နမော တဿ ဘဂဝတော အရဟတော သမ္မာသမ္ဗုဒ္ဓဿ

အဘိဓမ္မပိဋက

သံဂါယနဿ ပုစ္ဆာ ဝိဿဇ္ဇနာ

ပုစ္ဆာ – ပဌမမဟာသံဂီတိကာလေ အာဝုသော ဓမ္မသံဂါဟကာ မဟာကဿပါဒယော မဟာထေရဝရာ ပေါရာဏသံဂီတိကာရာ ပဌမံ ဝိနယပိဋကံ သံဂါယိတွာ သုတ္တန္တပိဋကေ စ ဒီဃမဇ္ဈိမသံယုတ္တအင်္ဂုတ္တရသံခါတေ စတ္တာရော မဟာနိကာယေ သံဂါယိတွာ တဒနန္တရံ ကိံ နာမ ပါဝစနံ သံဂါယိံသု.

ဝိဿဇ္ဇနာ – ပဌမမဟာသံဂီတိကာလေ ဘန္တေ ဓမ္မသံဂါဟကာ မဟာကဿပါဒယော မဟာထေရဝရာ ပေါရာဏသံဂီတိကာရာ ပဌမံ ဝိနယပိဋကံ သံဂါယိတွာ သုတ္တန္တပိဋကေ စ ဒီဃမဇ္ဈိမသံယုတ္တအင်္ဂုတ္တရသံခါတေ စတ္တာရော နိကာယေ သံဂါယိတွာ တဒနန္တရံ အဘိဓမ္မပိဋကံ နာမ ပါဝစနံ သံဂါယိံသု.

ပုစ္ဆာ – ဣမိဿမ္ပိ အာဝုသော ဆဋ္ဌသံဂီတိယံ သကလဉ္စေဝ ဝိနယပိဋကံ သံဂီတံ၊ တေ စ စတ္တာရော မဟာနိကာယာ. ကာလော ဒါနိ အာဝုသော သမ္ပတ္တော အဘိဓမ္မပိဋကံ သံဂါယိတုံ၊ တသ္မာဟံ တံ တတ္ထ ပုစ္ဆိတဗ္ဗာနိ ပုစ္ဆိဿာမိ. အဘိဓမ္မော နာမေသ အာဝုသော ကေနဋ္ဌေန အဘိဓမ္မောတိ ဝုစ္စတိ.

ဝိဿဇ္ဇနာ – ဓမ္မာတိရေက ဓမ္မဝိသေသဋ္ဌေန ဘန္တေ အဘိဓမ္မောတိ ဝုစ္စတိ.

ပုစ္ဆာ – သော ပနေသ အာဝုသော အဘိဓမ္မော ကေန ကတ္ထ ကဒါ စ အဓိဂတော.

ဝိဿဇ္ဇနာ – သော ခေါ ဘန္တေ အဘိဓမ္မော သဗ္ဗညုဗုဒ္ဓေန မဟာဗောဓိမဏ္ဍမူလေ ဝေသာခပုဏ္ဏမိယံ ယထာဘူတံ အဓိဂတော.

ပုစ္ဆာ – ကတ္ထ ပနေသ အာဝုသော အဘိဓမ္မော ဘဂဝတာ ကဒါ စ ဝိစိတော.

ဝိဿဇ္ဇနာ – သော ခေါ ဘန္တေ အဘိဓမ္မော ဘဂဝတာ မဟာဗောဓိမဏ္ဍေ ရတနဃရသတ္တာဟေ ဝိစိတော.

ပုစ္ဆာ – ကတ္ထ ပနေသ အာဝုသော အဘိဓမ္မော ဘဂဝတာ ကဒါ ကဿတ္ထာယ စ ဒေသိတော.

ဝိဿဇ္ဇနာ – သော ခေါ ဘန္တေ အဘိဓမ္မော ဘဂဝတာ ဒေဝေသု တာဝတိံသေသု ပါရိစ္ဆတ္တကမူလမှိ ပဏ္ဍုကမ္ဗလသိလာယံ အဘိသမ္ဗောဓိတော သတ္တမေ ဝဿေ မာတရံ ပမုခံ ကတွာ ဒသဟိ စက္ကဝါဠသဟဿေဟိ အာဂမ္မ သန္နိသိန္နာနံ ဒေဝတာနံ စတုရောဃနိတ္ထရဏတ္ထာယ အန္တော ဝဿံ ဒေသိတော.

ပုစ္ဆာ – ကေနေသ အာဝုသော အဘိဓမ္မော ပဌမံ မနုဿလောကေ ပတိဂ္ဂဟိတော၊ ကဿ စ ပုန တေန ဒေသိတော.

ဝိဿဇ္ဇနာ – အာယသ္မတာ ဘန္တေ သာရိပုတ္တတ္ထေရေန ဓမ္မသေနာပတိနာ ဧသ အဘိဓမ္မော ပဌမံ မနုဿလောကေ ပတိဂ္ဂဟိတော၊ တေနေဝ ဘန္တေ အာယသ္မတာ သာရိပုတ္တတ္ထေရေန အတ္တနော သဒ္ဓိဝိဟာရိကာနံ ပဉ္စန္နံ ဘိက္ခုသတာနံ ဒေသိတော.

ပုစ္ဆာ – ကေ အာဝုသော သိက္ခန္တိ.

ဝိဿဇ္ဇနာ – သေခါ စ ဘန္တေ ပုထုဇ္ဇနာ ကလျာဏကာ စ သိက္ခန္တိ.

ပုစ္ဆာ – ကေ အာဝုသော သိက္ခိတသိက္ခာ.

ဝိဿဇ္ဇနာ – အရဟန္တော ဘန္တေ သိက္ခိတသိက္ခာ.

ပုစ္ဆာ – ကေ အာဝုသော ဓာရေန္တိ.

ဝိဿဇ္ဇနာ – ယေသံ ဘန္တေ ဝတ္တတိ၊ တေ ဓာရေန္တိ.

ပုစ္ဆာ – ကဿ အာဝုသော ဝစနံ.

ဝိဿဇ္ဇနာ – ဘဂဝတော ဘန္တေ ဝစနံ အရဟတော သမ္မာသမ္ဗုဒ္ဓဿ.

ပုစ္ဆာ – ကေနာဝုသော အာဘတံ.

ဝိဿဇ္ဇနာ – ပရံပရာယ ဘန္တေ အာဘတံ.

ဓမ္မသင်္ဂဏီ

ပုစ္ဆာ – သော ပနေသ အာဝုသော အဘိဓမ္မော ဓမ္မသင်္ဂဏိဝိဘင်္ဂါဒိပကရဏပရိစ္ဆေဒဝသေန သတ္တဝိဓော. တေသု ပဌမံ ဘဂဝတာ ကတရံ ပကရဏံ ဒေသိတံ.

ဝိဿဇ္ဇနာ – ပဌမံ ဘန္တေ ဓမ္မသင်္ဂဏိပကရဏံ ဘဂဝတာ ဒေသိတံ.

ပုစ္ဆာ – ဓမ္မသင်္ဂဏိယံ အာဝုသော အတ္ထိ မာတိကာ၊ အတ္ထိ ပဒဘာဇနီယံ. တေသု မာတိကံ နိက္ခိပန္တေန ဘဂဝတာ ကတံ နိက္ခိတ္တာ.

ဝိဿဇ္ဇနာ – မာတိကံ ဘန္တေ နိက္ခိပန္တေန ဘဂဝတာ ‘‘ကုသလာ ဓမ္မာ အကုသလာ ဓမ္မာ အဗျာကတာ ဓမ္မာ. သုခါယ ဝေဒနာယ သမ္ပယုတ္တာ ဓမ္မာ ဒုက္ခာယ ဝေဒနာယ သမ္ပယုတ္တာ ဓမ္မာ အဒုက္ခမသုခါယ ဝေဒနာယ သမ္ပယုတ္တာ ဓမ္မာ. ဝိပါကာ ဓမ္မာ ဝိပါကဓမ္မဓမ္မာ နေဝဝိပါကနဝိပါကဓမ္မဓမ္မာ’’တိ ဧဝမာဒိနာ ဒွါဝီသတိယာ တိကာနံ ဝသေန. ‘‘ဟေတူ ဓမ္မာ န ဟေတူ ဓမ္မာ. သဟေတုကာ ဓမ္မာ အဟေတုကာ ဓမ္မာ.

