ဘိက္ခုနီ ဝိဘင်္ဂပါစိတ္တိယ

၁. လသုဏဝဂ္ဂ၊ ၁. ပဌမ သိက္ခာပုစ္ဆာ

ပုစ္ဆာ – ယံ တေန အာဝုသော ဘဂဝတာ။ပေ။ သမ္မာသမ္ဗုဒ္ဓေန လက္ခဏံ ခါဒန္တိယာ ပါစိတ္တိယံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ ထုလ္လနန္ဒံ ဘိက္ခုနိံ အာရဗ္ဘ ပညတ္တံ၊ ထုလ္လနန္ဒာ ဘန္တေ ဘိက္ခုနီ န မတ္တံ ဇာနိတွာ ဗဟုံ လသုဏံ ဟရာပေသိ၊ တသ္မိံ ဘန္တေ ဝတ္ထုသ္မိံ ပညတ္တံ.

၁. လသုဏဝဂ္ဂ၊ ၆. ဆဋ္ဌ သိက္ခာပုစ္ဆာ

ပုစ္ဆာ – ဘိက္ခုဿ အာဝုသော ဘုဉ္ဇမာနဿ အန္နေန ဝါ ပါနေန ဝါ ဝိဓူပနေန ဝါ ဥပတိဋ္ဌန္တိယာ ဘိက္ခုနိယာ ပါစိတ္တိယံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ အညတရံ ဘိက္ခုနိံ အာရဗ္ဘ ပညတ္တံ၊ အညတရာ ဘန္တေ ဘိက္ခုနီ ဘိက္ခုဿ ဘုဉ္ဇမာနဿ ပါနီယေန ဝိဓူပနေန စ ဥပတိဋ္ဌတိ၊ တသ္မိံ ဘန္တေ ဝတ္ထုသ္မိံ ပညတ္တံ.

၁. လသုဏဝဂ္ဂ၊ ၈. အဋ္ဌမ သိက္ခာပုစ္ဆာ

ပုစ္ဆာ – ဥစ္စာရံဝါ အာဝုသော ပဿာဝံဝါ သင်္ကာရံဝါ ဝိဃာသံဝါ ထိရောကုဋ္ဋေ ဆဍ္ဍေန္တိယာ ပါစိတ္တိယံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ အညတရံ ဘိက္ခုနိံ အာရဗ္ဘ ပညတ္တံ၊ အညတရာ ဘန္တေ ဘိက္ခုနီ ဥစ္စာရံ တိရောကုဋ္ဋေ ဆဍ္ဍေသိ၊ တသ္မိံ ဘန္တေ ဝတ္ထုသ္မိံ ပညတ္တံ.

၁. လသုဏဝဂ္ဂ၊ ၁၀. ဒသမ သိက္ခာပုစ္ဆာ

ပုစ္ဆာ – နစ္စံ ဝါ အာဝုသော ဂီတံ ဝါ ဝါဒိတံ ဝါ ဒဿနာယ ဂစ္ဆန္တိယာ ပါစိတ္တိယံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ ဆဗ္ဗဂ္ဂိယာ ဘိက္ခုနိယော အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခုနိယော နစ္စမ္ပိ ဂီတမ္ပိ ဝါဒိတမ္ပိ ဒဿနာယ အဂမံသု၊ တသ္မိံ ဘန္တေ ဝတ္ထုသ္မိံ ပညတ္တံ.

ပုစ္ဆာ – ဘိက္ခုပန အာဝုသော နစ္စံ ဝါ ဂီတံ ဝါ ဝါဒိတံ ဝါ ဒဿနာယ ဂစ္ဆန္တော ကံ နာမ အာပတ္တိံ အာပဇ္ဇတိ.

ဝိဿဇ္ဇနာ – ဒုက္ကဋံ ဘန္တေ အာပတ္တိံ အာပဇ္ဇတိ.

၁. ပဌမ သိက္ခာပုစ္ဆာ

ပုစ္ဆာ – ရတ္တန္ဓကာရေ အာဝုသော အပဒီပေ ပုရိသေန သဒ္ဓိံ ဧကေနေကာယ သန္တိဋ္ဌန္တိယာ ပါစိတ္တိယံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ အညတရံ ဘိက္ခုနိံ အာရဗ္ဘ ပညတ္တံ၊ အညတရာ ဘန္တေ ဘိက္ခုနီ ရတ္တန္ဓကာရေ အပဒီပေ ပုရိသေန သဒ္ဓိံ ဧကေနေကာ သန္တိဋ္ဌိ၊ တသ္မိံ ဘန္တေ ဝတ္ထုသ္မိံ ပညတ္တံ.

