၁၃. ကုလဒူသက သံဃာဒိသေသ သိက္ခာပုစ္ဆာ

ပုစ္ဆာ – ယံ တေန အာဝုသော ဘဂဝတာ။ပေ။ သမ္မာသမ္ဗုဒ္ဓေန ကုလဒူသကဿ ဘိက္ခုနော ယာဝတတိယံ သမနုဘာသနာယ အပ္ပဋိနိဿဇ္ဇန္တဿ သံဃာဒိသေသော ကတ္ထ ပညတ္တော.

ဝိဿဇ္ဇနာ – သာဝတ္ထိယံ ဘန္တေ ပညတ္တော.

ပုစ္ဆာ – ကံ အာရဗ္ဘ အာဝုသော ကိသ္မိံ ဝတ္ထုသ္မိံ ပညတ္တော.

ဝိဿဇ္ဇနာ – အဿဇိ ပုနဗ္ဗသုကေ ဘန္တေ ဘိက္ခူ အာရဗ္ဘ ပညတ္တော၊ အဿဇိပုနဗ္ဗသုကာ ဘန္တေ ဘိက္ခူ သံဃေန ပဗ္ဗာဇနီယကမ္မကတာ ဆန္ဒဂါမိတာ ဒေါသဂါမိတာ မောဟဂါမိတာ ဘယဂါမိတာ ပါပေသုံ၊ တသ္မိံ ဘန္တေ ဝတ္ထုသ္မိံ ပညတ္တော.

အနိယတ သိက္ခာပုစ္ဆာ

ပုစ္ဆာ – ယံ တေန အာဝုသော ဘဂဝတာ။ပေ။ သမ္မာသမ္ဗုဒ္ဓေန ပဌမော စ အနိယတော ဒုတိယော စ အနိယတော ကတ္ထ ပညတ္တော.

ဝိဿဇ္ဇနာ – သာဝတ္ထိယံ ဘန္တေ ပညတ္တော.

ပုစ္ဆာ – ကံ အာဝုသော အာရဗ္ဘ ကိသ္မိံ ဝတ္ထုသ္မိံ ပညတ္တော.

ဝိဿဇ္ဇနာ – အာယသ္မန္တံ ဘန္တေ ဥဒါယိံ အာရဗ္ဘ ပညတ္တော၊ အာယသ္မာ ဘန္တေ ဥဒါယီ မာတုဂါမေန သဒ္ဓိံ ဧကောဧကာယ ရဟော ပဋိစ္ဆန္နေ အာသနေ အလံကမ္မနိယေ နိသဇ္ဇံ ကပ္ပေသိ၊ တသ္မိဉ္စ ဝတ္ထုသ္မိံ၊ အာယသ္မာယေဝ ဘန္တေ ဥဒါယီ မာတုဂါမေန သဒ္ဓိံ ရဟော နိသဇ္ဇံ အကာသိ၊ တသ္မိဉ္စ ဘန္တေ ဝတ္ထုသ္မိံ ပညတ္တော.

ပုစ္ဆာ – ကဿ အာဝုသော ဝစနံ.

ဝိဿဇ္ဇနာ – ဘဂဝတော ဘန္တေ ဝစနံ အရဟတော သမ္မာသမ္ဗုဒ္ဓဿ.

ပုစ္ဆာ – ကေနာဝုသော အာဘတံ.

ဝိဿဇ္ဇနာ – ပရမ္ပရာယ ဘန္တေ အာဘတံ.

ပုစ္ဆာ – အတ္ထိ နုခေါ အာဝုသော ဧတ္ထ ကောစိပိ ဝိရဒ္ဓဒေါသော.

ဝိဿဇ္ဇနာ – နတ္ထိ ဘန္တေ.

သံဂါယနတ္ထာယ သံဃဿဉာပနံ

သုဏာတု မေ ဘန္တေ သံဃော၊ အဟံ ဘန္တေ အာယသ္မန္တံ ဝိစိတ္တသာရာဘိဝံသံ တိပိဋကဓရ ဓမ္မဘဏ္ဍာဂါရိကံ ပဌမ ဒုဋ္ဌဒေါသ သိက္ခာပဒတော ပဋ္ဌာယ ပုစ္ဆိတဗ္ဗာနိ အနေကာနိ ဌာနာနိ ပုစ္ဆိံ၊ သော စ အာယသ္မာ ပုဋ္ဌော ပုဋ္ဌော ဝိဿဇ္ဇေတိ၊ ဣတိဟိဒံ ဘန္တေ သဗ္ဗံ သိက္ခာပဒံ နိမ္မလံ သုပရိသုဒ္ဓံ တဿေဝ ဘဂဝတော ဝစနံ အရဟတော သမ္မာသမ္ဗုဒ္ဓဿ၊ တသ္မာ ယထာပုရေ မဟာကဿပါဒယော မဟာထေရဝရာ ပေါရာဏသံဂီတိကာရာ ဗြဟ္မစရိယဿ စိရဋ္ဌိတိယာ ဗဟုဇနဟိတာယ ဗဟုဇနသုခါယ လောကာနုကမ္ပာယ အတ္ထာယ ဟိတာယ သုခါယ ဒေဝမနုဿာနံ သံဂါယိံသုစေဝ အနုသံဂါယိံသုစ၊ ဧဝမေဝ မယမ္ပိ ဒါနိ သဗ္ဗေဝ ဆဋ္ဌသံဂီတိ မဟာဓမ္မသဘာပရိယာပန္နာ ဣမာနိ သိက္ခာပဒါနိ ဧကတော ဂဏသဇ္ဈာယံ ကတွာ သံဂါယေယျာမ.