၅၉. တဿ ဘာဝကမ္မေသုတ္တ+တာ+တ္တန+ဏျ+ဏေယျ+ဏိ+ယ+ဏိယာ

ဆဋ္ဌိယန္တာ ဘာဝေ ကမ္မေ စ တ္တာဒယော ဟောန္တိ ဗဟုလံ. န သဗ္ဗေ ပစ္စယာ သဗ္ဗတော ဟောန္တိ အညတြတ္တ+တာဟိ. ဘဝန္တိ ဧတသ္မာ ဗုဒ္ဓိသဒ္ဒါတိ ဘာဝေါ သဒ္ဒပဝတ္တိနိမိတ္တံ. ဝုတ္တဉ္စ –

ဟောန္တျ+သ္မာ သဒ္ဒဗုဒ္ဓီတိ၊ ဘာဝေါ တံ သဒ္ဒဝုတ္တိယာ၊

နိမိတ္တဘူတံ နာမဉ္စ၊ ဇာတိ ဒဗ္ဗံ ကြိယာ ဂုဏောတိ.

နီလဿ ပဋဿ ဘာဝေါ နီလတ္တံ နီလတာတိ ဂုဏော ဘာဝေါ. ဧတ္ထ နီလဂုဏဝသေန ပဋေ နီလသဒ္ဒဿ ဝုတ္တိယာ ပဋဗုဒ္ဓိယာ နိမိတ္တံ ဘာဝေါ နာမ. နီလဿ ဂုဏဿ ဘာဝေါ နီလတ္တံ နီလတာတိ နီလဂုဏဇာတိ၊ ဧတ္ထ နီလဂုဏဇာတိ နိမိတ္တံ ဟုတွာ နီလသဒ္ဒဿ ဂုဏဝုတ္တိယာ နီလဂုဏဇာတိ နိမိတ္တံ. ဂေါတ္တံ ဂေါတာတိ ဂေါဇာတိ၊ ဧတ္ထ ဇာတိသဒ္ဒါနံ ဒဗ္ဗဝုတ္တိယာ သတိ ဇာတိ နိမိတ္တံ. ပါစကဿ ဘာဝေါ ပါစကတ္တံတိ ကြိယာသမ္ဗန္ဓိတ္တံ ဘာဝေါ၊ ဧတ္ထ ပစနကြိယာသမ္ဗန္ဓိတ္တံ ဘာဝေါ. ဒဏ္ဍိတ္တံ ဝိသာဏိတ္တံ ရာဇပုရိသတ္တံတိ ဒဏ္ဍ+ဝိသာဏ+ရာဇဒဗ္ဗာနံ သမ္ဗန္ဓိတ္တံ ဘာဝေါ၊ ဒဏ္ဍီတျာဒိသဒ္ဒပဝတ္တိယာ နိမိတ္တတ္တာ.

ဒေဝဒတ္တဿ ဘာဝေါ ဒေဝဒတ္တတ္တံ၊ စန္ဒတ္တံ၊ သူရိယတ္တံတိ တဒဝတ္ထာ ဝိသေသသာမညံ၊ ဒေဝဒတ္တဿ ဗာလတာဒိအဝတ္ထာဘေဒေါ၊ စန္ဒဿ ကလာဒိအဝတ္ထဘေဒေါ စ၊ သူရိယဿ မန္ဒပဋုတာဒိအဝတ္ထာဘေဒေါ စ သာမညံ၊ တဒေတ္ထ နိမိတ္တံ. ဧတ္ထ ဝိဇ္ဇမာနပဒတ္ထာနံ ဝိသယဘူတသညာသဒ္ဒါနံ ပဝတ္တိနိမိတ္တံ ဝုတ္တံ. အာကာသတ္တံ အဘာဝတ္တံတိ၊ တတ္ထ ဃဋာကာသ+ပီဌရာကာသ၊ ပဋာဘာဝ+ဃဋာဘာဝါဒိနာ ဥပစရိတဘေဒသာမညံ ဘာဝေါ.

တ္တန-ပုထုဇ္ဇနတ္တနံ. ဝေဒနာယ ဘာဝေါ ဝေဒနတ္တနံ၊ ရဿော. ဧဝံ ဇာယတ္တနံ၊ ဇာရတ္တနံ.