၂. အန္ဓကာရဝဂ္ဂ၊ ၂-၃. ဒုတိယ၊ တတိယ သိက္ခာပုစ္ဆာ

ပုစ္ဆာ – ပဋိစ္ဆန္နေ ဝါ အာဝုသော ဩကာသေ အဇ္ဈောကာသေ ဝါ ပုရိသေန သဒ္ဓိံ ဧကေနေကာယ သန္တိဋ္ဌန္တိယာ ပါစိတ္တိယံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ အညတရံ ဘိက္ခုနိံ အာရဗ္ဘ ပညတ္တံ၊ အညတရာ ဘန္တေ ဘိက္ခုနီ ပဋိစ္ဆန္နေ ဩကာသေ အဇ္ဈောကာသေ စ ပုရိသေန သဒ္ဓိံ ဧကေနေကာ သန္တိဋ္ဌိ၊ တသ္မိံ ဘန္တေ ဝတ္ထုသ္မိံ ပညတ္တံ.

၂. အန္ဓကာရဝဂ္ဂ၊ ၈. အဋ္ဌမ သိက္ခာပုစ္ဆာ

ပုစ္ဆာ – ဒုဂ္ဂဟိတေန အာဝုသော ဒူပဓာရိတေန ပရံ ဥဇ္ဈာပေန္တိယာ ပါစိတ္တိယံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ အညတရံ ဘိက္ခုနိံ အာရဗ္ဘ ပညတ္တံ၊ အညတရာ ဘန္တေ ဘိက္ခုနီ ဒုဂ္ဂဟိတေန ဒူပဓာရိတေန ပရံ ဥဇ္ဈာပေသိ၊ တသ္မိံ ဘန္တေ ဝတ္ထုသ္မိံ ပညတ္တံ.

၂. အန္ဓကာရဝဂ္ဂ၊ ၉. နဝမ သိက္ခာပုစ္ဆာ

ပုစ္ဆာ – အတ္တာနံ ဝါ အာဝုသော ပရံ ဝါ နိရယေန ဝါ ဗြဟ္မစရိယေန ဝါ အဘိသပန္တိယာ ပါစိတ္တိယံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ စဏ္ဍကာဠိံ ဘိက္ခုနိံ အာရဗ္ဘ ပညတ္တံ၊ စဏ္ဍကာဠီ ဘန္တေ ဘိက္ခုနီ အတ္တာနမ္ပိ ပရမ္ပိ နိရယေနပိ ဗြဟ္မစရိယေနပိ အဘိသပိ၊ တသ္မိံ ဘန္တေ ဝတ္ထုသ္မိံ ပညတ္တံ.

၂. အန္ဓကာရဝဂ္ဂ၊ ၁၀. ဒသမ သိက္ခာပုစ္ဆာ

ပုစ္ဆာ – အတ္တာနံ အာဝုသော ဝဓိတွာ ဝဓိတွာ ရောဒန္တိယာ ပါစိတ္တိယံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ စဏ္ဍကာဠိံ ဘိက္ခုနိံ အာရဗ္ဘ ပညတ္တံ၊ စဏ္ဍကာဠီ ဘန္တေ ဘိက္ခုနီ ဘိက္ခုနီဟိ သဒ္ဓိံ ဘဏ္ဍိတွာ အတ္တာနံ ဝဓိတွာ ဝဓိတွာ ရောဒိ၊ တသ္မိံ ဘန္တေ ဝတ္ထုသ္မိံ ပညတ္တံ.

၃. နဂ္ဂဝဂ္ဂ၊ ၃. တတိယ သိက္ခာပုစ္ဆာ

ပုစ္ဆာ – ဘိက္ခုနိယာ အာဝုသော စီဝရံ ဝိသိဗ္ဗေတွာ ဝါ ဝိသိဗ္ဗာပေတွာ ဝါ နေဝ သိဗ္ဗေန္တိယာ န သိဗ္ဗာပနာယ ဥဿုက္ကံ ကရောန္တိယာ ပါစိတ္တိယံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ ထုလ္လနန္ဒံ ဘိက္ခုနိံ အာရဗ္ဘ ပညတ္တံ၊ ထုလ္လနန္ဒာ ဘန္တေ ဘိက္ခုနီ ဘိက္ခုနိယာ စီဝရံ ဝိသိဗ္ဗာပေတွာ နေဝ သိဗ္ဗေသိ န သိဗ္ဗာပနာယ ဥဿုက္ကံ အကာသိ၊ တသ္မိံ ဘန္တေ ဝတ္ထုသ္မိံ ပညတ္တံ.

