၄. ပဝါရဏာက္ခန္ဓက
ပုစ္ဆာ – ဝဿံ ဝုဋ္ဌာနံ အာဝုသော ဘိက္ခူနံ တီဟိ ဌာနေဟိ ပဝါရိတုံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.
ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ အနုညာတံ၊ သမ္ဗဟုလာ ဘန္တေ ဘိက္ခူ သန္ဒိဋ္ဌာ သမ္ဘတ္တာ အန္တောဝဿံ နေဝ အာလပိံသု န သလ္လပိံသု၊ တသ္မိံ ဘန္တေ ဝတ္ထုသ္မိံ အနုညာတံ.
အနုဇာနာမိ ဘိက္ခဝေ ဝဿံ ဝုဋ္ဌာနံ ဘိက္ခူနံ တီဟိ ဌာနေဟိ ပဝါရေတုံ၊ ဒိဋ္ဌေဝ ဝါ သုတေန ဝါ ပရိသင်္ကာယ ဝါ.
ပုစ္ဆာ – ကတိ အာဝုသော ပဝါရဏာ ဒိဝသဝသေန စ ပုဂ္ဂလဝသေန စ ကာတဗ္ဗာကာရဝသေန စ.
ဝိဿဇ္ဇနာ – ဒိဝသဝသေန ဘန္တေ တိဿော ပဝါရဏာ၊ တထာ ပုဂ္ဂလဝသေန ကာတဗ္ဗာကာရဝသေနစ.
ပုစ္ဆာ – ကတီနံ အာဝုသော သံဃေ ပဝါရေတုံ ဘဂဝတာ အနုညာတံ၊ ကတီနံ ပနာဝုသော အညမညံ ပဝါရေတုံ ဘဂဝတာ အနုညာတံ.
ဝိဿဇ္ဇနာ – ပဉ္စန္နံ ဘန္တေ ဘိက္ခူနံ သံဃေ ပဝါရေတုံ ဘဂဝတာ အနုညာတံ၊ စတုန္နံ ဝါ ဘန္တေ တိဏ္ဏံ ဝါ ဒွိန္နံ ဝါ အညမညံ ပဝါရေတုံ အနုညာတံ.
ပုစ္ဆာ – ဧကေန ပနာဝုသော ဝဿံဝုဋ္ဌေန ဘိက္ခုနာ ကထံ ပဋိပဇ္ဇိတဗ္ဗန္တိ ဘဂဝတာ အနုညာတံ.
ဝိဿဇ္ဇနာ – ဧကေန ပန ဘန္တေ ဘိက္ခုနာ ‘‘အဇ္ဇ မေ ပဝါရဏာ’’တိ အဓိဋ္ဌာတဗ္ဗန္တိ ဘဂဝတာ အနုညာတံ.
ပုစ္ဆာ – ပဝါရဏံ ပုစ္ဆိဿံ၊ သနိဒါနံ သနိဒ္ဒေသံ. သမုက္ကဋ္ဌပဒါနံ အာဝုသော ကတိ အာပတ္တိယော.
ဝိဿဇ္ဇနာ – ပဝါရဏံ ဝိဿဇ္ဇိဿံ၊ သနိဒါနံ သနိဒ္ဒေသံ. သမုက္ကဋ္ဌပဒါနံ ဘန္တေ တိဿော အာပတ္တိယော.