မဇ္ဈိမပဏ္ဏာသပါဠိ

ကန္ဒရကသုတ္တ

ပုစ္ဆာ – တေနာဝုသော ဇာနတာ။ပေ။ သမ္မာသမ္ဗုဒ္ဓေန ကန္ဒရကသုတ္တံ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ.

ဝိဿဇ္ဇနာ – စမ္ပာယံ ဘန္တေ ဂဂ္ဂရာယ ပေါက္ခရဏိယာ တီရေ ပေဿဉ္စ ဟတ္ထာရောဟပုတ္တံ ကန္ဒရကဉ္စ ပရိဗ္ဗာဇကံ အာရဗ္ဘ ဘာသိတံ၊ ကန္ဒရကော ဘန္တေ ပရိဗ္ဗာဇကော ဘဂဝတော စ ဘိက္ခုသံဃဿ စ ဝဏ္ဏံ အဘာသိ၊ ပေဿော စ ဘန္တေ ဟတ္ထာရောဟပုတ္တော ဘဂဝတော စ ဓမ္မဒေသနာယ စ ဝဏ္ဏံ အဘာသိ. တသ္မိံ ဘန္တေ ဝတ္ထုသ္မိံ ဘာသိတံ.

ပုစ္ဆာ – ဧဝံ ခေါ အာဝုသော ကန္ဒရကေန ပရိဗ္ဗာဇကေန ဘဂဝတော စ ဘိက္ခုသံဃဿ စ အဘိပ္ပသန္နေန ဝဏ္ဏေ ဘာသိတေ ကထံ ဘဂဝါ တံ သမနုဇာနိတွာ ဓမ္မဒေသနာရမ္ဘံ အာရဘိ၊ ကထဉ္စ ပေဿော ဟတ္ထာရောဟပုတ္တော ဘဂဝတော စ ဓမ္မဒေသနာယ စ ဝဏ္ဏံ အဘာသိ၊ ကထဉ္စ ပေဿဿ ဟတ္ထာရောဟပုတ္တဿ အဇ္ဈာသယာနုရူပံ ဓမ္မံ ဒေသေသိ.

ဝိဿဇ္ဇနာ – ဧဝံ ခေါ ဘန္တေ ကန္ဒရကေန ပရိဗ္ဗာဇကေန ဘဂဝတော စ ဘိက္ခုသံဃဿ စ အဘိပ္ပသန္နေန ဝဏ္ဏေ ဘာသိတေ ‘‘ဧဝမေတံ ကန္ဒရက ဧဝမေတံ ကန္ဒရက’’ ဧဝမာဒိနာ ဘဂဝါ တံ သမနုဇာနိတွာ ‘‘သန္တိ ဟိ ကန္ဒရက ဘိက္ခူ ဣမသ္မိံ ဘိက္ခုသံဃေ အရဟန္တော ခီဏာသဝါ ဝုသိတဝန္တော ကတကရဏီယာ ဩဟိတဘာရာ အနုပ္ပတ္တသဒတ္ထာ ပရိက္ခီဏဘဝသံယောဇနာ သမ္မဒညာ ဝိမုတ္တာ’’တိ ဧဝမာဒိနာ ဓမ္မဒေသနံ သမာရဘိ. အထ ခေါ ဘန္တေ ပေဿော ဟတ္ထာရောဟပုတ္တော ‘‘အစ္ဆရိယံ ဘန္တေ အဗ္ဘုတံ ဘန္တေ ယာဝ သုပညတ္တာ စိမေ ဘန္တေ ဘဂဝတာ စတ္တာရော သတိပဋ္ဌာနာ သတ္တာနံ ဝိသုဒ္ဓိယာ သောကပရိဒေဝါနံ သမတိက္ကမာယ ဒုက္ခဒေါမနဿာနံ အတ္ထင်္ဂမာယ ဉာယဿ အဓိဂမာယ နိဗ္ဗာနဿ သစ္ဆိကိရိယာယာ’’တိ ဧဝမာဒိနာ ဘဂဝတော စ ဓမ္မဒေသနာယ ဝဏ္ဏံ အဘာသိ၊ ဘဂဝါပိ ဘန္တေ ‘‘ဂဟနဉှေတံ ပေဿ ယဒိဒံ မနုဿာ၊ ဥတ္တာနကဉှေတံ ပေဿ ယဒိဒံ ပသဝေါ’’တိအာဒိနာ ပေဿဿ ဟတ္ထာရောဟပုတ္တဿ အဇ္ဈာသယာနုရူပံ ဓမ္မကထံ ဒေသေသိ.

ပုစ္ဆာ – တံ ပနာဝုသော ဓမ္မဒေသနံ သုတွာ ပေဿဿ ဟတ္ထာရောဟပုတ္တဿ ကီဒိသော အာနိသံသော အဓိဂတော၊ ကထဉ္စ ဘဂဝါ တံ ပုဂ္ဂလစတုက္ကဒေသနံ သံခိတ္တေန ဘာသိတံ၊ ဘိက္ခူနံ ဝိတ္ထာရေန ဝိဘဇိတွာ ဒေသေသိ.

ဝိဿဇ္ဇနာ – တံ ခေါ ပန ဘန္တေ ဓမ္မံ သုတွာ ပေဿဿ ဟတ္ထာရောဟပုတ္တဿ ဒွေ အာနိသံသာ အဓိဂတာ သံဃေ စ ပသာဒေါ သတိပဋ္ဌာနပရိဂ္ဂဟဏူပါယော စ အဘိနဝေါ. ဘဂဝါ စ ဘန္တေ တံ ပုဂ္ဂလစတုက္ကဒေသနံ ဘိက္ခူဟိ ယာစိတော ‘‘ကတမော စ ဘိက္ခဝေ ပုဂ္ဂလော အတ္တပရိတာပနာနုယောဂမနုယုတ္တော’’တိအာဒိနာ သံခိတ္တေန ဘာသိတံ၊ ဝိတ္ထာရေန အတ္ထံ အဝိဘတ္တံ. ဝိတ္ထာရေန ဝိဘဇိတွာ ဒေသေသိ.

အဋ္ဌကနာဂရသုတ္တ

ပုစ္ဆာ – အဋ္ဌကနာဂရသုတ္တံ ပနာဝုသော ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ကေန ဘာသိတံ.

ဝိဿဇ္ဇနာ – ဝေသာလိယံ ဘန္တေ ဝေဠုဝဂါမကေ ဂဟပတိံ အဋ္ဌကနာဂရံ အာရဗ္ဘ အာယသ္မတာ အာနန္ဒတ္ထေရေန ဓမ္မဘဏ္ဍာဂါရိကေန ဘာသိတံ. ဒသမော ဘန္တေ ဂဟပတိ အဋ္ဌကနာဂရော အာယသ္မန္တံ အာနန္ဒံ ဥပသင်္ကမိတွာ ဧတဒဝေါစ ‘‘အတ္ထိ နု ခေါ ဘန္တေ အာနန္ဒ တေန ဘဂဝတာ ဇာနတာ ပဿတာ အရဟတာ သမ္မာသမ္ဗုဒ္ဓေန ဧကဓမ္မော အက္ခာတော၊ ယတ္ထ ဘိက္ခုနော အပ္ပမတ္တဿ အာတာပိနော ပဟိတတ္တဿ ဝိဟရတော အဝိမုတ္တဉ္စေဝ စိတ္တံ ဝိမုစ္စတိ၊ အပရိက္ခိဏာ စ အာသဝါ ပရိက္ခယံ ဂစ္ဆန္တိ၊ အနနုပ္ပတ္တဉ္စ အနုတ္တရံ ယောဂက္ခေမံ အနုပါပုဏာတီ’’တိ၊ တသ္မိံ ဘန္တေ ဝတ္ထုသ္မိံ ဘာသိတံ.

သေခသုတ္တ

ပုစ္ဆာ – သေခသုတ္တံ ပနာဝုသော ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ကေန ဘာသိတံ.