၃. နဂ္ဂဝဂ္ဂ၊ ၈. အဋ္ဌမ သိက္ခာပုစ္ဆာ

ပုစ္ဆာ – အဂါရိကဿ ဝါ အာဝုသော ပရိဗ္ဗာဇကဿ ဝါ ပရိဗ္ဗာဇိကာယ ဝါ သမဏစီဝရံ ဒေန္တိယာ ပါစိတ္တိယံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ ထုလ္လနန္ဒံ ဘိက္ခုနိံ အာရဗ္ဘ ပညတ္တံ၊ ထုလ္လနန္ဒာ ဘန္တေ ဘိက္ခုနီ အဂါရိကဿ သမဏစီဝရံ အဒါသိ၊ တသ္မိံ ဘန္တေ ဝတ္ထုသ္မိံ ပညတ္တံ.

၄. တုဝဋ္ဋဝဂ္ဂ၊ ၁-၂. ပဌမ၊ ဒုတိယ သိက္ခာပုစ္ဆာ

ပုစ္ဆာ – ဒွိန္နံ အာဝုသော ဘိက္ခုနီနံ ဧကမဉ္စေ ဝါ ဧကတ္ထရဏပါဝုရဏေ ဝါ တုဝဋ္ဋေန္တီနံ ပါစိတ္တိယံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလာ ဘိက္ခုနိယော အာရဗ္ဘ ပညတ္တံ၊ သမ္ဗဟုလာ ဘန္တေ ဘိက္ခုနိယော ဒွေ ဧကမဉ္စေ တုဝဋ္ဋေသုံ၊ ဧကတ္ထရဏပါဝုရဏေ တုဝဋ္ဋေသုံ၊ တသ္မိံ ဘန္တေ ဝတ္ထုသ္မိံ ပညတ္တံ.

၄. တုဝဋ္ဋဝဂ္ဂ၊ ၃. တတိယ သိက္ခာပုစ္ဆာ

ပုစ္ဆာ – ဘိက္ခုနိယာ အာဝုသော သဉ္စိစ္စ အဖာသုံ ကရောန္တိယာ ပါစိတ္တိယံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ ထုလ္လနန္ဒံ ဘိက္ခုနိံ အာရဗ္ဘ ပညတ္တံ၊ ထုလ္လနန္ဒာ ဘန္တေ ဘိက္ခုနီ ဘိက္ခုနိယာ သဉ္စိစ္စ အဖာသုံ အကာသိ၊ တသ္မိံ ဘန္တေ ဝတ္ထုသ္မိံ ပညတ္တံ.

၄. တုဝဋ္ဋဝဂ္ဂ၊ ၄. စတုတ္ထ သိက္ခာပုစ္ဆာ

ပုစ္ဆာ – ဒုက္ခိတံ အာဝုသော သဟဇီဝိနိံ နေဝ ဥပဋ္ဌေန္တိယာ န ဥပဋ္ဌာပနာယ ဥဿုက္ကံ ကရောန္တိယာ ပါစိတ္တိယံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ ထုလ္လနန္ဒံယေဝ ဘိက္ခုနိံ အာရဗ္ဘ ပညတ္တံ၊ ထုလ္လနန္ဒာ ဘန္တေ ဘိက္ခုနီ ဒုက္ခိတံ သဟဇီဝိနိံ နေဝဥပဋ္ဌေသိ န ဥပဋ္ဌာပနာယ ဥဿုက္ကံ အကာသိ၊ တသ္မိံ ဘန္တေ ဝတ္ထုသ္မိံ ပညတ္တံ.

၄. တုဝဋ္ဋဝဂ္ဂ၊ ၅. ပဉ္စမ သိက္ခာပုစ္ဆာ

ပုစ္ဆာ – ဘိက္ခုနိယာ အာဝုသော ဥပဿယံ ဒတွာ ကုပိတာယ အနတ္တမနာယ နိက္ကဍ္ဎန္တိယာ ပါစိတ္တိယံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ ထုလ္လနန္ဒံယေဝ ဘိက္ခုနိံ အာရဗ္ဘ ပညတ္တံ၊ ထုလ္လနန္ဒာ ဘန္တေ ဘိက္ခုနီ ဘိက္ခုနိယာ ဥပဿယံ ဒတွာ ကုပိတာ အနတ္တမနာ နိက္ကဍ္ဎိ၊ တသ္မိံ ဘန္တေ ဝတ္ထုသ္မိံ ပညတ္တံ.

၄. တုဝဋ္ဋဝဂ္ဂ၊ ၆. ဆဋ္ဌ သိက္ခာပုစ္ဆာ

ပုစ္ဆာ – သံသဋ္ဌာယ အာဝုသော ဘိက္ခုနိယာ ယာဝတတိယံ သမနုဘာသနာယ န ပဋိနိဿဇ္ဇန္တိယာ ပါစိတ္တိယံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ စဏ္ဍကာဠိံ ဘိက္ခုနိံ အာရဗ္ဘ ပညတ္တံ၊ စဏ္ဍကာဠီ ဘန္တေ ဘိက္ခုနီ သံသဋ္ဌာ ဝိဟရိ၊ တသ္မိံ ဘန္တေ ဝတ္ထုသ္မိံ ပညတ္တံ.