ဟေတုသမ္ပယုတ္တာ ဓမ္မာ ဟေတုဝိပ္ပယုတ္တာ ဓမ္မာ. ဟေတူ စေဝ ဓမ္မာ သဟေတုကာ စ သဟေတုကာ စေဝ ဓမ္မာ န စ ဟေတူ. ဟေတူ စေဝ ဓမ္မာ ဟေတုသမ္ပယုတ္တာ စ ဟေတုသမ္ပယုတ္တာ စေဝ ဓမ္မာ န စ ဟေတူ. န ဟေတူ ခေါ ပန ဓမ္မာ သဟေတုကာပိ အဟေတုကာပီ’’တိ ဧဝမာဒိနာ ဒုကသတာနဉ္စ ဝသေန မာတိကာ နိက္ခိတ္တာ.

ကာမာဝစရကုသလ

ပုစ္ဆာ – အဘိဓမ္မပိဋကေ အာဝုသော ဓမ္မသင်္ဂဏိယံ ပဒဘာဇနီယေ စိတ္တုပ္ပါဒကဏ္ဍေ ကုသလာ ဓမ္မာတိပဒဿ အတ္ထံ ဝိဘဇန္တေန ဘဂဝတာ ကထံ ကာမာဝစရကုသလံ ဝိတ္ထာရတော ဝိဘဇိတွာ ဒေသိတံ.

ဝိဿဇ္ဇနာ – အဘိဓမ္မပိဋကေ ဘန္တေ ဓမ္မသင်္ဂဏိပကရဏေ စိတ္တုပ္ပါဒကဏ္ဍေ ကုသလာ ဓမ္မာတိ ပဒဿ အတ္ထံ ဝိဘဇန္တေန ဘဂဝတာ ‘‘ကတမေ ဓမ္မာ ကုသလာ. ယသ္မိံ သမယေ ကာမာဝစရံ ကုသလံ စိတ္တံ ဥပ္ပန္နံ ဟောတိ သောမနဿသဟဂတံ ဉာဏသမ္ပယုတ္တံ ရူပါရမ္မဏံ ဝါ သဒ္ဒါရမ္မဏံ ဝါ ဂန္ဓာရမ္မဏံ ဝါ ရသာရမ္မဏံ ဝါ ဖောဋ္ဌဗ္ဗာရမ္မဏံ ဝါ ဓမ္မာရမ္မဏံ ဝါ ယံ ယံ ဝါ ပနာရဗ္ဘ. တသ္မိံ သမယေ ဖဿော ဟောတိ ဝေဒနာ ဟောတိ သညာ ဟောတိ စေတနာ ဟောတိ စိတ္တံ ဟောတိ ဝိတက္ကော ဟောတိ ဝိစာရော ဟောတိ ပီတိ ဟောတိ သုခံ ဟောတိ စိတ္တဿေကဂ္ဂတာ ဟောတီ’’တိ ဧဝမာဒိနာ ကာမာဝစရကုသလံ တီဟိ မဟာဝါရေဟိ ဝိဘဇိတွာ ဒေသိတံ.

ရူပါဝစရကုသလ

ပုစ္ဆာ – အဘိဓမ္မပိဋကေ အာဝုသော ဓမ္မသင်္ဂဏီပါဠိယံ စိတ္တုပ္ပါဒကဏ္ဍေ ကုသလာ ဓမ္မာတိ ပဒဿ အတ္ထံ ဝိဘဇန္တေန ဘဂဝတာ ကထံ ရူပါဝစရကုသလဉ္စ အရူပါဝစရကုသလဉ္စ ဝိတ္ထာရတော ဝိဘဇိတွာ ဒေသိတံ.

ဝိဿဇ္ဇနာ – ရူပါဝစရကုသလဉ္စ အရူပါဝစရကုသလဉ္စ ဘန္တေ ‘‘ကတမေ ဓမ္မာ ကုသလာ. ယသ္မိံ သမယေ ရူပူပပတ္တိယာ မဂ္ဂံ ဘာဝေတိ ဝိဝိစ္စေဝ ကာမေဟိ ဝိဝိစ္စ အကုသလေဟိ ဓမ္မေဟိ သဝိတက္ကံ သဝိတက္ကံ ဝိဝေကဇံ ပီတိသုခံ ပဌမံ ဈာနံ ဥပသမ္ပဇ္ဇ ဝိဟရတိ ပထဝီကသိဏ’’န္တိ ဧဝမာဒိနာ ဘဂဝတာ ဝိတ္ထာရတော ဒေသိတံ.

လောကုတ္တရာကုသလ

ပုစ္ဆာ – အဘိဓမ္မပိဋကေ အာဝုသော ဓမ္မသင်္ဂဏီပါဠိယံ စိတ္တုပ္ပါဒကဏ္ဍေ ကုသလာ ဓမ္မာတိ ပဒဿ အတ္ထံ ဝိဘဇန္တေန ဘဂဝတာ ကထံ လောကုတ္တရကုသလံ ဝိတ္ထာရတော ဝိဘဇိတွာ ဒေသိတံ.

ဝိဿဇ္ဇနာ – အဘိဓမ္မပိဋကေ ဘန္တေ ဓမ္မသင်္ဂဏိယံ စိတ္တုပ္ပါဒကဏ္ဍေ ကုသလာ ဓမ္မာတိ ပဒဿ အတ္ထံ ဝိဘဇန္တေန ဘဂဝတာ ‘‘ကတမေ ဓမ္မာ ကုသလာ. ယသ္မိံ သမယေ လောကုတ္တရံ ဈာနံ ဘာဝေတိ နိယျာနိကံ အပစယဂါမိံ ဒိဋ္ဌိဂတာနံ ပဟာနာယ ပဌမာယ ဘူမိယာ ပတ္တိယာ ဝိဝိစ္စေဝ ကာမေဟိ။ပေ။ ပဌမံ ဈာနံ ဥပသမ္ပဇ္ဇ ဝိဟရတိ ဒုက္ခပဋိပဒံ ဒန္ဓာဘိည’’န္တိ ဧဝမာဒိနာ ဘဂဝတာ လောကုတ္တရကုသလံ ဝိတ္ထာရတော ဝိဘဇိတွာ ဒေသိတံ.

အကုသလ

ပုစ္ဆာ – တတ္ထေဝ အာဝုသော အကုသလာ ဓမ္မာတိ မာတိကာပဒဿ အတ္ထံ ဝိဘဇန္တေန ဘဂဝတာ ကထံ အကုသလံ ဝိတ္ထာရတော ဝိဘဇိတွာ ဒေသိတံ.

ဝိဿဇ္ဇနာ – တတ္ထေဝ ဘန္တေ အကုသလာ ဓမ္မာတိ မာတိကာပဒဿ အတ္ထံ ဝိဘဇန္တေန ဘဂဝတာ ‘‘ကတမေ ဓမ္မာ အကုသလာ. ယသ္မိံ သမယေ အကုသလံ စိတ္တံ ဥပ္ပန္နံ ဟောတိ သောမနဿသဟဂတံ ဒိဋ္ဌိဂတသမ္ပယုတ္တံ ရူပါရမ္မဏံ ဝါ သဒ္ဓါရမ္မဏံ ဝါ ဂန္ဓာရမ္မဏံ ဝါ ရသာရမ္မဏံ ဝါ ဖောဋ္ဌဗ္ဗာရမ္မဏံ ဝါ ဓမ္မာရမ္မဏံ ဝါ ယံ ယံ ဝါ ပနာရဗ္ဘ. တသ္မိံ သမယေ ဖဿော ဟောတိ ဝေဒနာ ဟောတိ သညာ ဟောတိ စေတနာ ဟောတိ စိတ္တံ ဟောတီ’’တိ ဧဝမာဒိနာ အကုသလံ ဝိတ္ထာရတော ဝိဘဇိတွာ ဒေသိတံ.

အဗျာကတ

ပုစ္ဆာ – အဘိဓမ္မပိဋကေ အာဝုသော ဓမ္မသင်္ဂဏီပါဠိယံ စိတ္တုပ္ပါဒကဏ္ဍရူပကဏ္ဍေသု အဗျာကတာ ဓမ္မာတိ မာတိကာပဒဿ အတ္ထံ ဝိဘဇန္တေန ဘဂဝတာ ကထံ အဗျာကတာ ဓမ္မာ ဝိတ္ထာရတော ဝိဘဇိတွာ ဒေသိတာ.

