၅. ဘာဝါဝဗောဓ-ပဉ္စမပရိစ္ဆေဒ

၃၃၈. ပဋိဘာနဝတာ လောက၊ ဝေါဟာရ’မနုသာရိနာ၊

တတော’စိတျ သမုလ္လာသ၊ ဝေဒိနာ ကဝိနာ ပရံ.

၃၃၉. ဌာယိသမ္ဗန္ဓိနော ဘာဝ၊ ဝိဘာဝါ သာ’နုဘာဝကာ၊

သမ္ဗဇ္ဈန္တိ နိဗန္ဓာ တေ၊ ရသ’ဿာဒါယ သာဓုနံ.

ဘာဝအဓိပ္ပါယ

၃၄၀. စိတ္တ ဝုတ္တိ ဝိသေသာ တု၊ ဘာဝယန္တိ ရသေ ယတော၊

ရတျာဒယော တတော ဘာဝ၊ သဒ္ဒေန ပရိကိတ္တိတာ.

ဌာယီဘာဝအဓိပ္ပါယ

၃၄၁. ဝိရောဓိနာ’ညဘာဝေန၊ ယော ဘာဝေါ န တိရောဟိတော၊

သီလေန တိဋ္ဌတိ’စ္စေသော၊ ‘ဌာယီဘာဝေါ’တိ သဒ္ဒိတော.

ဌာယီဘာဝပ္ပဘေဒဥဒ္ဒေသ

၃၄၂. ရတိ၊ ဟဿော၊ စ သောကော၊ စ၊

ကောဓု၊ ဿာဟာ၊ ဘယံ၊ပိ စ၊

ဇိဂုစ္ဆာ၊ ဝိမှယော၊ စေဝ၊ သမော စ နဝ ဌာယိနော.

ဗျဘိစာရီဘာဝအဓိပ္ပါယ

၃၄၃. တိရောဘာဝါ၊ ဝိဘာဝါ’ဒိ၊ ဝိသေသနာ’ဘိမုချတော၊

ယေ တေ စရန္တိ သီလေန၊ တေ ဟောန္တိ ဗျဘိစာရိနော.

ဗျဘိစာရိဘာဝပဘေဒ

၃၄၄. နိဗ္ဗေဒေါ၊ တက္က၊ သင်္ကာ၊ သမ၊

ဓိတိ၊ ဇဠတာ၊ ဒီနတု၊ ဂ္ဂါ၊ လသတ္တံ၊

သုတ္တံ၊ တာသော၊ ဂိလာနု၊ ဿုက၊ ဟရိသ၊

သတိ၊ ဿာ၊ ဝိသာဒါ၊ ဗဟိတ္ထာ [ဗဟိဒ္ဓါ (က.)]၊

စိန္တာ၊ ဂဗ္ဗာ၊ ပမာရော၊ မရိသ၊ မဒ၊

မတု၊ မ္မာဒ၊ မောဟာ၊ ဝိဗောဓော၊

နိဒ္ဒါ၊ ဝေဂါ၊ သဗိလံ၊ မရဏ၊

စပလတာ [သစပလာ (က.)]၊ ဗျာဓိ၊ တေတ္တိံသ မေတေ.

သတ္တိကဘာဝအဓိပ္ပါယ

၃၄၅. သမာဟိတ’တ္တ’ပ္ပဘဝံ၊ သတ္တံ [သတွံ (က.)] တေနော’ပပါဒိတာ၊

သတ္တိကာ [သာတွိကာ (က.)] ပျ’နုဘာဝတ္တေ၊ ဝိသုံ ဘာဝါ ဘဝန္တိ တေ.

သတ္တိကဘာဝပ္ပဘေဒ

၃၄၆. ထမ္ဘော၊ ပဠယ၊ ရောမဉ္စာ၊ တထာ သေဒ၊ ဿု၊ ဝေပထု၊

ဝေဝဏ္ဏိယံ၊ ဝိသရတာ၊ ဘာဝါ’ဋ္ဌေ’တေ တု သတ္တိကာ.