ဝိဿဇ္ဇနာ – သက္ကေသု ဘန္တေ ကပိလဝတ္ထုသ္မိံ သန္ထာဂါရေ အာယသ္မတာ အာနန္ဒတ္ထေရေန ဓမ္မဘဏ္ဍာဂါရိကေန ကာပိလဝတ္ထဝေ သကျေ အာရဗ္ဘ ဘာသိတံ. ဘဂဝါ ဘန္တေ ကာပိလဝတ္ထဝေ သကျေ ဗဟုဒေဝရတ္တိံ ဓမ္မိယာ ကထာယ သန္ဒဿေတွာ သမာဒပေတွာ သမုတ္တေဇေတွာ သမ္ပဟံသေတွာ အာယသ္မန္တံ အာနန္ဒံ အာမန္တေသိ ‘‘ပဋိဘာတု တံ အာနန္ဒ ကာပိလဝတ္ထဝါနံ သကျာနံ သေခေါ ပါဋိပဒေါ၊ ပိဋ္ဌိ မေ အာဂိလာယတိ၊ တမဟံ အာယမိဿာမီ’’တိ. တသ္မိံ ဘန္တေ ဝတ္ထုသ္မိံ ဘာသိတံ.

ပေါတလိယသုတ္တ

ပုစ္ဆာ – ပေါတလိယသုတ္တံ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ.

ဝိဿဇ္ဇနာ – အင်္ဂုတ္တရာပေသု ဘန္တေ အာပဏေ နာမ အင်္ဂုတ္တရာပါနံ နိဂမေ ပေါတလိယံ ဂဟပတိံ ပဋိက္ခိတ္တသဗ္ဗကမ္မန္တံ အာရဗ္ဘ ဘာသိတံ. ပေါတလိယော ဘန္တေ ဂဟပတိ ပဋိက္ခိတ္တသဗ္ဗကမ္မန္တော ယေန ဘဂဝါ တေနုပသင်္ကမိ၊ ဥပသင်္ကမန္တော ဘဂဝတာ ဂဟပတိဝါဒေန သမုဒါစရိယမာနော ကုပိတော အနတ္တမနော ဘဂဝန္တံ ဧတဒဝေါစ ‘‘တယိဒံ ဘော ဂေါတမ နစ္ဆန္နံ တယိဒံ နပ္ပတိရူပံ၊ ယံ မံ တွံ ဂဟပတိဝါဒေန သမုဒါစရသီ’’တိ. တသ္မိံ ဘန္တေ ဝတ္ထုသ္မိံ ဘာသိတံ.

ပုစ္ဆာ – ကထဉ္စာဝုသော ဘဂဝါ ကာမာနံ အာဒီနဝံ ဝိတ္ထာရေန ပကာသေတွာ အရိယဿ ဝိနယေ ဝေါဟာရသမုစ္ဆေဒံ ဒဿေသိ.

ဝိဿဇ္ဇနာ – အထ ဘန္တေ ဘဂဝါ အရိယဿ ဝိနယေ ဝေါဟာရသမုစ္ဆေဒါယ အဋ္ဌ ဓမ္မေ ဝိဘဇိတွာ ‘‘သေယျထာပိ ဂဟပတိ ကုက္ကုရော ဇိဃစ္ဆာဒုဗ္ဗလျပရေတော ဂေါဃာတကသူနံ ပစ္စုပဋ္ဌိတော အဿ’’ ဧဝမာဒိနာ ကာမေသု အာဒီနဝံ ဒဿေတွာ ပရိယောသာနေ တီဟိ ဝိဇ္ဇာဟိ အရိယဿ ဝိနယေ ဝေါဟာရသမုစ္ဆေဒံ သဗ္ဗေနသဗ္ဗံ သဗ္ဗထာသဗ္ဗံ ဝေါဟာရသမုစ္ဆေဒံ ဝိတ္ထာရေန ဝိဘဇိတွာ ဒေသေသိ.

ဇီဝကသုတ္တ

ပုစ္ဆာ – တေနာဝုသော ဘဂဝတာ။ပေ။ သမ္မာသမ္ဗုဒ္ဓေန ဇီဝကသုတ္တံ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ.

ဝိဿဇ္ဇနာ – ရာဇဂဟေ ဘန္တေ ဇီဝကံ ကောမာရဘစ္စံ အာရဗ္ဘ ဘာသိတံ. ဇီဝကော ဘန္တေ ကောမာရဘစ္စော ဘဂဝန္တံ ဥပသင်္ကမိတွာ ဧတဒဝေါစ ‘‘သုတံ မေတံ ဘန္တေ သမဏံ ဂေါတမံ ဥဒ္ဒိဿ ပါဏံ အာရဘန္တိ၊ တံ သမဏော ဂေါတမော ဇာနံ ဥဒ္ဒိဿ ကတံ မံသံ ပရိဘုဉ္ဇတိ ပဋိစ္စ ကမ္မန္တိ. ယေ တေ ဘန္တေ ဧဝမာဟံသု ‘သမဏံ ဂေါတမံ ဥဒ္ဒိဿ ပါဏံ အာရဘန္တိ၊ တံ သမဏော ဂေါတမော ဇာနံ ဥဒ္ဒိဿ ကတံ မံသံ ပရိဘုဉ္ဇတိ ပဋိစ္စ ကမ္မ’န္တိ၊ ကစ္စိ တေ ဘန္တေ ဘဂဝတော ဝုတ္တဝါဒိနော န စ ဘဂဝန္တံ အဘူတေန အဗ္ဘာစိက္ခန္တိ၊ ဓမ္မဿ စာနုဓမ္မံ ဗျာကရောန္တိ၊ န စ ကောစိ သဟဓမ္မိကော ဝါဒါနုဝါဒေါ ဂါရယှံ ဌာနံ အာဂစ္ဆတီ’’တိ. တသ္မိံ ဘန္တေ ဝတ္ထုသ္မိံ ဘာသိတံ.

ဥပါလိသုတ္တ

ပုစ္ဆာ – ဥပါလိသုတ္တံ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ.

ဝိဿဇ္ဇနာ – နာဠန္ဒာယံ ဘန္တေ ဥပါလိံ ဂဟပတိံ အာရဗ္ဘ ဘာသိတံ. ဥပါလိ ဘန္တေ ဂဟပတိ ဘဂဝန္တံ ဥပသင်္ကမိတွာ ဧတဒဝေါစ ‘‘အာဂမာ နုခွိဓ ဘန္တေ ဒီဃတပဿီ နိဂဏ္ဌော’’တိ၊ ဧဝမာဒိနာ စ ဘန္တေ ဥပါလိ ဂဟပတိ ဘဂဝတော ပဋိသန္ဓာရံ ကတွာ အတ္တနော အာစရိယဿ နိဂဏ္ဌဿ နာဋပုတ္တဿ ဝါဒံ ပကာသေသိ၊ ဝါဒံ ဝဏ္ဏေသိ. တသ္မိံ ဘန္တေ ဝတ္ထုသ္မိံ ဘာသိတံ.

ပုစ္ဆာ – အထ ခေါ အာဝုသော ဘဂဝါ ဥပါလိံ ဂဟပတိံ တသ္မိံ ဝါဒေ ကထံ သမနုယုဉ္ဇီ သမနုဂါဟီ သမနုဘာသီ၊ ကထဉ္စဿ ဥပါယံ ဒဿေတွာ ယထာဘူတံ အတ္ထံ ဉာပေသိ.

ဝိဿဇ္ဇနာ – အထ ခေါ ဘန္တေ ဘဂဝါ ဥပါလိံ ဂဟပတိံ ‘‘သစေ ခေါ တွံ ဂဟပတိ သစ္စေ ပတိဋ္ဌာယ မန္တေယျာသိ၊ သိယာ နော ဧတ္ထ ကထာသလ္လာပေါ’’တိ ဥပါလိံ ဂဟပတိံ ကထံ သမုဋ္ဌာပေတွာ ‘‘တံ ကိံမညသိ ဂဟပတိ၊ ဣဓဿ နိဂဏ္ဌော အာဗာဓိကော ဒုက္ခိတော ဗာဉှဂိလာနော သီတောဒကပရိက္ခိတ္တော ဥဏှောဒကပဋိသေဝီ၊ သော သီတောဒကံ အလဘမာနော ကာလင်္ကရေယျာ’’တိ ဧဝမာဒိနာ ဘန္တေ ဘဂဝါ စတ္တာရော ဥပါယေ ဒဿေတွာ ဥပါလိံ ဂဟပတိံ ယထာဘူတမတ္ထံ ဉာပေသိ.