ဝိဿဇ္ဇနာ – အဘိဓမ္မပိဋကေ ဘန္တေ ဓမ္မသင်္ဂဏိယံ အဗျာကတာ ဓမ္မာတိ ပဒဿ အတ္ထံ ဝိဘဇန္တေန ဘဂဝတာ ‘‘ကတမေ ဓမ္မာ အဗျာကတာ. ယသ္မိံ သမယေ ကာမာဝစရဿ ကုသလဿ ကမ္မဿ ကတတ္တာ ဥပစိတတ္တာ ဝိပါကံ စက္ခုဝိညာဏံ ဥပ္ပန္နံ ဟောတိ ဥပေက္ခာသဟဂတံ ရူပါရမ္မဏံ. တသ္မိံ သမယေ ဖဿော ဟောတိ ဝေဒနာ ဟောတိ သညာ ဟောတိ စေတနာ ဟောတိ စိတ္တံ ဟောတီ’’တိ ဧဝမာဒိနာ စ စိတ္တုပ္ပါဒကဏ္ဍေ၊ ရူပကဏ္ဍေ စ ‘‘ကတမေ ဓမ္မာ အဗျာကတာ. ကုသလာကုသလာနံ ဓမ္မာနံ ဝိပါကာ ကာမာဝစရာ ရူပါဝစရာ အရူပါဝစရာ အပရိယာပန္နာ ဝေဒနာက္ခန္ဓော သညာက္ခန္ဓော သင်္ခါရက္ခန္ဓော ဝိညာဏက္ခန္ဓော. ယေ စ ဓမ္မာ ကိရိယာ နေဝ ကုသလာ နာကုသလာ န စ ကမ္မဝိပါကာ. သဗ္ဗဉ္စ ရူပံ အသင်္ခတာ စ ဓာတု. ဣမေ ဓမ္မာ အဗျာကတာ’’တိ ဧဝမာဒိနာ စ အဗျာကတာ ဓမ္မာ ဝိတ္ထာရတော ဝိဘဇိတွာ ဒေသိတာ.

ဝိဘင်္ဂ

ပုစ္ဆာ – သတ္တသု အာဝုသော အဘိဓမ္မပ္ပကရဏေသု ဝိဘင်္ဂပ္ပကရဏေ ဘဂဝတာ ကတိ ဝိဘင်္ဂါ ဒေသိတာ.

ဝိဿဇ္ဇနာ – အဘိဓမ္မပိဋကေ ဘန္တေ သတ္တသု ပကရဏေသု ဒုတိယေ ဝိဘင်္ဂပ္ပကရဏေ ခန္ဓဝိဘင်္ဂေါ အာယတနဝိဘင်္ဂေါ ဓာတုဝိဘင်္ဂေါ သစ္စဝိဘင်္ဂေါ ဣန္ဒြိယဝိဘင်္ဂေါ ပဋိစ္စသမုပ္ပါဒဝိဘင်္ဂေါ သတိပဋ္ဌာနဝိဘင်္ဂေါ သမ္မပ္ပဓာနဝိဘင်္ဂေါ ဣဒ္ဓိပါဒဝိဘင်္ဂေါ ဗောဇ္ဈင်္ဂဝိဘင်္ဂေါ မဂ္ဂင်္ဂဝိဘင်္ဂေါ ဈာနဝိဘင်္ဂေါ အပ္ပမညာဝိဘင်္ဂေါ သိက္ခာပဒဝိဘင်္ဂေါ ပဋိသမ္ဘိဒါဝိဘင်္ဂေါ ဉာဏဝိဘင်္ဂေါ ခုဒ္ဒကဝတ္ထုဝိဘင်္ဂေါ ဓမ္မဟဒယဝိဘင်္ဂေါတိ ဘဂဝတာ အဋ္ဌာရသ ဝိဘင်္ဂါ ဒေသိတာ.

ခန္ဓဝိဘင်္ဂ

ပုစ္ဆာ – တေသု အာဝုသော အဋ္ဌာရသသု ဝိဘင်္ဂေသု ပဌမေ ခန္ဓဝိဘင်္ဂေ ဘဂဝတာ ကထံ ခန္ဓာ ဝိတ္ထာရတော ဝိဘဇိတွာ ဒေသိတာ.

ဝိဿဇ္ဇနာ – တေသု ဘန္တေ အဋ္ဌာရသသု ဝိဘင်္ဂေသု ပဌမေ ခန္ဓဝိဘင်္ဂေ ‘‘ပဉ္စက္ခန္ဓာ ရူပက္ခန္ဓော ဝေဒနာက္ခန္ဓော သညာက္ခန္ဓော သင်္ခါရက္ခန္ဓော ဝိညာဏက္ခန္ဓော. တတ္ထ ကတမော ရူပက္ခန္ဓော၊ ယံကိဉ္စိ ရူပံ အတီတာနာဂတပစ္စုပ္ပန္နံ အဇ္ဈတ္တံ ဝါ ဗဟိဒ္ဓါ ဝါ ဩဠာရိကံ ဝါ သုခုမံ ဝါ ဟီနံ ဝါ ပဏီတံ ဝါ ယံ ဒူရေ သန္တိကေ ဝါ၊ တဒေကဇ္ဈံ အဘိသညူဟိတွာ အဘိသင်္ခိပိတွာ အယံ ဝုစ္စတိ ရူပက္ခန္ဓော’’တိ ဧဝမာဒိနာ သုတ္တန္တဘာဇနီယအဘိဓမ္မဘာဇနီယပဉှာပုစ္ဆကသင်္ခါတေဟိ တီဟိ မဟာနယေဟိ ဘဂဝတာ ခန္ဓာ ဝိတ္ထာရတော ဝိဘဇိတွာ ဒေသိတာ.

အာယတနဝိဘင်္ဂ

ပုစ္ဆာ – ဒုတိယေ ပန အာဝုသော အာယတနဝိဘင်္ဂေ ဘဂဝတာ ကထံ အာယတနာနိ ဝိတ္ထာရတော ဝိဘဇိတွာ ဒေသိတာနိ.

ဝိဿဇ္ဇနာ – ဒုတိယေ ဘန္တေ အာယတနဝိဘင်္ဂေ ‘‘ဒွါဒသာယတနာနိ စက္ခာယတနံ ရူပါယတနံ သောတာယတနံ သဒ္ဒါယတနံ ဃာနာယတနံ ဂန္ဓာယတနံ ဇိဝှါယတနံ ရသာယတနံ ကာယာယတနံ ဖောဋ္ဌဗ္ဗာယတနံ မနာယတနံ ဓမ္မာယတနံ. စက္ခုံ အနိစ္စံ ဒုက္ခံ အနတ္တာ ဝိပရိဏာမဓမ္မံ၊ ရူပါ အနိစ္စာ ဒုက္ခာ အနတ္တာ ဝိပရိဏာမဓမ္မာ’’တိ ဧဝမာဒိနာ ဘဂဝတာ သုတ္တန္တဘာဇနီယအဘိဓမ္မဘာဇနီယပဉှာပုစ္ဆကသင်္ခါတေဟိ တီဟေဝ အာယတနာနိ ဝိတ္ထာရတော ဝိဘဇိတွာ ဒေသိတာနိ.

ဓာတုဝိဘင်္ဂ

ပုစ္ဆာ – အဘိဓမ္မပိဋကေ အာဝုသော ဝိဘင်္ဂပ္ပကရဏေ တတိယေ ဓာတုဝိဘင်္ဂေ ဘဂဝတာ ကထံ ဓာတုယော ဝိတ္ထာရေန ဝိဘဇိတွာ ဒေသိတာ.

ဝိဿဇ္ဇနာ – တတိယေ ဘန္တေ ဓာတုဝိဘင်္ဂေ ‘‘ဆ ဓာတုယော ပထဝီဓာတု အာပေါဓာတု တေဇောဓာတု ဝါယောဓာတု အာကာသဓာတု ဝိညာဏဓာတူ’’တိ ဘန္တေ သုတ္တန္တဘာဇနီယအဘိဓမ္မဘာဇနီယပဉှာပုစ္ဆကသင်္ခါတေဟိ တီဟိ မဟာနယေဟိ ဘဂဝတာ ဓာတုယော ဝိတ္ထာရတော ဝိဘဇိတွာ ဒေသိတာ.

သစ္စဝိဘင်္ဂ

ပုစ္ဆာ – စတုတ္ထေ ပန အာဝုသော သစ္စဝိဘင်္ဂေ ဘဂဝတာ ကထံ သစ္စာနိ ဝိတ္ထာရတော ဝိဘဇိတွာ ဒေသိတာနိ.

ဝိဿဇ္ဇနာ – စတုတ္ထေ ဘန္တေ သစ္စဝိဘင်္ဂေ ‘‘စတ္တာရိ အရိယသစ္စာနိ ဒုက္ခံ အရိယသစ္စံ၊ ဒုက္ခသမုဒယံ အရိယသစ္စံ၊ ဒုက္ခနိရောဓံ အရိယသစ္စံ၊ ဒုက္ခနိရောဓဂါမိနီ ပဋိပဒါ အရိယသစ္စံ. တတ္ထ ကတမံ ဒုက္ခံ အရိယသစ္စံ၊ ဇာတိပိ ဒုက္ခာ၊ ဇရာပိ ဒုက္ခာ၊ မရဏမ္ပိ ဒုက္ခံ၊ သောကပရိဒေဝဒုက္ခဒေါမနဿုပါယာသာပိ ဒုက္ခာ၊ အပ္ပိယေဟိ သမ္ပယောဂေါ ဒုက္ခော၊ ပိယေဟိ ဝိပ္ပယောဂေါ ဒုက္ခော၊ ယမ္ပိစ္ဆံ န လဘတိ၊ တမ္ပိ ဒုက္ခံ၊ သံခိတ္တေန ပဉ္စုပါဒါနက္ခန္ဓာ ဒုက္ခာ’’တိ ဧဝမာဒိနာ သုတ္တန္တဘာဇနီယအဘိဓမ္မဘာဇနီယပဉှာပုစ္ဆကသင်္ခါတေဟိ တီဟိ မဟာနယေဟိ ဘဂဝတာ သစ္စာနိ ဝိတ္ထာရတော ဝိဘဇိတွာ ဒေသိတာနိ.

