၂. ဘူတဂါမဝဂ္ဂ၊ ၅. ဒုတိယ သေနာသန သိက္ခာပုစ္ဆာ

ပုစ္ဆာ – သံဃိကေ အာဝုသော ဝိဟာရေ သေယျံ သန္ထရိတွာ အနုဒ္ဓရိတွာ အနာပုစ္ဆာ ပက္ကမန္တဿ ပါစိတ္တိယံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ သတ္တရသဝဂ္ဂိယေ ဘိက္ခူ အာရဗ္ဘ ပညတ္တံ၊ သတ္တရသဝဂ္ဂိယာ ဘန္တေ ဘိက္ခူ သံဃိကေ ဝိဟာရေ သေယျံ သန္ထရိတွာ အနုဒ္ဓရိတွာ အနာပုစ္ဆာ ပက္ကမိံသု၊ တသ္မိံ ဘန္တေ ဝတ္ထုသ္မိံ ပညတ္တံ.

ပုစ္ဆာ – ကဿ အာဝုသော ဝစနံ.

ဝိဿဇ္ဇနာ – ဘဂဝတာ ဘန္တေ ဝစနံ အရဟတော သမ္မာသမ္ဗုဒ္ဓဿ.

ပုစ္ဆာ – ကေနာဝုသော အာဘတံ.

ဝိဿဇ္ဇနာ – ပရမ္ပရာယ ဘန္တေ အာဘတံ.

ပုစ္ဆာ – အတ္ထိ နုခေါ အာဝုသော ဧတ္ထ ကောစိပိ ဝိရဒ္ဓဒေါသော.

ဝိဿဇ္ဇနာ – နတ္ထိ ဘန္တေ.

သံဃဿ ဉာပနံ

သုဏာတု မေ ဘန္တေ သံဃော၊ အဟံ ဘန္တေ အာယသ္မန္တံ ဝိစိတ္တသာရာဘိဝံသံ ဣမေသံ ပန္နရသန္နံ သိက္ခာပဒါနံ နိဒါနာဒီနိ ပုစ္ဆိတဗ္ဗာနိ အနေကာနိ ဌာနာနိ ပုစ္ဆိံ၊ သော စ ပုဋ္ဌော ပုဋ္ဌော ဝိဿဇ္ဇေတိ၊ ဣတိ ဟိဒံ ဘန္တေ နိမ္မလံ သုပရိသုဒ္ဓံ တဿေဝ ဘဂဝတော ဝစနံ အရဟတော သမ္မာသမ္ဗုဒ္ဓဿ၊ တသ္မာ ယထာပုရေ မဟာကဿပါဒယော မဟာထေရဝရာ ပေါရာဏသံဂီတိကာရာ ဗြဟ္မစရိယဿ စိရဋ္ဌိတိယာ ဗဟုဇနဟိတာယ ဗဟုဇနသုခါယ လောနုကမ္ပာယ အတ္ထာယ ဟိတာယ သုခါယ ဒေဝမနုဿာနံ ဓမ္မဝိနယံ သံဂါယိံသုစေဝ အနုသံဂါယိံသုစ၊ ဧဝမေဝ မယမ္ပိ ဒါနိ ဆဋ္ဌသံဂီတိမဟာဓမ္မသဘာ ပရိယာပန္နာ ယထာနုပ္ပဋ္ဌာနတော ပဋ္ဌာယ ဣမာနိ သိက္ခာပဒါနိ ဧကတော ဂဏသဇ္ဈာယံ ကတွာ သံဂါယေယျာမ.