၄. တုဝဋ္ဋဝဂ္ဂ၊ ၇-၈. သတ္တမ အဋ္ဌမ သိက္ခာပုစ္ဆာ

ပုစ္ဆာ – အန္တောရဋ္ဌေ ဝါ အာဝုသော တိရောရဋ္ဌေ ဝါ သာသင်္ကသမ္မတေ သပ္ပဋိဘယေ အသတ္ထိကာယ စာရိကံ စရန္တိယာ ပါစိတ္တိယံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလာ ဘိက္ခုနိယော အာရဗ္ဘ ပညတ္တံ၊ သမ္ဗဟုလာ ဘန္တေ ဘိက္ခုနိယော အန္တောရဋ္ဌေပိ တိရောရဋ္ဌေပိ သာသင်္ကသမ္မတေ သပ္ပဋိဘယေ အသတ္ထိကာယော စာရိကံ စရိံသု၊ တသ္မိံ ဘန္တေ ဝတ္ထုသ္မိံ ပညတ္တံ.

၄. တုဝဋ္ဋဝဂ္ဂ၊ ၉. နဝမ သိက္ခာပုစ္ဆာ

ပုစ္ဆာ – အန္တောဝဿံ အာဝုသော စာရိကံ စရန္တိယာ ပါစိတ္တိယံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – ရာဇဂဟေ ဘန္တေ သမ္ဗဟုလာ ဘိက္ခုနိယော အာရဗ္ဘ ပညတ္တံ၊ သမ္ဗဟုလာ ဘန္တေ ဘိက္ခုနိယော အန္တောဝဿံ စာရိကံ ပက္ကမိံသု၊ တသ္မိံ ဘန္တေ ဝတ္ထုသ္မိံ ပညတ္တံ.

၄. တုဝဋ္ဋဝဂ္ဂ၊ ၁၀. ဒသမ သိက္ခာပုစ္ဆာ

ပုစ္ဆာ – ဝဿံ ဝုဋ္ဌာယ အာဝုသော ဘိက္ခုနိယာ စာရိကံ န ပက္ကမန္တိယာ ပါစိတ္တိယံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – ရာဇဂဟေ ဘန္တေ သမ္ဗဟုလာ ဘိက္ခုနိယော အာရဗ္ဘံ ပညတ္တံ၊ သမ္ဗဟုလာ ဘန္တေ ဘိက္ခုနိယော ဝဿံဝုဋ္ဌာ စာရိကံ န ပက္ကမိံသု၊ တသ္မိံ ဘန္တေ ဝတ္ထုသ္မိံ ပညတ္တံ.

ပုစ္ဆာ – ကဿ အာဝုသော ဝစနံ.

ဝိဿဇ္ဇနာ – ဘဂဝတော ဘန္တေ ဝစနံ အရဟတော သမ္မာသမ္ဗုဒ္ဓဿ.

ပုစ္ဆာ – ကေနာဝုသော အာဘတံ.

ဝိဿဇ္ဇနာ – ပရမ္ပရာယ ဘန္တေ ဝစနံ.

သုဏာတု မေ ဘန္တေ သံဃော။ပေ။ သံဂါယေယျာမ.

၅. စိတ္တာဂါရဝဂ္ဂ၊ ၁. ပဌမ သိက္ခာပုစ္ဆာ

ပုစ္ဆာ – ယံ တေန အာဝုသော ဘဂဝတာ။ပေ။ သမ္မာသမ္ဗုဒ္ဓေန ရာဇာဂါရံ ဝါ စိတ္တာဂါရံ ဝါ အာရာမံ ဝါ ဥယျာနံ ဝါ ပေါက္ခရဏိံ ဝါ ဒဿနာယ ဂစ္ဆန္တိယာ ပါစိတ္တိယံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ ဆဗ္ဗဂ္ဂိယာ ဘိက္ခုနိယော အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခုနိယော ရာဇာဂါရမ္ပိ စိတ္တာဂါရမ္ပိ ဒဿနာယ ဂစ္ဆိံသု၊ တသ္မိံ ဘန္တေ ဝတ္ထုသ္မိံ ပညတ္တံ.

၅. စိတ္တာဂါရဝဂ္ဂ၊ ၄. စတုတ္ထ သိက္ခာပုစ္ဆာ

ပုစ္ဆာ – ဂိဟိဝေယျာဝစ္စံ အာဝုသော ကရောန္တိယာ ပါစိတ္တိယံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလာ ဘိက္ခုနိယော အာရဗ္ဘ ပညတ္တံ၊ သမ္ဗဟုလာ ဘန္တေ ဘိက္ခုနိယောဂိဟိ ဝေယျာဝစ္စံ အကံသု၊ တသ္မိံ ဘန္တေ ဝတ္ထုသ္မိံ ပညတ္တံ.