ဣန္ဒြိယဝိဘင်္ဂ

ပုစ္ဆာ – ပဉ္စမေ ပန အာဝုသော ဣန္ဒြိယဝိဘင်္ဂေ ဘဂဝတာ ကထံ ဣန္ဒြိယာနိ ဝိတ္ထာရတော ဝိဘဇိတွာ ဒေသိတာနိ.

ဝိဿဇ္ဇနာ – ပဉ္စမေ ပန ဘန္တေ ဣန္ဒြိယဝိဘင်္ဂေ ‘‘ဗာဝီသတိန္ဒြိယာနိ စက္ခုန္ဒြိယံ သောတိန္ဒြိယံ ဃာနိန္ဒြိယံ ဇိဝှိန္ဒြိယံ ကာယိန္ဒြိယံ မနိန္ဒြိယံ။ပေ။ အညာတာဝိန္ဒြိယ’’န္တိ ဧဝမာဒိနာ အဘိဓမ္မဘာဇနီယပဉှာပုစ္ဆကသင်္ခါတေဟိ ဒွီဟိ မဟာနယေဟိ ဘဂဝတာ ဣန္ဒြိယာနိ ဝိတ္ထာရတော ဝိဘဇိတွာ ဒေသိတာနိ.

ပဋိစ္စသမုပ္ပါဒ ဝိဘင်္ဂ

ပုစ္ဆာ – အဘိဓမ္မပိဋကေ အာဝုသော ဝိဘင်္ဂပ္ပကရဏေ ဆဋ္ဌေ ပဋိစ္စသမုပ္ပါဒဝိဘင်္ဂေ ဘဂဝတာ ကထံ ပဋိစ္စသမုပ္ပါဒေါ ဝိတ္ထာရေန ဝိဘဇိတွာ ဒေသိတော.

ဝိဿဇ္ဇနာ – ဆဋ္ဌေ ဘန္တေ ပဋိစ္စသမုပ္ပါဒဝိဘင်္ဂေ ‘‘အဝိဇ္ဇာပစ္စယာ သင်္ခါရာ။ပေ။ သမုဒယော ဟောတီ’’တိ ဧဝမာဒိနာ ဘဂဝတာ ပဋိစ္စသမုပ္ပါဒေါ သုတ္တန္တဘာဇနီယအဘိဓမ္မဘာဇနီယသင်္ခါတေဟိ ဒွီဟိ မဟာနယေဟိ ဝိတ္ထာရတော ဝိဘဇိတွာ ဒေသိတော.

သတိပဋ္ဌာနဝိဘင်္ဂ

ပုစ္ဆာ – သတ္တမေ ပန အာဝုသော သတိပဋ္ဌာနဝိဘင်္ဂေ ဘဂဝတာ ကထံ သတိပဋ္ဌာနာ ဝိတ္ထာရတော ဝိဘဇိတွာ ဒေသိတာ.

ဝိဿဇ္ဇနာ – သတ္တမေ ဘန္တေ သတိပဋ္ဌာနဝိဘင်္ဂေ ‘‘စတ္တာရော သတိပဋ္ဌာနာ ဣဓ ဘိက္ခု အဇ္ဈတ္တံ ကာယေ ကာယာနုပဿီ ဝိဟရတိ၊ ဗဟိဒ္ဓါ ကာယေ ကာယာနုပဿီ ဝိဟရတိ၊ အဇ္ဈတ္တဗဟိဒ္ဓါ ကာယေ ကာယာနုပဿီ ဝိဟရတိ အာတာပီ သမ္ပဇာနော သတိမာ ဝိနေယျ လောကေ အဘိဇ္ဈာဒေါမနဿ’’န္တိ ဧဝမာဒိနာ သုတ္တန္တဘာဇနီယအဘိဓမ္မဘာဇနီယပဉှာပုစ္ဆကသင်္ခါတေဟိ တီဟိ မဟာနယေဟိ ဘဂဝတာ သတိပဋ္ဌာနာ ဝိတ္ထာရတော ဝိဘဇိတွာ ဒေသိတာ.

သမ္မပ္ပဓာနဝိဘင်္ဂ

ပုစ္ဆာ – အဋ္ဌမေ ပန အာဝုသော သမ္မပ္ပဓာနဝိဘင်္ဂေ ဘဂဝတာ ကထံ သမ္မပ္ပဓာနာ ဝိတ္ထာရတော ဝိဘဇိတွာ ဒေသိတာ.

ဝိဿဇ္ဇနာ – အဋ္ဌမေ ဘန္တေ သမ္မပ္ပဓာနဝိဘင်္ဂေ ‘‘စတ္တာရော သမ္မပ္ပဓာနာ ဣဓ ဘိက္ခု အနုပ္ပန္နာနံ ပါပကာနံ အကုသလာနံ ဓမ္မာနံ အနုပ္ပါဒါယ ဆန္ဒံ ဇနေတိ ဝါယမတိ ဝီရိယံ အာရဘတိ စိတ္တံ ပဂ္ဂဏှာတိ ပဒဟတိ၊ ဥပ္ပန္နာနံ ပါပကာနံ အကုသလာနံ ဓမ္မာနံ ပဟာနာယ ဆန္ဒံ ဇနေတိ ဝါယမတိ ဝီရိယံ အာရဘတိ စိတ္တံ ပဂ္ဂဏှာတိ ပဒဟတိ၊ အနုပ္ပန္နာနံ ကုသလာနံ ဓမ္မာနံ ဥပ္ပါဒါယ ဆန္ဒံ ဇနေတိ ဝါယမတိ ဝီရိယံ အာရဘတိ စိတ္တံ ပဂ္ဂဏှာတိ ပဒဟတိ၊ ဥပ္ပန္နာနံ ကုသလာနံ ဓမ္မာနံ ဌိတိယာ အသမ္မောသာယ ဘိယျောဘာဝါယ ဝေပုလ္လာယ ဘာဝနာယ ပါရိပူရိယာ ဆန္ဒံ ဇနေတိ ဝါယမတိ ဝီရိယံ အာရဘတိ စိတ္တံ ပဂ္ဂဏှာတိ ပဒဟတီ’’တိ ဧဝမာဒိနာ ဘဂဝတာ သမ္မပ္ပဓာနာ ဝိတ္ထာရတော ဝိဘဇိတွာ ဒေသိတာ.

ဣဒ္ဓိပါဒဝိဘင်္ဂ

ပုစ္ဆာ – နဝမေ ပန အာဝုသော ဣဒ္ဓိပါဒဝိဘင်္ဂေ ဘဂဝတာ ကထံ ဣဒ္ဓိပါဒါ ဝိတ္ထာရတော ဝိဘဇိတွာ ဒေသိတာ.

ဝိဿဇ္ဇနာ – နဝမေ ဘန္တေ ဣဒ္ဓိပါဒဝိဘင်္ဂေ ‘‘စတ္တာရော ဣဒ္ဓိပါဒါ ဣဓ ဘိက္ခု ဆန္ဒသမာဓိပဓာနသင်္ခါရသမန္နာဂတံ ဣဒ္ဓိပါဒံ ဘာဝေတိ။ပေ။ ဝီမံသာသမာဓိပဓာနသင်္ခါရသမန္နာဂတံ ဣဒ္ဓိပါဒံ ဘာဝေတီ’’တိ ဧဝမာဒိနာ တီဟိ မဟာနယေဟိ ဘဂဝတာ ဣဒ္ဓိပါဒါ ဝိတ္ထာရတော ဝိဘဇိတွာ ဒေသိတာ.

ဗောဇ္ဈင်္ဂဝိဘင်္ဂ

ပုစ္ဆာ – အဘိဓမ္မပိဋကေ အာဝုသော ဝိဘင်္ဂပ္ပကရဏေ ဒသမေ ဗောဇ္ဈင်္ဂဝိဘင်္ဂေ ဘဂဝတာ ကထံ ဗောဇ္ဈင်္ဂါ ဝိတ္ထာရတော ဝိဘဇိတွာ ဒေသိတာ.

