ဂါမဏိသံယုတ္တ

စဏ္ဍသုတ္တ

ပုစ္ဆာ – တေနာဝုသော ဘဂဝတာ။ပေ။ သမ္မာသမ္ဗုဒ္ဓေန ဂါမဏိသံယုတ္တေ ပဌမံ စဏ္ဍသုတ္တံ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ကထဉ္စ ဘာသိတံ.

ဝိဿဇ္ဇနာ – သာဝတ္ထိယံ ဘန္တေ စဏ္ဍံ ဂါမဏိံ အာရဗ္ဘ ဘာသိတံ. စဏ္ဍော ဘန္တေ ဂါမဏိ ဘဂဝန္တံ ဧတဒဝေါစ ‘‘ကော နု ခေါ ဘန္တေ ဟေတု ကော ပစ္စယော၊ ယေန မိဓေကစ္စော စဏ္ဍော စဏ္ဍောတွေဝ သင်္ခံ ဂစ္ဆတိ. ကော ပန ဘန္တေ ဟေတု ကော ပစ္စယော၊ ယေန မိဓေကစ္စော သောရတော သောရတောတွေဝ သင်္ခံ ဂစ္ဆတီ’’တိ. တသ္မိံ ဘန္တေ ဝတ္ထုသ္မိံ ‘‘ဣဓ ဂါမဏိ ဧကစ္စဿ ရာဂေါ အပ္ပဟီနော ဟောတိ၊ ရာဂဿ အပ္ပဟီနတ္တာ ပရေ ကောပေန္တိ၊ ပရေဟိ ကောပိယမာနော ကောပံ ပါတုကရောတိ၊ သော စဏ္ဍောတွေဝ သင်္ခံ ဂစ္ဆတီ’’တိ ဧဝမာဒိနာ ဘဂဝတာ ဘာသိတံ.

ခေတ္တူပမသုတ္တ

ပုစ္ဆာ – တတ္ထေဝ အာဝုသော ပေါရာဏကေဟိ ဓမ္မသံဂါဟကမဟာထေရေဟိ သတ္တမံ သံဂီတံ ခေတ္တူပမသုတ္တံ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ကထဉ္စ ဘာသိတံ.

ဝိဿဇ္ဇနာ – နာဠန္ဒာယံ ဘန္တေ ပါဝါရိကမ္ဗဝနေ အသိဗန္ဓကပုတ္တံ ဂါမဏိံ အာရဗ္ဘ ဘာသိတံ. အသိဗန္ဓကပုတ္တော ဘန္တေ ဂါမဏိ ဘဂဝန္တံ ဧတဒဝေါစ ‘‘နနု ဘန္တေ ဘဂဝါ သဗ္ဗပါဏဘူတဟိတာနုကမ္ပီ ဝိဟရတီတိ. ဧဝံ ဂါမဏိ တထာဂတော သဗ္ဗပါဏဘူတဟိတာနုကမ္ပီ ဝိဟရတီတိ. အထ ကိဉ္စရဟိ ဘန္တေ ဘဂဝါ ဧကစ္စာနံ သက္ကစ္စံ ဓမ္မံ ဒေသေတိ၊ ဧကစ္စာနံ နော တထာ သက္ကစ္စံ ဓမ္မံ ဒေသေတီ’’တိ. တသ္မိံ ဘန္တေ ဝတ္ထုသ္မိံ ‘‘တေန ဟိ ဂါမဏိ တညေဝေတ္ထ ပဋိပုစ္ဆိဿာမိ၊ ယထာ တေ ခမေယျ၊ တထာ နံ ဗျာကရေယျာသီ’’တိ ဧဝမာဒိနာ ဘဂဝတာ ဘာသိတံ.

သင်္ခဓမသုတ္တ

ပုစ္ဆာ – တတ္ထေဝ အာဝုသော ပေါရာဏကေဟိ ဓမ္မသံဂါဟက မဟာထေရေဟိ အဋ္ဌမံ သံဂီတံ သင်္ခဓမသုတ္တံ ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ကထဉ္စ ဘာသိတံ.

