၂. ကောသိယဝဂ္ဂ ၄. ဆဗ္ဗဿ သိက္ခာပုစ္ဆာ

ပုစ္ဆာ – ယံ တေန အာဝုသော ဘဂဝတာ။ပေ။ သမ္မာသမ္ဗုဒ္ဓေန အနုဝဿံ ကာရာပေန္တဿ နိဿဂ္ဂိယံ ပါစိတ္တိယံ ကတ္ထ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ ပညတ္တံ.

ပုစ္ဆာ – ကံ အာဝုသော အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သမ္ဗဟုလေ ဘန္တေ ဘိက္ခူ အာရဗ္ဘ ပညတ္တံ၊ သမ္ဗဟုလာ ဘန္တေ ဘိက္ခူ အနုဝဿံ သန္ထတံ ကာရာပေသုံ၊ တသ္မိံ ဘန္တေ ဝတ္ထုသ္မိံ ပညတ္တံ.

ပုစ္ဆာ – ကဿ အာဝုသော ဝစနံ.

ဝိဿဇ္ဇနာ – ဘဂဝတော ဘန္တေ ဝစနံ အရဟတော သမ္မာသမ္ဗုဒ္ဓဿ.

ပုစ္ဆာ – ကေနာဝုသော အာဘတံ.

ဝိဿဇ္ဇနာ – ပရမ္ပရာယ ဘန္တေ အာဘတံ.

ပုစ္ဆာ – အတ္ထိ နုခေါ အာဝုသော ဧတ္ထ ကောစိ ဝိရဒ္ဓဒေါသော.

ဝိဿဇ္ဇနာ – နတ္ထိ ဘန္တေ.

သံဂါယနတ္ထာယ သံဃဿ ဉာပနံ

သုဏာတု မေ ဘန္တေ သံဃော၊ အဟံ အာယသ္မန္တံ ဝိစိတ္တသာရာဘိဝံသံ တိပိဋကဓရ ဓမ္မဘဏ္ဍာဂါရိကံ ဣမေသံ နိဿဂ္ဂိယပါစိတ္တိယသိက္ခာပဒါနံ ယာဝ ဆဗ္ဗဿသိက္ခာပဒံ နိဒါနာဒီနိ ပုစ္ဆိတဗ္ဗာနိ အနေကာနိ ဌာနာနိ ပုစ္ဆိံ၊ ပုဋ္ဌောပုဋ္ဌော စ သော အာယသ္မာ ဝိစိတ္တသာရာဘိဝံသော ဝိဿဇ္ဇေသိ၊ ဣတိဟိဒံ ဘန္တေ ဣမာနိ သိက္ခာပဒါနိ နိမ္မလာနိ သုပရိသုဒ္ဓါနီ တဿေဝ ဘဂဝတော ဝစနာနိ အရဟတော သမ္မာသမ္ဗုဒ္ဓဿ၊ တသ္မာ ယထာပုရေ မဟာကဿပါဒယော မဟာထေရဝရာ ပေါရာဏသံဂီတိကာရာ ဗြဟ္မစရိယဿ စိရဋ္ဌိတိယာ ဗဟုဇနဟိတာယ ဗဟုဇနသုခါယ လောကာနုကမ္ပာယ အတ္ထာယ ဟိတာယ သုခါယ ဒေဝမနုဿာနံ ဓမ္မဝိနယံ သံဂါယိံသု စေဝ အနုသံဂါယိံသု စ၊ ဧဝမေဝ မယမ္ပိ ဒါနိ သဗ္ဗေဝ ဆဋ္ဌသံဂီတိ မဟာဓမ္မသဘာ ပရိယာပန္နာ ဆဗ္ဗဿ နိဿဂ္ဂိယ သိက္ခာပဒတော ပဋ္ဌာယ ဣမာနိ နိဿဂ္ဂိယသိက္ခာပဒါနိ ဧကတော ဂဏသဇ္ဈာယံ ကတွာ သံဟာယေယျာမ.