧကာဒသဟာယတနေဟိ သတ္တရသဟိ ဓာတူဟိ အသင်္ဂဟိတာ.

၁၀၉. အနိဒဿနသပ္ပဋိဃာ ဓမ္မာ ဧကေန ခန္ဓေန နဝဟာယတနေဟိ နဝဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? စတူဟိ ခန္ဓေဟိ တီဟာယတနေဟိ နဝဟိ ဓာတူဟိ အသင်္ဂဟိတာ.

၁၁၀. အနိဒဿနအပ္ပဋိဃာ ဓမ္မာ အသင်္ခတံ ခန္ဓတော ဌပေတွာ ပဉ္စဟိ ခန္ဓေဟိ ဒွီဟာယတနေဟိ အဋ္ဌဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? န ကေဟိစိ ခန္ဓေဟိ၊ ဒသဟာယတနေဟိ ဒသဟိ ဓာတူဟိ အသင်္ဂဟိတာ.

၈. ဒုကံ

၁၁၁. ဟေတူ ဓမ္မာ။ ဟေတူ စေဝ သဟေတုကာ စ ဓမ္မာ။ ဟေတူ စေဝ ဟေတုသမ္ပယုတ္တာ စ ဓမ္မာ ဧကေန ခန္ဓေန ဧကေနာယတနေန ဧကာယ ဓာတုယာ သင်္ဂဟိတာ. ကတိဟိ အသင်္ဂဟိတာ? စတူဟိ ခန္ဓေဟိ ဧကာဒသဟာယတနေဟိ သတ္တရသဟိ ဓာတူဟိ အသင်္ဂဟိတာ.

၁၁၂. န ဟေတူ ဓမ္မာ။ အဟေတုကာ ဓမ္မာ။ ဟေတုဝိပ္ပယုတ္တာ ဓမ္မာ။ န ဟေတူ အဟေတုကာ [န ဟေတူ အဟေတုကာ (သျာ. က.) ဝိဘ. ဒုကပဉှာပုစ္ဆကေပိ] ဓမ္မာ အသင်္ခတံ ခန္ဓတော ဌပေတွာ ပဉ္စဟိ ခန္ဓေဟိ ဒွါဒသဟာယတနေဟိ အဋ္ဌာရသဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? န ကေဟိစိ ခန္ဓေဟိ န ကေဟိစိ အာယတနေဟိ န ကာဟိစိ ဓာတူဟိ အသင်္ဂဟိတာ.

၁၁၃. သဟေတုကာ ဓမ္မာ။ ဟေတုသမ္ပယုတ္တာ ဓမ္မာ။ သဟေတုကာ စေဝ န စ ဟေတူ ဓမ္မာ။ ဟေတုသမ္ပယုတ္တာ စေဝ န စ ဟေတူ ဓမ္မာ။ န ဟေတူ သဟေတုကာ ဓမ္မာ စတူဟိ ခန္ဓေဟိ ဒွီဟာယတနေဟိ ဒွီဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? ဧကေန ခန္ဓေန ဒသဟာယတနေဟိ သောဠသဟိ ဓာတူဟိ အသင်္ဂဟိတာ.

၁၁၄. သပ္ပစ္စယာ ဓမ္မာ။ သင်္ခတာ ဓမ္မာ ပဉ္စဟိ ခန္ဓေဟိ ဒွါဒသဟာယတနေဟိ အဋ္ဌာရသဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? န ကေဟိစိ ခန္ဓေဟိ န ကေဟိစိ အာယတနေဟိ န ကာဟိစိ ဓာတူဟိ အသင်္ဂဟိတာ.

၁၁၅. အပ္ပစ္စယာ ဓမ္မာ။ အသင်္ခတာ ဓမ္မာ န ကေဟိစိ ခန္ဓေဟိ ဧကေနာယတနေန ဧကာယ ဓာတုယာ သင်္ဂဟိတာ. ကတိဟိ အသင်္ဂဟိတာ? ပဉ္စဟိ ခန္ဓေဟိ ဧကာဒသဟာယတနေဟိ သတ္တရသဟိ ဓာတူဟိ အသင်္ဂဟိတာ.

၁၁၆. သနိဒဿနာ ဓမ္မာ ဧကေန ခန္ဓေန ဧကေနာယတနေန ဧကာယ ဓာတုယာ သင်္ဂဟိတာ. ကတိဟိ အသင်္ဂဟိတာ? စတူဟိ ခန္ဓေဟိ ဧကာဒသဟာယတနေဟိ သတ္တရသဟိ ဓာတူဟိ အသင်္ဂဟိတာ.

၁၁၇. အနိဒဿနာ ဓမ္မာ အသင်္ခတံ ခန္ဓတော ဌပေတွာ ပဉ္စဟိ ခန္ဓေဟိ ဧကာဒသဟာယတနေဟိ သတ္တရသဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? န ကေဟိစိ ခန္ဓေဟိ၊ ဧကေနာယတနေန ဧကာယ ဓာတုယာ အသင်္ဂဟိတာ.