ပုစ္ဆာ – ဧဝံ ခေါ အာဝုသော ဥပါလိ ဂဟပတိ ဘဂဝတာ သညာပိတော ဣမသ္မိံ ဓမ္မဝိနယေ ပသန္နော ကီဒိသံ ပသန္နာကာရံ အကာသိ၊ ကထဉ္စ ဘဂဝါ တံ ပုန အနုသာသိတွာ ဥတ္တရိ ဝိနေသိ.

ဝိဿဇ္ဇနာ – ‘‘ပုရိမေနေဝါဟံ ဘန္တေ ဩပမ္မေန ဘဂဝတော အတ္တမနော အဘိရဒ္ဓေါ၊ အပိစာဟံ ဣမာနိ ဘဂဝတော ဝိစိတြာနိ ပဉှပဋိဘာနာနိ သောတုကာမော၊ ဧဝါဟံ ဘဂဝန္တံ ပစ္စနီကံ ကာတဗ္ဗံ အမညိဿ’’န္တိ၊ ဧဝမာဒိနာ ဘန္တေ ဥပါလိ ဂဟပတိ ဘဂဝတာ ဝိညာပိတော ဣမသ္မိံ ဓမ္မဝိနယေ ပသန္နော ပသန္နာကာရံ အကာသိ. တတ္ထ ဘဂဝါ စ ဘန္တေ ‘‘အနုဝိစ္စကာရံ ခေါ ဂဟပတိ ကရောဟိ၊ အနုဝိစ္စကာရော တုမှာဒိသာနံ ဉာတမနုဿာနံ သာဓု ဟောတီ’’တိ ဧဝမာဒိနာ ပုန အနုသာသိတွာ ဥတ္တရိ ယာဝ ဓမ္မစက္ခုပဋိလာဘာ ဝိနေသိ.

ပုစ္ဆာ – ကထဉ္စာဝုသော နိဂဏ္ဌဿ နာဋပုတ္တဿ ဥပါလိဿ ဂဟပတိဿ နိဝေသနံ ဂန္တွာ အာဝီမံသနာ စ ဥပါလိဿ ဂဟပတိဿ ပစ္စုတ္တရာ ကထာ စ အဟောသိ.

ဝိဿဇ္ဇနာ – ‘‘ဥမ္မတ္တောသိ တွံ ဂဟပတိ ဒတ္တောသိ တွံ ဂဟပတီ’’တိ ဧဝမာဒိနာ ဘန္တေ နိဂဏ္ဌဿ နာဋပုတ္တဿ ဥပါလိဿ ဂဟပတိဿ နိဝေသနံ ဂန္တွာ ဝီမံသာ စ ‘‘ဘဒ္ဒိကာ ဘန္တေ အာဝဋ္ဋနီမာယာ ကလျာဏီ ဘန္တေ အာဝဋ္ဋနီမာယာတိ’’ ဧဝမာဒိနာ ဥပါလိဿ ဂဟပတိဿ ပစ္စုတ္တရကထာ စ အဟောသိ.

ဓီရဿ ဝိဂတမောဟဿ၊

ပဘိန္နခီလဿ ဝိဇိတဝိဇယဿ၊

အနီဃဿ သုသမစိတ္တဿ၊

ဝုဒ္ဓသီလဿ သာဓုပညဿ၊

ဝေသမန္တရဿ ဝိမလဿ၊

ဘဂဝတော တဿ သာဝကောဟမသ္မိံ.

အကထံ ကထိဿ တုသိတဿ၊

ဝန္တလောကာမိသဿ မုဒိတဿ၊

ကတသမဏဿ မနုဇဿ၊

အန္တိမသာရီရဿ နရဿ.

အနောပမဿ ဝိရဇဿ၊

ဘဂဝတော တဿ သာဝကော ဟမသ္မိ –

တဏှစ္ဆိဒဿ ဗုဒ္ဓဿ၊

ဝီတဓူမဿ အနုပလိတ္တဿ.

အာဟုနေယျဿ ယက္ခဿ၊

ဥတ္တမပုဂ္ဂလဿ အတုလဿ၊

မဟတော ယသဂ္ဂပတ္တဿ၊

ဘဂဝတော တဿ သာဝကော ဟမသ္မိ –

ကုက္ကုရဝတိကသုတ္တ

ပုစ္ဆာ – ကုက္ကုရဝတိကသုတ္တံ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ.

ဝိဿဇ္ဇနာ – ကောလိယေသု ဘန္တေ ဟလိဒ္ဒဝသနေ နာမ ကောလိယာနံ နိဂမေ ပုဏ္ဏဉ္စ ကောလိယပုတ္တံ ဂေါဝတိကံ အစေလဉ္စ သေနိယံ ကုက္ကုရဝတိကံ အာရဗ္ဘ ဘာသိတံ. ပုဏ္ဏော ဘန္တေ ကောလိယ ပုတ္တော ဂေါဝတိကော ဘဂဝန္တံ ဧတဒဝေါစ ‘‘အယံ ဘန္တေ အစေလော သေနိယော ကုက္ကုရဝတိကော ဒုက္ကရကာရကော ဆမာနိက္ခိတ္တံ ဘောဇနံ ဘုဉ္ဇတိ၊ တဿ တံ ကုက္ကုရဝတံ ဒီဃရတ္တံ သမတ္တံ သမာဒိန္နံ၊ တဿ ကာ ဂတိ၊ ကော အဘိသမ္ပရာယော’’တိ၊ တသ္မိံ ဘန္တေ ဝတ္ထုသ္မိံ ဘာသိတံ.

အဘယရာဇကုမာရသုတ္တ

ပုစ္ဆာ – တေနာဝုသော ဇာနတာ။ပေ။ သမ္မာသမ္ဗုဒ္ဓေန အဘယရာဇကုမာရသုတ္တံ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ.

ဝိဿဇ္ဇနာ – ရာဇဂဟေ မေ ဘန္တေ အဘယံ ရာဇကုမာရံ အာရဗ္ဘ ဘာသိတံ. အဘယော ဘန္တေ ရာဇကုမာရော ဘဂဝန္တံ ဥပသင်္ကမိတွာ ဧတဒဝေါစ ‘‘ဘာသေယျ နု ခေါ ဘန္တေ တထာဂတော တံ ဝါစံ၊ ယာ သာ ဝါစာ ပရေသံ အပ္ပိယာ အမနာပါ’’တိ၊ တသ္မိံ ဘန္တေ ဝတ္ထုသ္မိံ ဘာသိတံ.

ဗဟုဝေဒနီယသုတ္တ

ပုစ္ဆာ – ဗဟုဝေဒနီယသုတ္တံ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ.