ဝိဿဇ္ဇနာ – နာဠန္ဒာယံယေဝ ဘန္တေ ပါဝါရိကမ္ဗဝနေ အသိဗန္ဓကပုတ္တံ ဂါမဏိံ နိဂဏ္ဌသာဝကံ အာရဗ္ဘ ဘာသိတံ. ဘဂဝါ ဘန္တေ အသိဗန္ဓကပုတ္တံ ဂါမဏိံ နိဂဏ္ဌသာဝကံ ဧတဒဝေါစ ‘‘ကထံ နု ခေါ ဂါမဏိ နိဂဏ္ဌော နာဋပုတ္တော သာဝကာနံ ဓမ္မံ ဒေသေတီ’’တိ. ဧဝံ ခေါ ဘန္တေ နိဂဏ္ဌော နာဋပုတ္တော သာဝကာနံ ဓမ္မံ ဒေသေတိ ‘‘ယော ကောစိ ပါဏံ အတိပါတေတိ၊ သဗ္ဗော သော အာပါယိကော နေရယိကော. (ပေယျာလ) ယံဗဟုလံ ယံဗဟုလံ ဝိဟရတိ၊ တေန တေန နီယတီ’’တိ. တသ္မိံ ဘန္တေ ဝတ္ထုသ္မိံ ‘‘ယံဗဟုလံ ယံဗဟုလဉ္စ ဂါမဏိ ဝိဟရတိ၊ တေန တေန နီယတိ၊ ဧဝံ သန္တေ န ကောစိ အာပါယိကော နေရယိကော ဘဝိဿတိ၊ ယထာ နိဂဏ္ဌဿ နာဋပုတ္တဿ ဝစန’’န္တိ ဧဝံ ခေါ ဘဂဝတာ သံခိတ္တေန ဘာသိတံ.

ယံ ဗဟုလဝါဒ

ပုစ္ဆာ – ကထဉ္စာဝုသော တတ္ထ ဘဂဝတာ ယံဗဟုလဝါဒေ ဒေါသော ပကာသိတော.

ဝိဿဇ္ဇနာ – တံ ကိံ မညသိ ဂါမဏိ၊ ယော သော ပုရိသော ပါဏာတိပါတီ ရတ္တိယာ ဝါ ဒိဝသဿ ဝါ သမယာသမယံ ဥပါဒါယ ကတမော ဗဟုတရော သမယော ယံ ဝါသော ပါဏမတိပါတေတိ. ယံ ဝါ သော ပါဏံ နာတိပါတေတီတိ ဧဝမာဒိနာ ဘန္တေ တတ္ထ ဘဂဝတာ အသိဗန္ဓကံ နိဂဏ္ဌနာဋပုတ္တဿ သာဝကံ ဂါမဏိံ ပုစ္ဆိတွာ ပုစ္ဆိတွာ ယံဗဟုလဝါဒေ ဒေါသော ပကာသိတော.

ပုစ္ဆာ – ကထဉ္စာဝုသော တတ္ထ ဘဂဝတာ အနေကံသ ဝိပါကကမ္မဿ ဧကံ သဝိပါကဝါဒေ ဒေါသော ပကာသိတော.

ဝိဿဇ္ဇနာ – ဣဓ ဂါမဏိ ဧကစ္စော သတ္ထာ ဧဝံဝါဒီ ဟောတိ ဧဝံဒိဋ္ဌိ ယော ကောစိ ပါဏမတိပါတေတိ၊ သဗ္ဗော သော အာပါယိကော နေရယိကောတိ ဧဝမာဒိနာ ဘန္တေ တတ္ထ ဘဂဝတာ အနေကံသ ကမ္မဝိပါကဿ ဧကံသဝိပါကဝါဒေ ဒေါသော ဝိတ္ထာရေတွာ ပကာသိတော.

ပုစ္ဆာ – ကထဉ္စာဝုသော တတ္ထ ဘဂဝတာ ယထာဓမ္မသာသနေ ဂုဏောဝိဘဇိတွာ ပကာသိတော.