၁၁၈. သပ္ပဋိဃာ ဓမ္မာ ဧကေန ခန္ဓေန ဒသဟာယတနေဟိ ဒသဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? စတူဟိ ခန္ဓေဟိ ဒွီဟာယတနေဟိ အဋ္ဌဟိ ဓာတူဟိ အသင်္ဂဟိတာ.

၁၁၉. အပ္ပဋိဃာ ဓမ္မာ အသင်္ခတံ ခန္ဓတော ဌပေတွာ ပဉ္စဟိ ခန္ဓေဟိ ဒွီဟာယတနေဟိ အဋ္ဌဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? န ကေဟိစိ ခန္ဓေဟိ၊ ဒသဟာယတနေဟိ ဒသဟိ ဓာတူဟိ အသင်္ဂဟိတာ.

၁၂၀. ရူပိနော ဓမ္မာ ဧကေန ခန္ဓေန ဧကာဒသဟာယတနေဟိ ဧကာဒသဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? စတူဟိ ခန္ဓေဟိ ဧကေနာယတနေန သတ္တဟိ ဓာတူဟိ အသင်္ဂဟိတာ.

၁၂၁. အရူပိနော ဓမ္မာ အသင်္ခတံ ခန္ဓတော ဌပေတွာ စတူဟိ ခန္ဓေဟိ ဒွီဟာယတနေဟိ အဋ္ဌဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? ဧကေန ခန္ဓေန ဒသဟာယတနေဟိ ဒသဟိ ဓာတူဟိ အသင်္ဂဟိတာ.

၁၂၂. လောကိယာ ဓမ္မာ ပဉ္စဟိ ခန္ဓေဟိ ဒွါဒသဟာယတနေဟိ အဋ္ဌာရသဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? န ကေဟိစိ ခန္ဓေဟိ န ကေဟိစိ အာယတနေဟိ န ကာဟိစိ ဓာတူဟိ အသင်္ဂဟိတာ.

၁၂၃. လောကုတ္တရာ ဓမ္မာ အသင်္ခတံ ခန္ဓတော ဌပေတွာ စတူဟိ ခန္ဓေဟိ ဒွီဟာယတနေဟိ ဒွီဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? ဧကေန ခန္ဓေန ဒသဟာယတနေဟိ သောဠသဟိ ဓာတူဟိ အသင်္ဂဟိတာ.

၁၂၄. ကေနစိ ဝိညေယျာ ဓမ္မာ။ ကေနစိ န ဝိညေယျာ ဓမ္မာ အသင်္ခတံ ခန္ဓတော ဌပေတွာ ပဉ္စဟိ ခန္ဓေဟိ ဒွါဒသဟာယတနေဟိ အဋ္ဌာရသဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? န ကေဟိစိ ခန္ဓေဟိ န ကေဟိစိ အာယတနေဟိ န ကာဟိစိ ဓာတူဟိ အသင်္ဂဟိတာ.

၁၂၅. အာသဝါ ဓမ္မာ။ အာသဝါ စေဝ သာသဝါ စ ဓမ္မာ။ အာသဝါ စေဝ အာသဝသမ္ပယုတ္တာ စ ဓမ္မာ ဧကေန ခန္ဓေန ဧကေနာယတနေန ဧကာယ ဓာတုယာ သင်္ဂဟိတာ. ကတိဟိ အသင်္ဂဟိတာ? စတူဟိ ခန္ဓေဟိ ဧကာဒသဟာယတနေဟိ သတ္တရသဟိ ဓာတူဟိ အသင်္ဂဟိတာ.

၁၂၆. နော အာသဝါ ဓမ္မာ။ အာသဝဝိပ္ပယုတ္တာ ဓမ္မာ အသင်္ခတံ ခန္ဓတော ဌပေတွာ ပဉ္စဟိ ခန္ဓေဟိ ဒွါဒသဟာယတနေဟိ အဋ္ဌာရသဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? န ကေဟိစိ ခန္ဓေဟိ န ကေဟိစိ အာယတနေဟိ န ကာဟိစိ ဓာတူဟိ အသင်္ဂဟိတာ.

၁၂၇. သာသဝါ ဓမ္မာ။ သာသဝါ စေဝ နော စ အာသဝါ ဓမ္မာ။ အာသဝဝိပ္ပယုတ္တာ သာသဝါ ဓမ္မာ ပဉ္စဟိ ခန္ဓေဟိ ဒွါဒသဟာယတနေဟိ အဋ္ဌာရသဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? န ကေဟိစိ ခန္ဓေဟိ န ကေဟိစိ အာယတနေဟိ န ကာဟိစိ ဓာတူဟိ အသင်္ဂဟိတာ.

၁၂၈. အနာသဝါ ဓမ္မာ။ အာသဝဝိပ္ပယုတ္တာ အနာသဝါ ဓမ္မာ အသင်္ခတံ ခန္ဓတော ဌပေတွာ စတူဟိ ခန္ဓေဟိ ဒွီဟာယတနေဟိ ဒွီဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? ဧကေန ခန္ဓေန ဒသဟာယတနေဟိ သောဠသဟိ ဓာတူဟိ အသင်္ဂဟိတာ.