ဝိဿဇ္ဇနာ – သာဝတ္ထိယံ ဘန္တေ အာယသ္မန္တဉ္စ ဥဒါယိံ ပဉ္စကင်္ဂဉ္စ ထပတိံ အာရဗ္ဘ ဘာသိတံ၊ ပဉ္စကင်္ဂေါ ဘန္တေ ထပတိ အာယသ္မန္တံ ဥဒါယိံ ဥပသင်္ကမိတွာ ဝေဒနံ ပုစ္ဆိ၊ အာယသ္မာ ဘန္တေ ဥဒါယီ ပဉ္စကင်္ဂံ ထပတိံ ဧတဒဝေါစ ‘‘တိဿော ခေါ ထပတိ ဝေဒနာ ဝုတ္တာ ဘဂဝတာ သုခါ ဝေဒနာ ဒုက္ခာ ဝေဒနာ အဒုက္ခမသုခါ ဝေဒနာ’’တိ. ဧဝံ ဝုတ္တေ ဘန္တေ ပဉ္စကင်္ဂေါ ထပတိ အာယသ္မန္တံ ဥဒါယိံ ဧတဒဝေါစ ‘‘န ခေါ ဘန္တေ ဥဒါယိ တိဿော ဝေဒနာ ဝုတ္တာ ဘဂဝတာ၊ ဒွေ ဝေဒနာ ဝုတ္တာ ဘဂဝတာ သုခါ ဝေဒနာ ဒုက္ခာ ဝေဒနာ၊ ယာယံ ဘန္တေ အဒုက္ခမသုခါ ဝေဒနာ၊ သန္တသ္မိံ ဧသာ ပဏီတေ သုခေ ဝုတ္တာ ဘဂဝတာ’’တိ. နေဝ အသက္ခိ ခေါ ဘန္တေ အာယသ္မာ ဥဒါယီ ပဉ္စကင်္ဂံ ထပတိံ သညာပေတုံ၊ န ပန အသက္ခိ ပဉ္စကင်္ဂေါ ထပတိ အာယသ္မန္တံ ဥဒါယိံ သညာပေတုံ. အဿောသိ ခေါ အာယသ္မာ အာနန္ဒော အာယသ္မတော ဥဒါယိဿ ပဉ္စကင်္ဂေန ထပတိနာ သဒ္ဓိံ ဣမံ ကထာသလ္လာပံ၊ အထ ခေါ ဘန္တေ အာယသ္မာ အာနန္ဒော ယာဝတကော အဟောသိ အာယသ္မတော ဥဒါယိဿ ပဉ္စကင်္ဂေန ထပတိနာ သဒ္ဓိံ ကထာသလ္လာပေါ၊ တံ သဗ္ဗံ ဘဂဝတော အာရောစေသိ. တသ္မိံ ဘန္တေ ဝတ္ထုသ္မိံ ဘာသိတံ.

အပဏ္ဏကသုတ္တ

ပုစ္ဆာ – အပဏ္ဏကသုတ္တံ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ.

ဝိဿဇ္ဇနာ – ကောသလေသု ဘန္တေ သာလာယံ နာမ ကောသလာနံ ဗြာဟ္မဏဂါမေ သာလေယျကေ ဗြာဟ္မဏဂဟပတိကေ အာရဗ္ဘ ဘာသိတံ. သမ္ဗဟုလာ ဘန္တေ အညတိတ္ထိယာ သာလေယျကာနံ ဗြာဟ္မဏဂဟပတိကာနံ အတ္တနော အတ္တနော မိစ္ဆာဒိဋ္ဌိယော ပဋိဂ္ဂဏှာပေသုံ ဥဂ္ဂဏှာပေသုံ. တေ ပန ဘန္တေ သာလေယျကာ ဗြာဟ္မဏဂဟပတိကာ ဧကဒိဋ္ဌိယမ္ပိ ပတိဋ္ဌာတုံ န သက္ခိံသု. တသ္မိံ ဘန္တေ ဝတ္ထုသ္မိံ ဘာသိတံ.

ပုစ္ဆာ – တတြ အာဝုသော ဘဂဝတာ ပဌမံ မိစ္ဆာဝါဒေါ စ သမ္မာဝါဒေါ စ ကထံ ဝိဘဇိတွာ ပကာသိတော.

ဝိဿဇ္ဇနာ – တတြ ဘန္တေ ဘဂဝတာ ‘‘သန္တိ ဂဟပတယော ဧကေ သမဏဗြာဟ္မဏာ ဧဝံဝါဒိနော ဧဝံဒိဋ္ဌိနော နတ္ထိ ဒိန္နံ နတ္ထိ ယိဋ္ဌံ နတ္ထိ ဟုတံ နတ္ထိ သုကတဒုက္ကဋာနံ ကမ္မာနံ ဖလံ ဝိပါကော’’တိ ဧဝမာဒိနာ ပဌမံ မိစ္ဆာဝါဒေါ စ သမ္မာဝါဒေါ စ ဝိဘဇိတွာ ပကာသိတော.

ပုစ္ဆာ – တတ္ထ အာဝုသော ဘဂဝတာ မိစ္ဆာဝါဒီနဉ္စ ဒေါသော သမ္မာဝါဒီနဉ္စ ဂုဏော ကထံ ဝိစာရေတွာ ပကာသိတော.

ဝိဿဇ္ဇနာ – တတ္ထ ဘန္တေ ဘဂဝတာ ‘‘တတြ ဂဟပတယော ယေတေ သမဏဗြာဟ္မဏာ ဧဝံဝါဒိနော ဧဝံဒိဋ္ဌိနော နတ္ထိ ဒိန္နံ နတ္ထိ ယိဋ္ဌံ နတ္ထိ ဟုတံ နတ္ထိ သုကတဒုက္ကဋာနံ ကမ္မာနံ ဖလံ ဝိပါကော’’တိ ဧဝမာဒိနာ ဘန္တေ မိစ္ဆာဝါဒီနဉ္စ ဒေါသော သမ္မာဝါဒီနဉ္စ ဂုဏော ဘဂဝတာ ဝိစာရေတွာ ပကာသိတော.

ပုစ္ဆာ – ကထဉ္စာဝုသော တတ္ထ ဘဂဝတာ ဝိညုနော ပုရိသပုဂ္ဂလဿ ပဋိသဉ္စိက္ခဏာ ပကာသိတာ.

ဝိဿဇ္ဇနာ – တတြ ဂဟပတယော ဝိညူ ပုရိသော ဣတိ ပဋိသဉ္စိက္ခတီတိ ဧဝမာဒိနာ ဘန္တေ တတ္ထ ဘဂဝတာ ဝိညုနော ပုရိသပုဂ္ဂလဿ ပဋိသဉ္စိက္ခဏာ ပကာသိတာ.

ပုစ္ဆာ – ကထဉ္စာဝုသော ဘဂဝတာ အညေသုပိ မိစ္ဆာဝါဒသမ္မာဝါဒေသု အပဏ္ဏကပဋိပဒါ ဝိစာရေတွာ ပကာသိတာ၊ တံ သင်္ခေပတော ကထေသိ.

ဝိဿဇ္ဇနာ – ယထေဝ ဘန္တေ ပဌမေ ဝါဒေ၊ ဧဝမေဝ ခေါ ဘန္တေ အကိရိယဝါဒါဒီသု စတူသု စ မိစ္ဆာဝါဒေသု ဒေါသံ ကိရိယဝါဒါဒီသု စ စတူသု သမ္မာဝါဒေသု ဂုဏံ၊ တတ္ထ စ ဝိညုနော ပုရိသဿ ပဋိသဉ္စိက္ခဏာကာရံ ဒဿေတွာ ဘဂဝတာ အပဏ္ဏကပဋိပဒါ ပကာသိတာ.

အမ္ဗလဋ္ဌိကရာဟုလောဝါဒသုတ္တ

ပုစ္ဆာ – အမ္ဗလဋ္ဌိကရာဟုလောဝါဒသုတ္တံ ပနာဝုသော ဘဂဝတာ ကတ္ထ ကံ အာရဗ္ဘ ဘာသိတံ.

ဝိဿဇ္ဇနာ – ရာဇဂဟေ ဘန္တေ အာယသ္မန္တံ ရာဟုလံ အာရဗ္ဘ ဘာသိတံ.

မဟာရာဟုလောဝါဒသုတ္တ

ပုစ္ဆာ – မဟာရာဟုလောဝါဒသုတ္တံ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ.

ဝိဿဇ္ဇနာ – သာဝတ္ထိယံ ဘန္တေ အာယသ္မန္တံ ရာဟုလံ အာရဗ္ဘ ဘာသိတံ. အာယသ္မာ ဘန္တေ ရာဟုလော ဘဂဝတော စေဝ အတ္တနော စ အတ္တဘာဝသမ္ပတ္တိံ နိဿာယ ဂေဟဿိတံ ဆန္ဒရာဂံ ဥပ္ပါဒေသိ. တသ္မိံ ဘန္တေ ဝတ္ထုသ္မိံ ဘာသိတံ.