၅. စိတ္တာဂါရဝဂ္ဂ၊ ၆. ဆဋ္ဌ သိက္ခာပုစ္ဆာ

ပုစ္ဆာ – အဂါရိကဿ ဝါ အာဝုသော ပရိဗ္ဗာဇကဿ ဝါ ပရိဗ္ဗာဇိကာယ ဝါ သဟတ္ထာ ခါဒနီယံ ဘောဇနီယံ ဒေန္တိယာ ပါစိတ္တိယံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ ထုလ္လနန္ဒံ ဘိက္ခုနိံ အာရဗ္ဘ ပညတ္တံ၊ ထုလ္လနန္ဒာ ဘန္တေ ဘိက္ခုနီ အဂါရိကဿ သဟတ္ထာ ခါဒနီယမ္ပိ ဘောဇနီယမ္ပိ အဒါသိ၊ တသ္မိံ ဘန္တေ ဝတ္ထုသ္မိံ ပညတ္တံ.

၅. စိတ္တာဂါရဝဂ္ဂ၊ ၉-၁၀. နဝမ၊ ဒသမ သိက္ခာပုစ္ဆာ

ပုစ္ဆာ – တိရစ္ဆာနဝိဇ္ဇံ အာဝုသော ပရိယာပုဏန္တိယာ စ ဝါစေန္တိယာ စ ပါစိတ္တိယံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ ဆဗ္ဗဂ္ဂိယာ ဘိက္ခုနိယော အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခုနိယော တိရစ္ဆာနဝိဇ္ဇံ ပရိယာပုဏိံသုစေဝ ဝါစေသုဉ္စ၊ တသ္မိံ ဘန္တေ ဝတ္ထုသ္မိံ ပညတ္တံ.

ပုစ္ဆာ – ဘိက္ခု ပန အာဝုသော တာဒိသံ တိရစ္ဆာနဝိဇ္ဇံ ပရိယာပုဏန္တော စ ဝါစေန္တော စ ကိံ နာမ အာပတ္တိံ အာပဇ္ဇတိ.

ဝိဿဇ္ဇနာ – ဒုက္ကဋံ ဘန္တေ အာပတ္တိံ အာပဇ္ဇတိ.

၆. အာရာမဝဂ္ဂ၊ ၁. ပဌမ သိက္ခာပုစ္ဆာ

ပုစ္ဆာ – ဇာနံ အာဝုသော သဘိက္ခုကံ အာရာမံ အနာပုစ္ဆာ ပဝိသန္တိယာ ပါစိတ္တိယံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလာ ဘိက္ခုနိယော အာရဗ္ဘ ပညတ္တံ၊ သမ္ဗဟုလာ ဘန္တေ ဘိက္ခုနိယော အာရာမံ အနာပုစ္ဆာ ပဝိသိံသု၊ တသ္မိံ ဘန္တေ ဝတ္ထုသ္မိံ ပညတ္တံ.

၆. အာရာမဝဂ္ဂ၊ ၂. ဒုတိယ သိက္ခာပုစ္ဆာ

ပုစ္ဆာ – ဘိက္ခုံ အာဝုသော အက္ကောသန္တိယာ ပါစိတ္တိယံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – ဝေသာလိယံ ဘန္တေ ဆဗ္ဗဂ္ဂိယာ ဘိက္ခုနိယော အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခုနိယော အာယသ္မန္တံ ဥပါလိံ အက္ကောသိံသု၊ တသ္မိံ ဘန္တေ ဝတ္ထုသ္မိံ ပညတ္တံ.

၆. အာရာမဝဂ္ဂ၊ ၃. တတိယ သိက္ခာပုစ္ဆာ

ပုစ္ဆာ – စဏ္ဍိကတာယ အာဝုသော ဂဏံ ပရိဘာသန္တိယာ ပါစိတ္တိယံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ ထုလ္လနန္ဒံ ဘိက္ခုနိံ အာရဗ္ဘ ပညတ္တံ၊ ထုလ္လနန္ဒာ ဘန္တေ ဘိက္ခုနီ စဏ္ဍိကတာယ ဂဏံ ပရိဘာသိ၊ တသ္မိံ ဘန္တေ ဝတ္ထုသ္မိံ ပညတ္တံ.