ဝိဿဇ္ဇနာ – ဒသမေ ဘန္တေ ဗောဇ္ဈင်္ဂဝိဘင်္ဂေ ‘‘သတ္တ ဗောဇ္ဈင်္ဂါ သတိသမ္ဗောဇ္ဈင်္ဂေါ ဓမ္မဝိစယသမ္ဗောဇ္ဈင်္ဂေါ ဝီရိယသမ္ဗောဇ္ဈင်္ဂေါ ပီတိသမ္ဗောဇ္ဈင်္ဂေါ ပဿဒ္ဓိသမ္ဗောဇ္ဈင်္ဂေါ သမာဓိသမ္ဗောဇ္ဈင်္ဂေါ ဥပေက္ခာသမ္ဗောဇ္ဈင်္ဂေါ. တတ္ထ ကတမော သတိသမ္ဗောဇ္ဈင်္ဂေါ၊ ဣဓ ဘိက္ခု သတိမာ ဟောတိ ပရမေန သတိနေပက္ကေန သမန္နာဂတော စိရကတမ္ပိ စိရဘာသိတမ္ပိ သရိတာ ဟောတိ အနုဿရိတာ၊ အယံ ဝုစ္စတိ သတိသမ္ဗောဇ္ဈင်္ဂေါ’’တိ ဧဝမာဒိနာ ဘဂဝတာ သုတ္တန္တဘာဇနီယအဘိဓမ္မဘာဇနီယပဉှာပုစ္ဆကသင်္ခါတေဟိ တီဟိ နယေဟိ ဗောဇ္ဈင်္ဂါ ဝိတ္ထာရတော ဝိဘဇိတွာ ဒေသိတာ.

မဂ္ဂင်္ဂဝိဘင်္ဂ

ပုစ္ဆာ – ဧကာဒသမေ ပန အာဝုသော မဂ္ဂင်္ဂဝိဘင်္ဂေ ဘဂဝတာ ကထံ မဂ္ဂင်္ဂါ ဝိတ္ထာရတော ဝိဘဇိတွာ ဒေသိတာ.

ဝိဿဇ္ဇနာ – ဧကာဒသမေ ဘန္တေ မဂ္ဂင်္ဂဝိဘင်္ဂေ ‘‘အရိယော အဋ္ဌင်္ဂိကော မဂ္ဂေါ. သေယျထိဒံ၊ သမ္မာဒိဋ္ဌိ သမ္မာသင်္ကပ္ပေါ သမ္မာဝါစာ သမ္မာကမ္မန္တော သမ္မာအာဇီဝေါ သမ္မာဝါယာမော သမ္မာသတိ သမ္မာသမာဓီ’’တိ ဧဝမာဒိနာ ဘဂဝတာ သုတ္တန္တဘာဇနီယအဘိဓမ္မဘာဇနီယပဉှာပုစ္ဆကသင်္ခါတေဟိ တီဟိ မဟာနယေဟိ မဂ္ဂင်္ဂါ ဝိတ္ထာရတော ဝိဘဇိတွာ ဒေသိတာ.

ဈာနဝိဘင်္ဂ

ပုစ္ဆာ – ဒွါဒသမော ပန အာဝုသော ဈာနဝိဘင်္ဂေါ ဘဂဝတာ ကထံ ဝိတ္ထာရေန ဝိဘဇိတွာ ဒေသိတော.

ဝိဿဇ္ဇနာ – ဒွါဒသမော ဘန္တေ ဈာနဝိဘင်္ဂေါ ‘‘ဣဓ ဘိက္ခု ပါတိမောက္ခသံဝရသံဝုတော ဝိဟရတိ အာစာရဂေါစရသမ္ပန္နော အဏုမတ္တေသု ဝဇ္ဇေသု ဘယဒဿာဝီ သမာဒါယ သိက္ခတိ သိက္ခာပဒေသု ဣန္ဒြိယေသု ဂုတ္တဒွါရော ဘောဇနေ မတ္တညူ ပုဗ္ဗရတ္တာပရရတ္တံ ဇာဂရိယာနုယောဂမနုယုတ္တော’’တိ ဧဝမာဒိနာ ဘဂဝတာ ဝိတ္ထာရတော ဝိဘဇိတွာ ဒေသိတော.

အပ္ပမညာဝိဘင်္ဂ

ပုစ္ဆာ – တေရသမေ ပန အာဝုသော အပ္ပမညာဝိဘင်္ဂေ ဘဂဝတာ ကထံ အပ္ပမညာယော ဝိတ္ထာရတော ဝိဘဇိတွာ ဒေသိတာ.

ဝိဿဇ္ဇနာ – တေရသမေ ဘန္တေ အပ္ပမညာဝိဘင်္ဂေ ‘‘စတဿော အပ္ပမညာယော ဣဓ ဘိက္ခု မေတ္တာသဟဂတေန စေတသာ ဧကံ ဒိသံ ဖရိတွာ ဝိဟရတိ၊ တထာ ဒုတိယံ. တထာ တတိယံ. တထာ စတုတ္ထံ. ဣတိ ဥဒ္ဓမဓော တိရိယံ သဗ္ဗဓိ သဗ္ဗတ္တတာယ သဗ္ဗာဝန္တံ လောကံ မေတ္တာသဟဂတေန စေတသာ ဝိပုလေန မဟဂ္ဂတေန အပ္ပမာဏေန အဝေရေန အဗျာပဇ္ဇေန ဖရိတွာ ဝိဟရတီ’’တိ ဧဝမာဒိနာ ဘဂဝတာ သုတ္တန္တဘာဇနီယအဘိဓမ္မဘာဇနီယပဉှာပုစ္ဆကသင်္ခါတေဟိ တီဟိ မဟာနယေဟိ အပ္ပမညာယော ဝိတ္ထာရတော ဝိဘဇိတွာ ဒေသိတာ.

သိက္ခာပဒဝိဘင်္ဂ

ပုစ္ဆာ – အဘိဓမ္မပိဋကေ အာဝုသော ဝိဘင်္ဂပ္ပကရဏေ စုဒ္ဒသမေ သိက္ခာပဒဝိဘင်္ဂေ ဘဂဝတာ ကထံ သိက္ခာပဒါနိ ဝိတ္ထာရတော ဝိဘဇိတွာ ဒေသိတာနိ.

ဝိဿဇ္ဇနာ – စုဒ္ဒသမေ ဘန္တေ သိက္ခာပဒဝိဘင်္ဂေ ‘‘ပဉ္စ သိက္ခာပဒါနိ ပါဏာတိပါတာ ဝေရမဏီ သိက္ခာပဒံ၊ အဒိန္နာဒါနာ ဝေရမဏီ သိက္ခာပဒံ၊ ကာမေသုမိစ္ဆာစာရာ ဝေရမဏီ သိက္ခာပဒံ၊ မုသာဝါဒါ ဝေရမဏီ သိက္ခာပဒံ၊ သုရာမေရယမဇ္ဇပမာဒဋ္ဌာနာ ဝေရမဏီ သိက္ခာပဒံ. တတ္ထ ကတမံ ပါဏာတိပါတာ ဝေရမဏီ သိက္ခာပဒံ၊ ယသ္မိံ သမယေ ကာမာဝစရံ ကုသလံ စိတ္တံ ဥပ္ပန္နံ ဟောတိ သောမနဿသဟဂတံ ဉာဏသမ္ပယုတ္တံ ပါဏာတိပါတာ ဝိရမန္တဿာ’’တိ ဧဝမာဒိနာ အဘိဓမ္မဘာဇနီယပဉှာပုစ္ဆကသင်္ခါတေဟိ ဒွီဟိ မဟာနယေဟိ ဘဂဝတာ သိက္ခာပဒါနိ ဝိတ္ထာရတော ဝိဘဇိတွာ ဒေသိတာနိ.

ပဋိသမ္ဘိဒါဝိဘင်္ဂ

ပုစ္ဆာ – ပန္နရသမေ ပန အာဝုသော ပဋိသမ္ဘိဒါဝိဘင်္ဂေ ဘဂဝတာ ကထံ ပဋိသမ္ဘိဒါယော ဝိတ္ထာရတော ဝိဘဇိတွာ ဒေသိတာ.