စူဠမာလုကျသုတ္တ

ပုစ္ဆာ – စူဠမာလုကျသုတ္တံ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ.

ဝိဿဇ္ဇနာ – သာဝတ္ထိယံ ဘန္တေ အာယသ္မန္တံ မာလုကျပုတ္တံ အာရဗ္ဘ ဘာသိတံ. အာယသ္မာ ဘန္တေ မာလုကျပုတ္တော အတ္တနော ပဝိဝိတ္တဿ ရဟောဂတဿ ပဋိသလ္လီနဿ စေတသော ပရိဝိတက္ကံ ဘဂဝတော အာရောစေသိ. တသ္မိံ ဘန္တေ ဝတ္ထုသ္မိံ ဘာသိတံ.

မဟာမာလုကျသုတ္တ

ပုစ္ဆာ – မဟာမာလုကျသုတ္တံ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ.

ဝိဿဇ္ဇနာ – တသ္မိံယေဝ ဘန္တေ သာဝတ္ထိယံ အာယသ္မန္တံ မဟာမာလုကျပုတ္တံ အာရဗ္ဘ ဘာသိတံ.

ဘဒ္ဒါလိသုတ္တ

ပုစ္ဆာ – တေနာဝုသော ဘဂဝတာ။ပေ။ သမ္မာသမ္ဗုဒ္ဓေန ဘဒ္ဒါလိသုတ္တံ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ.

ဝိဿဇ္ဇနာ – သာဝတ္ထိယံ ဘန္တေ အာယသ္မန္တံ ဘဒ္ဒါလိံ အာရဗ္ဘ ဘာသိတံ. အာယသ္မာ ဘန္တေ ဘဒ္ဒါလိ ဘဂဝတာ သိက္ခာပဒေ ပညာပိယမာနေ ဘိက္ခုသံဃေ သိက္ခံ သမာဒိယမာနေ အနုဿာဟံ ပဝေဒေသိ. တသ္မိံ ဘန္တေ ဝတ္ထုသ္မိံ ဘာသိတံ.

အစ္စယော မံ ဘန္တေ အစ္စဂမာ ယထာဗာလံ ယထာမူဠှံ ယထာအကုသလံ၊ ယောဟံ ဘဂဝတာ သိက္ခာပဒေ ပညာပိယမာနေ ဘိက္ခုသံဃေ သိက္ခံ သမာဒိယမာနေ အနုဿာဟံ ပဝေဒေသိံ၊ တဿ မေ ဘန္တေ ဘဂဝါ အစ္စယံ အစ္စယတော ပဋိဂ္ဂဏှာတု အာယတိံ သံဝရာယ –

ပုစ္ဆာ – အထ ခေါ အာဝုသော အာယသ္မာ ဘဒ္ဒါလိ ဘဂဝန္တံ ကီဒိသံ ပဉှံ ပုစ္ဆိ၊ ကထဉ္စဿ ဘဂဝါ တံ ဝိဘဇိတွာ ဗျာကာသိ.

ဝိဿဇ္ဇနာ – အထ ခေါ ဘန္တေ အာယသ္မာ ဘဒ္ဒါလိ ‘‘ကော နု ခေါ ဘန္တေ ဟေတု၊ ကော ပစ္စယော၊ ယေန မိဓေကစ္စံ ဘိက္ခုံ ပသယု ပသယု ကာရဏံ ကရောန္တီ’’တိ ဧဝမာဒိနာ ဘဂဝန္တံ ပဉှံ အပုစ္ဆိ. ဘဂဝါ စ ဘန္တေ ‘‘ဣဓ ဘဒ္ဒါလိ ဧကစ္စော ဘိက္ခု အဘိဏှာပတ္တိကော ဟောတိ၊ အာပတ္တိဗဟုလော’’ ဧဝမာဒိနာ အာယသ္မတော ဘဒ္ဒါလိဿ ဝိဘဇိတွာ ဗျာကာသိ.

ပုစ္ဆာ – တဒါပိ ခေါ အာဝုသော အာယသ္မာ ဘဒ္ဒါလိ ပုနပိ ဘဂဝန္တံ ကီဒိသံ ပဉှံ ပုစ္ဆိ၊ ကထဉ္စဿ ဘဂဝါ တမ္ပိ ဝိဘဇိတွာ ဗျာကာသိ.

ဝိဿဇ္ဇနာ – တဒါပိ ဘန္တေ အာယသ္မာ ဘဒ္ဒါလိ ‘‘ကော နု ခေါ ဘန္တေ ဟေတု၊ ကော ပစ္စယော၊ ယေန ပုဗ္ဗေ အပ္ပတရာနိ စေဝ သိက္ခာပဒါနိ အဟေသုံ၊ ဗဟုတရာ စ ဘိက္ခူ အညာယ သဏ္ဍဟိံသု. ကော ပန ဘန္တေ ဟေတု၊ ကော ပစ္စယော ယေန ဧတရဟိ ဗဟုတရာနိ စေဝ သိက္ခာပဒါနိ ဟောန္တိ အပ္ပတရာ စ ဘိက္ခူ အညာယ သဏ္ဍဟန္တီ’’တိ ဘဂဝန္တံ ပုနပိ ပဉှံ အပုစ္ဆိ. ဘဂဝါ စ ဘန္တေ ‘‘ဧဝမေတံ ဘဒ္ဒါလိ ဟောတိ၊ သတ္တေသု ဟာယမာနေသု သဒ္ဓမ္မေ အန္တရဓာယမာနေ ဗဟုတရာနိ ဟောန္တိ အပ္ပတရာ စ ဘိက္ခူ အညာယ သဏ္ဍဟန္တီ’’တိ၊ ဧဝမာဒိနာ အာယသ္မတော ဘဒ္ဒါလိဿ ဝိဘဇိတွာ ဝိဘဇိတွာ ဗျာကတာ.

လဋုကိကောပမသုတ္တ

ပုစ္ဆာ – လဋုကိကောပမသုတ္တံ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ.

ဝိဿဇ္ဇနာ – အင်္ဂုတ္တရာပေသု ဘန္တေ အာပဏေ နာမ အင်္ဂုတ္တရာပါနံ နိဂမေ အာယသ္မန္တံ ဥဒါယိံ အာရဗ္ဘ ဘာသိတံ. အာယသ္မာ ဘန္တေ ဥဒါယီ ဘဂဝန္တံ ဥပသင်္ကမိတွာ ဧတဒဝေါစ ‘‘ဣဓ မယှံ ဘန္တေ ရဟောဂတဿ ပဋိသလ္လီနဿ ဧဝံ စေတသော ပရိဝိတက္ကော ဥဒပါဒိ ‘‘ဗဟူနံ ဝတ နော ဘဂဝါ ဒုက္ခဓမ္မာနံ အပဟတ္တာ၊ ဗဟူနံ ဝတ နော ဘဂဝါ သုခဓမ္မာနံ ဥပဟတ္တာ၊ ဗဟူနံ ဝတ နော ဘဂဝါ အကုသလာနံ ဓမ္မာနံ အပဟတ္တာ၊ ဗဟူနံ ဝတ နော ဘဂဝါ ကုသလာနံ ဓမ္မာနံ ဥပဟတ္တာ’တိ’’. တသ္မိံ ဘန္တေ ဝတ္ထုသ္မိံ ဘာသိတံ.

ပုစ္ဆာ – အထ ခေါ အာဝုသော ဘဂဝါ ကီဒိသီ ဥပမာယော ဒဿေတွာ ဘိက္ခူနံ ဩဝါဒံ အဒါသိ.

ဝိဿဇ္ဇနာ – အထ ခေါ ဘန္တေ ဘဂဝါ လဋုကိကောပမံ ဟတ္ထိနာဂေါပမံ ဒလိဒ္ဒပုရိသောပမံ ဂဟပတိကောပမန္တိ စတဿော ဥပမာယော ဒဿေတွာ ဘိက္ခူနံ ဩဝါဒမဒါသိ.