၆. အာရာမဝဂ္ဂ၊ ၅. ပဉ္စမ သိက္ခာပုစ္ဆာ

ပုစ္ဆာ – ကုလံ အာဝုသော မစ္ဆရာယန္တိယာ ပါစိတ္တိယံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ အညတရံ ဘိက္ခုနိံ အာရဗ္ဘ ပညတ္တံ၊ အညတရာ ဘန္တေ ဘိက္ခုနီ ကုလံ မစ္ဆရာယိ၊ တသ္မိံ ဘန္တေ ဝတ္ထုသ္မိံ ပညတ္တံ.

၆. အာရာမဝဂ္ဂ၊ ၆. ဆဋ္ဌ သိက္ခာပုစ္ဆာ

ပုစ္ဆာ – အဘိက္ခုကေ အာဝုသော အာဝါသေ ဝဿံ ဝသန္တိယာ ပါစိတ္တိယံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလာ ဘိက္ခုနိယော အာရဗ္ဘ ပညတ္တံ၊ သမ္ဗဟုလာ ဘန္တေ ဘိက္ခုနိယော အဘိက္ခုကေ အာဝါသေ ဝဿံ ဝသိံသု၊ တသ္မိံ ဘန္တေ ဝတ္ထုသ္မိံ ပညတ္တံ.

၆. အာရာမဝဂ္ဂ၊ ၇. သတ္တမ သိက္ခာပုစ္ဆာ

ပုစ္ဆာ – ဝဿံ ဝုဋ္ဌာယ အာဝုသော ဘိက္ခုနိယာ ဥဘတောသံဃေ တီဟိ ဌာနေဟိ န ပဝါရေန္တိယာ ပါစိတ္တိယံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလာ ဘိက္ခုနိယော အာရဗ္ဘ ပညတ္တံ၊ သမ္ဗဟုလာ ဘန္တေ ဘိက္ခုနိယော ဝဿံ ဝုဋ္ဌာ ဘိက္ခုသံဃံ န ပဝါရေသုံ၊ တသ္မိံ ဘန္တေ ဝတ္ထုသ္မိံ ပညတ္တံ.

၆. အာရာမဝဂ္ဂ၊ ၈. အဋ္ဌမ သိက္ခာပုစ္ဆာ

ပုစ္ဆာ – ဩဝါဒါယ ဝါ အာဝုသော သံဝါသာယ ဝါ နဂစ္ဆန္တိယာ ပါစိတ္တိယံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သက္ကေသု ဘန္တေ ဆဗ္ဗဂ္ဂိယာ ဘိက္ခုနိယော အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခုနိယော ဩဝါဒံ နဂစ္ဆိံသု၊ တသ္မိံ ဘန္တေ ဝတ္ထုသ္မိံ ပညတ္တံ.

၆. အာရာမဝဂ္ဂ၊ ၉. နဝမ သိက္ခာပုစ္ဆာ

ပုစ္ဆာ – ဥပေါသထမ္ပိ အာဝုသော န ပုစ္ဆန္တိယာ ဩဝါဒမ္ပိ န ယာစန္တိယာ ပါစိတ္တိယံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလာ ဘိက္ခုနိယော အာရဗ္ဘ ပညတ္တံ၊ သမ္ဗဟုလာ ဘန္တေ ဘိက္ခုနိယော ဥပေါသထံ န ပုစ္ဆိံသု၊ ဩဝါဒမ္ပိ န ယာစိံသု၊ တသ္မိံ ဘန္တေ ဝတ္ထုသ္မိံ ပညတ္တံ.

၇. ဂဗ္ဘိနီဝဂ္ဂ၊ ၁-၂. ပဌမ၊ ဒုတိယ သိက္ခာပုစ္ဆာ

ပုစ္ဆာ – ဂဗ္ဘိနိံ ဝါ အာဝုသော ပါယန္တိံ ဝါ ဝုဋ္ဌာပေန္တိယာ ပါစိတ္တိယံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလာ ဘိက္ခုနိယော အာရဗ္ဘ ပညတ္တံ၊ သမ္ဗဟုလာ ဘန္တေ ဘိက္ခုနိယော ဂဗ္ဘိနိံ ဝုဋ္ဌာပေသုံ၊ ပါယန္တိံ ဝုဋ္ဌာပေသုံ၊ တသ္မိံ ဘန္တေ ဝတ္ထုသ္မိံ ပညတ္တံ.

၇. ဂဗ္ဘိနီဝဂ္ဂ၊ ၃. တတိယ သိက္ခာပုစ္ဆာ

ပုစ္ဆာ – ဒွေ ဝဿာနိ အာဝုသော ဆသု ဓမ္မေသု အသိက္ခိတသိက္ခံ သိက္ခမာနံ ဝုဋ္ဌာပေန္တိယာ ပါစိတ္တိယံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလာ ဘိက္ခုနိယော အာရဗ္ဘ ပညတ္တံ၊ သမ္ဗဟုလာ ဘန္တေ ဘိက္ခုနိယော ဒွေ ဝဿာနိ ဆသု ဓမ္မေသု အသိက္ခိတသိက္ခံ သိက္ခမာနံ ဝုဋ္ဌာပေသုံ၊ တသ္မိံ ဘန္တေ ဝတ္ထုသ္မိံ ပညတ္တံ.