ဝိဿဇ္ဇနာ – ဣဓ ပန ဂါမဏိ တထာဂတော လောကေ ဥပ္ပဇ္ဇတိ အရဟံ သမ္မာသမ္ဗုဒ္ဓေါ ဝိဇ္ဇာစရဏသမ္ပန္နော သုဂတော လောကဝိဒူ အနုတ္တရောပုရိသ ဒမ္မသာရထိ သတ္ထာဒေဝမနုဿာနံ ဗုဒ္ဓေါ ဘဂဝါ၊ သော အနေကပရိယာယေန ပါဏာတိပါတံ ဂရဟတိ ဝိဂရဟတိ. ‘‘ပါဏာတိပါတာ ဝိရမထာ’’တိ စာဟာတိ ဧဝမာဒိနာ ဘန္တေ ဘဂဝတာ တတ္ထ ယထာဓမ္မသာသနေ ဂုဏော ဝိတ္ထာရေတွာ ပကာသိတော.

ဘဒြကသုတ္တ

ပုစ္ဆာ – တတ္ထေဝ အာဝုသော ပေါရာဏကေဟိ ဓမ္မသံဂါဟကမဟာထေရေဟိ ဧကာဒသမံ သံဂီတံ ဘဒြကသုတ္တံ ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ကထဉ္စ ဘာသိတံ.

ဝိဿဇ္ဇနာ – မလ္လေသု ဘန္တေ ဥရုဝေလကပ္ပေနာမ မလ္လာနံ နိဂမေ ဘဒြကံ ဂါမဏိံ အာရဗ္ဘ ဘာသိတံ. ဘဒြကော ဘန္တေ ဂါမဏိ ဘဂဝန္တံ ဧတဒဝေါစ ‘‘သာဓု မေ ဘန္တေ ဘဂဝါ ဒုက္ခဿ သမုဒယဉ္စ အတ္ထင်္ဂမဉ္စ ဒေသေတူ’’တိ. တသ္မိံ ဘန္တေ ဝတ္ထုသ္မိံ ‘‘အဟဉ္စေ တေ ဂါမဏိ အတီတမဒ္ဓါနံ အာရဗ္ဘ ဒုက္ခဿ သမုဒယဉ္စ အတ္ထင်္ဂမဉ္စ ဒေသေယျံ ‘ဧဝံ အဟောသိ အတီတမဒ္ဓါန’န္တိ. တတြ တေ သိယာ ကင်္ခါ သိယာ ဝိမတီ’’တိ ဧဝမာဒိနာ ဘဂဝတာ ဘာသိတံ.

သာဓု မေ ဘန္တေ ဘဂဝါ ဒုက္ခဿ

သမုဒယဉ္စ အတ္ထင်္ဂမဉ္စ ဒေသေတု–

‘‘တံ ကိံ မညသိ ဂါမဏိ၊ အတ္ထိ ဥရုဝေလကပ္ပေ မနုဿာ’’ –

ရာသိယသုတ္တ

ပုစ္ဆာ – တေနာဝုသော ဘဂဝတာ။ပေ။ သမ္မာသမ္ဗုဒ္ဓေန ဂါမဏိသံယုတ္တေ ဒွါဒသမံ သံဂီတံ ရာသိယသုတ္တံ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ကထဉ္စ ဘာသိတံ.

ဝိဿဇ္ဇနာ – မလ္လေသု ဘန္တေ ဥရုဝေလကပ္ပေနာမ မလ္လာနံ နိဂမေ ရာသိယံ ဂါမဏိံ အာရဗ္ဘ ဘာသိတံ. ရာသိယော ဘန္တေ ဂါမဏိ ဘဂဝန္တံ ဥပသင်္ကမိတွာ ဧတဒဒေါစ ‘‘သုတံ မေ ဘန္တေ ‘သမဏော ဂေါတမော သဗ္ဗံ တပံ ဂရဟတိ၊ သဗ္ဗံ တမဿိံ လူခဇီဝိံ ဧကံသေန ဥပဝဒတိ ဥပက္ကောသတီ’’တိ. ယေ တေ ဘန္တေ ဧဝမာဟံသု ‘သမဏော ဂေါတမော သဗ္ဗံ တပံ ဂရဟတိ၊ သဗ္ဗံ တပဿိံ လူခဇီဝိံ ဧကံသေန ဥပဝဒတိ ဥပက္ကောသတီ’’တိ. ကစ္စိ တေ ဘန္တေ ဘဂဝတော ဝုတ္တဝါဒိနော၊ န စ ဘဂဝန္တံ အဘူတေန အဗ္ဘာစိက္ခန္တိ၊ ဓမ္မဿ စာနုဓမ္မံ ဗျာကရောန္တီ’’တိ. တသ္မိံ ဘန္တေ ဝတ္ထုသ္မိံ ယေ တေ ဂါမဏိ ဧဝမာဟံသု ‘‘သမဏော ဂေါတမော သဗ္ဗံ တပံ ဂရဟတိ၊ သဗ္ဗံ တပဿိံ လူခဇီဝိံ ဧကံသေန ဥပဝဒတိ ဥပက္ကောသတီ’’တိ ဧဝမာဒိနာ ဘဂဝတာ ဘာသိတံ.

ပုစ္ဆာ – ကထဉ္စာဝုသော တတ္ထ ဘဂဝတာ ဂရဟိတဗ္ဗာဂရဟိတဗ္ဗာ ကာမဘောဂိနော ဝိတ္ထာရေန ဝိဘဇိတွာ ပကာသိတာ.

ဝိဿဇ္ဇနာ – တယော ခေါ မေ ဂါမဏိ ကာမဘောဂိနော သန္တော သံဝိဇ္ဇမာနာ လောကသ္မိံ. ကတမေ တယော. ဣဓ ဂါမဏိ ဧကစ္စော ကာမဘောဂီ အဓမ္မေန ဘောဂေ ပရိယေသတိ သာဟသေန၊ အဓမ္မေန ဘောဂေ ပရိယေသိတွာ သာဟသေန န အတ္တာနံ သုခေတိ န ပီဏေတိ၊ န သံဝိဘဇတိ န ပုညာနိ ကရောတီတိ ဧဝမာဒိနာ ဘန္တေ တတ္ထ ဘဂဝတာ ဂရဟိတဗ္ဗာဂရဟိတဗ္ဗာ ကာမဘောဂိနော ဝိတ္ထာရေန ဝိဘဇိတွာ ပကာသိတာ.

ပုစ္ဆာ – ကထဉ္စာဝုသော တတ္ထ ဘဂဝတာ ဂရဟိတဗ္ဗာဂရဟိတဗ္ဗာ တပဿိနော လူခဇီဝိနော ဝိတ္ထာရေန ဝိဘဇိတွာ ပကာသိတာ.

ဝိဿဇ္ဇနာ – တယော မေ ဂါမဏိ တပဿိနော လူခဇီဝိနော သန္တော သံဝိဇ္ဇမာနာ လောကသ္မိံ. ကတမေ တယော. ဣဓ ဂါမဏီ ဧကစ္စော တပဿီ လူခဇီဝီ သဒ္ဓါ အဂါရသ္မာ အနဂါရိယံ ပဗ္ဗဇိတော ဟောတိ ‘‘အပ္ပေဝ နာမ ကုသလံ ဓမ္မံ အဓိဂစ္ဆေယျံ၊ အပ္ပေဝ နာမ ဥတ္တရိမနုဿဓမ္မာ အလမရိယဉာဏဒဿနဝိသေသံ သစ္ဆိကရေယျ’’န္တိ၊ သော အတ္တာနံ အာတာပေတိ ပရိတာပေတိ၊ ကုသလဉ္စ ဓမ္မံ နာဓိဂစ္ဆတိ၊ ဥတ္တရိ စ မနုဿဓမ္မာ အလမရိယဉာဏဒဿနဝိသေသံ န သစ္ဆိကရောတီတိ ဧဝမာဒိနာ ဘန္တေ တတ္ထ ဘဂဝတာ ဂရဟိတဗ္ဗာဂရဟိတဗ္ဗာ တပဿိနော လူခဇီဝိနော ဝိတ္ထာရေန ဝိဘဇိတွာ ပကာသိတာ.