ပုစ္ဆာ – ဧဝဉ္စာဝုသော ဘဂဝါ စတူဟိ ဥပမာဟိ ဘိက္ခူနံ ဩဝါဒံ ဒတွာ ကထံ ဥတ္တရိ ဓမ္မဒေသနံ ပဝဍ္ဎေသိ.

ဝိဿဇ္ဇနာ – ဧဝံ ခေါ ဘန္တေ ဘဂဝါ စတူဟိ ဥပမာဟိ ဘိက္ခူနံ ဩဝါဒံ ဒတွာ ‘‘စတ္တာရော မေ ဥဒါယိ ပုဂ္ဂလာ သန္တော သံဝိဇ္ဇမာနာ လောကသ္မိံ’’န္တိ ဧဝမာဒိနာ ဥတ္တရိ ဘိက္ခူနံ ဓမ္မကထံ ပဝဍ္ဎေသိ.

စာတုမသုတ္တ

ပုစ္ဆာ – စာတုမသုတ္တံ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ.

ဝိဿဇ္ဇနာ – စာတုမာယံ ဘန္တေ အာယသ္မန္တာနံ သာရိပုတ္တမောဂ္ဂလာနတ္ထေရာနံ သဒ္ဓိဝိဟာရိကေ အဓုနာ ပဗ္ဗဇိတေ သမ္ဗဟုလေ ဘိက္ခူ အာရဗ္ဘ ဘာသိတံ. သာရိပုတ္တမောဂ္ဂလ္လာနပ္ပမုခါနိ ဘန္တေ ပဉ္စမတ္တာနိ ဘိက္ခုသတာနိ စာတုမံ အနုပ္ပတ္တာနိ ဟောန္တိ ဘဂဝန္တံ ဒဿနာယ၊ တေ စ အာဂန္တုကာ ဘိက္ခူ နေဝါသိကေဟိ ဘိက္ခူဟိ သဒ္ဓိံ ပဋိသမ္မောဒမာနာ သေနာသနာနိ ပညာပယမာနာ ပတ္တစီဝရာနိ ပဋိသာမယမာနာ ဥစ္စာသဒ္ဒါ မဟာသဒ္ဒါ အဟေသုံ. တသ္မိံ ဘန္တေ ဝတ္ထုသ္မိံ ဘာသိတံ.

ပုစ္ဆာ – ကထဉ္စာဝုသော တတ္ထ ဘဂဝါ ဘိက္ခူနံ ဩဝါဒံ အဒါသိ.

ဝိဿဇ္ဇနာ – စတ္တာရိမာနိ ဘိက္ခဝေ ဘယာနိ ဥဒကောရောဟန္တေ ပါတိကင်္ခိတဗ္ဗာနီတိ ဧဝမာဒိနာ ဘန္တေ ဘဂဝါ တတ္ထ ဘိက္ခူနံ ဩဝါဒံ အဒါသိ.

နဠကပါနသုတ္တ

ပုစ္ဆာ – နဠကပါနသုတ္တံ ပနာဝုသော ဘဂဝတာ ကတ္ထ ကံ အာရဗ္ဘ ဘာသိတံ.

ဝိဿဇ္ဇနာ – နဠကပါနေ ဘန္တေ အနုရုဒ္ဓတ္ထေရပ္ပမုခေ သမ္ဗဟုလေ အဘိညာတေ အဘိညာတေ ကုလပုတ္တေ အာရဗ္ဘ ဘာသိတံ.

ဂေါလိယာနိသုတ္တ

ပုစ္ဆာ – ဂေါလိယာနိသုတ္တံ ပနာဝုသော ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ကေန ဘာသိတံ.

ဝိဿဇ္ဇနာ – ရာဇဂဟေ ဘန္တေ အာယသ္မန္တံ ဂေါလိယာနိံ အာရဗ္ဘ အာယသ္မတာ သာရိပုတ္တတ္ထေရေန ဓမ္မသေနာပတိနာ ဘာသိတံ. အာယသ္မာ ဘန္တေ ဂေါလိယာနိ အာရညိကော ပဒသမာစာရော သံဃမဇ္ဈေ ဩသဋော ဟောတိ ကေနစိဒေဝ ကရဏီယေန၊ တသ္မိံ ဘန္တေ ဝတ္ထုသ္မိံ ဘာသိတံ.

ကီဋာဂိရိသုတ္တ

ပုစ္ဆာ – တေနာဝုသော ဘဂဝတာ။ပေ။ သမ္မာသမ္ဗုဒ္ဓေန ကီဋာဂိရိသုတ္တံ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ.

ဝိဿဇ္ဇနာ – ကာသီသု ဘန္တေ ကီဋာဂိရိသ္မိံ ကာသီနံ နိဂမေ အဿဇိပုနဗ္ဗသုကေ ဘိက္ခူ အာရဗ္ဘ ဘာသိတံ. အဿဇိပုနဗ္ဗသုကာ ဘန္တေ ဘိက္ခူ ဘိက္ခူဟိ သဟဓမ္မိကံ ဝုစ္စမာနာ ဧဝမာဟံသု ‘‘မယံ ခေါ အာဝုသော သာယဉ္စေဝ ဘုဉ္ဇာမ ပါတော စ ဒိဝါ စ ဝိကာလေ၊ တေ မယံ သာယဉ္စေဝ ဘုဉ္ဇမာနာ ပါတော စ ဒိဝါ စ ဝိကာလေ အပ္ပါဗာဓတဉ္စ သဉ္ဇာနာမ အပ္ပါတင်္ကတဉ္စ လဟုဋ္ဌာနဉ္စ ဗလဉ္စ ဖာသုဝိဟာရဉ္စ၊ တေ မယံ ကိံ သန္ဒိဋ္ဌိကံ ဟိတွာ ကာလိကံ အနုဓာဝိဿာမ၊ သာယဉ္စေဝ မယံ ဘုဉ္ဇိဿာမ ပါတော စ ဒိဝါ စ ဝိကာလေ’’တိ. တသ္မိံ ဘန္တေ ဝတ္ထုသ္မိံ ဘာသိတံ.

တေဝိဇ္ဇဝစ္ဆသုတ္တ

ပုစ္ဆာ – တေဝိဇ္ဇဝစ္ဆသုတ္တံ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ.

ဝိဿဇ္ဇနာ – ဝေသာလိယံ ဘန္တေ ဝစ္ဆဂေါတ္တံ ပရိဗ္ဗာဇကံ အာရဗ္ဘ ဘာသိတံ. ဝစ္ဆဂေါတ္တော ဘန္တေ ပရိဗ္ဗာဇကော ဘဂဝန္တံ ဧတဒဝေါစ ‘‘သုတံ မေ ဘန္တေ သမဏော ဂေါတမော သဗ္ဗညူ သဗ္ဗဒဿာဝီ အပရိသေသံ ဉာဏဒဿနံ ပဋိဇာနာတိ၊ စရတော စ မေ တိဋ္ဌတော စ သုတ္တဿ စ ဇာဂရဿ စ သတတံ သမိတံ ဉာဏဒဿနံ ပစ္စုပဋ္ဌိတ’’န္တိ. ယေ တေ ဘန္တေ ဧဝမာဟံသု ‘‘သမဏော ဂေါတမော သဗ္ဗညူ သဗ္ဗဒဿာဝီ အပရိသေသံ ဉာဏဒဿနံ ပဋိဇာနာတိ၊ စရတော စ မေ တိဋ္ဌတော စ သုတ္တဿ စ ဇာဂရဿ စ သတတံ သမိတံ ဉာဏဒဿနံ ပစ္စုပဋ္ဌိတ’’န္တိ. ကစ္စိ တေ ဘန္တေ ဘဂဝတော ဝုတ္တဝါဒိနော၊ န စ ဘဂဝန္တံ အဘူတေန အဗ္ဘာစိက္ခန္တိ၊ ဓမ္မဿ စာနုဓမ္မံ ဗျာကရောန္တိ၊ န စ ကောစိ သဟဓမ္မိကော ဝါဒါနုဝါဒေါ ဂါရယှံ ဌာနံ အာဂစ္ဆတီ’’တိ. တသ္မိံ ဘန္တေ ဝတ္ထုသ္မိံ ဘာသိတံ.