၈. ကုမာရီဘူတဝဂ္ဂ၊ ၉. နဝမ သိက္ခာပုစ္ဆာ

ပုစ္ဆာ – ပုရိသသံသဋ္ဌံ အာဝုသော ကုမာရကသံသဋ္ဌံ စဏ္ဍိံ သောကာဝါသံ သိက္ခမာနံ ဝုဋ္ဌာပေန္တိယာ ပါစိတ္တိယံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ ထုလ္လနန္ဒံ ဘိက္ခုနိံ အာရဗ္ဘ ပညတ္တံ၊ ထုလ္လနန္ဒာ ဘန္တေ ဘိက္ခုနီ ပုရိသသံသဋ္ဌံ ကုမာရကသံသဋ္ဌံ စဏ္ဍိံ သောကာဝါသံ စဏ္ဍကာဠိံ သေက္ခမာနံ ဝုဋ္ဌာပေသိ၊ တသ္မိံ ဘန္တေ ဝတ္ထုသ္မိံ ပညတ္တံ.

၈. ကုမာရီဘူတဝဂ္ဂ၊ ၁၀. ဒသမ သိက္ခာပုစ္ဆာ

ပုစ္ဆာ – မာတာပိတူဟိ ဝါ အာဝုသော သာမိကေန ဝါ အနနုညာတံ သိက္ခမာနံ ဝုဋ္ဌာပေန္တိယာ ပါစိတ္တိယံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ ထုလ္လနန္ဒံ ဘိက္ခုနိံ အာရဗ္ဘ ပညတ္တံ၊ ထုလ္လနန္ဒာ ဘန္တေ ဘိက္ခုနီ မာတာပိတူဟိပိ သာမိကေနပိ အနနုညာတံ သိက္ခမာနံ ဝုဋ္ဌာပေသိ၊ တသ္မိံ ဘန္တေ ဝတ္ထုသ္မိံ ပညတ္တံ.

၉. ဆတ္တုပါဟနဝဂ္ဂ၊ ၁-၂. ပဌမ၊ ဒုတိယ သိက္ခာပုစ္ဆာ

ပုစ္ဆာ – ဆတ္တုပါဟနံ အာဝုသော ဓာရေန္တိယာ စ ယာနေန ယာယန္တိယာ စ ပါစိတ္တိယံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ ဆဗ္ဗဂ္ဂိယာ ဘိက္ခုနိယော အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခုနိယော ဆတ္တုပါဟနံ ဓာရေသုံ၊ ယာနေန ယာယိံသု၊ တသ္မိံ ဘန္တေ ဝတ္ထုသ္မိံ ပညတ္တံ.

၉. ဆတ္တုပါဟနဝဂ္ဂ၊ ၄. စတုတ္ထ သိက္ခာပုစ္ဆာ

ပုစ္ဆာ – ဣတ္ထာလင်္ကာရံ အာဝုသော ဓာရေန္တိယာ ပါစိတ္တိယံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ ဆဗ္ဗဂ္ဂိယာ ဘိက္ခုနိယော အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခုနိယော ဣတ္ထာလင်္ကာရံ ဓာရေသုံ၊ တသ္မိံ ဘန္တေ ဝတ္ထုသ္မိံ ပညတ္တံ.

ပုစ္ဆာ – ဘိက္ခု ပန အာဝုသော ပုရိသာလင်္ကာရံ ဓာရေန္တော ကိံ နာမ အာပတ္တိံ အာပဇ္ဇေယျ.

ဝိဿဇ္ဇနာ – ဒုက္ကဋံ ဘန္တေ အာပတ္တိံ အာပဇ္ဇေယျ.

၉. ဆတ္တုပါဟနဝဂ္ဂ၊ ၅. ပဉ္စမ သိက္ခာပုစ္ဆာ

ပုစ္ဆာ – ဂန္ဓဝဏ္ဏကေန အာဝုသော နဟာယန္တိယာ ပါစိတ္တိယံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ ဆဗ္ဗဂ္ဂိယာ ဘိက္ခုနိယော အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခုနိယော ဂန္ဓဝဏ္ဏကေန နဟာယိံသု၊ တသ္မိံ ဘန္တေ ဝတ္ထုသ္မိံ ပညတ္တံ.

