၈-၉. ဒုဋ္ဌဒေါသ သံဃာဒိသေသ သိက္ခာပုစ္ဆာ

ပုစ္ဆာ – ယံ တေန အာဝုသော ဘဂဝတာ။ပေ။ သမ္မာသမ္ဗုဒ္ဓေန ဘိက္ခုံ အမူလကေန ပါရာဇိကေန ဓမ္မေန အနုဒ္ဓံသေန္တဿ စ၊ ဘိက္ခုံ အညဘာဂိယဿ အဓိကရဏဿ ကိဉ္စိဒေသံ လေသမတ္တံ ဥပါဒါယ ပါရာဇိကေန ဓမ္မေန အနုဒ္ဓံသေန္တဿ စ သံဃာဒိသေသော ကတ္ထ ပညတ္တော.

ဝိဿဇ္ဇနာ – ရာဇဂဟေ ဘန္တေ ပညတ္တော.

ပုစ္ဆာ – ကံ အာဝုသော အာရဗ္ဘ ကိသ္မိံ ဝတ္ထုသ္မိံ ပညတ္တော.

ဝိဿဇ္ဇနာ – မေတ္တိယဘူမဇကာ ဘန္တေ ဘိက္ခူ အာရဗ္ဘ ပညတ္တော၊ မေတ္တိယဘူမဇကာ ဘန္တေ ဘိက္ခူ အာယသ္မန္တံ ဒဗ္ဗံ မလ္လပုတ္တံ အမူလကေန ပါရာဇိကေန ဓမ္မေန အနုဒ္ဓံသေသုံ၊ တေယေဝ ဘန္တေ မေတ္တိယဘူမဇကာ ဘိက္ခူ အာယသ္မန္တံ ဒဗ္ဗံ မလ္လပုတ္တံ အညဘာဂိယဿ အဓိကရဏဿ ကိဉ္စိဒေသံ လေသမတ္တံ ဥပါဒါယ ပါရာဇိကေန ဓမ္မေန အနုဒ္ဓံသေသုံ၊ တသ္မိံ ဘန္တေ ဝတ္ထုသ္မိံ၊ ပညတ္တော.