ဝိဿဇ္ဇနာ – ပန္နရသမေ ဘန္တေ ပဋိသမ္ဘိဒါဝိဘင်္ဂေ ‘‘စတဿော ပဋိသမ္ဘိဒါ အတ္ထပဋိသမ္ဘိဒါ ဓမ္မပဋိသမ္ဘိဒါ နိရုတ္တိပဋိသမ္ဘိဒါ ပဋိဘာနပဋိသမ္ဘိဒါ. အတ္ထေ ဉာဏံ အတ္ထပဋိသမ္ဘိဒါ၊ ဓမ္မေ ဉာဏံ ဓမ္မပဋိသမ္ဘိဒါ၊ တတြ ဓမ္မနိရုတ္တာဘိလာပေ ဉာဏံ နိရုတ္တိပဋိသမ္ဘိဒါ၊ ဉာဏေသု ဉာဏံ ပဋိဘာနပဋိသမ္ဘိဒါ’’တိ ဧဝမာဒိနာ ဘဂဝတာ စတဿော ပဋိသမ္ဘိဒါယော သုတ္တန္တဘာဇနီယအဘိဓမ္မဘာဇနီယပဉှာပုစ္ဆကသင်္ခါတေဟိ တီဟိ မဟာနယေဟိ ဝိတ္ထာရတော ဝိဘဇိတွာ ဒေသိတာ.

ဉာဏဝိဘင်္ဂ

ပုစ္ဆာ – သောဠသမေ ပန အာဝုသော ဉာဏဝိဘင်္ဂေ ဘဂဝတာ ကထံ ဉာဏာနိ ဝိတ္ထာရတော ဝိဘဇိတွာ ဒေသိတာနိ.

ဝိဿဇ္ဇနာ – သောဠသမေ ဘန္တေ ဉာဏဝိဘင်္ဂေ ‘‘ဧကဝိဓေန ဉာဏဝတ္ထု ပဉ္စဝိညာဏာ န ဟေတူ၊ အဟေတုကာ၊ ဟေတုဝိပ္ပယုတ္တာ၊ သပ္ပစ္စယာ၊ သင်္ခတာ၊ အရူပါ၊ လောကိယာ၊ သာသဝါ’’တိ ဧဝမာဒိနာ ဧကကတော ပဋ္ဌာယ ယာဝ ဒသကာ ဘဂဝတာ ဉာဏာနိ ဝိတ္ထာရတော ဝိဘဇိတွာ ဒေသိတာနိ.

ခုဒ္ဒကဝတ္ထုဝိဘင်္ဂ

ပုစ္ဆာ – အဘိဓမ္မပိဋကေ အာဝုသော ဝိဘင်္ဂပ္ပကရဏေ သတ္တရသမော ခုဒ္ဒကဝတ္ထုဝိဘင်္ဂေါ ဘဂဝတာ ကထံ ဒေသိတော.

ဝိဿဇ္ဇနာ – အဘိဓမ္မပိဋကေ ဘန္တေ ဒုတိယေ ဝိဘင်္ဂပ္ပကရဏေ သတ္တရသမော ခုဒ္ဒကဝတ္ထုဝိဘင်္ဂေါ ‘‘ဇာတိမဒေါ၊ ဂေါတ္တမဒေါ၊ အာရောဂျမဒေါ၊ ယောဗ္ဗနမဒေါ၊ ဇီဝိတမဒေါ’’တိ ဧဝမာဒိနာ ဧကကတော ပဋ္ဌာယ ယာဝ အဋ္ဌသတတဏှာဝိစရိတံ ဘဂဝတာ ဝိတ္ထာရတော ဝိဘဇိတွာ ဒေသိတော.

ဓမ္မဟဒယဝိဘင်္ဂ

ပုစ္ဆာ – တတ္ထ အာဝုသော အဋ္ဌာရသမော ဓမ္မဟဒယဝိဘင်္ဂေါ ဘဂဝတာ ကထံ ဝိဘဇိတွာ ဒေသိတော.

ဝိဿဇ္ဇနာ – အဋ္ဌာရသမော ဘန္တေ ဓမ္မဟဒယဝိဘင်္ဂေါ ‘‘ကတိ ခန္ဓာ၊ ကတိ အာယတနာနိ၊ ကတိ ဓာတုယော၊ ကတိ သစ္စာနိ၊ ကတိ ဣန္ဒြိယာနိ၊ ကတိ ဟေတူ၊ ကတိ အာဟာရာ၊ ကတိ ဖဿာ၊ ကတိ ဝေဒနာ၊ ကတိ သညာ၊ ကတိ စေတနာ၊ ကတိ စိတ္တာနိ. ပဉ္စက္ခန္ဓာ၊ ဒွါဒသာယတနာနိ၊ အဋ္ဌာရသ ဓာတုယော၊ စတ္တာရိ သစ္စာနိ၊ ဗာဝီသတိန္ဒြိယာနိ၊ နဝ ဟေတူ၊ စတ္တာရော အာဟာရာ၊ သတ္တ ဖဿာ၊ သတ္တ ဝေဒနာ၊ သတ္တ သညာ၊ သတ္တ စေတနာ၊ သတ္တ စိတ္တာနီ’’တိ ဧဝမာဒိနာ သဗ္ဗသင်္ဂါဟကာဒီဟိ ဒသဟိ ဝါရေဟိ ဘဂဝတာ ဝိတ္ထာရေန ဝိဘဇိတွာ ဒေသိတော.

ပုစ္ဆာ – ကထဉ္စာဝုသော တတ္ထ ဘဂဝတာ ဥပ္ပါဒကကမ္မအာယုပ္ပမာဏဝါရော ဝိတ္ထာရေန ဝိဘဇိတွာ ဒေသိတော.

ဝိဿဇ္ဇနာ – ဒါနံ ဒတွာ သီလံ သမာဒိယိတွာ ဥပေါသထကမ္မံ ကတွာ ကတ္ထ ဥပပဇ္ဇန္တိ. ဒါနံ ဒတွာ၊ သီလံ သမာဒိယိတွာ ဥပေါသထကမ္မံ ကတွာ အပ္ပေကစ္စေ ခတ္တိယမဟာသာလာနံ သဟဗျတံ ဥပပဇ္ဇန္တိ၊ အပ္ပေကစ္စေ ဗြာဟ္မဏမဟာသာလာနံ၊ အပ္ပေကစ္စေ ဂဟပတိမဟာသာလာနံ၊ အပ္ပေကစ္စေ စာတုမဟာရာဇိကာနံ ဒေဝါနံ၊ အပ္ပေကစ္စေ တာဝတိံသာနံ ဒေဝါနံ၊ အပ္ပေကစ္စေ ယာမာနံ ဒေဝါနံ၊ အပ္ပေကစ္စေ တုသိတာနံ ဒေဝါနံ သဟဗျတံ ဥပပဇ္ဇန္တီတိ ဧဝမာဒိနာ ဘန္တေ တတ္ထ ဘဂဝတာ ဥပ္ပါဒကကမ္မအာယုပ္ပမာဏဝါရော ဝိတ္ထာရေန ဝိဘဇိတွာ ဒေသိတော.

ဥက္ခိတ္တာ ပုညတေဇေန၊ ကာမရူပဂတိံ ဂတာ၊

ဘဝဂ္ဂတမ္ပိ သမ္ပတ္တာ၊ ပုနာဂစ္ဆန္တိ ဒုဂ္ဂတိံ –

ဓာတုကထာ

ပုစ္ဆာ – တေနာဝုသော ဘဂဝတာ အဋ္ဌာရသဟိ ဗုဒ္ဓဓမ္မေဟိ သမန္နာဂတေန အဘိဓမ္မေ အဋ္ဌာရသဟိ ဝိဘင်္ဂေဟိ ပဋိမဏ္ဍိတံ ဒုတိယံ ဝိဘင်္ဂပ္ပကရဏံ ဒေသေတွာ တဒနန္တရံ ဓာတုကထံ နာမ တတိယံ ပကရဏံ ကထံ ဝိဘဇိတွာ ဒေသိတံ.

ဝိဿဇ္ဇနာ – တတိယံ ဘန္တေ ဓာတုကထံ နာမ အဘိဓမ္မပိဋကံ ‘‘သင်္ဂဟော အသင်္ဂဟော၊ သင်္ဂဟိတေန အသင်္ဂဟိတံ၊ အသင်္ဂဟိတေန သင်္ဂဟိတံ၊ သင်္ဂဟိတေန သင်္ဂဟိတံ၊ အသင်္ဂဟိတေန အသင်္ဂဟိတံ. သမ္ပယောဂေါ ဝိပ္ပယောဂေါ၊ သမ္ပယုတ္တေန ဝိပ္ပယုတ္တံ၊ ဝိပ္ပယုတ္တေန သမ္ပယုတ္တံ၊ သမ္ပယုတ္တေန သမ္ပယုတ္တံ၊ ဝိပ္ပယုတ္တေန ဝိပ္ပယုတ္တံ. သင်္ဂဟိတေန သမ္ပယုတ္တံ ဝိပ္ပယုတ္တံ၊ သမ္ပယုတ္တေန သင်္ဂဟိတံ အသင်္ဂဟိတံ၊ အသင်္ဂဟိတေန သမ္ပယုတ္တံ ဝိပ္ပယုတ္တံ၊ ဝိပ္ပယုတ္တေန သင်္ဂဟိတံ အသင်္ဂဟိတ’’န္တိ ဧဝမာဒိနာ ပဉ္စ မာတိကာယော ပဌမံ နိက္ခိပိတွာ သင်္ဂဟာသင်္ဂဟာဒီဟိ စုဒ္ဒသဟိ နယေဟိ ဘဂဝတာ ဝိတ္ထာရတော ဝိဘဇိတွာ ဒေသိတံ.

