၁. မုသာဝါဒဝဂ္ဂေါ ၅. သဟသေယျ သိက္ခာပုစ္ဆာ

ပုစ္ဆာ – အနုပသမ္ပန္နေန အာဝုသော ဥတ္တရိဒိရတ္တတိရတ္တံ သဟသေယျံ ကပ္ပေန္တဿ ပါစိတ္တိယံ ကတ္ထ ပညတ္တံ၊ ကံအာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – အာဠဝိယံ ဘန္တေ ပညတ္တံ၊ သမ္ဗဟုလေ ဘိက္ခူ အာရဗ္ဘ ပညတ္တံ၊ သမ္ဗဟုလာ ဘန္တေ ဘိက္ခူ အနုပသမ္ပန္နေန သဟသေယျံ ကပ္ပေသုံ၊ တသ္မိံ ဘန္တေ ဝတ္ထုသ္မိံ ပညတ္တံ.

ပုစ္ဆာ – ကေသံ အာဝုသော ဧတ္ထ အနုပသမ္ပန္နေန သဟသေယျံ ကပ္ပေန္တာနမ္ပိ အနာပတ္တိ ဟောတိ.

ဝိဿဇ္ဇနာ – ဧကာဒသန္နံ ဘန္တေ ပုဂ္ဂလာနံ အနုပသမ္ပန္နေန သဟသေယျံ ကပ္ပေန္တာနံ အနာပတ္တိ၊ ဒွေတိဿော ရတ္တိယော ဝသတီ၊ ဦနကဒွေ တိဿော ရတ္တိယော ဝသတိ၊ ဒွေရတ္တိယော ဝသိတွာ တတိယာယရတ္တိယာ ပုရာရုဏာ နိက္ခမိတွာ ပုန ဝသတိ၊ သဗ္ဗစ္ဆန္နေ သဗ္ဗအပရိစ္ဆန္နေ၊ သဗ္ဗပရိစ္ဆန္နေ သဗ္ဗအစ္ဆန္နေ၊ ယေဘုယျေန အစ္ဆန္နေ ယေဘုယျေန အပရိစ္ဆန္နေ၊ အနုပသမ္ပန္နေ နိပန္နေ ဘိက္ခု နိသီဒတိ၊ ဘိက္ခုနိပန္နေ အနုပသမ္ပန္နော နိသီဒတိ၊ ဥဘောဝါ နိသီဒန္တိ၊ ဥမ္မတ္တကဿ၊ အာဒိကမ္မိကဿ၊ ဣမေသံခေါ ဘန္တေ ဧကာဒသန္နံ ပုဂ္ဂလာနံ အနုပသမ္ပန္နေန သဟသေယျံ ကပ္ပေန္တာနံ အနာပတ္တိ.