၅. ဝိသမဝုတ္တိနိဒ္ဒေသ-ပဉ္စမပရိစ္ဆေဒ

၁၁၈. န’ဋ္ဌက္ခရေသု ပါဒေသု၊ သ္နာ’ဒိမှာ ယော’ဏ္ဏဝါ ဝတ္တံ.

၁၁၉. သမေသု သိန္ဓုတော ဇေန၊ ပထျာဝတ္တံ ပကိတ္တိတံ.

၁၂၀. ဩဇေသု ဇေန သိန္ဓုတော၊ တ’မေဝ ဝီပရီတာ’ဒိ.

၁၂၁. န၊ကာရော စေ ဇလဓိတော၊ စပလာဝတ္တ’မိစ္စေ’တံ.

၁၂၂. သမေ လော သတ္တမော ယဿာ၊ ဝိပုလာ ပိင်္ဂလဿ သာ.

၁၂၃. သေတဝဿာ’ခိလေသုပိ.

၁၂၄. ဘေန’ဏ္ဏဝါ ဘ’ဗ္ဗိပုလာ.

၁၂၅. ဧဝ’မညာ ရော စတုတ္ထာ.

၁၂၆. နော’ဏ္ဏဝါ စေ နဝိပုလာ.

၁၂၇. တော’ဏ္ဏဝါ တထာ’ညာ သိယာ.

ဝတ္တ’ပ္ပဘေဒေါ.

၁၂၈. နဒိဿတေ’တ္ထ ယံ ဆန္ဒံ၊ ပယောဂေ ဒိဿတေ ယဒိ၊

ဝိသမ’က္ခရပါဒံ တံ၊ ဂါထာ သာမညနာမတော.

ဣတိ ဝုတ္တောဒယေ ဆန္ဒသိ ဝိသမဝုတ္တိ နိဒ္ဒေသော နာမ

ပဉ္စမော ပရိစ္ဆေဒေါ.