ဏျ-အလသဿ ဘာဝေါ ကမ္မံ ဝါ အာလသျံ၊ ဧတ္ထ ‘‘လောပေါ+ဝဏ္ဏိ+ဝဏ္ဏာနံ’’တိ အ-လောပေ ‘‘သရာန+မာဒိဿာ’’ဒိနာ အာကာရော၊ ဧဝ+မုပရိ စ. ဗြာဟ္မဏဿ ဘာဝေါ ဗြဟ္မညံ၊ ညကာရပုဗ္ဗရူပါနိ. စာပလျံ၊ နေပုညံ၊ ပေသုညံ၊ ရညော ဘာဝေါ ရဇ္ဇံ၊ အာဓိပစ္စံ၊ ဒါယဇ္ဇံ၊ ဝေသမ္မံ၊ ဝေသမံ၊ ဏပစ္စယော. သခိနော ဘာဝေါ သချံ၊ ဝါဏိဇ္ဇံ၊ အာရောဂျံ၊ ဩဒဂျံ၊ အာနဏျံ၊ ဒုဗ္ဗလျံ၊ ဗလျံ၊ ပဏ္ဍိစ္စံ၊ ဗာဟုဿစ္စံ၊ ပေါရောဟိစ္စံ. မုဋ္ဌဿတိဿ ဘာဝေါ မုဋ္ဌဿစ္စံ၊ ဣလောပေါ. ကောသလ္လံ၊ ဝေပုလ္လံ. သမာနဿ ဘာဝေါ သာမညံ၊ ပေရိဿံ၊ သောမနဿံ၊ ဒေါမနဿံ၊ သောဝစဿံ၊ ဒေါဝစဿံ၊ နိပကဿ ဘာဝေါ နေပက္ကံ၊ အာဓိက္ကံ၊ ဒုဘဂဿ ဘာဝေါ ဒေါဘဂ္ဂံ၊ သရူပဿ ဘာဝေါ သာရုပ္ပံ၊ ဩပမ္မံ၊ သောခုမ္မံ၊ တထဿ ဘာဝေါ တစ္ဆံ. ဒုမ္မေဓဿ ဘာဝေါ ဒုမ္မေဇ္ဈံ. ဘေသဇဿ ဘာဝေါ ဘေသဇ္ဇံ၊ ဗျာဝဋဿ ကမ္မံ ဝေယျာဝစ္စံ ယထာ ဝေယျာကရဏံ.

ဏေယျ-သုစိနော ဘာဝေါ သောစေယျံ၊ အာဓိပတေယျံ၊ ကပိဿ ဘာဝေါ ကာပေယျံ. သဌဿ ဘာဝေါ ကမ္မံ ဝါ သာဌေယျံ.

ဏ-ဂရူနံ ဘာဝေါ ဂါရဝံ၊ ဥ အဝင. ပါဋဝံ၊ အဇ္ဇဝံ၊ မဒ္ဒဝံ၊ ‘‘ကောသဇ္ဇာ’’ဒိနာ ဥဿ အတ္တံ ဒွိတ္တဉ္စ. ပရမာနံ ဘာဝေါ ပါရမီ၊ ဝီပစ္စယော. သမဂ္ဂါနံ ဘာဝေါ သာမဂ္ဂီ.

ဣယ-အဓိပတိနော ဘာဝေါ အဓိပတိယံ၊ ပဏ္ဍိတိယံ၊ ဗဟုဿုတိယံ၊ နဂ္ဂိယံ၊ သူရိယံ.

ဏိယ-အလသဿ ဘာဝေါ ကမ္မံ ဝါ အာလသိယံ၊ တာလုသိယံ၊ မန္ဒိယံ၊ ဒက္ခိယံ၊ ပေါရောဟိတိယံ၊ ဝေယျတ္တိယံ.

ကထံ ရာမဏီယကံတိ၊ သကတ္ထေ ကန္တာ ဏေန သိဒ္ဓါ. ကမ္မံ=ကြိယာ၊ တတ္ထ အလသဿ ကမ္မံ အလသတ္တံ အလသတာ အလသတ္တနံ အာလသျံ အာလသိယံ ဝါ.