၁. သညာပရိဘာသာနိဒ္ဒေသ-ပဌမပရိစ္ဆေဒ

၁. နမ’တ္ထု ဇန သန္တာန၊ တမ သန္တာန ဘေဒိနော၊

ဓမ္မု’ဇ္ဇလန္တ ရုစိနော၊ မုနိန္ဒော’ဒါတ ရောစိနော.

၂. ပိင်္ဂလာ’စရိယာဒီဟိ၊ ဆန္ဒံ ယ မုဒိတံ ပုရာ၊

သုဒ္ဓမာဂဓိကာနံ တံ၊ န သာဓေတိ ယထိစ္ဆိတံ [ယ’ဒိစ္ဆိတံ ယတိ’စ္ဆိတံ (က.)].

၃. တတော မာဂဓဘာသာယ၊ မတ္တာ၊ဝဏ္ဏ၊ဝိဘေဒနံ၊

လက္ချ လက္ခဏ သံယုတ္တံ၊ ပသန္န’တ္ထ၊ပဒ၊က္ကမံ.

၄. ဣဒံ ဝုတ္တောဒယံ နာမ၊ လောကိယ’စ္ဆန္ဒနိဿိတံ၊

အာရဘိဿ’မဟံ ဒါနိ၊ တေသံ သုခဝိဗုဒ္ဓိယာ.

၅. သဗ္ဗဂ္လာ မ္နာ၊’ဒိဂလဟူ၊ ဘျာ’၊မဇ္ဈ’န္တ ဂရူ ဇသာ၊

မဇ္ဈ’န္တလာ ရ၊တေ’တေ’ဋ္ဌ၊ ဂဏာ ဂေါ ဂရု၊လော လဟု.

၆. ဘ၊ဇ၊သာ သဗ္ဗဂ၊လဟူ၊ ပဉ္စိ’မေ သဏ္ဌိတာ ဂဏာ၊

အရိယာဒိမှိ ဝိညေယျာ၊ ဂဏော ဣဓ စတု’က္ကလော.

၇. သံယောဂါ’ဒိ စ၊ ဒီဃော စ၊ နိဂ္ဂဟီတပရော စ၊ ယော၊

ဂရု၊ ဝင်္ကော၊ ပါဒန္တော၊ဝါ၊ ရဿော’ညော မတ္တိကော လု’ဇု.

၈. ပရေ ပါဒါဒိသံယောဂေ၊ ယော ပုဗ္ဗော ဂရုက’က္ခရော၊

လဟု သ ကွစိ ဝိညေယျော၊ တဒုဒါဟရဏံ ယထာ.

၉. ဒဿနရသာ’နုဘာဝနေ၊ နိဗဒ္ဓဂေဓာ ဇိနဿ’ယံ ဇနတာ၊

ဝိမှယဇနနီ သညတ၊ ကြိယာ နု ကံ နာ’နုရဉ္ဇယတိ.

၁၀. ဝိညေယျာ လောကတော သညာ၊ သမုဒ္ဒေါ၊သု၊ရသာဒိနံ၊

ပါဒေါဉေယျော စတုတ္ထံ’သော၊ ပဒစ္ဆေဒေါ ယတီ ဘဝေ.

၁၁. သမ၊မဍ္ဎသမံ၊ ဝုတ္တံ၊ ဝိသမံ စာ’ပရံ တိဓာ၊

သမာ လက္ခဏတော ပါဒါ၊ စတ္တာရော ယဿ တံ သမံ.

၁၂. ယဿ’န္တိမေန ဒုတိယော၊ တတိယေနာ’ဒိမော သမော၊

တ’ဒဍ္ဎသမ၊ မညံ တု၊ ဘိန္န လက္ခဏ ပါဒိကံ.

၁၃. ပါဒ’မေကက္ခရာ’ရဗ္ဘ၊ ယာဝ ဆဗ္ဗီသတ’က္ခရာ၊

ဘဝေ ပါဒေဟိ တံ ဆန္ဒံ၊ နာနာနာမော’ဒိတံ တတော.

၁၄. ဒဏ္ဍကာ စဏ္ဍဝုဋ္ဌျာ’ဒိ၊ ပါဒေဟိ ဆဟိ၊ တီဟိ တု၊

‘ဂါထာ’တိ စ ပရတ္ထေ’ဝံ၊ ဆန္ဒော သညာ ပကာသိတာ.

၁၅. အနန္တရော’ဒိတံ စ’ည၊ မေတံ သာမည နာမတော၊

‘ဂါထာ’ဣစ္စေဝ နိဒ္ဒိဋ္ဌံ၊ မုနိန္ဒဝစနေ ပန.

၁၆. ဝိသေသနာမတော ကိဉ္စိ၊ ဂဟေတွာ သဗ္ဗထော’စိတံ၊

ဒဿယိဿာမ’ဟံ တေ’တ္ထ၊ နာမာနာ’ဝိ ဘဝိဿရေ.

ဣတိ ဝုတ္တောဒယေ ဆန္ဒသိ သညာပရိဘာသာ နိဒ္ဒေသော နာမ

ပဌမော ပရိစ္ဆေဒေါ.