ပုဂ္ဂလပညတ္တိ

ပုစ္ဆာ – တေနာဝုသော ဘဂဝတာ သဗ္ဗဓာတုကုသလေန အဘိဓမ္မပိဋကေ တတိယံ ဓာတုကထာပကရဏံ ဒေသေတွာ တဒနန္တရံ စတုတ္ထံ ပုဂ္ဂလပညတ္တိပ္ပကရဏံ ကထံ ဝိဘဇိတွာ ဒေသိတံ.

ဝိဿဇ္ဇနာ – အဘိဓမ္မပိဋကေ ဘန္တေ စတုတ္ထံ ပုဂ္ဂလပညတ္တိပ္ပကရဏံ ‘‘ဆ ပညတ္တိယော ခန္ဓပညတ္တိ အာယတနပညတ္တိ ဓာတုပညတ္တိ သစ္စပညတ္တိ ဣန္ဒြိယပညတ္တိ ပုဂ္ဂလပညတ္တိ. ကိတ္တာဝတာ ခန္ဓာနံ ခန္ဓပညတ္တိ၊ ယာဝတာ ပဉ္စက္ခန္ဓာ၊ ရူပက္ခန္ဓော ဝေဒနာက္ခန္ဓော သညာက္ခန္ဓော သင်္ခါရက္ခန္ဓော ဝိညာဏက္ခန္ဓော. ဧတ္တာဝတာ ခန္ဓာနံ ခန္ဓပညတ္တီ’’တိ ဧဝမာဒိနာ ခန္ဓာယတနဓာတုသစ္စဣန္ဒြိယပညတ္တိယော သံခိတ္တေန ဥဒ္ဒိသိတွာ ပုဂ္ဂလပညတ္တိံ စ ဧကကဒုကတိကစတုက္ကပဉ္စကဆက္ကသတ္တကအဋ္ဌကနဝကဒသကဝသေန ဝိတ္ထာရတော ဝိဘဇိတွာ ဘဂဝတာ ဒေသိတာ.

ကထာဝတ္ထု

ပုစ္ဆာ – တေနာဝုသော ဘဂဝတာ သဗ္ဗပရမတ္ထပညတ္တိဓမ္မကုသလေန အဘိဓမ္မပိဋကေ စတုတ္ထံ ပုဂ္ဂလပညတ္တိပ္ပကရဏံ ဒေသေတွာ တဒနန္တရံ ပဉ္စမံ ကထာဝတ္ထုပ္ပကရဏံ ကထံ ဒေသိတံ.

ဝိဿဇ္ဇနာ – သဗ္ဗပရမတ္ထပညတ္တိဓမ္မကုသလေန ဘန္တေ ဘဂဝတာ လောကေ အဂ္ဂပုဂ္ဂလေန အဘိဓမ္မပိဋကေ စတုတ္ထံ ပုဂ္ဂလပညတ္တိပ္ပကရဏံ ဒေသေတွာ တဒနန္တရံ ကထာဝတ္ထုဒေသနာယ ဝါရေ သမ္ပတ္တေ ‘‘အနာဂတေ မမ သာဝကော မောဂ္ဂလိပုတ္တတိဿတ္ထေရော နာမ ဥပ္ပန္နံ သာသနမလံ သောဓေတွာ တတိယသင်္ဂီတိံ ကရောန္တော ဘိက္ခုသံဃဿ မဇ္ဈေ နိသိန္နော သကဝါဒေ ပဉ္စ သုတ္တသတာနိ ပရဝါဒေ ပဉ္စာတိ သုတ္တသဟဿံ သမောဓာနေတွာ၊ ဣမံ ပကရဏံ ဘာဇေဿတီ’’တိ တဿောကာသံ ကရောန္တေန ပုဂ္ဂလဝါရေ အဋ္ဌမုခါ ဝါဒယုတ္တိံ အာဒိံ ကတွာ သဗ္ဗကထာမဂ္ဂေသု အသမ္ပုဏ္ဏဘာဏဝါရတ္ထာယ တန္တိယာ မာတိကာ နိက္ခေပမတ္တေန ပဉ္စမံ ကထာဝတ္ထုပ္ပကရဏံ သံခေပတော ဒေသိတံ.

ပုစ္ဆာ – အဓုနာ ပါကဋံ ပနာဝုသော ဝိတ္ထာရံ ကထာဝတ္ထုပ္ပကရဏံ ကဒါ ကေန ကတ္ထ ကထဉ္စ ဝိတ္ထာရတော ဝိဘဇိတွာ ဒေသိတံ.

ဝိဿဇ္ဇနာ – တံ ခေါ ဘန္တေ ဘဂဝတော နယမုခံ နိဿာယ အာယသ္မတာ မဟာမောဂ္ဂလိပုတ္တတိဿတ္ထေရေန တတိယသံဂီတိကာလေ ပါဋလိပုတ္တေ အသောကာရာမေ သဋ္ဌိဘိက္ခုသတသဟဿာနံ သမာဂမေ ဘဂဝတာ ဒိန္နနယဝသေန တထာဂတေန ဌပိတမာတိကံ ဝိဘဇန္တေန သကဝါဒေ ပဉ္စသုတ္တသတာနိ ပရဝါဒေ ပဉ္စာတိ သုတ္တသဟဿံ အာဟရိတွာ ဣဒံ ပရဝါဒမထနံ အဓုနာ ပါကဋံ ကထာဝတ္ထုပ္ပကရဏံ ဝိတ္ထာရတော ဝိဘဇိတွာ ဒေသိတံ.

ပုစ္ဆာ – ကတိ အာဝုသော တတ္ထ ကထာယော တေန အာယသ္မတာ မဟာမောဂ္ဂလိပုတ္တတိဿတ္ထေရေန ဝိတ္ထာရတော ဝိဘဇိတွာ ကထိတာ.

ဝိဿဇ္ဇနာ – တတ္ထ ဘန္တေ ဝါစနာမဂ္ဂတော ဒွေ စ သတာနိ သတ္တဝီသတိ စ ကထာယော အာယသ္မတာ မဟာမောဂ္ဂလိပုတ္တတိဿတ္ထေရေန ဝိတ္ထာရတော ဝိဘဇိတွာ ကထိတာ.

ပုဂ္ဂလကထာ

ပုစ္ဆာ – ကထဉ္စာဝုသော တတ္ထ ပဌမာ ပုဂ္ဂလကထာ အာယသ္မတာ မဟာမောဂ္ဂလိပုတ္တတိဿတ္ထေရေန ဝိတ္ထာရတော ဝိဘဇိတွာ ကထိတာ.

ဝိဿဇ္ဇနာ – ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာတိ၊ အာမန္တာ. ယော သစ္စိကဋ္ဌော ပရမတ္ထော၊ တတော သော ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာတိ၊ န ဟေဝံ ဝတ္တဗ္ဗေ. အာဇာနာဟိ နိဂ္ဂဟံ ဟဉ္စိ ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေန၊ တေန ဝတ ရေ ဝတ္တဗ္ဗေ ‘‘ယော သစ္စိကဋ္ဌော ပရမတ္ထော၊ တတော သော ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာ’’တိ. ယံ တတ္ထ ဝဒေသိ ‘‘ဝတ္တဗ္ဗေ ခေါ ‘ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေန’၊ နော စ ဝတ္တဗ္ဗေ ‘ယော သစ္စိကဋ္ဌော ပရမတ္ထော၊ တတော သော ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာ’’တိ၊ မိစ္ဆာတိ ဧဝမာဒိနာ ဘန္တေ တတ္ထ ပဌမာ ပုဂ္ဂလကထာ ပဉ္စ ဘာဏဝါရမတ္တာယ တန္တိယာ အာယသ္မတာ မဟာမောဂ္ဂလိပုတ္တတိဿတ္ထေရေန ဝိတ္ထာရတော ဝိဘဇိတွာ ကထိတာ.

အညာဏကထာ

ပုစ္ဆာ – အဘိဓမ္မပိဋကေ အာဝုသော ကထာဝတ္ထုပ္ပကရဏေ ဒုတိယဝဂ္ဂေ ဒုတိယာ အညာဏကထာ အာယသ္မတာ မဟာမောဂ္ဂလိပုတ္တတိဿတ္ထေရေန ကထံ ဝိတ္ထာရတော ဝိဘဇိတွာ ကထိတာ.