အဂ္ဂိဝစ္ဆသုတ္တ

ပုစ္ဆာ – အဂ္ဂိဝစ္ဆသုတ္တံ ပနာဝုသော ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ.

ဝိဿဇ္ဇနာ – သာဝတ္ထိယံ ဘန္တေ ဝစ္ဆဂေါတ္တံ ပရိဗ္ဗာဇကံ ဘာသိတံ. ဝစ္ဆဂေါတ္တော ဘန္တေ ပရိဗ္ဗာဇကော ဘဂဝန္တံ ဥပသင်္ကမိတွာ ‘‘ကိံ နု ခေါ ဘော ဂေါတမ ‘သဿတော လောကော ဣဒမေဝ သစ္စံ မောဃမည’န္တိ ဧဝံဒိဋ္ဌိ ဘဝံ ဂေါတမော’’တိ ဧဝမာဒိကံ ပဉှံ အပုစ္ဆိ. တသ္မိံ ဘန္တေ ဝတ္ထုသ္မိံ ဘာသိတံ.

မဟာဝစ္ဆသုတ္တ

ပုစ္ဆာ – မဟာဝစ္ဆသုတ္တံ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ.

ဝိဿဇ္ဇနာ – ရာဇဂဟေ ဘန္တေ ဝစ္ဆဂေါတ္တံယေဝ ပရိဗ္ဗာဇကံ အာရဗ္ဘ ဘာသိတံ. ဝစ္ဆဂေါတ္တော ဘန္တေ ပရိဗ္ဗာဇကော ဘဂဝန္တံ ဥပသင်္ကမိတွာ ဧတဒဝေါစ ‘‘ဒီဃရတ္တာဟံ ဘောတာ ဂေါတမေန သဟကထီ၊ သာဓု မေ ဘဝံ ဂေါတမော သံခိတ္တေန ကုသလာကုသလံ ဒေသေတူ’’တိ. တသ္မိံ ဘန္တေ ဝတ္ထုသ္မိံ ဘာသိတံ.

ပုစ္ဆာ – ဧဝံ ဝုတ္တေ ခေါ အာဝုသော ဝစ္ဆဂေါတ္တော ပရိဗ္ဗာဇကော ဣမသ္မိံ ဓမ္မဝိနယေ ပသန္နော ဟုတွာ ကီဒိသံ ပသန္နာကာရံ အကာသိ၊ ကထဉ္စဿ ဓမ္မာဘိသမယော အဟောသိ.

ဝိဿဇ္ဇနာ – ဧဝံ ဝုတ္တေ ဘန္တေ ဝစ္ဆဂေါတ္တော ပရိဗ္ဗာဇကော ‘‘သစေ ဟိ ဘော ဂေါတမ ဣမံ ဓမ္မံ ဘဝံယေဝ ဂေါတမော အာရာဓကော အဘဝိဿ၊ နော စ ခေါ ဘိက္ခူ အာရာဓကာ အဘဝိဿံသု၊ ဧဝမိဒံ ဗြဟ္မစရိယံ အပရိပူရံ အဘဝိဿ တေနင်္ဂေနာ’’တိ ဧဝမာဒိနာ ဣမသ္မိံ ဓမ္မဝိနယေ ပသန္နော ပသန္နာကာရမကာသိ. ယာဝ အရဟတ္တဉ္စဿ ဓမ္မာဘိသမယော အဟောသိ.

ဒီဃနခသုတ္တ

ပုစ္ဆာ – ဒီဃနခသုတ္တံ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ.

ဝိဿဇ္ဇနာ – ရာဇဂဟေ ဘန္တေ ဒီဃနခံ ပရိဗ္ဗာဇကံ အာရဗ္ဘ ဘာသိတံ. ဒီဃနခေါ ဘန္တေ ပရိဗ္ဗာဇကော ဘဂဝန္တံ ဥပသင်္ကမိတွာ ဧတဒဝေါစ ‘‘အဟဉှိ ဘော ဂေါတမ ဧဝံဝါဒီ ဧဝံဒိဋ္ဌိ သဗ္ဗံ မေ နက္ခမတီ’’တိ. တသ္မိံ ဘန္တေ ဝတ္ထုသ္မိံ ဘာသိတံ.

ပုစ္ဆာ – ဣမသ္မိံ စ ပနာဝုသော ဝေယျာကရဏသ္မိံ ဘညမာနေ ကေသံ ပုဂ္ဂလာနံ ဝိသေသာဓိဂမော အဟောသိ.

ဝိဿဇ္ဇနာ – ဣမသ္မိဉ္စ ပန ဘန္တေ ဝေယျာကရဏသ္မိံ ဘညမာနေ အာယသ္မတော သာရိပုတ္တဿ အနုပါဒါယ အာသဝေဟိ စိတ္တံ ဝိမုစ္စိ၊ ဒီဃနခဿ ပန ပရိဗ္ဗာဇကဿ တသ္မိံယေဝ အာသနေ ဝိရဇံ ဝီတမလံ ဓမ္မစက္ခုံ ဥဒပါဒိ ယံကိဉ္စိ သမုဒယဓမ္မံ၊ သဗ္ဗံ တံ နိရောဓဓမ္မ’’န္တိ.

မာဂဏ္ဍိယသုတ္တ

ပုစ္ဆာ – မာဂဏ္ဍိယသုတ္တံ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ.

ဝိဿဇ္ဇနာ – ကုရူသု ဘန္တေ ကမ္မာသဓမ္မေ နာမ ကုရူနံ နိဂမေ ဘာရဒွါဇ ဂေါတ္တဿ ဗြာဟ္မဏဿ အဂျာဂါရေ တိဏသန္ထာရကေ မာဂဏ္ဍိယံ ပရိဗ္ဗာဇကံ အာရဗ္ဘ ဘာသိတံ. မာဂဏ္ဍိယော ဘန္တေ ပရိဗ္ဗာဇကော ဘဂဝန္တံ ‘‘ဘူနဟု သမဏော ဂေါတမော’’တိ ဝဒေသိ၊ တသ္မိံ ဘန္တေ ဝဋ္ဌုသ္မိံ ဘာသိတံ.

ပုစ္ဆာ – ကထဉ္စာဝုသော ဘဂဝါ တတ္ထ မာဂဏ္ဍိယဿ ပရိဗ္ဗာဇကဿ သမနုယုဉ္ဇိတွာ သမနုယုဉ္ဇိတွာ ဓမ္မံ ဒေသေသိ.

ဝိဿဇ္ဇနာ – ‘‘စက္ခုံ ခေါ မာဂဏ္ဍိယ ရူပါရတံ ရူပသမ္မုဒိတံ၊ တံ တထာဂတဿ ဒန္တံ ဂုတ္တံ ရက္ခိတံ သံဝုတံ၊ တဿ စ သံဝရာယ ဓမ္မံ ဒေသေတီ’’တိ ဧဝမာဒိနာ ဘန္တေ တတ္ထ ဘဂဝါ မာဂဏ္ဍိယဿ ပရိဗ္ဗာဇကဿ သမနုယုဉ္ဇိတွာ သမနုယုဉ္ဇိတွာ ဓမ္မံ ဒေသေသိ.

ပုစ္ဆာ – ဧဝံ ခေါ အာဝုသော မာဂဏ္ဍိယေန ပရိဗ္ဗာဇကေန ‘‘နကိဉ္စိ ဘော ဂေါတမာ’’တိ ယထာဘူတံ ပဋိဿုတေ ကထံ ဘဂဝါ အတ္တနောပိ န ကိဉ္စိ ကေနစိပိ ဝတ္တဗ္ဗတံ ပကာသေသိ.

