၂. ဥပေါသထက္ခန္ဓက

ပုစ္ဆာ – စာတုဒ္ဒသေ စ အာဝုသော ပန္နရသေ စ ပက္ခဿ စ အဋ္ဌမိယာ သန္နိပတိတွာ ဓမ္မံ ဘာသိတုံ ဘဂဝတာ ကတ္ထ အနုညာတံ၊ ကိသ္မိံ ဝတ္ထုသ္မိံ အနုညာတံ.

ဝိဿဇ္ဇနာ – ရာဇဂဟေ ဘန္တေ သမ္ဗဟုလေ ဘိက္ခူ အာရဗ္ဘ အနုညာတာ၊ သမ္ဗဟုလာ ဘန္တေ ဘိက္ခူ စာတုဒ္ဒေသ ပန္နရသေ အဋ္ဌမိယာ စ ပက္ခဿ သန္နိပတိတွာ တုဏှီ နိသီဒိံသု၊ တသ္မိံ ဘန္တေ ဝတ္ထုသ္မိံ အနုညာတာ.

အနုဇာနာမိ ဘိက္ခဝေ စာတုဒ္ဒသေ ပန္နရသေ အဋ္ဌမိယာ စ ပက္ခဿ သန္နိပတိတုံ.

နနု နာမ သန္နိပတိတေဟိ ဓမ္မော ဘာသိတဗ္ဗော.

ပုစ္ဆာ – ကဒါ အာဝုသော ဘိက္ခူနံ ပါတိမောက္ခုဒ္ဒေသော ဘဂဝတာ အနုညာတော.

ဝိဿဇ္ဇနာ – ယဒါ ဘန္တေ ဘဂဝတော ရဟောဂတဿ ပဋိသလ္လီနဿ ဧဝံ စေတသော ပရိဝိတက္ကော ဥဒပါဒိ ‘‘ယံနူနာဟံ ယာနိ မယာ ဘိက္ခူနံ ပညတ္တာနိ သိက္ခာပဒါနိ၊ တာနိ နေသံ ပါတိမောက္ခုဒ္ဒေသံ အနုဇာနေယျံ၊ သော နေသံ ဘဝိဿတိ ဥပေါသထကမ္မ’’န္တိ တဒါ ဘန္တေ ဘဂဝတာ ဘိက္ခူနံ ပါတိမောက္ခုဒ္ဒေသော အနုညာတော.

ပုစ္ဆာ – သီမံ အာဝုသော သမ္မနိတုံ ဘဂဝတာ ကတ္ထ အနုညာတံ၊ ကိသ္မိဉ္စ ဝတ္ထုသ္မိံ အနုညာတံ.

ဝိဿဇ္ဇနာ – ရာဇဂဟေ ဘန္တေ အနုညာတံ၊ ရာဇဂဟေ ဘန္တေ ဘဂဝတိ ဝိဟရတိ ဘိက္ခူနံ ဧတဒဟောသိ ‘‘ဘဂဝတာ ပညတ္တံ ဧတ္တာဝတာ သာမဂ္ဂီ၊ ယာဝတာ ဧကာဝါသောတိ ကိတ္တာဝတာနုခေါ ဧကာဝါသော ဟောတီ’’တိ၊ တသ္မိံ ဘန္တေ ဝတ္ထုသ္မိံ အနုညာတံ.

ပုစ္ဆာ – ကတိ အာဝုသော ဥပေါသထာ ဒိဝသဝသေန စ ကာရကပုဂ္ဂလဝသေန စ ကာတဗ္ဗာကာရဝသေန စ.

ဝိဿဇ္ဇနာ – ဒိဝသဝသေန ဘန္တေ တယော ဥပေါသထာ၊ ပုဂ္ဂလဝသေန စ ဘန္တေ တယော ဥပေါသထာ၊ ကာတဗ္ဗာကာရဝသေန စ ဘန္တေ တယော ဥပေါသထာ.

ပုစ္ဆာ – ကတိ အာဝုသော ဥပေါသထကမ္မာနိ တေသု စ ကီဒိသံ ဥပေါသထကမ္မံ ဘဂဝတာ အနုညာတံ၊ ကီဒိသံ အနနုညာတံ.

ဝိဿဇ္ဇနာ – စတ္တာရိမာနိ ဘန္တေ ဥပေါသထကမ္မာနိ၊ အဓမ္မေန ဝဂ္ဂံ ဥပေါသထကမ္မံ၊ အဓမ္မေန သမဂ္ဂံ ဥပေါသထကမ္မံ၊ ဓမ္မေန ဝဂ္ဂံ ဥပေါသထကမ္မံ၊ ဓမ္မေန သမဂ္ဂံ ဥပေါသထကမ္မံ. တတြ ဘန္တေ ယဒိဒံ အဓမ္မေန ဝဂ္ဂံ ဥပေါသထကမ္မံ၊ အဓမ္မေန သမဂ္ဂံ ဥပေါသထကမ္မံ ဓမ္မေန ဝဂ္ဂံ ဥပေါသထကမ္မံ၊ ဧဝရူပံ ဘန္တေ ဥပေါသထကမ္မံ အနနုညာတံ၊ တတြ ဘန္တေ ယဒိဒံ ဓမ္မေန သမဂ္ဂံ ဥပေါသထကမ္မံ၊ ဧဝရူပံ ဘန္တေ ဥပေါသထကမ္မံ အနုညာတံ.

ပုစ္ဆာ – ဥပေါသထံ ပုစ္ဆိဿံ၊ သနိဒါနံ သနိဒ္ဒေသံ. သမုက္ကဋ္ဌပဒါနံ အာဝုသော ကတိ အာပတ္တိယော.

ဝိဿဇ္ဇနာ – ဥပေါသထံ ဝိဿဇ္ဇိဿံ၊ သနိဒါနံ သနိဒ္ဒေသံ. သမုက္ကဋ္ဌပဒါနံ ဘန္တေ တိဿော အာပတ္တိယော.