ဝိဿဇ္ဇနာ – အဘိဓမ္မပိဋကေ ဘန္တေ ပဉ္စမေ ကထာဝတ္ထုပ္ပကရဏေ ဒုတိယဝဂ္ဂေ ဒုတိယာ အညာဏကထာ ‘‘အတ္ထိ အရဟတော အညာဏန္တိ၊ အာမန္တာ. အတ္ထိ အရဟတော အဝိဇ္ဇာ အဝိဇ္ဇောဃော အဝိဇ္ဇာယောဂေါ အဝိဇ္ဇာနုသယော အဝိဇ္ဇာပရိယုဋ္ဌာနံ အဝိဇ္ဇာသံယောဇနံ အဝိဇ္ဇာနီဝရဏန္တိ၊ န ဟေဝံ ဝတ္တဗ္ဗေ. နတ္ထိ အရဟတော အဝိဇ္ဇာ အဝိဇ္ဇောဃော အဝိဇ္ဇာယောဂေါ အဝိဇ္ဇာနုသယော အဝိဇ္ဇာပရိယုဋ္ဌာနံ အဝိဇ္ဇာသံယောဇနံ အဝိဇ္ဇာနိဝရဏန္တိ၊ အာမန္တာ. ဟဉ္စိ နတ္ထိ အရဟတော အဝိဇ္ဇာ အဝိဇ္ဇောဃော အဝိဇ္ဇာယောဂေါ အဝိဇ္ဇာနုသယော အဝိဇ္ဇာပရိယုဋ္ဌာနံ အဝိဇ္ဇာသံယောဇနံ အဝိဇ္ဇာနီဝရဏံ၊ နော စ ဝတ ရေ ဝတ္တဗ္ဗေ ‘‘အတ္ထိ အရဟတော အညာဏ’’န္တိ ဧဝမာဒိနာ အာယသ္မတာ မဟာမောဂ္ဂလိပုတ္တတိဿတ္ထေရေန ဝိတ္ထာရတော ဝိဘဇိတွာ ဘာသိတာ.

အသညကထာ

ပုစ္ဆာ – အဘိဓမ္မပိဋကေ အာဝုသော ပဉ္စမေ ကထာဝတ္ထုပ္ပကရဏေ တတိယဝဂ္ဂေ ဧကာဒသမာ အသညကထာ အာယသ္မတာ မဟာမောဂ္ဂလိပုတ္တတိဿတ္ထေရေန ကထံ ဝိတ္ထာရတော ဝိဘဇိတွာ ကထိတာ.

ဝိဿဇ္ဇနာ – အဘိဓမ္မပိဋကေ ဘန္တေ ပဉ္စမေ ကထာဝတ္ထုပ္ပကရဏေ တတိယဝဂ္ဂေ ဧကာဒသမာ အသညကထာ ‘‘အသညသတ္တေသု သညာ အတ္ထီတိ၊ အာမန္တာ. သညာဘဝေါ သညာဂတိ သညာသတ္တာဝါသော သညာသံသာရော သညာယောနိ သညတ္တဘာဝပဋိလာဘောတိ၊ န ဟေဝံ ဝတ္တဗ္ဗေ’’တိ ဧဝမာဒိနာ အာယသ္မတာ မဟာမောဂ္ဂလိပုတ္တတိဿတ္ထေရေန ဝိတ္ထာရတော ဝိဘဇိတွာ ကထိတာ.

အသညသတ္တေသု သညာ အတ္ထိ.

သညာဘဝေါ သညာဂတိ သညာသတ္တာဝါသော သညာသံသာရော သညာယောနိ သညတ္တဘာဝပဋိလာဘော.

န ဟေဝံ ဝတ္တဗ္ဗေ.

နနု အသညဘဝေါ အသညဂတိ အသညသတ္တာဝါသော အသညသံသာရော အသညယောနိ အသညတ္တဘာဝပဋိလာဘော.

ဟဉ္စိ အသညဘဝေါ အသညဂတိ အသညသတ္တာဝါသော အသညသံသာရော အသညယောနိ အသညတ္တဘာဝပဋိလာဘော၊ နော စ ဝတ ရေ ဝတ္တဗ္ဗေ အသညသတ္တေသု သညာ အတ္ထိ.

အသညသတ္တေသု သညာ အတ္ထိ.

ပဉ္စဝေါကာရဘဝေါ ဂတိ သတ္တာဝါသော သံသာရော ယောနိ အတ္တဘာဝပဋိလာဘော.

နနု ဧကဝေါကာရဘဝေါ ဂတိ သတ္တာဝါသော သံသာရော ယောနိ အတ္တဘာဝပဋိလာဘော.

ဟဉ္စိ ဧကဝေါကာရဘဝေါ ဂတိ သတ္တာဝါသော သံသာရော ယောနိ အတ္တဘာဝပဋိလာဘော၊ နော စ ဝတ ရေ ဝတ္တဗ္ဗေ အသညသတ္တေသု သညာ အတ္ထိ.

ဆဋ္ဌဝဂ္ဂ

ပထဝီဓာတုသနိဒဿနာတိအာဒိကထာ

ပုစ္ဆာ – ဆဋ္ဌဝဂ္ဂေ ပန အာဝုသော အဋ္ဌမာ ပထဝီဓာတု သနိဒဿနာတိအာဒိကထာ အာယသ္မတာ မဟာမောဂ္ဂလိပုတ္တတိဿတ္ထေရေန ကထံ ဝိတ္ထာရတော ဝိဘဇိတွာ ကထိတာ.

ဝိဿဇ္ဇနာ – ဆဋ္ဌဝဂ္ဂေ ဘန္တေ အဋ္ဌမာ ပထဝီဓာတု သနိဒဿနာတိအာဒိကထာ ‘‘ပထဝီဓာတု သနိဒဿနာတိ အာမန္တာ. ရူပံ ရူပါယတနံ ရူပဓာတု နီလံ ပီတကံ လောဟိတကံ ဩဒါတံ စက္ခုဝိညေယျံ စက္ခုသ္မိံ ပဋိဟညတိ စက္ခုဿ အာပါထံ အာဂစ္ဆတီတိ၊ န ဟေဝံ ဝတ္တဗ္ဗေ’’တိ ဧဝမာဒိနာ အာယသ္မတာ မဟာမောဂ္ဂလိ ပုတ္တတိဿတ္ထေရေန ဝိတ္ထာရတော ဝိဘဇိတွာ ကထိတာ.

ပထဝီဓာတု သနိဒဿနာ.

စက္ခုဉ္စ ပဋိစ္စ ပထဝီဓာတုဉ္စ ဥပ္ပဇ္ဇတိ စက္ခုဝိညာဏံ.

တေန ဟိ န ဝတ္တဗ္ဗံ စက္ခုဉ္စ ပဋိစ္စ ပထဝီဓာတုဉ္စ ဥပ္ပဇ္ဇတိ စက္ခုဝိညာဏံ.

အန္တရာဘဝကထာ

ပုစ္ဆာ – အဘိဓမ္မပိဋကေ အာဝုသော ပဉ္စမေ ကထာဝတ္ထုပ္ပကရဏေ အဋ္ဌမဝဂ္ဂေ ဒုတိယာ အန္တရာဘဝကထာ အာယသ္မတာ မဟာမောဂ္ဂလိပုတ္တတိဿတ္ထေရေန ကထံ ဝိတ္ထာရတော ဝိဘဇိတွာ ကထိတာ.

ဝိဿဇ္ဇနာ – အဘိဓမ္မပိဋကေ ဘန္တေ ပဉ္စမေ ကထာဝတ္ထုပ္ပကရဏေ အဋ္ဌမဝဂ္ဂေ ဒုတိယာ အန္တရာဘဝကထာ ‘‘အတ္ထိ အန္တရာဘဝေါတိ၊ အာမန္တာ. ကာမဘဝေါတိ၊ န ဟေဝံ ဝတ္တဗ္ဗေ။ပေ။ အတ္ထိ အန္တရာဘဝေါတိ၊ အာမန္တာ. ရူပဘဝေါတိ၊ န ဟေဝံ ဝတ္တဗ္ဗေ။ပေ။ အတ္ထိ အန္တရာဘဝေါတိ၊ အာမန္တာ. အရူပဘဝေါတိ၊ န ဟေဝံ ဝတ္တဗ္ဗေ’’တိ ဧဝမာဒိနာ အာယသ္မတာ မဟာမောဂ္ဂလိပုတ္တတိဿတ္ထေရေန ဝိတ္ထာရတော ဝိဘဇိတွာ ကထိတာ.

အတ္ထိ အန္တရာဘဝေါ.

န ဟေဝံ ဝတ္တဗ္ဗေ.