၆၆. တဿ ဝိကာရာဝယဝေသု ဏ+ဏိက+ဏေယျ+မယာ

ပကတိယာ ဥတ္တရ+မဝတ္ထန္တရံ ဝိကာရော. ဆဋ္ဌိယန္တာ နာမသ္မာ ဝိကာရေ+ဝယဝေ စ ဏာဒယော ဟောန္တိ ဗဟုလံ. ဏ-အယသော ဝိကာရော အာယသံ ဗန္ဓနံ၊ သကာဂမော. ဥဒုမ္ဗရဿ အဝယဝေါ ဝိကာရော ဝါ ဩဒုမ္ဗရံ ဘသ္မံ ပဏ္ဏံ ဝါ. ကာပေါတံ မံသံ သတ္တိ ဝါ. ဏိက-ကပ္ပါသဿ ဝိကာရော ကပ္ပါသိကံ ဝတ္ထံ. ဏေယျ-ဧဏိဿ ဝိကာရော+ဝယဝေါ ဝါ ဧဏေယျံ. ကောသာနံ ဝိကာရော ကောသေယျံ ဝတ္ထံ. မယ-တိဏာနံ ဝိကာရော တိဏမယံ၊ ဒါရုမယံ၊ နဠမယံ၊ မတ္တိကာမယံ၊ သုဝဏ္ဏမယော ရထော၊ ရူပိယမယံ. ‘‘အညသ္မိံ’’တိ မယော၊ ဂုန္နံ ကရီသံ ဂေါမယံ.