၉. ဆတ္တုပါဟနဝဂ္ဂ၊ ၁၁. ဧကာဒသမ သိက္ခာပုစ္ဆာ

ပုစ္ဆာ – ဘိက္ခုဿ အာဝုသော ပုရတော အနာပုစ္ဆာ အာသနေ နိသီဒန္တိယာ ပါစိတ္တိယံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလာ ဘိက္ခုနိယော အာရဗ္ဘ ပညတ္တံ၊ သမ္ဗဟုလာ ဘန္တေ ဘိက္ခုနိယော ဘိက္ခုဿ ပုရတော အနာပုစ္ဆာ အာသနေ နိသီဒိံသု၊ တသ္မိံ ဘန္တေ ဝတ္ထုသ္မိံ ပညတ္တံ.

၉. ဆတ္တုပါဟနဝဂ္ဂ၊ ၁၂. ဒွါဒသမ သိက္ခာပုစ္ဆာ

ပုစ္ဆာ – အနောကာသကတံ အာဝုသော ဘိက္ခုံ ပဉှံ ပုစ္ဆန္တိယာ ပါစိတ္တိယံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလာ ဘိက္ခုနိယော အာရဗ္ဘ ပညတ္တံ၊ သမ္ဗဟုလာ ဘန္တေ ဘိက္ခုနိယော အနောကာသကတံ ဘိက္ခုံ ပဉှံ ပုစ္ဆိံသု၊ တသ္မိံ ဘန္တေ ဝတ္ထုသ္မိံ ပညတ္တံ.

ပုစ္ဆာ – သပ္ပိံ ဝါ အာဝုသော တေလံ ဝါ မဓုံ ဝါ ဖာဏိတံ ဝါ မစ္ဆံ ဝါ မံသံ ဝါ ခီရံ ဝါ ဒဓိံ ဝါ ဝိညာပေတွာ ဘုဉ္ဇန္တိယာ ပါဋိဒေသနီယံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ ဆဗ္ဗဂ္ဂိယာ ဘိက္ခုနိယော အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခုနိယော သပ္ပိမ္ပိ တေလမ္ပိ မဓုမ္ပိ ဖာဏိတမ္ပိ မစ္ဆမ္ပိ မံသမ္ပိ ခီရမ္ပိ ဒဓိမ္ပိ ဝိညာပေတွာ ဘုဉ္ဇိံသု၊ တသ္မိံ ဘန္တေ ဝတ္ထုသ္မိံ ပညတ္တံ.

ပုစ္ဆာ – စတုန္နံ အာဝုသော ဝိပတ္တီနံ ကတမာ ဝိပတ္တိ.

ဝိဿဇ္ဇနာ – အာစာရဝိပတ္တိ ဘန္တေ.

ပုစ္ဆာ – ဆန္နံ အာဝုသော အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌာတိ.

ဝိဿဇ္ဇနာ – စတူဟိ ဘန္တေ သမုဋ္ဌာနေဟိ သမုဋ္ဌာတိ၊ သိယာ ကာယတော သမုဋ္ဌာတိ၊ နဝါစတော နစိတ္တတော၊ သိယာ ကာယတော စ ဝါစတော စ သမုဋ္ဌာတိ၊ နစိတ္တတော၊ သိယာ ကာယတော စ စိတ္တတော စ သမုဋ္ဌာတိ၊ နဝါစတော၊ သိယာ ကာယတော စ ဝါစတော စ စိတ္တတော စ သမုဋ္ဌာတိ၊ ဣမေဟိ ဘန္တေ စတူဟိ သမုဋ္ဌာနေဟိ သမုဋ္ဌာတိ.

ပုစ္ဆာ – ကာ အာဝုသော ဝိပတ္တိ.

ဝိဿဇ္ဇနာ – အသံဝရော ဘန္တေ ဝိပတ္တိ.

ပုစ္ဆာ – ကာ အာဝုသော သမ္ပတ္တိ.

ဝိဿဇ္ဇနာ – သံဝရော ဘန္တေ သမ္ပတ္တိ.

ပုစ္ဆာ – ကာ အာဝုသော ပဋိပတ္တိ.

ဝိဿဇ္ဇနာ – န ဧဝရူပံ ကရိဿာမီတိ ယာဝဇီဝံ အာပါဏကောဋိကံ သမာဒါယ သိက္ခတိ သိက္ခာပဒေသု၊ အယံ ဘန္တေ ပဋိပတ္တိ.

ပုစ္ဆာ – ကဿ အာဝုသော ဝစနံ.

ဝိဿဇ္ဇနာ – ဘဂဝတော ဘန္တေ ဝစနံ အရဟတော သမ္မာသမ္ဗုဒ္ဓဿ.

ပုစ္ဆာ – ကေနာဝုသော အာဘတံ.

ဝိဿဇ္ဇနာ – ပရမ္ပရာယ ဘန္တေ အာဘတံ.

သုဏာတု မေ ဘန္တေ သံဃော။ပေ။ သံဂါယေယျာမ.