ဝိဿဇ္ဇနာ – ဧဝံ ခေါ ဘန္တေ မာဂဏ္ဍိယေန ပရိဗ္ဗာဇကေန နကိဉ္စိ ဘောဂေါတမာတိ ယထာဘူတံ ပဋိဿုတေ ‘‘အဟံ ခေါ ပန မာဂဏ္ဍိယ ပုဗ္ဗေ အဂါရိယဘူတော သမာနော ပဉ္စဟိ ကာမဂုဏေဟိ သမပ္ပိတော သမင်္ဂီဘူတော ပရိစာရေသိံ စက္ခုဝိညေယျဟိ ရူပေဟိ ဣဋ္ဌေဟိ မနာပေဟိ ပိယရူပေဟိ ကာမူပသံဟိတေဟိ ရဇနီယေဟီ’’တိ ဧဝမာဒိနာ ဘဂဝါ အတ္တနောပိ န ကိဉ္စိ ကေနစိပိ ဝတ္တဗ္ဗတံ ပကာသေသိ.

ပုစ္ဆာ – ဣမသ္မိံ သုတ္တေ ပရိယောသာနပုစ္ဆံ ပုစ္ဆိဿာမိ ဣမဉ္စ ပနာဝုသော ဓမ္မဒေသနံ သုတွာ မာဂဏ္ဍိယော ပရိဗ္ဗာဇကော ဣမသ္မိံ ဓမ္မဝိနယေ ပသန္နော ဟုတွာ ကီဒိသံ ပသန္နာကာရမကာသိ.

ဝိဿဇ္ဇနာ – ဣမံ စ ပန ဘန္တေ ဓမ္မဒေသနံ သုတွာ မာဂဏ္ဍိယော ပရိဗ္ဗာဇကော ‘အဘိက္ကန္တံ ဘော ဂေါတမ အဘိက္ကန္တံ ဘော ဂေါတမာ’’တိ ဧဝမာဒိနာ ဣမသ္မိံ ဓမ္မဝိနယေ ပသန္နော ပသန္နာကာရမကာသိ.

သန္ဒကသုတ္တ

ပုစ္ဆာ – သန္ဒကသုတ္တံ ပနာဝုသော ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ကေန ဘာသိတံ.

ဝိဿဇ္ဇနာ – ကောသမ္ဗိယံ ဘန္တေ သန္ဒကံ ပရိဗ္ဗာဇကံ အာရဗ္ဘ အာယသ္မတာ အာနန္ဒတ္ထေရေန ဓမ္မဘဏ္ဍာဂါရိကေန ဘာသိတံ. သန္ဒကော ဘန္တေ ပရိဗ္ဗာဇကော အာယသ္မန္တံ အာနန္ဒံ ဧတဒဝေါစ ‘‘သာဓုဝတ ဘဝန္တံယေဝ အာနန္ဒံ ပဋိဘာတု သကေ အာစရိယ ကေ ဓမ္မိကထာ’’တိ၊ တသ္မိံ ဘန္တေ ဝတ္ထုသ္မိံ ဘာသိတံ.

ပုစ္ဆာ – ကထဉ္စာဝုသော တတ္ထ စတ္တာရော အဗြဟ္မစရိယဝါသာ အာယသ္မတာ အာနန္ဒတ္ထေရေန ဓမ္မဘဏ္ဍာဂါရိကေန ဝိစာရေတွာ ပကာသိတာ.

ဝိဿဇ္ဇနာ – ဣဓ သန္ဒက ဧကစ္စော သတ္ထာ ဧဝံဝါဒီ ဟောတိ ဧဝံဒိဋ္ဌိ နတ္ထိ ဒိန္နံ၊ နတ္ထိ ယိဋ္ဌံ၊ နတ္ထိ ဟုတံ၊ နတ္ထိ သုကတဒုက္ကဋာနံ ကမ္မာနံ ဖလံဝိပါကော၊ နတ္ထိ အယံလောကော၊ နတ္ထိ ပရောလောကော၊ နတ္ထိ မာတာ၊ နတ္ထိ ပိတာ၊ နတ္ထိ သတ္တာ ဩပပါတိကာတိ

ဧဝမာဒိနာ ဘန္တေ တတ္ထ အာယသ္မတာ အာနန္ဒတ္ထေရေန ဓမ္မဘဏ္ဍာဂါရိကေန စတ္တာရော အဗြဟ္မစရိယဝါသာ ဝိစာရေတွာ ပကာသိတာ.

ပုစ္ဆာ – ကထဉ္စာဝုသော တတ္ထ စတ္တာရိ အနဿာသိကာနိ ဗြဟ္မစရိယာနိ အာယသ္မတာ အာနန္ဒတ္ထေရေန ဓမ္မဘဏ္ဍာဂါရိကေန ဝိစာရေတွာ ပကာသိတာနိ.

ဝိဿဇ္ဇနာ – ဣဓ သန္ဒက ဧကစ္စော သတ္ထာ သဗ္ဗညူ သဗ္ဗဒဿာဝီ အပရိသေသံ ဉာဏဒဿနံ ပဋိဇာနာတိ ‘‘စရတော စ မေ တိဋ္ဌတော စ သုတ္တဿ စ ဇာဂရဿ စ သတတံ သမိတံ ဉာဏဒဿနံ ပစ္စုပဋ္ဌိတ’’န္တိ ဧဝမာဒိနာ ဘန္တေ တတ္ထ အာယသ္မတာ အာနန္ဒတ္ထေရေန ဓမ္မဘဏ္ဍာဂါရိကေန စတ္တာရိ အနဿာသိကာနိ ဗြဟ္မစရိယာနိ ဝိဘဇိတွာ ပကာသိတာနိ.

ပုစ္ဆာ – အထ

ခေါ အာဝုသော သန္ဒကော ပရိဗ္ဗာဇကော အာယသ္မန္တံ အာနန္ဒတ္ထေရံ ကထံ ပုစ္ဆိ၊ တထဉ္စဿာယသ္မာနန္ဒတ္ထေရော ဗျာကာသိ.

ဝိဿဇ္ဇနာ – အထ ခေါ ဘန္တေ သန္ဒကော ပရိဗ္ဗာဇကော ‘‘သော ပန ဘော အာနန္ဒ သတ္ထာ ကိံဝါဒီ ကိံ အက္ခာယီ’’တိ ဧဝမာဒိနာ အာယသ္မန္တံ အာနန္ဒတ္ထေရံ ပုစ္ဆိ၊ အာယသ္မာ စ ဘန္တေ အာနန္ဒတ္ထေရော ‘‘ဣဓ သန္ဒက တထာဂတော လောကေ ဥပ္ပဇ္ဇတိ အရဟံ သမ္မာသမ္ဗုဒ္ဓေါ ဝိဇ္ဇာစရဏသမ္ပန္နော’’တိ ဧဝမာဒိနာ သန္ဒကဿ ပရိဗ္ဗာဇကဿ ဝိဘဇိတွာ ဝိဘဇိတွာ ဗျာကာသိ.

ပုစ္ဆာ – ဣမဉ္စ ပနာဝုသော ဓမ္မဒေသနံ သုတွာ သန္ဒကော ပရိဗ္ဗာဇကော ဣမသ္မိံ ဓမ္မဝိနယေ ပသန္နော ကီဒိသံ ပသန္နာကာရမကာသိ.

ဝိဿဇ္ဇနာ – ဣမဉ္စ ဘန္တေ ဓမ္မဒေသနံ သုတွာ သန္ဒကော ပရိဗ္ဗာဇကော ‘‘အစ္ဆရိယံ ဘော အာနန္ဒ၊ အဗ္ဘုတံ ဘော အာနန္ဒ၊ န စ နာမ သဓမ္မောက္ကံသနာ ဘဝိဿတိ၊ န ပရဓမ္မဝမ္ဘနာ၊ အာယတနေ စ ဓမ္မဒေသနာ၊ တာဝ ဗဟုကာ စ နိယျာတာရော ပညာယိဿန္တီ’’တိ ဧဝမာဒိနာ ဣမသ္မိံ ဓမ္မဝိနယေ ပသန္နော ပသန္နာကာရမကာသိ.

မဟာသကုလုဒါယီသုတ္တ

ပုစ္ဆာ – မဟာသကုလုဒါယိသုတ္တံ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ.