သာရိပုတ္တသံယုတ္တ
သုစိမုခီသုတ္တ
ပုစ္ဆာ – သာရိပုတ္တသံယုတ္တေ ပနာဝုသော ဒသမံ သုစိမုခီသုတ္တံ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ကေန ကထဉ္စ ဘာသိတံ.
ဝိဿဇ္ဇနာ – ရာဇဂဟေ ဘန္တေ သုစိမုခိံ ပရိဗ္ဗာဇိကံ အာရဗ္ဘ အာယသ္မတာ သာရိပုတ္တတ္ထေရေန ဓမ္မသေနာပတိနာ ဘာသိတံ. သုစိမုခီ ဘန္တေ ပရိဗ္ဗာဇိကာ အာယသ္မန္တံ သာရိပုတ္တံ ဧတဒဝေါစ ‘‘ကိံ နု ခေါ သမဏ အဓောမုခေါ ဘုဉ္ဇသီ’’တိ. တသ္မိံ ဘန္တေ ဝတ္ထုသ္မိံ ‘‘န ခွာဟံ ဘဂိနိ အဓောမုခေါ ဘုဉ္ဇာမီ’’တိ ဧဝမာဒိနာ ပဋိက္ခိပိတွာ ‘‘ယေ ဟိ ကေစိ ဘဂိနိ သမဏဗြာဟ္မဏာ ဝတ္ထုဝိဇ္ဇာ တိရစ္ဆာနဝိဇ္ဇာယ မိစ္ဆာဇီဝေန ဇီဝိကံ ကပ္ပေန္တိ၊ ဣမေ ဝုစ္စန္တိ ဘဂိနိ သမဏဗြာဟ္မဏာ အဓောမုခါ ဘုဉ္ဇန္တီ’’တိ ဧဝမာဒိနာ အာယသ္မတာ သာရိပုတ္တတ္ထေရေန ဓမ္မသေနာပတိနာ ဘာသိတံ.
ကိံ နု ခေါ သမဏ အဓော မုခေါ ဘုဉ္ဇသိ.
န ခွာဟံ ဘဂိနိ အဓောမုခေါ ဘုဉ္ဇာမိ.
တေန ဟိ သမဏ ဥဗ္ဘမုခေါ ဘုဉ္ဇသိ.
န ခွာဟံ ဘဂိနိ ဥဗ္ဘမုခေါ ဘုဉ္ဇာမိ.