၃၄၇. ယဒါ ရတျာဒယော ဘာဝါ၊ ဌိတိသီလာ န ဟောန္တိ စေ၊

တဒါ သဗ္ဗေပိ တေ ဘာဝါ၊ ဘဝန္တိ ဗျဘိစာရိနော.

၃၄၈. ဝိဘာဝေါ ကာရဏံ တေသု၊ ပ္ပတ္တိယု’ဒ္ဒီပနေ တထာ၊

ယော သိယာ ဗောဓကော တေသံ၊

အနုဘာဝေါ’ယ မီရိတော.

၃၄၉. နေကဟေတုံ မနောဝုတ္တိ၊ ဝိသေသဉ္စ ဝိဘာဝိတုံ၊

ဘာဝံ ဝိဘာဝါ’နုဘာဝါ၊ ဝဏ္ဏိယာ ဗန္ဓနေ ဖုဋံ.

၃၅၀. သဝိဘာဝါ’နုဘာဝေဟိ၊ ဘာဝါ တေ တေ ယထာရဟံ၊

ဝဏ္ဏနီယာ ယထော’စိတျံ၊ လောကရူပါ’နုဂါမိနာ.

၃၅၁. စိတ္တ ဝုတ္တိ ဝိသေသတ္တာ၊ မာနသာ သတ္တိကာ’င်္ဂတော၊

ဗဟိ နိဿဋ သေဒါဒိ၊ အနုဘာဝေဟိ ဝဏ္ဏိယာ.

ရသအဓိပ္ပါယ

၃၅၂. သာမာဇိကာန မာနန္ဒော၊ ယော ဗန္ဓတ္ထာ’နုသာရိနံ၊

ရသီယတီတိ တညူဟိ၊ ရသော နာမာ’ယ’မီရိတော.

ရသပ္ပဘေဒ

၃၅၃. သဝိဘာဝါ၊ နုဘာဝေဟိ၊ သတ္တိက၊ဗျဘိစာရိဘိ၊

အဿာဒိယတ္တ မာနီယ၊ မာနော ဌာယေ’ဝ သော ရသော.

၃၅၄. သိင်္ဂါရ၊ဟဿ၊ကရုဏာ၊ ရုဒ္ဒ၊ဝီရ၊ဘယာနကာ၊

ဗီဘစ္ဆ၊ဗ္ဘုတ၊သန္တာ၊ စ၊ ရသာ ဌာယီန နုက္ကမာ.

၃၅၅. ဒုက္ခရူပေ’ယ’ မာနန္ဒော၊ ကထံ နု ကရုဏာဒိကေ?

သိယာ သောတူနမာနန္ဒော၊

သောကော ဝေဿန္တရဿ ဟိ.

ဌာယီဘာဝ နိဒ္ဒေသ ရတိဋ္ဌာယီဘာဝ

၃၅၆. ရမ္မ၊ဒေသ၊ ကလာ၊ ကာလ၊ ဝေသာဒိ၊ ပဋိသေဝနာ၊

ယုဝါန’ညောညရတ္တာနံ၊ ပမောဒေါ ရတိ ရုစ္စတေ.

၃၅၇. ယုတျာ ဘာဝါနုဘာဝါ တေ၊ နိဗန္ဓာ ပေါသယန္တိ နံ၊

သောပျ’ယောဂ၊ ဝိပ္ပယောဂ၊ သမ္ဘောဂါနံ ဝသာ တိဓာ.

ဟဿဋ္ဌာယီဘာဝ

၃၅၈. ဝိကာရာ’ကတိအာဒီဟိ၊ အတ္တနော ထ ပရဿ ဝါ၊

ဟဿော နိဒ္ဒါ၊ သမာ’လသျ၊ မုစ္ဆာဒိ၊ဗျဘိစာရိဘိ၊

ပရိပေါသေ သိယာ ဟဿော၊ ဘိယျော’တ္ထိပဘုတီနံ သော.

ဟဿပ္ပဘေဒ

၃၅၉. သိတ မိဟ ဝိကာသိ နယနံ၊

ကိဉ္စာ’လက္ခိယ ဒိဇံ တု တံ ဟသိတံ၊

မဓုရဿရံ ဝိဟသိတံ၊ အံသသိရောကမ္ပမုပဟသိတံ.

၃၆၀. အပဟသိတံ သဇလ’က္ခိ၊ ဝိက္ခိတ္တင်္ဂံ ဘဝတျ’တိဟသိတံ၊

ဒွေ ဒွေ ကထိတာ စေ’သံ၊

ဇေဋ္ဌေ [မဇ္ဈေ’ဓမေတိ ဧတ္ထ မဇ္ဈေ အဓမေတိ ပဒစ္ဆေဒေါ] မဇ္ဈေ’ဓမေ စ ကမသော.

ကရုဏဋ္ဌာယီဘာဝ

၃၆၁. သောကရူပေါ တု ကရုဏော၊ နိဋ္ဌပ္ပတ္တိ’ဋ္ဌ နာသတော၊

တတ္ထာ’နုဘာဝါ ရုဒိတ၊ ပဠယ၊တ္ထမ္ဘကာဒယော၊

ဝိသာဒါ၊လသျ၊မရဏ၊ စိန္တာ’ဒီ ဗျဘိစာရိနော.

ရုဒ္ဒဋ္ဌာယီဘာဝ

၃၆၂. ကောဓော မစ္ဆရိယာ’ဒီဟိ၊ ပေါသေ တာသ၊ မဒါဒိဘိ၊

နယနာ’ရုဏတာဒီဟိ၊ ရုဒ္ဒေါ နာမ ရသော ဘဝေ.

ဝီရဋ္ဌာယီဘာဝ

၃၆၃. ပတာပ၊ ဝိက္ကမာ’ဒီဟု၊ ဿာဟော ‘ဝီရော’တိ သညိတော၊

ရဏ၊ဒါန၊ဒယာယောဂါ၊ ဝီရော’ယံ တိဝိဓော ဘဝေ၊

တေဝါ’နုဘာဝါ ဓိတိ၊မ၊ တျာ’ဒယော ဗျဘိစာရိနော.

ဘယဋ္ဌာယီဘာဝ

၃၆၄. ဝိကာရာ၊သနိ၊သတ္တာ’ဒိ၊ ဘယု’က္ကံသော ဘယာနကော၊

သေဒါ’ဒယော နုဘာဝေ’တ္ထ၊ တာသာ’ဒီ ဗျဘိစာရိနော.

ဇိဂုစ္ဆာဋ္ဌာယီဘာဝ

၃၆၅. ဇိဂုစ္ဆာ ရုဓိရာ’ဒီဟိ၊ ပူတျာ’ဒီဟိ ဝိရာဂတော၊

ဗီဘစ္ဆော ခေါဘနု’ဗ္ဗေဂီ၊ ကမေန ကရုဏာယုတော၊

နာသာ ဝိကူဏနာဒီဟိ၊ သင်္ကာဒီဟိ’ဿ ပေါသနံ.

ဝိမှယဋ္ဌာယီဘာဝ

၃၆၆. အတိ လောက ပဒတ္ထေဟိ၊ ဝိမှယော’ယံ ရသော’ဗ္ဘုတော၊

တဿာ’နုဘာဝါ သေဒ၊ဿု၊ သာဓုဝါဒါ’ဒယော သိယုံ၊

တာသာ၊ဝေဂ၊ဓိတိ၊ပ္ပညာ၊ ဟောန္တေ’တ္ထ ဗျဘိစာရိနော.

သမဋ္ဌာယီဘာဝ

၃၆၇. ဌာယီဘာဝေါ သမော မေတ္တာ၊ ဒယာ၊မောဒါ’ဒိ သမ္ဘဝေါ၊

ဘာဝါဒီဟိ တ’ဒုက္ကံသော၊ သန္တော သန္တ နိသေဝိတော.

ဣတိ သင်္ဃရက္ခိတ မဟာသာမိဝိရစိတေ သုဗောဓာလင်္ကာရေ

ရသဘာဝါ’ဝဗောဓော နာမ

ပဉ္စမော ပရိစ္ဆေဒေါ.

သုဗောဓာလင်္ကာရော သမတ္တော.